Read idege ỊMAKỊ 2 Bible Online

ỊMAKỊ 2 - idege bible

ỊMAKỊ 2

¹Ụka ká ụtụrụ ịmanyị-ịmanyị chịpwụrụ kam lẹ, iJisọsị a mwẹẹkpẹ kele ka epweji nya ịKapẹnawụm lẹlẹ. Ọọwa lẹ, ị juwa kpa ya je angịnyị lụmẹ-lụmẹ yẹkẹẹ, iJisọsị nyị nya juwa ẹ-ẹpwa lẹlẹ.

²Ịnyị, iru nya angịnyị lụmẹ-lụmẹ a bwu ẹga myị́ ẹga kele kaka myị ube ọlẹ ká iJisọsị ji kpọng-kpọng, ju ka odehe-odehe lẹlẹ. Ọọwa lẹ, iJisọsị a juwa ya ẹla nya Ohe Oluhye ju angịịwa lẹlẹ.

³Ụka ọọwa, alẹng angị ine ịhyẹ juwa tịtọ kị ka kpa ọlẹng ọhẹ ọlẹ ká une nya ịnyịrọ nyamwụ gbu ba, kele ka ẹga nya iJisọsị.

⁴Ma, jaabwọ ká angịnyị myị ẹpwang ọọwa lụmẹ kaka kpoye lẹ, ịwa ayịdang á ye ẹgẹgẹhẹ bwu pwụ ẹga nya iJisọsị kpong-kpong ka. Ọọwa lẹ, ị kele kaka kpụ uhye nya achịnawụ nya ube ọọwa ọlẹ kọ la papịla lala isiling nya ube lẹlẹ. Ị chị achịnawụ ọọwa iwa lẹ, ị tụụbwọ hi ang ọ-da nọnọ nya ọlẹdụrụ ọọwa nya weji dọọọ bwula ori ọlẹ kị ya jwọọ, gbee kọ kaka neeji i-ijata nya iJisọsị la ọlẹdụrụ ọọwa ayịdang lẹlẹ.

⁵Ụka ká iJisọsị yẹ ọmyịmyị ọlala ọtụka nya angịịwa, ọ byi ọlẹng o-gbu ịnyịrọ ba ọọwa yẹkẹẹ, “Ọnyị nyam, m hịnyọhi ịhọbịrị nyang hang lẹ.”

⁶Ụka ọọwa, ịtịcha ị-mẹ ehile nya iMosisi jẹ ịhyẹ ịlẹ kị hụhụ ụ-ụwa, juwa nwụ ịlaa la ịtọ ọtọtọ yẹkẹẹ,

⁷“Anyị, a tị́ du ká ọngọlẹ jam ya ẹla ọlẹ kọ pyị ẹ-ẹga nya Ohe Oluhye ịnyị? Ọngịnyị ehe ọhẹ-lọhẹ jam kọ la ọngịrị ka hịnyọhi ịhọbịrị ịhọhọ nya angịnyị ehe ịkịla haa myị́, dala Ohe Oluhye ayịdang lẹ?”

⁸Ahyaahị, iJisọsị kpa olegu ọlẹpwụ nyamwụ jẹ́ irya ịbaa-ịbaa ọlẹpwụ nya ọkịlẹtụ nya angịwẹ. Ọọwa lẹ, ọ taa ịtọ yẹkẹẹ, “Ịịyẹ a tị́ du kanụ juwa tọ ịlọnụ ịtọ ọtịpyọ ọlịịwẹ ẹ-ẹpwụ nyanụ kpong-kpong?

⁹Anụ ya jem wẹẹ, ọ-ka byi ọnyị ọlẹng ọwẹ yẹkẹẹ, ‘M hịnyọhi ịhọbịrị nyang hang lẹ!’ Lee, ọ-ka byoo yẹkẹẹ, ‘Wuleji ká hu ang ọ-da nọnọ nyang ká jẹdịyẹ alẹ mẹ!’ Lẹ, oyina a tị́ ka chịkpẹẹ la oyaya gụ ọkịla?

¹⁰M jam ka họ ang o-ju ẹjẹẹ lẹẹlẹẹ, chajị kanụ ka jẹ́ yẹkẹẹ, Am Ọnyị nya ọngịnyị ehe ọlẹ nyị la ọngịrị nyọka hịnyọhi ịhọbịrị ịhọhọ nya angịnyị ehe haa ám odehe ọlẹ myị́ lẹ.” Ọọwa lẹ, ọ byi ọngọlẹ ká une nya ịnyịrọ nyamwụ gbu ba wẹ yẹkẹẹ,

¹¹“Ẹnwa ọlẹng, m bying yẹkẹẹ, wuleji godayị kọkọ lẹẹlẹẹ, ká hu ang ọ-da nọnọ nyang, ká rụ ka ẹpwa mẹ.”

¹²Ọọwa lẹ, ọngọ gbu une nya ịnyịrọ ba ọwẹ a wuleji ahyaahị lẹ, ọ hu ang ọ-da nọnọ nyamwụ, juwa jẹdịyẹ ị-ịlahị nyaa ịwa wuu lẹlẹ. Ụka ká iru nya angịnyị ịlẹ kị juwa yẹ ọngọwẹ kọ wuleji ịnyị lẹ, ọ laa ahịbwuu nya ịlẹhị-ịlẹhị. I juwa gwogbo ha Ohe Oluhye juwa byi awụlẹ yẹkẹẹ, “Am yẹ ẹla ọlịịlẹ jẹ́ ẹnẹnẹhẹ lẹka!”

¹³IJisọsị myịmyị tịrẹkpẹ kele ka ọnụụka nya Ihu ọkịlọlọ nya ịGalili. Iru nya angịnyị lụmẹ-lụmẹ kele kaka dagaga ju iJisọsị ụ-ụwa lẹ, ọ juwa mẹ ang jaa lẹlẹ.

¹⁴Ụka ká iJisọsị juwa jẹ kele kịlahị-ịlahị ịnyịnyịịnyị, ọ yẹ ọngọ ye okpoko nya ẹpwa ọnyẹnyẹ bwu ẹga nya angị ra ihi ọhẹ lẹlẹ. Ẹnyị nyamwụ ọhẹ ri iLivayị, ọkịla ri ịMatiyu. Ẹnyị nya adamwụ ri Alufiyọsị. Ụka ọọwa, iLivayị hụhụ ẹ-ẹga ọ-họ ụkụrwọ nyamwụ. IJisọsị byoo yẹkẹẹ, “ILivayị, wuleji ká bam jẹ mẹ.” Ọọwa lẹ, iLivayị a wuleji ahyaahị ba iJisọsị jẹ lẹlẹ.

¹⁵Ụka kọ nọ chẹẹ, iLivayị wụrụ iJisọsị ẹpwa kele kaka hụhụ juwa ri ang oriri. Ụka ọọwa, iru nya angị nyẹ angịnyị ẹpwa ịkịla lụmẹ-lụmẹ juwa ba iJisọsị jẹ bala alọhọbịrị ịlẹ ká angịnyị wa nya angị hi deeji. Iru nya angịhyẹ lụmẹ-lụmẹ lẹpwarịrị nyaa kele kaka hụhụ ta iJisọsị bala angịjụgbẹyị nyamwụ juwa ri ang oriri ẹ-ẹpwa nya iLivayị ịnyịnyị.

¹⁶Ụka ká ịtịcha ị-mẹ ehile nya iMosisi jẹ ịlẹpwụ nya ala ịFarịsii ịhyẹ yẹ iJisọsị kọ hụhụ ụ-ụwa juwa ri ang oriri ta alọhọbịrị i-hi deeji ịịwa bala angị nyẹ angịnyị ẹpwa ịwẹ lẹ, ị tọ angịjụgbẹyị nya iJisọsị ịtọ byaa yẹkẹẹ, “Ịịyẹ a tị́ du ká ayịbanụ juwa ri ang oriri ta angị nyẹ angịnyị ẹpwa bala alọhọbịrị i-hi deeji ịwẹ ịnyị?”

¹⁷Ụka ká iJisọsị wo ịtọ nyaa ọọwa, ọ wẹ byaa yẹkẹẹ, “Ube utoji ọkaka ka ẹga nya idongkita, á kaa baba ha angịlẹ wuu kị la ịnyịrọ ogogo ka! Kẹnẹ-kẹnẹ, angịlẹ ká ẹdụrụ á jụ ene lẹ, mẹ ịnyị. Aangịlẹ kị hu ịlaa nya alabwẹla ọnyịịla, m warị wẹ odehe ọlẹ kam ka wụrụ ka. Ma, chajị kam ka kpa alọhọbịrị nya tịrẹkpẹ warị wẹ ụgbẹyị nya irya ọyẹda ịnyị.”

¹⁸Ụka ọhẹ juwa ká angịjụgbẹyị nya ịJọn ọngọ hụ enyi Ohe bala ala ịFarịsii anyị juwa nọ limyi ha Ohe Oluhye jaabwọ kị kaa họ ene-ene. Ọọwa lẹ, angịhyẹ a kele kaka tọ iJisọsị ịtọ ọhẹ yẹkẹẹ, “Ayịbahị ịtịcha, ya jehi wẹẹ. Ịịyẹ a tị́ du ká angịjụgbẹyị nya ịJọn ọngọ hụ enyi Ohe bala angịjụgbẹyị nya ala ịFarịsii kaa nọ limyi ha Ohe Oluhye ịnyịnyịịnyị ká angịjụgbẹyị nyang ahụ á tị kaa nọ limyi ha Ohe Oluhye kpong-kpong ka ịnyị?”

¹⁹Ụka ọọwa, iJisọsị wẹ byaa yẹkẹẹ, “Anụ ya ká angịlẹ kị wụrụ ẹpwa kaka chị ọkẹkẹnị nya ahụ onyeewe oyeye ka kele ka ụwa kaka nọ limyi, lụka ọlẹ ká ọrụ-ahụ onyeewe ọọwa juwa taa? Ọ́ ka jẹ́-ẹ la ịnyị ka! Jaabwọ myị́ abwọ ká ọrụ-ahụ ọọwa á hụ tata taa kaka ba, ịwa ayịdang á ka jẹ́-ẹ hụwa limyi-limyi kpong-kpong kaka.

²⁰Ma, ụka tị juwa warị, kị ka kpa ọrụ-ahụ onyeewe ọọwa rụ hyaa. Ọọwa lẹ, angịịwa a ka jẹ́-ẹ juwa nọ limyi myị́ wẹẹ lẹ.”

²¹“Anụ wo mẹ! Ọngọngọhẹ á kaa kpa apwụ onyeewe ọlẹ kọ tịra ẹnẹnẹhẹ lẹka kaka pachị nya awụrụ onyogo nyamwụ ka. Ó-ri kị họ ịnyị aalẹ, apwụ onyeewe ọọwa ka gu onyogo ọwẹ ene, chọọ iwa dụwa gbam gụ olene-ene.

²²Ọngọngọhẹ á tị kaa hu ere onyeewe kpa kaka ju ẹpwụ nya ugu akwọ onyogo kpong-kpong ka ịnyịnyị. Ó-ri kị họ ịnyị, ere onyeewe ọlụwa ka họ ká ugu akwọ ọọwa ka hụla hi awụlẹ hwẹẹhwẹẹ. Ụka ọọwa, ere ọọwa ka yẹ hụrụ wuu, ene ká akwọ ọọwa ayịdang ka ri iyabwọ ịnyịnyị. Lẹ, ịkwọ inyeewe, ị kaa ya ju ere inyeewe ịnyịnyị lẹ.”

²³IJisọsị bala angịjụgbẹyị nyamwụ juwa chịpwụrụ bwu ẹrụ nya ang nya alubekee ị-lala ịrayịsị nya ọngọhẹ la Ẹnụtụrụ Ọhịnyọ Lụkụrwọ nya ala iJuu ọhẹ. Ụka ọọwa, imyi juwa nwụ angịjụgbẹyị nya iJisọsị lụmẹ. Ọọwa lẹ, ị juwa ya abwọ pwọ egbeju nya ịrayịsị ịwẹ pwọo ri ụ-ụwa lẹlẹ.

²⁴Ọọwa lẹ, ala ịFarịsii ịlẹ kị juwa a byi iJisọsị yẹkẹẹ, “Ayịbahị ịtịcha, a yẹ jaabwọ ká angịjụgbẹyị nyang ịwẹ wẹẹ bịrị ehile nya Ẹnụtụrụ Ọhịnyọ Lụkụrwọ nyahị kpong-kpong?”

²⁵Ụka ọọwa, iJisọsị wẹ byaa yẹkẹẹ, “O-ri anụ ayịdang á wa bwu ẹpwụ nya Ụpwụ Ịgọgọ ẹnẹnẹhẹ chajị nya ọhọhọ nya iDevidi ụka ọlẹ ká imyi juwa nwọọ bala angịnyị nyamwụ ẹnẹnẹhẹ kpong-kpong lẹka?

²⁶Chajị, ụka ọọwa lẹ, iDevidi kele ka ube ịgọgọ ọtụka nya Ohe Oluhye kaka hu ịkaa ọlẹ kị ya ha ọhaha ha Ohe Oluhye ri bala o-hwoo ha angịnyị nyamwụ ri ịnyịnyị. Ẹla ọọwa họ lụka ọlẹ ká Abiyata ri olegbeju ọgbahị nya angịkiliya nya Ohe Oluhye wuu. Ma, jaabwọ ká ehile nya Ohe Oluhye tị ya u-uhye nya ọọwa ri yẹkẹẹ, ọngọlẹ kọ ri ọngọkiliya nya Ohe Oluhye ụbwọọmwụ nyaa ka la ọngịrị ri ụma nya ịkaa ọlịnyị myị́ kem lẹ.”

²⁷IJisọsị ya ẹla ọlẹ tụ ẹla ọọwa ku yẹkẹẹ, “Ọngịnyị ehe ayịdang kpangga, Ohe Oluhye a họ Ẹnụtụrụ Ọhịnyọ Lụkụrwọ ha lẹ. Ohe Oluhye á họ ọngịnyị ehe chajị nya Ẹnụtụrụ Ọhịnyọ Lụkụrwọ kpong-kpong ka.

²⁸Am Ọnyị nya ọngịnyị ehe ọlẹ kpakpakpa a tị ri Ayịbaba nya Ẹnụtụrụ Ọhịnyọ Lụkụrwọ ọọwa ayịdang kpangga ịnyịnyị lẹ.”