Read idege ỊMAKỊ 4 Bible Online

ỊMAKỊ 4 - idege bible

ỊMAKỊ 4

¹Ụka ọọwa, iJisọsị myịmyị juwa mẹ ang jẹ iru nya angịnyị ọ-ọnụụka nya ihu ọkịlọlọ nya ịGalili. Angịịwa ju iru lụmẹ gbee ká iJisọsị ayịdang rụ kaka hụhụ ẹ-ẹpwụ nya ụmwụ nya enyi. Ọọwa lẹ, iru nya angịnyị ịịwa a godayị rịrị ọ-ọnụụka nya Ihu lẹlẹ.

²IJisọsị kpa ija ị-da etu la datị-datị mẹ iru nya ang lụmẹ-lụmẹ jaa ụ-ụwa. Ọ byaa yẹkẹẹ,

³“Anụ wo mẹ! Ụka ọhẹ juwa ká ọlẹrụ ọhẹ kpa ajẹ ịhyẹ kaka hụ ẹ-ẹrụ nyamwụ.

⁴Ụka ká ọlẹng ọwẹ juwa kpa ajẹ ịịwa hụ ịnyịnyịịnyị, ịhyẹ nyaa hụrụ chị ụwa ọ-ọnụ nya ụgbẹyị. Ịchịnụ kele kaka gwaa ri.

⁵Ajẹ ịkịla hụrụ chị ka uhye nya ẹjwọ. Jaabwọ ká ọpyị ọlụwa á lụmẹ gbuu ka lẹ, ị bwu kpehe ahyaahị, ma, ị́ tị ye ẹgẹgẹhẹ ka da ụtẹ okpori-kpori kpong-kpong kaka.

⁶Ịnyị a du, ụka ká ẹnụ gba kpehe, kọ chaa nya ịlẹhị-ịlẹhị lẹ, apwụ nyaa a yẹpiloo gbee kị gbu gbanggbang wuu lẹlẹ. Chajị, ụtẹ nyaa á la gogo gbuu, ka waa kpa myị́ kpong-kpong kaka.

⁷Ajẹ ịkịla hụrụ chị ka ẹpwụ nya ejwo. Ụka kị bwu kpehe, ejwo ịịwa taa pyịpyị lụmẹ kaka kpoye lẹ, ị́ nwụ́ ugbe ọhẹ-lọhẹ kpong-kpong ka.

⁸Ajẹ ịkịla hụrụ chị ka ọpyị ọnyịịla. Ajẹ ịịwa nwa gbee kị nwụ́ egbe ju iru hiigu-hiigu. Ịhyẹ nyaa nwụ́ egbe chị ba ịlaa lala ugbabwọ iwo ịta chiriri. Ịkịla nyaa nwụ́ egbe chị ba ịlaa lala ugbabwọ iwo ịrwọnyẹ chiriri. Ịkịla nyaa myịmyị nwụ́ egbe chị ba ịlaa lala ugbabwọ ohu chiriri ịnyịnyị.”

⁹IJisọsị kpa ẹla ọlẹ tụ ẹla ọọwa ku yẹkẹẹ, “Ọngọlẹ kọ ju ụrụ ọ-kpa wo ẹla lẹ aalẹ, ọngọọwa a wo etu nya ẹla ọlẹ mẹ!”

¹⁰Ụka ká iJisọsị juwa ụbwọọmwụ, angịhyẹ ịlẹ kị juwa tọọ bala angịjụgbẹyị nyamwụ kele kaka tọọ ịtọ u-uhye nyọlẹ ká iJisọsị kaa kpa ija ịkpịta mẹ ang jẹ.

¹¹Ụka ọọwa, iJisọsị wẹ byaa yẹkẹẹ, “Ẹ-ẹga nyanụ lẹ, Ohe Oluhye ya ọ-jẹ́ myịmyị hanụ chajị kanụ ka jẹ́ ang okpori-kpori ọ-kpụ ịbaa nya ịpyị Adịrahụ nya Ohe Oluhye lẹ! Ma, ẹ-ẹga nya angịlẹ kị ri igbodiya lẹ, ang myị́ ang ọmẹjẹ ọlẹga nyaa wuu ka ri oja ọkpịta kem.

¹²Chajị ọọwa ri ọ-họ jịra nya ẹla ọlẹ ká Ụpwụ Ịgọgọ ya lẹẹ yẹkẹẹ, ‘Ịwa ayịdang á yọyị la ọyẹyẹ, ị́ kaa jẹ́ ịngịngịhyẹ ogu datị kpong-kpong ka. Ụka kị tị wo ẹla la owowo, ị́ tị kaa la ọ-jẹ́ myịmyị u-uhye nya ẹla ọọwa datị kpong-kpong ka ịnyịnyị. Ọ la ịnyị ẹ-ẹga nyaa, chajị kịịwa ayịdang á ka jẹ́-ẹ tịrẹkpẹ bwu ụgbẹyị nya ịhọbịrị ịhọhọ nyaa, chajị, kị ka wu ọhịnyọhi nya Ohe Oluhye oyi myị́ kpong-kpong kaka pyịyọọ.’ ”

¹³Ụka ọọwa, iJisọsị tọ angịlẹ kị juwa ẹ-ẹga nyamwụ ịtọ yẹkẹẹ, “Kpakpakpa lẹẹ, anụ ayịdang jẹ́ etu nya oja nya ọngọ hụ ajẹ ọlẹ kpong-kpong? Ó-ri kanụ jẹ́ etu nyamwụ ka aalẹ, anyanyị, anụ tị́, tị tị ka họ, kanụ ka jẹ́-ẹ jẹ́ etu nya ija ịkpịta nyam ịkịla wuu mẹ?

¹⁴Etu nyamwụ a lẹẹ lẹlẹ: Ẹrụ ọnyịịla nya Ohe Oluhye o-ya pyẹ a ku ọmwakpa nya ajẹ ịwẹ ká ọlẹng ọwẹ kpa kaka hụ ẹ-ẹrụ lẹ.

¹⁵Ụka ọhẹ juwa, ká ẹrụ ọnyịịla nya Ohe Oluhye kaa kele ka ẹpwụ nya ụrụ nya angịlẹ kị ku ọmwakpa nya ajẹ ịlọka nya ụgbẹyị. Ahyaahị ká angịịwa á wo ẹla nya Ohe Oluhye kpá lẹ, Ohe Onyobyi a kaa kele kaka naa ẹla nya Ohe Oluhye ọọwa ọlẹ kị wo wẹ lẹlẹ.

¹⁶Angị ịkịla ịlẹ kị ku ọmwakpa nya ajẹ ịlẹ kị hụrụ chị ka uhye nya ẹjwọ a lẹẹ lẹ. Ahyaahị ká angịịwa á wo ẹla nya Ohe Oluhye ọọwa, ị kaa ye ẹla ọọwa gbaaa la ọkẹkẹnị.

¹⁷Ma, jaabwọ kịịwa ayịdang á tị myị ya iwe da ha ẹla ọọwa kpụ, ọ da ụtẹ weji ẹ-ẹpwụ ọkịlẹtụ nyaa gogo ka lẹ, ị́ kaa godayị rịrị tata myị́ ka. Ahyaahị ká akama lee ọ-tụ pyịpyị á warị chaa ọgụ o-oluhye nya ẹla ọọwa lẹ, ị mileji pwụrẹrẹ lẹlẹ.

¹⁸Angị ịkịla ri angị ku ọmwakpa nya ajẹ ịlẹ kị hụrụ chị ka ẹpwụ nya ejwo. Angịịwa kaa wo ẹla nya Ohe Oluhye kpá wuu hiigu-hiigu.

¹⁹Ụka ká olo nya imahị nya ọhịhị ọlẹ bala ọháha ọlala u-uhye nya ụdụ nya odehe ọlẹ bala imyi nya ịnyịrọ, á kele kaka tụ ẹla ọọwa pyịpyị ọ-ọkịlẹtụ nyaa gbee lẹ, ịwa ayịdang a kaa nwụ́ ugbe ọnyịịla ọhẹ-lọhẹ ha Ohe Oluhye myị́ kaka lẹlẹ.

²⁰Angị ịkịla ri angị ku ọmwakpa nya ajẹ ịlẹ kị hụrụ chị ka ọpyị ọnyịịla. Ụka ká angịịwa á wo ẹla nya Ohe Oluhye kpá, ị kaa ye ẹla ọọwa la ọkịlẹtụ ookpokpo, juwa kpa họ ụkụrwọ gbee kị kaa nwụ́ egbe hiigu-hiigu ha Ohe Oluhye. Angịhyẹ nyaa juwa nwụ́ egbe ha Ohe Oluhye chị ba ịlaa lala ugbabwọ iwo ịta chiriri. Angị ịkịla nyaa juwa nwụ́ egbe ha Ohe Oluhye chị ba ịlaa lala ugbabwọ iwo ịrwọnyẹ chiriri. Angị ịkịla nyaa juwa nwụ́ egbe ha Ohe Oluhye chị ba ịlaa lala ugbabwọ ohu chiriri ịnyịnyị.”

²¹IJisọsị myịmyị byaa yẹkẹẹ, “Anụ ya ká ọngọngọhẹ juwa kọ ka wuru ila ju otinika nyamwụ wuu, ọ ka myị-ị hwọọ kpa kaka kpịbaa ẹ-ẹpwụ nya iboketi nya enyi lee ọ-hwoo kpa kaka kpịbaa e-ekpeleji nya ịbẹẹdị ọ-da nọnọ nyamwụ? Anụ ya ká uhye nya itebwuru, ọngọ ọlịnyị a ka hu otinika nyamwụ kpa kaka rịrị ka?

²²Chajị ịngịngịhyẹ á juwa ọlẹ ká ọngịnyị ehe á tụ kpịbaa kpịrẹ-kpịrẹ ene lẹ, ká ang ọọwa á ka jẹ́-ẹ chị ehe a-ahịgboo myị́ kaka lẹ ka. Lee, ang myị́ ang ọlẹ ká ọngịnyị ehe á tị họ kwiikwii ene lẹ, kị ka jẹ́-ẹ bwuru ang ọọwa apwụ dodehe myị́ kaka lẹ ka ịnyịnyị.

²³Anụ wo mẹ! Ọngọlẹ kọ ju ụrụ ọ-kpa wo ẹla lẹ aalẹ, ọngọọwa a wo etu nya ẹlẹwẹ mẹ!”

²⁴IJisọsị myịmyị byaa yẹkẹẹ, “Lẹ, anụ cheri kanụ wu ẹla nya Ohe Oluhye ọlẹ kanụ wẹẹ wo kpa ụ-ụwa gogo mẹ. Chajị ang ọlẹ kaanụ ayịdang wẹẹ kpa me ang ha angịnyị angịkịla wẹẹ, ụma nya ang ọọwa, Ohe Oluhye a ka kpa me ang tịrẹkpẹ hanụ kwiwa ịnyịnyị lẹ. Ohe Oluhye dọmwụ ka me ang danụ uhye mwụ aba ba.

²⁵Chajị ọng myị́ ọng ọlẹ kọ la ang juwa ene lẹ aalẹ, ọngọọwa, ị ka myịmyị-ị̀ ya ang ịkịla da uhye ha lẹlẹ. Ma, ọng myị́ ọng ọlẹ kọ tị la ang juwa gbuu ene kaka lẹ aalẹ, ị ka noo ang ochiche ọọwa ọlẹ kọọwa ayịdang la juwa ene-ene pyii lẹ.”

²⁶IJisọsị myịmyị byaa yẹkẹẹ, “Ang chajị nya ịpyị Adịrahụ nya Ohe Oluhye lala oja ọlẹ: Ọlẹng ọhẹ juwa, kọ kele kaka hụ ajẹ ẹ-ẹrụ nyamwụ.

²⁷Ọọwa lẹ, ọ rụ tịrẹkpẹ ka ẹpwa nyamwụ kaka nune, juwa chahị ka ọlụkụrwọ nyamwụ ịkịla la datị-datị ẹnẹnẹẹnụ, gu ahịgboo, lụka ọlẹ ká ajẹ ịlẹ kọ ya hụ ẹ-ẹrụ bwu kpehe, juwa nwa ịnyịnyịịnyị lẹlẹ. Ma, ọlẹrụ ọọwa ayịdang á tị jẹ́ jaabwọ kọ la kọ du ká ajẹ ịlẹrụ nyamwụ ịịwa juwa nwa ịnyị kpong-kpong ka.

²⁸Chajị ọpyị ọlẹ kọ ya ajẹ ịịwa hụ, a wẹẹ kpaa nwa, gbee kị gu apwụ, nwụ́ egbe, gbee ká egbe nyaa ịịwa ri ịtụka-ịtụka wuu lẹ.

²⁹Ụka ká egbe ịịwa á ga kpá wuu lẹ, ọngọọwa a kaa kpa ẹma nyamwụ kele kaka chị egbe ịịwa bala ọ-taa guru lẹlẹ. Chajị ụka nya ang ohuhu nya ẹrụ pwụ lẹ.”

³⁰Ụka ọọwa, iJisọsị yẹkẹẹ, “Ịịyẹ ahị tị́ ka chụ ịpyị Adịrahụ nya Ohe Oluhye kaka pwoku kpá lẹẹ mẹ? Oja ọ-da etu oyina, ahị tị́ kpa da ẹla ọọwa wụlẹ ya je angịnyị ehe kpá lẹẹ mẹ?

³¹Oja ọọwa a lẹẹ lẹ: Ịpyị Adịrahụ nya Ohe Oluhye lala ẹjẹ nya okoji ọlẹ kị wụrụ ịmọsịtadị ọlẹ kọ ri ochiche gụ ajẹ ịkịla ilodehe ọlẹ wuu, ká alẹrụ kaa hu ẹjẹ nya ịmọsịtadị ọọwa kpa kele kaka tọ ẹ-ẹrụ nya apwụ iriri nyaa.

³²Ma, ụka kị ya tọ ịnyị kpá, ká ịmọsịtadị ọọwa a bwu kpehe, ọ kaa nwa kaka ri ọmwụ nya okoji ọlẹ kọ ri ọtụka gu ekeji ịkịla ịlẹrụ nya apwụ iriri ọọwa wuu. Ọ kaa gu abwọ ịtụka-ịtụka gọdọ-gọdọ, gbee ká ịchịnụ iluhye-ọgba kaa kele kaka nọ awụ nyaa u-uhye nyamwụ.”

³³Iru nya ija ịkpịta lụmẹ-lụmẹ ịlịịwẹ, iJisọsị a kpa da ẹla nya Ohe oyaya nyamwụ wụlẹ, ya je angịnyị jaabwọ kịịwa ayịdang ka la ọngịrị wo myị́ kaka ba lẹ.

³⁴Ụka ọọwa lẹ, iJisọsị á ya ẹla Ohe nyamwụ ọhẹ-lọhẹ ju angịnyị, ọ́ọ dayi la ọ-kpa ija ịkpịta ịlịịwẹ da ẹla ọọwa wụlẹ ya jaa kpong-kpong ka lẹ ka. Ma, ọ tị kaa bwuru etu nya ija ịịwa wuu ya je angịjụgbẹyị nyamwụ yẹẹyẹẹ ụka kị juwa ụbwaa.

³⁵La obyi nya ẹnụtụrụ ọọwa, iJisọsị byi angịjụgbẹyị nyamwụ yẹkẹẹ, “Anụ kẹwẹ kahị ju ụmwụ nya enyi kpoye nya ihu ọlẹ kele koye ọlaanyị nyamwụ mẹ.”

³⁶Ụka ọọwa, angịjụgbẹyị nya iJisọsị rụ hi iru nya angịnyị ịịwa ụ-ụwa. Ị ba iJisọsị kele ka ẹpwụ nya ụmwụ nya enyi ọlẹ kọ ji. Ọọwa lẹ, ịwa bala iJisọsị ayịdang a bajẹ la awụlẹ juwa rụ kpoye nya ihu ọọwa kele koye ọlaanyị lẹlẹ. Ụka ọọwa, ụmwụ nya enyi ịkịla ịhyẹ juwa ụ-ụwa ịnyịnyị.

³⁷Lụka ọkpahị ju ka, igbachịwụ ọtụka-ọtụka ọhẹ gba mịla Ihu ọtụka ọkịlọlọ ọọwa nmoo, juwa da enyi pwururu myị ẹpwụ nya ụmwụ nya enyi nyaa tọlọng lẹlẹ.

³⁸Ma, ụka ọọwa, iJisọsị tị ya ipilo da ịlọmwụ e-egbeju, juwa kpa une nọ ẹ-ẹkpẹ nya ụmwụ nya enyi ọọwa kem. Ọọwa lẹ, angịjụgbẹyị nya iJisọsị a kele kaka chọọ ahị-une lẹ, ị byoo yẹkẹẹ, “Ọngọlahị! Ọ ri ọlẹ kahị lẹẹ ka byi-enyi ẹ-ẹgẹlẹ lẹ, ọ gung ẹ-ẹpwụ ọkịlẹtụ o-oluhye nya ọọwa kpong-kpong kaka?”

³⁹Ịnyị, ụka ká iJisọsị chị ahị-une kọ wuleji lẹ, ọ kpụ igbachịwụ ọtụka-ọtụka ọọwa ịkata lẹ, ọ byi Ihu ọtụka ọkịlọlọ ọwẹ yẹkẹẹ, “Ba chịng ká kpụ ba kem lẹẹlẹẹ mẹ!” Ọọwa lẹ, igbachịwụ ọtụka ọwẹ a kpụ ba lẹ, ẹga myị́ ẹga a chị nyoo lẹlẹ.

⁴⁰Ọọwa lẹ, iJisọsị a byi angịjụgbẹyị nyamwụ yẹkẹẹ, “Ịịyẹ a tị́ du kaanụ juwa juii ọtụka ọlịịwẹ ene? Ọ ri anụ ayịdang á la ọmyịmyị ọhẹ-lọhẹ ẹ-ẹpwụ nyanụ kpong-kpong kaka?”

⁴¹Ụka ọọwa, ọ la angịlẹ wuu kị juwa ụ-ụwa ẹbyẹbyị lụmẹ kaka kpoye. I juwa byi awụlẹ yẹkẹẹ, “Ụma nya ọngịnyị ọlanyị a tị́ lẹẹ ká igbachịwụ bala ihu ọtụka jẹ́ juwa ju ẹla nyamwụ ihi ịnyị?”