Read idege ỊMAKỊ 3 Bible Online

ỊMAKỊ 3 - idege bible

ỊMAKỊ 3

¹IJisọsị myịmyị tịrẹkpẹ kele ka ube ọ-mẹ ẹla nya Ohe Oluhye jẹ nya ala iJuu. Ọ yẹ ọlẹng ọhẹ ọlẹ ká ụbwọ nyamwụ ọhẹ gbu ba ụ-ụwa.

²Ụka ọọwa, aluji nya iJisọsị ịhyẹ juwa kụ iJisọsị kụ kee, chajị kọ ri kọ họ ọlẹng ọwẹ uda la Ẹnụtụrụ Ọhịnyọ Lụkụrwọ lẹ, kị ka jẹ́-ẹ ye ang ọ-ya ẹta rịrị kpa chị ẹla ba iJisọsị u-uhye nyamwụ.

³Ụka ọọwa, iJisọsị be ẹkọ wụrụ ọlẹng o-gbu ụbwọ ba ọwẹ, byoo yẹkẹẹ, “Ẹnwa ọlẹng, kẹwẹ wẹ ẹgẹlẹ wẹẹ.”

⁴Ọọwa lẹ, iJisọsị a tọ angịwẹ ịtọ yẹkẹẹ, “Anụ ya jem wẹẹ! Oyina lẹpwụ nya ịngịịlẹ, ehile nya iMosisi a tị́ myị ọnụ hahị yẹkẹẹ, ahị nyị họ la Ẹnụtụrụ Ọhịnyọ Lụkụrwọ? Ang ọnyịịla ọhọhọ lee ang ọtịpyọ ọhọhọ tị́? Ọhịhị nya ọngịnyị ehe ọchịda lee ọngịnyị ehe ọnwụnwụ tị́?” Ma, ịwa wuu hu iJisọsị ujiji kpini-kpini, ị́ wọọ ẹlẹlẹhẹ bwu ọnụ nyaa ka.

⁵Ụka ọọwa, iJisọsị mwụụrụ yaa ịwa wuu dagaga jula agbama ẹ-ẹpwụ nyamwụ. Chajị ụka ọlẹ ká iJisọsị yẹ ọkịlẹtụ ọnyọọngịrị nyaa ọlẹ kọ juwa kpaa hwahị hi ẹla nya ịlẹhị ọjẹ́jẹ lẹ, ọ tọọ olujwo lụmẹ kaka kpoye. Ọọwa lẹ, iJisọsị a byi ọlẹng o-gbu ụbwọ ọhẹ ba ọwẹ yẹkẹẹ, “Nịra ụbwọ ọtịpyọ nyang ọwẹ kpaaa lẹẹlẹẹ mẹ, ẹnwa.” Ụka kọ nịra ụbwọ nyamwụ ọọwa kpaaa lẹ, ụbwọ ọọwa a la gogo hiigu-hiigu lẹlẹ.

⁶Ma, ala ịFarịsii ịlẹ kị juwa ụ-ụwa, rụ kpehe hi ube ọ-mẹ ẹla nya Ohe Oluhye jẹ nya ala iJuu ọwẹ ahyaahị kele kaka la ọjịra-jịra bala ala iJuu ịkịla ịlẹ kị ri angị ji ẹkpẹ nya iHerọdụ. Ọọwa lẹ, ị juwa me obyi jaabwọ kị ka bwu nwụ iJisọsị lẹlẹ.

⁷IJisọsị bala angịjụgbẹyị nyamwụ rụ kpehe bwu ẹgẹwẹ kele ka Ihu ọkịlọlọ nya ịGalili. Ọọwa lẹ, iru nya angịnyị lụmẹ-lụmẹ a bọọ kele lẹlẹ. Angịịwa bwu ịpyị nya ịGalili bala ịpyị nya iJudiya.

⁸Angị ịkịla bwu epweji nya iJerusalẹm bala ịkịka nya ịpyị nya Idumiya bala ịkịka nya ịpyị ịlẹ kị juwa o-oye ọlaanyị nya Ihu ịJọdan wuu. Angị ịkịla bwu epweji nya ịTaya bala ịSayịdọn ịnyịnyị. Iru nya angịwẹ wuu kele ka ẹga nya iJisọsị ịnyị chajị nyọlẹ kị wo oja nya ụkụrwọ ẹbyẹbyị ọlẹ, ká iJisọsị juwa họ.

⁹Aliru nya angịnyị ịịwa ju iru lụmẹ gbee ká iJisọsị byi angịjụgbẹyị nyamwụ yẹkẹẹ, anụ nyị kpa ụmwụ nya enyi warị wẹ ọwa, kọọwa nyị ju ka ẹpwụ nyamwụ chajị ká angịnyị nyị́ ka tụ ọwa tutu kaka mẹ.

¹⁰Chajị jaabwọ ká iJisọsị juwa họ iru nya alẹdụrụ uda lẹ, angịlẹ wuu kị jụ ẹdụrụ ụ-ụwa juwa tụ angịnyị tututu, chajị kị ka jẹ́-ẹ kaka yụbwọ nyaa gu iJisọsị.

¹¹Ụ-ụwa, ụka ká alegu inyibyi ịlẹpwụ nya angịlẹ wuu ká alegu inyibyi ịịwa juwa wu á chẹhị kaka yẹ iJisọsị lẹ, ị kaa kpa angịịwa kaka hị nọnọ i-ijata nya iJisọsị ịnyịnyịịnyị lẹlẹ. Ọọwa lẹ, ị kaa kpaa ya ẹla dodehe yẹkẹẹ, “Ahụ ayịdang kpakpakpa a ri Ọnyẹwẹ nya Ohe Oluhye lẹ!”

¹²Ma, iJisọsị da alegu inyibyi ịịwa ehile yẹkẹẹ, anụ nyị ya ụma nya ọngọlẹ kọọwa ayịdang nyị ri, dodehe je angịnyị kpong-kpong ka.

¹³Ịnyị, iJisọsị a rụ kele ka uhye nya ịgbọdọ ịhyẹ lẹ, ọ be ẹkọ wụrụ iru nya angịlẹ wuu kọ tịtọ lẹ, angịịwa a bọọ kele ka ụwa lẹlẹ.

¹⁴Ọọwa lẹ, iJisọsị a chụ anyị alẹng angị iwo kụrụ imiiye bwu ẹpwarịrị nyaa kị ka ri angịjụgbẹyị nyamwụ, chajị kọ ka ya ọngịrị nyamwụ haa, daa ẹrụ kpehe kaka ya ẹrụ ọnyịịla pyẹ je angịnyị ehe lẹlẹ.

¹⁵Chajị ká iJisọsị ka ya ọngịrị nyamwụ ọ-kpa ku alegu inyibyi dodehe haa ịnyịnyị.

¹⁶Ẹnyị nya angị iwo kụrụ imiiye ịịwa ịlẹ kọ chụ a lẹẹ lẹ: ịSayịmọn ọlẹ ká iJisọsị wụrụ iPita,

¹⁷IJemsi bala ịJọn ọnyịnamwụ ịlẹ kị ri anyị nya iSebidi. IJisọsị wụrụ ẹnyị nyaa, iBonajisu, ọlẹ ká etu nyamwụ ri “Anyị nya ịkpala” chajị, ị kaa chị ọnụ ila lụmẹ.

¹⁸Ẹnyị nya angịkịla ihihi a lẹẹ lẹ: Andụrụ, iFilipu, ịBatọlomyu, ịMatiyu, ịTọmasị, iJemsi ọnyị nya Alufiyọsị, iTadiyọsị, ịSayịmọn ọlẹ kọ ri ọngọ kaa yẹ ẹrwa nya ụpwọma nyamwụ lụmẹ,

¹⁹bala iJudasị Isikarọtụ ọlẹ kọ ri ọngọ pịrị iJisọsị ha.

²⁰Ụka ọọwa, iJisọsị rụ kele ka ẹpwa. Ma, iru nya angịnyị lụmẹ-lụmẹ myịmyị bọọ kele birititi gbee kọọwa ayịdang bala angịjụgbẹyị nyamwụ á ye ụka ọhẹ-lọhẹ ri ang oriri kaka.

²¹Ọọwa lẹ, aanịna nya iJisọsị a kele juwa tịtọ nyọka kpọọ rụ hi ụwa, chajị nyọlẹ kị wo ká angịhyẹ juwa ya ịnyịnyịịnyị yẹkẹẹ, iJisọsị nyị hyụla lẹ!

²²Ụka ọọwa, ịtịcha ị-mẹ ehile nya iMosisi jẹ ịhyẹ ịlẹ kị bwu epweji nya iJerusalẹm, juwa kpa ẹlẹlẹ ọwọọwọọ nyaa ya dodehe yẹkẹẹ, “IBilisibọlụ olegbeju ọgbahị nya alegu inyibyi wuu a wẹẹ wu iJisọsị lẹ. Ọngịrị nya iBilisibọlụ ọọwa a tị wẹ kọ wẹẹ kpa ku alegu inyibyi ịwẹ wuu dodehe ịnyịnyị lẹ!”

²³Ọọwa lẹ, iJisọsị a be ẹkọ wụrụ angịwẹ kele ka ẹga nyamwụ lẹ, ọ juwa kpa oja ọkpịta ya ẹla byaa yẹkẹẹ, “Anyị, anụ tị́ me irya, ká Ohe Onyobyi ayịdang ka jẹ́-ẹ juwa ku Ohe Onyobyi ọọnamwụ ọkịla dodehe ịnyị?”

²⁴IJisọsị myịmyị byaa yẹkẹẹ, “Anụ wo mẹ, ó-ri ká ịpyị adịrahụ á kụ ụwa, juwa chị ịlọmwụ ebwo, juwa tụ ịlọmwụ pyịpyị lẹ aalẹ, ịpyị adịrahụ ọọwa á ka jẹ́-ẹ godayị rịrị myị́ kaka.

²⁵Ọ́ tị ri ká alọdọdẹpwa ookpokpo á kụ ụwa chị ịlaa ebwo imiiye, juwa tụ ịlaa pyịpyị lẹ aalẹ, ọdọdẹpwa ọọwa á tịtị ka jẹ́-ẹ godayị rịrị myị́ kaka ịnyịnyị.

²⁶Lẹ, ó-ri ká Ohe Onyobyi á ka kụ ụwa chị ọngịrị nyamwụ ebwo, juwa kpa ọngịrị ọọwa tụ ịlọmwụ pyịpyị lẹ aalẹ, ọngịrị nya ịpyị Adịrahụ nya Ohe Onyobyi ayịdang á ka jẹ́-ẹ godayị rịrị myị́ kpong-kpong kaka, ịnyịnyị. Ọkọkọ nya ọọwa lẹ, ọngịrị nyamwụ wuu ka myị́ gbanggbang lẹ.”

²⁷“Ọlẹga ọhẹ-lọhẹ á tị juwa kọ ka jẹ́-ẹ kele kaka be oluji ọlẹ kọ la ogogo ẹpwa myị́ kpụ, ọ ka kele kaka go ang nyamwụ kpa rụ la agbụrụ kaka. Kẹnẹ-kẹnẹ, ó-ri kọọwa ayịdang á wu ayịdẹpwa ọọwa nọnọ, chọọ ori myị́ kpá ene lẹ, ọ ka jẹ́-ẹ go ịngịịwẹ kpa rụ myị́ ịnyị lẹlẹ.”

²⁸“Nya ịlẹhị-ịlẹhị, m byinu yẹkẹẹ, ọhọbịrị myị́ ọhọbịrị ọlẹ ká angịnyị ehe á họ bawụlẹ lee ẹla o-ya pyị ọnyị myị ọnyị ọlẹ kị ya pyị ẹ-ẹga nya awụlẹ aalẹ, Ohe Oluhye ka hịnyọhi ịhọbịrị ịịwa wuu haa myị́.

²⁹Ma, ọng myị́ ọng ọlẹ kọ tị ya ẹla onyobyi ba Olegu Ịgọgọ nya Ohe Oluhye ene lẹ aalẹ, Ohe Oluhye á ka hịnyọhi ọhọbịrị ọọwa họọ kpá ẹnẹnẹhẹ kaka. Chajị ọngọọwa ayịdang juwa ẹ-ẹpwụ ọnụ nya eje owuwu nya ọhọbịrị ọhọhọ o-gbe oyi myị́ oyi pyịyọọ lẹ.”

³⁰Ang odudu ká iJisọsị ya ala ịwẹ wuu dodehe ri chajị nyọlẹ ká angịhyẹ tọchị-tọchị me ọnọọkịla kịrọrọ yẹkẹẹ, “Olegu onyobyi nyaa wẹẹ kpa iJisọsị họ ụkụrwọ ẹbyẹbyị ịwẹ wuu lẹ.”

³¹Ụka ọọwa, anyịnịna nya iJisọsị alẹng bala ịnamwụ kele kaka godayị rịrị odehe nya ẹpwang ọlẹ ká iJisọsị ji. Ọọwa lẹ, ị byi ọngọhẹ yẹkẹẹ, nyị kele kaka be ẹkọ wụrụ iJisọsị ha ịwa wẹẹ.

³²Ụka ọọwa, Iru nya angịnyị ịlẹ kị hụhụ dagaga ju iJisọsị ụ-ụwa byoo yẹkẹẹ, “Ayịbahị, ịnang bala anyịnang alẹng anyị godayị rịrị lalẹẹ odehe, juwa tịtọ nyang.”

³³IJisọsị wẹ byaa yẹkẹẹ, “Oowo, a tị́ ri ịnam bala anyadam ịịwa ene?”

³⁴Ụka ká iJisọsị chẹhị kaka yẹ angịwẹ wuu kị dagaga jwoo kpá lẹ, ọ byaa yẹkẹẹ, “Anụ wo mẹ! Angịwẹ kpangga a ri ịnam bala anyadam lẹlẹ.

³⁵Anụ wo mẹ, ọng myị́ ọng ọlẹ kọ juwa họ irya nya Ohe Oluhye lẹ aalẹ, ọngọọwa ayịdang a ri ọnyịnam, ọlẹng bala ọnyang lee ịnam ịnyịnyị lẹlẹ.”