Read idege ỊMAKỊ 16 Bible Online

ỊMAKỊ 16 - idege bible

ỊMAKỊ 16

¹Ụka ká Ẹnụtụrụ Ọhịnyọ Lụkụrwọ nya ala iJuu chịpwụrụ kpá lẹ, iMeri ọla ịMagịdala bala ịSalomi bala iMeri ịnịna nya iJemsi a kele kaka ra ida ochoru kwọkwọ ịhyẹ, juwa kpa kele kị ka ya wụ ogu nya iJisọsị i-iworu lẹlẹ.

²Ịnyị, anyang ịwẹ a chahị la ụtụrụ gbegbegbe la ẹnụ nya ịchọọchị lẹ, ị kele ka iworu nya iJisọsị lụka ọlẹ ká ẹnụ juwa kpehe lẹlẹ.

³Ụka kị juwa jẹ kele lẹ, ị juwa tọ awụlẹ ịtọ yẹkẹẹ, “Oowo a tị́ ka rị ẹjwọ ọtụka ọlaanyị hi ọnụ nya iworu hahị kpá lẹ mẹ?”

⁴Ma, ụka kị jẹ ju iworu ọọwa chwẹẹ, kị hu ẹhị nyaa hwaa lẹ, ị chẹhị kele kaka yẹ jaabwọ ká ẹjwọ ọọwa rị hi ọnụ nya iworu dụwa dodo lẹlẹ. Ẹjwọ ọọwa ri ọtụka lụmẹ kaka kpoye.

⁵Ụka ká anyang ịwẹ jụ kele ka ẹpwụ nya iworu ọọwa, ị yẹ okolobya ọlẹng ọhẹ kọ kụrụ awụrụ onyoowuru ogbileji hụhụ koye upwuriri nya iworu ọọwa lẹ, ọ laa ịwa wuu uhi-uhi nya ịlẹhị-ịlẹhị lẹlẹ.

⁶Ịnyị, ọnyị ọlẹng ọọwa a byi anyang ịwẹ yẹkẹẹ, “Anụ juhi kaka. M jẹ́ kanụ juwa tịtọ nya iJisọsị ọla ịNasareti ọlẹ kị gu iloo ba okoji. Ma, ọ wuleji bwula igu lẹ. Ó jam ẹ-ẹgẹlẹ kaka. Anụ chẹhị kaka yẹ ẹga ọlẹ kị yọọ nọ ẹnụmwụ-ẹnụmwụ dalẹ hwoo mẹ.”

⁷Ọlẹng ọọwa myịmyị byaa yẹkẹẹ, “Anụ rụ kaka ya je angịjụgbẹyị nya iJisọsị bala iPita mẹ. Kanụ byaa ịwa wuu yẹkẹẹ, iJisọsị nyị juwa ji ịlahị nyaa rụ ka ịGalili lẹ. Ụ-ụwa, anụ ka yẹ iJisọsị jaabwọ kọọwa ayịdang byinu ene-ene lẹlẹ.”

⁸Ọọwa lẹ, anyang ịwẹ a rụ bwu iworu lụnyẹ-lụnyẹ la uhi ojuju bala ahịbwuu ọtụka-ọtụka ị-ịnyịrọ juwa kele ka ẹga nya angịjụgbẹyị nya iJisọsị lẹlẹ. Jaabwọ kị juwa juhi lụmẹ kaka kpoye lẹ, í ya ẹlẹlẹhẹ bwu ọnụ ta ọngọngọhẹ myị́ kpong-kpong ene kịị pwụ ẹpwa kaka. [

⁹Ụka ọlẹ ká iJisọsị wuleji bwula igu la ụtụrụ gbegbegbe ẹnụ nya ịchọọchị lẹ, iMeri ọla ịMagịdala a ri ọngịnyị nya ọgbanyẹ-ọgbanyẹ ọlẹ ká iJisọsị mẹ ịlọmwụ jẹ jene-jene lẹ. IMeri ọwẹ, iJisọsị a ku alegu inyibyi irwiye kpehe bwu ẹpwụ nyamwụ lẹ.

¹⁰Ọọwa lẹ, iMeri ọwẹ à kele kaka ya je angịjụgbẹyị nya iJisọsị, ụka kị juwa kpa ida je bala o-juwa bida nya ịlẹhị-ịlẹhị lẹlẹ.

¹¹Ma, ụka kọ ya jaa ya iJisọsị nyị juwa hịhị lẹ, ọwa nyị tị yọọ lẹhị nya ịlọwa lẹ lẹ, ị́ myị ẹlẹwẹ nyị ri nya ịlẹhị ka.

¹²Ụka ká ụka ọwẹ chịpwụrụ kpá, iJisọsị kpa abwụma ọkịla chị ịlọmwụ ehe ụ-ụgbẹyị mẹjẹ angịjụgbẹyị nyamwụ imiiye ịhyẹ ịlẹ kị juwa jẹ ka epweji ochiche ọhẹ.

¹³Ma, ụka ọlẹ ká angị imiiye ịịwa tịrẹkpẹ kele kaka ya je angịjụgbẹyị nya iJisọsị ihihi lẹ, angịjụgbẹyị ihihi ịịwa á myị yẹkẹẹ, ẹla ọọwa nyị ri nya ịlẹhị kpong-kpong ka.

¹⁴Ụka kọ nụwa ịnyịnyịịnyị, iJisọsị myịmyị chị ịlọmwụ ehe mẹjẹ angịjụgbẹyị nyamwụ angị iwo kụrụ ookpokpo ụka ọlẹ kị juwa kpa ang oriri ri. Ụ-ụwa, iJisọsị yalibyi laa nya ịlẹhị-ịlẹhị chajị nya ọmyịmyị ọlala-ka lụmẹ nyaa bala ọkịlẹtụ ọnyọọngịrị nyaa ọlẹ kọ du kị juwa da ịwẹẹ ju ibeenu oriri nya angịlẹ kị yẹ iJisọsị lahị-lahị ụka ọlẹ kọ wuleji bwula igu kpá.

¹⁵Ịnyị, iJisọsị a byaa yẹkẹẹ, “Anụ kele ka odehe wuu kaka ya ẹrụ ọnyịịla nyam ọlẹ je angịnyị ehe wuu mẹ.

¹⁶Ọng myị́ ọng ọlẹ kọ myị la ẹrụ ọnyịịla ọọwa kị hwọọ enyi Ohe aalẹ, ọngọọwa ka chịda. Ma, ọng myị́ ọng ọlẹ kọ myị la ẹrụ ọnyịịla ọọwa ka aalẹ, eje nya Ohe Oluhye ka wu ọngọọwa.

¹⁷Ang i-ju ẹjẹẹ nya ụkụrwọ ẹbyẹbyị ịhọhọ la datị-datị ịlẹ, ka juwa ta angịnyị nya Ohe Oluhye ịlẹ kị myị lam nya ịlẹhị-ịlẹhị. Angịịwa ka kpa ẹnyị nyam ku alegu inyibyi dodehe. Ị ka ye ọngịrị ọ-kpa ya ija ịkịla la datị-datị.

¹⁸Ó-ri ká angịịwa á go ilo ịnyẹẹgẹga go kpa ụ-ụbwọ aalẹ, ilo ịịwa á ka haa abwaabwọhẹ ka. Ó-ri ká angịịwa á kpa ẹhwa ọ-nwụ ọngịnyị nwụ kọnụ nyaa aalẹ, ẹhwa ọọwa á ka haa abwaabwọhẹ ka ịnyịnyị. Ụka kị yụbwọ nyaa nịra alẹdụrụ, kị raabwọ ha Ohe Oluhye chajị nyaa aalẹ, alẹdụrụ ịịwa ka la gogo.”

¹⁹Ụka ká Ọngọlahị iJisọsị ya ẹla ta angịjụgbẹyị nyamwụ kpá wuu lẹ, Ohe Oluhye a họ lẹ, iJisọsị a ka epwoohe lahị-lahị kele kaka hụhụ ụ-ụwa u-upwuriri nya Ohe Oluhye lẹlẹ.

²⁰Ịnyị lẹ, angịjụgbẹyị nya iJisọsị ịwẹ a juwa ya ẹrụ ọnyịịla ọwẹ pyẹ ju ka ẹga myị́ ẹga wuu lẹlẹ. Ụka ọọwa, Ọngọlahị ayịdang juwa họ ụkụrwọ ọọwa taa, juwa daa ụbwọ ẹ-ẹpwụ nya ụkụrwọ ẹbyẹbyị ọhọhọ la datị-datị ịnyịnyịịnyị, chajị ká angịnyị ka jẹ́ yẹkẹẹ, ẹrụ ọnyịịla ọọwa nyị ri nya ịlẹhị.]