Read idege ỊMAKỊ 5 Bible Online

ỊMAKỊ 5 - idege bible

ỊMAKỊ 5

¹Ụka ọọwa, iJisọsị bala angịjụgbẹyị nyamwụ jẹ gbee kị pwụ ọpyị nya ala ịGẹrasa o-oye ọlaanyị nya Ihu ọkịlọlọ nya ịGalili.

²Ahyaahị ká iJisọsị juwa gba kpehe bwu ẹpwụ nya ụmwụ nya enyi ọọwa, ọlẹng ọhẹ gba kpehe bwu ẹga o-ju ogu eji nya alụwa kaka tọ iJisọsị. Jaabwọ ká alegu inyibyi wu ọlẹng ọọwa lụmẹ lẹ,

³ẹpwụ nya agbụ ịlẹ kị ri ẹga o-ju ogu eji nya alụwa a ri ẹpwa nyamwụ lẹlẹ. Ụla ọhyahya nyamwụ la ọngịrị lụmẹ lẹ, ọngọngọhẹ á kaa woo kpa myị́ lee o-jwoo odo kpa ụ-ụwa myị́ kpong-kpong kaka.

⁴Ụka lụmẹ-lụmẹ juwa kị kaa woo kpa la ọngịrị, ya odo jwọọ a-ata bala ọ-ya agba jwọọ a-abwọ. Ma, ọ tị kaa hụla odo ịịwa hwẹẹhwẹẹ hi ịlọmwụ bala ọ-chị agba ịịwa eku wuu kpiki-kpiki hi ịlọmwụ ịnyịnyị. Chajị nya ọọwa lẹ, ọngọngọhẹ á kaa jụ ọlụla ọwẹ chị ba eji myị́ kpong-kpong kaka.

⁵Ụkụrwọ nya ọlụla ọwẹ bwu ụtụrụ gbee, ju ká ahị ọpyẹpyẹ ọkịla wuu, ri agịlata kele ka ẹpwụ nya agbụ i-ju ogu eji nya alụwa bala o-bwu ụwa kele ka uhye nya ịgbọdọ ịnyịnyịịnyị, juwa chị eko loboo loboo. Ọ kaa kpa ajwọ gu ịnyịrọ nya ịlọmwụ ene ụka wuu ịnyịnyị.

⁶Ụka ká ọlụla ọọwa chẹhị kaka yẹ iJisọsị ẹ-ẹga ọlụrụ, ọ rụnyẹ kele kaka hịda keji ị-ịlahị nya iJisọsị.

⁷Ọ juwa ya ẹla ta iJisọsị lomyi o-gboo yẹkẹẹ, “Ahụ iJisọsị, Ọnyị nya Ohe Oluhye Agụgụ ọtụka, ẹẹla-ịyẹ, a tị́ kpa warị wẹ ẹga nyam? M jam kpa ẹnyị nya Ohe Oluhye bịlẹng, chuchuu, a yẹm akama ka!”

⁸Ang odudu kọ ya ịnyị ri ọlẹ ká iJisọsị byoo yẹkẹẹ, “Ahụ olegu onyobyi ọwẹ, gba kpehe hi ẹpwụ nya ọlẹng ọwẹ lẹẹlẹẹ!”

⁹Ụka ká olegu onyobyi ọwẹ bịlẹ iJisọsị ịnyị kpá lẹ, iJisọsị a tọọ ịtọ yẹkẹẹ, “Ẹnyị nyang a tị́ ri iyaa ene?” Olegu onyobyi ọwẹ wẹ bwu ọnụ nya ọlẹng ọọwa yẹkẹẹ, “Ẹnyị nyam ri ‘iLijọn.’ Chajị ahị ju iru lụmẹ kaka kpoye.” Etu nya iLijọn ri ịsọja ụnọ kụrụ ụnọ.

¹⁰Ọọwa lẹ, ọ juwa bịlẹ iJisọsị nya ịlẹhị-ịlẹhị ịnyịnyịịnyị yẹkẹẹ, ụka kaahụ nyị́ ku ịwa rụ kpehe bwu ẹpwụ nya ọlẹng ọlẹ kpá nyị chuchuu kịị nyị mwụ ịwa ẹpwa hi ọpyị ọlụwa ka.

¹¹Ụka ọọwa, angịhyẹ juwa kpa iru nya ikomba lụmẹ-lụmẹ ri ang ịkịka nya ọgbọdọ ọhẹ ọlẹ kọ ju ẹga ọọwa chwẹẹ.

¹²Ọọwa lẹ, alegu inyibyi ịwẹ a bịlẹ iJisọsị yẹkẹẹ, “Chuchuu, kuhi kpehe kaka ju ka ẹpwụ nya ikomba ịlaanyị chẹẹ mẹ!”

¹³Ọọwa lẹ, iJisọsị a myị ọnụ haa lẹ, alegu inyibyi ịịwa a gba kpehe bwu ẹpwụ nya ọlẹng ọwẹ lẹ, ị rụ kpehe kele ka ẹpwụ nya ikomba ịịwa lẹlẹ. Ọọwa lẹ, ikomba ịwẹ a rụnyẹ pwọ ụka nya Ihu ọkịlọlọ lẹga-lẹga kaka ju ka ẹpwụ nya enyi ọọwa wurum lẹ, ịwa wuu a byi-enyi ụ-ụwa wuu lẹlẹ. Iru ojuju nya ikomba ịịwa lala ụnọ ịrụ chiriri.

¹⁴Ụka ọọwa, angịlẹ kị juwa kpẹhị rịrị ikomba ịịwa, kpa oja nya ẹlẹwẹ rụnyẹ kaka ya je alepweji ọtụka nyaa wuu bala alepwolodehe iloye nya ọpyị ọọwa wuu. Ọọwa lẹ, iru nya angịnyị lụmẹ-lụmẹ a juwa kele ka ẹga nya iJisọsị kaka yẹ ang ọlẹ kọ họ ụ-ụwa lẹlẹ.

¹⁵Ụka ọlẹ kị pwụ ụwa, ị yẹ iJisọsị bala ọlụla ọwẹ ká iru nya alegu inyibyi ịwẹ wu kọ kụrụ ịwụrụ nyamwụ gbịlẹ-gbịlẹ hụhụ ta iJisọsị lẹlẹ. Chajị, ọ la irya ọlahị chịng hiigu-hiigu ẹ-ẹpwụ nyamwụ ugbẹnyị lẹ. Ụka ọọwa, ọ laa ịwa wuu uhi-uhi ọtụka-ọtụka.

¹⁶Ụka ọọwa, angịlẹ kị juwa i-ijata nya ẹla ọọwa a tịrọnụ ya je angịkịla u-uhye nya ang ọlẹ kọ họ wẹ ẹ-ẹga nya ọlụla ọọwa bala ikomba ịịwa lẹlẹ.

¹⁷Ọọwa lẹ, alụwa a juwa bịlẹ iJisọsị yẹkẹẹ, ahụ nyị chuchuu, kaahụ nyị rụ hi epweji bala ọpyị nyịwa ọlẹ mẹ, lẹlẹ.

¹⁸Ụka ọlẹ ká iJisọsị juwa ka ju ka ẹpwụ nya ụmwụ nya enyi, ọlẹng ọwẹ ká alegu inyibyi wu ene-ene kele ka ẹga nya iJisọsị, kaka byoo yẹkẹẹ, “Ọngọlahị, am tịtọ kam ka bang jẹ!”

¹⁹Ma, iJisọsị wẹ byoo yẹkẹẹ, “Ehe! Ọkọkọ nyọka bam jẹ lẹ, rụ kele ka ẹpwa nyanụ, ká ya je aligu nyang wuu jaabwọ ká Ohe Oluhye họ ang ịnyịịla hang kaka ba bala jaabwọ ká Ohe Oluhye yẹng ahyẹẹrwẹrwa kaka ba ịnyịnyị mẹ.”

²⁰Ọọwa lẹ, ọlẹng ọwẹ a yegiri bwu ụwa rụ kele ka ọpyị nya iDikapolisi ọlẹ ká ẹnyị ọkịla nyamwụ ri “Epweji iwo chiriri” lẹlẹ. Ọọwa lẹ, ọ juwa kpa ẹla ọọwa ya je alụwa wuu jaabwọ ká iJisọsị bwu họ ang ịnyịịla ẹ-ẹga nyamwụ kaka ba wuu lẹlẹ. Ụka ká alụwa wo ẹla ọọwa ịnyị lẹ, ọ laa ịwa wuu ahịbwuu lụmẹ kaka kpoye.

²¹Ụka ọọwa, iJisọsị kpoye nya ihu ọkịlọlọ ọwẹ tịrẹkpẹ myịmyị kele ka ọnụụka oloye ọkịla. Ụ-ụwa, iru nya angịnyị lụmẹ-lụmẹ kele kaka dagaga ju iJisọsị.

²²Ọọwa lẹ, ọlẹng ọhẹ ọlẹ kị wụrụ ịJẹẹrọsị kọ ri olegbeju ọtụka ọhẹ ẹ-ẹpwarịrị nya angị kpẹhị rịrị ube ọ-mẹ ẹla nya Ohe Oluhye jẹ nya ala iJuu, a kele kaka hịda keji i-ijata nya iJisọsị lẹlẹ.

²³Ịnyị, ọ juwa raabwọ bịlẹ iJisọsị yẹkẹẹ, “Ayịbahị, ọnyị nyam ọnyang ochiche ọhẹ juwa ẹ-ẹpwa ká ẹdụrụ juwa jụ ọtụka-ọtụka, nụwa ọ-ọbẹ nya igu. Lẹ, chuchuu, kẹwẹ kahị kele ka ẹga nyamwụ, ká yụbwọ nyang nịrọọ ká họọ uda ham chẹẹ mẹ!”

²⁴Ọọwa lẹ, iJisọsị a yegiri ahyaahị juwa ba ọlẹng ọwẹ kele ka ẹpwa nyamwụ lẹlẹ. Ụka ọọwa, iru nya angịnyị lụmẹ-lụmẹ juwa ba iJisọsị jẹ. I juwa tụ iJisọsị tutu bwu oyiye-oyiye ịnyịnyịịnyị.

²⁵Ụka ọọwa, ọnyang ọhẹ juwa ọlẹ ká ẹdụrụ nya ịwọ ọhụhụ jwọọ lala ẹka iwo kụrụ imiiye gbẹgbịlẹ lẹ. Ịwọ ọhụhụ ọọwa kpọọ lụmẹ kaka kpoye.

²⁶Ọnyang ọwẹ gbu la akama nya ọ-kpa ẹdụrụ nyamwụ ọọwa ga tụ iru nya idongkita da wuu, gbee ká okpoko nyamwụ wuu bala ang myị́ ang ịlẹ kọ la myị́ wuu o-oluhye nya ẹdụrụ ọọwa lẹ. Ma, ọkọkọ nya ẹdụrụ ọ-ka hagụ lẹ, ọ tị mwọọgịlẹ juwa tịpyọ gụ olene-ene.

²⁷Ụka ká ọnyang ọwẹ wo oja jaabwọ ká iJisọsị ri ọngọ kaa họ angịnyị uda lụmẹ lẹ, ọ hu ang kele ka ẹga nya iJisọsị lẹlẹ. Ọ bwu ẹpwụ nya iru nya angịnyị kaka bwu ẹkpẹ nya iJisọsị lẹ, ọ yụbwọ gwọọ a-awụrụ lẹlẹ.

²⁸Ene kọ ka kele lẹ, ọ chị eje ẹ-ẹpwụ nya ọkịlẹtụ nyamwụ yẹkẹẹ, “Am jẹ́ yẹkẹẹ, ó-ri kam dọmwụ yụbwọ nyam gu awụrụ nya iJisọsị gugu lẹ, ḿ ka dayi la ọ-la gogo kaka.”

²⁹Ọọwa lẹ, ahyaahị ká ọnyang ọwẹ yụbwọ nyamwụ gu awụrụ nya iJisọsị lẹ, ịwọ ọhụhụ nyamwụ a chị kịrang iijata-ijata lẹlẹ. Ọọwa lẹ, ọwa ayịdang a jẹ́ ẹ-ẹpwụ nya ịlọmwụ yẹkẹẹ, iJisọsị nyị họ ọwa uda nya ịwọ ọhụhụ nya ọọwa gbanggbang ịnyịlẹhị lẹlẹ.

³⁰Ahyaahị ká iJisọsị jẹ́ yẹkẹẹ, ọngịrị nyị chụ hi bwu ẹpwụ nya ọọwa lẹ, ọ jahị nyamwụ kpata da lẹ, ọ tọ aluche ịtọ yẹkẹẹ, “Oowo lẹpwụ nyanụ a tị́ yụbwọ nyamwụ gu awụrụ nyam?”

³¹Ụka ọọwa, angịjụgbẹyị nya iJisọsị wẹ byoo yẹkẹẹ, “Ọngọlahị, ahụ ayịdang tị́ wẹẹ yẹ jaabwọ ká iru nya angịnyị wẹẹ tung tutu bwu oyiye-oyiye lẹ, o-owo, a tị́ ka jẹ́ wẹ datị kọ yụbwọ nyamwụ gu awụrụ nyang mẹ?”

³²Ma, iJisọsị juwa kpẹhị dịrẹ iru nya angịnyị ịwẹ wuu, chajị kọ ka jẹ́-ẹ yẹ ọngọlẹ kọ yụbwọ gwọọ a-awụrụ.

³³Ụka ọlẹ ká ọnyang ọwẹ jẹ́ ang ọlẹ kọ họ wẹ ẹ-ẹga nyamwụ lẹ, ọ juwa hụ́ kpákpakpa la uhi ojuju kaka hịda keji ị-ịlahị nya iJisọsị lẹlẹ. Ọọwa lẹ, ọ tịrọnụ ya ẹla nya ịlẹhị je iJisọsị jaabwọ kọ la wuu lẹlẹ.

³⁴Ụka ọọwa, iJisọsị wẹ byoo yẹkẹẹ, “Ọnyị nyam ọnyang, ọmyịmyị ọlala nyang họ ká la gogo lẹ! Rụ la okpunyi mẹ. Ẹdụrụ nyang myị́ alẹ lẹ.”

³⁵Ụka ká iJisọsị juwa kpa ẹla ọọwa ọ-ọnụ ya wẹ lẹ, angịhyẹ ịlẹ kị du ẹrụ bwu ẹpwa nya olegbeju ịJẹẹrọsị a warị kaka byoo yẹkẹẹ, “ỊJayịrọsị, ọnyị nyang gbu lẹ. Chajị nya ọọwa lẹ, a myịmyị hu akama ha Ayịbahị ịtịcha kaka.”

³⁶Ụka ká iJisọsị chị ụrụ kaka wo ẹla ọọwa lẹ, ọ lọọ ẹpẹpẹ. Ọọwa lẹ, ọ byi ịJẹẹrọsị olegbeju ọkpẹhị rịrị ube ọ-mẹ ẹla nya Ohe Oluhye jẹ nya ala iJuu ọwẹ yẹkẹẹ, “A juwa nwụ ịlọng la imahị ka, ẹnwa! Kẹnẹ-kẹnẹ, kpa ọkịlẹtụ ookpokpo myị lam mẹ.”

³⁷Ụka ọọwa, iJisọsị á myị kpa ọngọngọhẹ ọkịla ba ịlọmwụ dala iPita, iJemsi bala ọnyịnamwụ ịJọn kele ka ụwa kpong-kpong kaka.

³⁸Ụka ọlẹ kị pwụ ẹpwa nya ịJẹẹrọsị olegbejwọọwa, iJisọsị ayịdang juwa kpẹhị nya ịlọmwụ yẹ iru ọtụka olejida ọọwa. Ọ myịmyị wo jaabwọ ká iru nya angịnyị ịlụwa juwa chị eko bala o-juwa jida ọtụka-ọtụka gboo ịnyịnyị.

³⁹Ụka ká iJisọsị kele ka ijata nyaa, ọ byaa yẹkẹẹ, “Ọmọnyọ ọlanyị, anụ tị́ jam hi kuu ịnyị ẹgẹlẹ alẹ? Ịịyẹ a tị́ du kanụ jam jida ọtụka ọlịịlẹ? Anụ wo mẹ! I-igu a nwụ ọnyị ọlẹ lẹẹ ka! Ma, une ọlam-ọlam, ọ wẹẹ nọ lẹ!”

⁴⁰Ọọwa lẹ, alejida ịwẹ wuu a juwa hụlọ ẹhụ ju iJisọsị lẹlẹ. Ụka ọọwa, iJisọsị kwaa ịwa wuu rụ kpehe. Ọ wụrụ adịda bala ịnịna nya ọnyị ọọwa bala angịjụgbẹyị nyamwụ angị ịta ịlẹ kọ kpa ba ịlọmwụ lẹ, ị kele ka ẹpwụ nya ube ọlẹ kị ya ogu nya ọnyị ọọwa nọ lẹlẹ.

⁴¹Ọọwa lẹ, iJisọsị a yụbwọ chị ọnyị ọnyang ọọwa ụ-ụbwọ lẹ, ọ yẹkẹẹ, “ịTalịta, kụmị,” ọlẹ ká etu nyamwụ ri yẹkẹẹ, “Ọnyị onjwo ọnyang, m bying yẹkẹẹ, chahị ká wuleji lẹẹlẹẹ mẹ!”

⁴²Ọọwa lẹ, ọnyị ọnyang ọwẹ a chahị bwula igu, wuleji juwa jẹdịyẹ iijata-ijata lẹlẹ. Ọnyị ọnyang ọọwa gu ẹka iwo kụrụ imiiye lẹ. Ụka ká iru nya angịnyị ịwẹ chẹhị kaka yẹ kọ wuleji ịnyị lẹ, ọ laa ịwa wuu ahịbwuu ọtụka-ọtụka lẹlẹ.

⁴³Ma, iJisọsị gbilaa ịwa wuu ụbwọ ụ-ụrụ yẹkẹẹ, anụ nyị kpa ẹlẹwẹ ja oja ya je ọngọngọhẹ koo. Ụka ọọwa, iJisọsị byi adịda nya ọnyị ọọwa anyị yẹkẹẹ, “Anụ kele kaka ya ang oriri ha ọnyị ọnyang nyanụ ọwẹ ri mẹ.”