Read idege ỊMAKỊ 13 Bible Online

ỊMAKỊ 13 - idege bible

ỊMAKỊ 13

¹Ụka ká iJisọsị gba kpehe bwu ube ịgọgọ ọtụka nya Ohe Oluhye nya ala iJuu kọ juwa jẹ rụ, ọngọhẹ lẹpwụ nya angịjụgbẹyị nyamwụ byoo yẹkẹẹ, “Ayịbahị, chẹhị kaka yẹ jaabwọ kị kpa ajwọ ịlẹbyẹbyị nwụ́ ebe ịnyịịla-ịnyịịla ịlaanyị lalẹẹ, wẹẹ!”

²IJisọsị wẹ byoo yẹkẹẹ, “Ee, anụ tị́ yẹ ebe ịnyịịla ịwẹ lẹ. Ma, nya ịlẹhị-ịlẹhị, m byinu yẹkẹẹ, ụka juwa warị ká ẹjwọ ọhẹ-lọhẹ ọlẹ kị kpa me ebe ịwẹ á ka hi nụwa u-uhye nya ẹjwọ ọkịla kpong-kpong kaka. Chajị ị ka tụrụ ẹpwang ịwẹ wuu ju eji gbanggbang ị-ịlahị.”

³Ụka ká iJisọsị kele kaka hụhụ ụ-ụwa u-uhye nya Ọgbọdọ Olivu ọlẹ kọ pwoku ube ịgọgọ ọtụka nya Ohe Oluhye nya ala iJuu kpakpakpa, iPita, iJemsi, ịJọn bala Andụrụ anyị kele kaka tọọ ịtọ ọhẹ ụ-ụwa ị-ịbaa-ịbaa yẹkẹẹ,

⁴“Ọngọlahị, chuchuu, ya jehi wẹẹ. Ụka oyina kpangga, ịngịịwẹ wuu a tị́ ka họ jịra? Ịịyẹ a tị́ ka ri ang o-ju ẹjẹẹ ọlẹ kahị ka kpa jẹ́ ụka ọlẹ ká ịngịịwẹ wuu ka họ jịra datị?”

⁵IJisọsị wẹ byaa yẹkẹẹ, “Anụ́-ụ kpahị ju ịlọnụ ọgwọgụ, chajị ká ọngọngọhẹ a hụnụ ahị koo!

⁶Chajị ụka juwa warị ị-ịlahị ká angịhyẹ lụmẹ-lụmẹ ka warị la ẹnyị nyam kaka byi angịnyị ehe yẹkẹẹ, ịwa ayịdang kpakpakpa nyaa ri ịKịrayịsị ọọwa lẹlẹ. Ọọwa lẹ, ị ka hụ iru nya angịnyị lụmẹ-lụmẹ ahị ịnyịlẹhị lẹlẹ.

⁷Ụka ọọwa, anụ ayịdang ka juwa kpa ụrụ nyanụ wo anụ nya ẹwụ ọdada ọlẹ kọ junu chwẹẹ bala ọ-ka juwa wo oja nya ẹwụ ọdada ọlẹga ọlụrụ la datị-datị ịnyịnyị. Ma, anụ tị juwa gu ugbodu ene lụka ọlịnyị kpong-kpong ka. Ọ ri nya ịlẹhị, ang ịlịịwẹ wuu ka ji pyii lẹ! Ma, ụka nya ọmyịmyị nya odehe ọlẹ ayịdang kpangga á tị ka pwụ eji lụka ọọwa lẹka.

⁸Ụka ọọwa, alepwoja ọhẹ ka wuleji juwa dẹwụ tụ alepwoja ọkịla pyịpyị. Alịpyị adịrahụ ọhẹ ka wuleji tụ alịpyị adịrahụ ọkịla pyịpyị ịnyịnyị. Ọpyị ọ-hụ́ jigi-jigi ka ji ụ-ụwa ẹ-ẹga la datị-datị. Imyi nya uhi ọtụka-ọtụka ka nwụ ju ka ẹga la datị-datị ịnyịnyị. Ma, ịngịịwẹ wuu ka ri ọmwụ ọdada nya ang ọjụjụ. Chajị, ị ka lala ụka ọlẹ ká ang nya ọnyị ọmama kaa yi ọnyang ọlẹnyị iwe lụka ọlẹ kọ juwa ka ma ọnyị.”

⁹“Anụ kpahị ju ịlọnụ ọgwọgụ. Chajị ụka juwa warị kị ka wunu, juwa kpanụ kele ka ịkọtụ nya eje. Ị ka waanụ egbiji e-ebe ị-mẹ ẹla nya Ohe Oluhye jẹ nya ala iJuu ịnyịnyị. Ị ka kpanụ kaka godayị rịrị ị-ịlahị nya ịgọvụnọ bala ịdịrịhụ datị-datị wuu ịnyịnyị chajị nyọlẹ kanụ myị lam. Ụ-ụwa, anụ ayịdang ka ri alibeenu nyam, ka juwa ya ẹrụ ọnyịịla ọlẹ pyẹ ị-ịlahị nya alegbeju ịịwa wuu.

¹⁰Ị ka kpa ẹrụ ọnyịịla ọlẹ ya pyẹ ju ka epwoja myị́ epwoja wuu pyii, ene ká ọbaba nya odehe ọlẹ ka pwụ.

¹¹Ụka kị wunu kpa kele ka ịkọtụ, juwa lanụ eje ọọwa, anụ chị uko nya ẹla ọlẹ kanụ ka wẹ ụka ọọwa lee jaabwọ kanụ ka bwu wẹ ẹla ụ-ụwa ka. Ma, egbe nya ala ịlẹ ká Ohe Oluhye ayịdang ka hu junu ọ-ọnụụka ọọwa, anụ ka ya dodehe lẹ. Chajị aanụ ayịdang a ka juwa ya ẹla ọọwa la ịlọnụ ka. Ma, Olegu Ịgọgọ a ka kpanụ ya ẹla ọọwa ụka ọọwa lẹlẹ.

¹²Ụka juwa warị ká anyị nya ọnyang ookpokpo bwu ẹpwụ ka juwa pịrị awụlẹ ha ka ẹpwụtụbwọ nya igu. Ụka ọọwa, adịda ka pịrị ọnyị nyamwụ ha kele ka ẹpwụ nya igu ịnyịnyị. Anyị ayịdang ka wuleji juwa tụ ịnịna bala adịda nyaa pyịpyị gbee kị ka pịrị angị maa ma ịwẹ ha ju ka ẹpwụtụbwọ nya igu ịnyịnyị.

¹³Ụka ọọwa, anụ ka wụ angịnyị wuu ẹjẹ chajị nyọlẹ kanụ myị la ẹnyị nyam. Ma, ọng myị́ ọng ọlẹ kọ ka kpa ugbodu ojuju nyamwụ pwụ ọbaba aalẹ, ọng ọọwa a ka wu ọchịda nyamwụ ọyị lụka ohyẹẹkpẹ lẹlẹ.”

¹⁴IJisọsị myịmyị byi angịjụgbẹyị nyamwụ yẹkẹẹ, “Ụka ọọwa, anụ ka chẹhị kaka yẹ ukpeku ọ-chị ịgọgọ ọlala ịrị ị-ịlahị nya Ohe Oluhye kọ kaka godayị rịrị ẹ-ẹga ọlẹ kọ chịla kaka. Ọngọlẹ kọ wa ẹla ọlẹ lẹ aalẹ, ọngọọwa a wo myịmyị mẹ oo! Ụka kanụ yẹ ịnyị lẹ aalẹ, angịlẹ wuu kị juwa i-iJudiya a rụnyẹ rụ kaka kpịbaa ẹ-ẹpwụ nya ịgbọdọ mẹ.

¹⁵Ụka ọọwa, ọng myị́ ọng ọlẹ kọ juwa u-uhye nya achịnawụ nya ube nyamwụ, a tụtụm myịmyị hireji bwu ụwa, juwa maga nyọka jụ ka ẹpwang nyamwụ kaka hu ịngịngịhyẹ bwu ụwa kpa rụ ene kaka.

¹⁶Lee, ọng ọlẹ kọ juwa ẹ-ẹrụ nyamwụ, ọ ka myịmyị-ị̀ rụnyẹ tịrẹkpẹ rụ kele ka ẹpwa kaka hu awụrụ ọlam-ọlam nyamwụ ọhẹ-lọhẹ ene kaka, ịnyịnyị.

¹⁷Ụka ọọwa, akama ọtụka-ọtụka ka juwa ha anyang ịlẹnyị bala anyang ị-kpa ẹmẹ ha anyị nyẹ, chajị, ị́ ka rụnyẹ hyaahyaa myị́ ka.

¹⁸Anụ́-ụ raabwọ bịlẹ Ohe Oluhye chajị kọ ka họ ká ụka ọọwa ka ri ụka nya alogo ọtụka-ọtụka ọlẹ kị wụrụ ‘iwinta’ kaka mẹ.

¹⁹Chajị, akama ọlẹnụtụrụ ọọwa ka ri akama ọtụka okpelego lụmẹ kpoye. Akama ọtụka ọlịnyị á ji bwu ọmwụ ọdada nya odehe ọlẹ ká Ohe Oluhye họ kpong-kpong ẹnẹnẹhẹ lẹka. Akama ọtụka ọlịnyị ọkịla á tị ka ji gụ ọwẹ kaka ịnyịnyị.

²⁰Ó-ri ajị nyọlẹ ká Ohe Oluhye ayịdang wẹẹ ka chị ụtụrụ ọọwa eku kpikpiri ka, ịnọ, ọngịnyị ehe ọhẹ-lọhẹ á ka hi chịda ụka ọọwa kpong-kpong myị́ kaka. Ma, ọ-chajị nya angịnyị nya Ohe Oluhye ịlam-ịlam ịlẹ kọọwa ayịdang chụchụ ene-ene, a du ká Ohe Oluhye wẹẹ ka chị ụka ọọwa eku hi kpikpiri lẹlẹ.”

²¹“Ụka ọọwa, ọng myị́ ọng ọlẹ kọ ka warị kaka byinu yẹkẹẹ, ịKịrayịsị nyị lalẹẹ, ẹ-ẹga ọlaanyị lee ịKịrayịsị nyị lẹẹ ẹ-ẹgẹlẹ aalẹ, anụ myị ju ọngọọwa kpong-kpong ka.

²²Chajị ụka ọọwa, iru nya ịKịrayịsị abala bala alọmwụ ịnịịkịla lụmẹ-lụmẹ ka ji. Angịịwa ka juwa họ iru nya ang o-ju ẹjẹẹ bala ụkụrwọ ẹbyẹbyị la datị-datị chajị nyọka hụ angịnyị ehe ahị. Ị dọmwụ ka maga nyọka hụ angịnyị nya Ohe Oluhye ịlam-ịlam ịlẹ kọ chụchụ ha ịlọmwụ ahị kpịlọ ịnyịnyị, ó-ri kọ ka chịkpẹẹ ịnọ,

²³anụ kpahị ju ịlọnụ ọgwọgụ mẹ, chajị, m ya jenu neeji ene lẹ!”

²⁴IJisọsị myịmyị byaa yẹkẹẹ, “Ụka ká akama ọtụka ọwẹ á chịpwụrụ kpá, ẹnụ oluhye-ọgba ka chị owu kpịlẹẹ. Ọya oluhye-ọgba ọwẹ á ka hụ́ la ẹnụtụrụ ọọwa kaka ịnyịnyị.

²⁵Ịdịchụ iluhye-ọgba ka chabwọ bwu uhye kaka mileji. Ụka ọọwa, ịngịrị myị́ ịngịrị iluhye-ọgba nya epwoohe wuu ka hụ́ jigi-jigi nya ịlẹhị-ịlẹhị ịnyịnyị.

²⁶Ọọwa lẹ, alodehe a ka chẹhị kaka yẹ Ọnyị nya ọngịnyị ehe ọlẹ kọ ka hi ehe bwu ẹpwụ nya egbamwụ juwa warị la ọngịrị bala ẹbyẹbyị ọtụka nyamwụ lẹlẹ.

²⁷Ụka ọọwa, ọwa ayịdang ka du alegu-ẹrụ nya Ohe Oluhye ẹrụ kele ka ịkịka ine nya odehe ọlẹ wuu ju ka ọbaba nya ohe bala eji, kị ka be ẹkọ wụrụ angịnyị nya Ohe Oluhye ịlam-ịlam ịlẹ wuu ká Ohe Oluhye chụchụ kaka jịra lẹlẹ.”

²⁸iJisọsị myịmyị byaa yẹkẹẹ, “Anụ jẹ́ ang bwu ẹga nya ọhịhị nya okoji ifigi mẹ. Ụka myị́ ụka kanụ yẹ ká abwọ nya okoji ifigi á juwa ju apwụ inyeewe jweejwee lẹ aalẹ, anụ jẹ́ mẹ. Ụka nya inehe juwa ju chwẹẹ lẹ!

²⁹Ịnyịnyị, ọ ka la ẹ-ẹga nya ang i-ju ẹjẹẹ ịwẹ wuu kam ya jenu lẹlẹ. Ụka myị́ ụka kanụ juwa yaa lẹ aalẹ, anụ jẹ́ mẹ. Am Ọnyị nya ọngịnyị ehe ayịdang godayị rịrị ọ-ọnụ ogirigba, juwa ka jụ warị wẹ odehe ọlẹ lẹ!

³⁰Nya ịlẹhị-ịlẹhị, m byinu yẹkẹẹ, aloyi ọlụka ọlẹ á ka chịpwụrụ kpá ene ká ịngịịwẹ wuu ka họ jịra kaka.

³¹Uhye-ọgba nya epwoohe bala odehe ọlẹ ka chịpwụrụ myị́. Ma, ẹla ọlọnụ nyam, am ayịdang, á tị ka chịpwụrụ kpá ẹnẹnẹhẹ kaka.”

³²IJisọsị myịmyị byi angịjụgbẹyị nyamwụ yẹkẹẹ, “Ma, ọngọngọhẹ á juwa kọ jẹ́ ẹnụtụrụ lee awa ọọwa kpangga, ọlẹ ká Ọnyị nya ọngịnyị ehe ka warị ka. Alegu ẹrụ nya Ohe Oluhye ilepwoohe á dọmwụ jẹ́ ka, tụ Ọnyẹwẹ nya Ohe Oluhye ayịdang ịnyịnyị. Kẹnẹ-kẹnẹ, Ohe Oluhye adịda ụbwọọmwụ a jẹ́ lẹlẹ.

³³Chajị nya ọọwa lẹ, anụ juwa gbeji giri-giri kanụ kpahị ju ọgwọgụ mẹ. Chajị anụ jẹ́ ụka ọlẹ ká ụka ọọwa ka ri kpangga ka.

³⁴Chajị ọwẹwẹ nya Ọnyị nya ọngịnyị ehe ọọwa ka lala ọnyị ọlẹng ọhẹ ọlẹ kọ hu ang nya ẹdịyẹ rụ kanyị ka ẹga ọlụrụ hi ẹpwa, kọ tụụbwọ hi ang-abwọ ịlẹpwa nyamwụ ju anchẹ nyamwụ ụ-ụbwọ. Ịnyị, ọ byi ọnchẹ ọnyị myị ọnyị yẹkẹẹ, nyị họ ụkụrwọ nyamwụ yẹẹyẹẹ gbe ọwa mẹ lẹlẹ.

³⁵Chajị nya ọọwa lẹ, anụ juwa gbeji ọgwọgụ giri-giri mẹ. Chajị, ánụ jẹ́ ụka ọlẹ ká ọngọ la ẹpwa ka nya kpangga datị ka. Ó-ri ụka nya ewobyi lee epwodu jijiji lee ụka nya ọwọọwọ ọ-da ịgbụ lee ụka nya ẹnụ okpehe kpụ la ụtụrụ, ánụ jẹ́ datị ka.

³⁶Chajị ó-ri kọ warị lụka ọ-mwaa, kọ ka wunu la une ọnọnọ kaka mẹ.

³⁷Ẹla ọlẹ kam wẹẹ ya tanụ lẹ, ẹla ọọwa, m juwa ya ta aluche nya angịnyị wuu lẹlẹ. Anụ juwa gbeji giri-giri ọgwọgụ mẹ!”