Read idege ỊMAKỊ 6 Bible Online

ỊMAKỊ 6 - idege bible

ỊMAKỊ 6

¹Ọọwa lẹ, iJisọsị a rụ bwu ẹgẹwẹ tịrẹkpẹ ka epweji nya ịlọmwụ lẹ, angịjụgbẹyị nyamwụ a bọọ kele ịnyịnyị lẹlẹ.

²Ụka ká Ẹnụtụrụ Ọhịnyọ Lụkụrwọ nya ala iJuu warị, ọ kele juwa mẹ ang jẹ angịnyị u-ube ọ-mẹ ẹla nya Ohe Oluhye jẹ nya ala iJuu ọlụwa. Iru nya angịnyị lụmẹ-lụmẹ juwa ụ-ụwa. Ụka kị wo ang ọmẹjẹ nyamwụ ọọwa, ọ laa ahịbwuu lụmẹ. I juwa yẹkẹẹ, “Ale, ọnyị ọlẹ a tị́ jẹ́ ang nyamwụ ịlẹ wuu bwu ịnyị? Ụma nya ẹla ọjẹ́jẹ ọtụka ọlanyị a tị́ wẹ ká Ohe Oluhye ya họọ ịnyị kpong-kpong? Anyị, ọ tị́ họ kọ jẹ́ jam họ iru nya ụkụrwọ ẹbyẹbyị ịtụka ịlịịwẹ wuu?

³Ọọnyị nya okebenta ọ-kọ ekeji ọlẹ a lẹẹ kaka? IMeri a ri ịnamwụ ka? Ọ-ọwa, anyịnamwụ alẹng anyị a ri iJemsi, iJosẹfụ, iJudasị bala ịSayịmọn kaka?” Ịnyị lẹ, abwọ a chị alụwa pyẹpyẹ la ọ-myị la iJisọsị lẹlẹ.

⁴Ọọwa lẹ, iJisọsị a byaa yẹkẹẹ, “Ọlọmwụ nya Ohe Oluhye kaa la ihi ẹ-ẹga myị́ ẹga. Kẹnẹ-kẹnẹ, alepweji nya ịlọmwụ ọwa bala alọdọdẹpwa nyamwụ bala aanamwụ mịlẹ-mịlẹ, a kaa jwoo ẹpẹ ụbwọọmwụ lẹlẹ.”

⁵IJisọsị á họ ụkụrwọ ẹbyẹbyị ju iru ị-ịNasareti ka. Kẹnẹ-kẹnẹ, alẹdụrụ ịmanyị-ịmanyị kem, iJisọsị a yụbwọ nyamwụ nịrọ ụ-ụwa, raabwọ jwaa lẹ, ị la gogo ụbwọọmwụ lẹlẹ.

⁶Ọmyịmyị ọlala-ka lụmẹ nya alepweji nya ịNasareti ọwẹ la iJisọsị ayịdang ahịbwuu lụmẹ kaka kpoye. Ọọwa lẹ, iJisọsị a rụ bwu ịNasareti juwa kaka mẹ ang jẹ alepweji ịkịla ịlẹ wuu kị dagaga ju ụwa lẹlẹ.

⁷Ọọwa lẹ, iJisọsị a be ẹkọ wụrụ angịjụgbẹyị nyamwụ angị iwo kụrụ imiiye kele kaka jịra lẹ, ọ daa ẹrụ kpehe angị imimiiye lẹlẹ. Ọ ya ọngịrị ọ-kpa ku alegu inyibyi dodehe myị́ haa.

⁸Ọ daa ehile yẹkẹẹ, “Anụ kpa ịngịngịhyẹ ba ịlọnụ dala ọgọdọ o-cheji nyanụ kaka. Anụ kpa ịkaa oriri lee ịbang ọ-ya ang ju lee okpoko ọhẹ-lọhẹ ẹ-ẹpwụ nya ang nyanụ kpong-kpong ka.

⁹Anụ kpa egbatẹ gbe ịlọnụ ẹkpẹ lee ịwụrụ ịkịla dala ịlẹ kanụ kpa u-uhye nya ịnyịrọ nyanụ kaka ịnyịnyị.”

¹⁰IJisọsị myịmyị byaa yẹkẹẹ, “Epweji myị́ epweji ọlẹ kanụ pwụ, ẹpwa nya ọng myị́ ọng ọlẹ kanụ ju ụga ụ-ụwa ene lẹ aalẹ, ẹ-ẹpwa ọọwa kem, anụ ka hụ pyịyọọ gbee pwụ ụka ọlẹ kanụ ka rụ bwu epweji ọọwa lẹlẹ.

¹¹Ma, ẹga myị́ ẹga ọlẹ wuu kanụ pwụ, ká alụwa á myị yenu ka ẹpwa nyaa ka lee ọ-myị ke ụrụ la ẹla oyaya nyanụ ka aalẹ, anụ wụ ọrụ nya ọpyị ọlẹpẹtẹ nyanụ hụrụ cheeji ụ-ụwa ene kanụ ka rụ bwu ụwa, chajị kọ ka ri ang ibeenu tụ alụwa pyịpyị mẹ.”

¹²Ịnyị, angịjụgbẹyị nya iJisọsị a rụ kpehe kele ịnyịlẹhị juwa ya ẹla nya Ohe Oluhye je angịnyị chajị kị ka yẹ irya da bwu ẹpwụ nya ịhọbịrị ịhọhọ nyaa lẹlẹ.

¹³Ịwa ayịdang ku alegu inyibyi dodehe bala o-juwa gu ida ọwụwụ tudu iru nya alẹdụrụ, raabwọ jwaa, haa uda ịnyịnyị.

¹⁴Ụka ọọwa, iHerọdụ ịgọvụnọ nya ala ịGalili wo jaabwọ kị juwa kpa ẹnyị nya iJisọsị ru ohi ju ka ẹga myị́ ẹga. Ụka ọọwa, angịhyẹ juwa ya ẹla rụ́ iJisọsị yẹkẹẹ, ịJọn, ọngọ hụ enyi Ohe nyaa wuleji bwula igu wẹ, du kịị nyị jẹ́ wẹẹ họ ụkụrwọ ẹbyẹbyị ịtụka ịlịịwẹ wuu myị́ lẹ.

¹⁵Ma, angịkịla juwa yẹkẹẹ, Ịlayịja ọlọmwụ nya Ohe Oluhye nyaa wẹ lẹ! Angị ịkịla nyaa juwa yẹkẹẹ, ọlẹng ọwẹ nyị ri ọlọmwụ nya Ohe Oluhye ọhẹ lala alọmwụ inyogo ịkịla.

¹⁶Ma, ụka ká iHerọdụ ayịdang wo oja nya iJisọsị ọọwa, ọ yẹkẹẹ, “ỊJọn ọngọ hụ enyi Ohe ọlẹ kaam i-iHerọdụ ọlẹ chị egbeju ugbeene, a wuleji bwula igu wẹ lẹlẹ.”

¹⁷IHerọdụ ya ịnyị, chajị ọwa kpangga a ri ọngọlẹ kọ du ẹrụ kele kaka wu ịJọn ọngọ hụ enyi Ohe, chọọ ori, hwọọ ju ka ube nya agba lẹ. IHerọdụ yẹ ịJọn akama ịnyị nyọka kpụ iHerodiyasị ịpyọ. IHerodiyasị ọọwa ri ahụ nya iFilipu ọnyịnịna ọlẹng nya iHerọdụ ene ká iHerọdụ nu iFilipu ọnyịnamwụ ọwẹ iHerodiyasị ahụ nyamwụ ye la ijẹẹhị.

¹⁸Ụka ọọwa, ịJọn ọngọ hụ enyi Ohe ọwẹ kaa kele kaka ya je iHerọdụ ịnyịnyịịnyị yẹkẹẹ, “IHerọdụ ee! Ọwẹ ká kele kaka nu iFilipu ọnyịnang ọlẹng ahụ nyamwụ ye wẹ la ijẹẹhị lẹ, ehile á myị ọnụ nya ọọwa kpong-kpong ka!”

¹⁹ỊJọn wụ iHerodiyasị ẹjẹ lụmẹ o-oluhye nya ẹla oyaya nya ịJọn ọwẹ kọ kpa ẹ-ẹpwụ. Lẹ, ọ ma iHerodiyasị ma ịnọ, kọ ka nwụ ịJọn. Ma, ọ́ tị họ ịnyị myị́ ka, ọ-ọlajị nya iHerọdụ ayịdang.

²⁰Chajị iHerọdụ la uhi ojuju ẹ-ẹga nya ịJọn lụmẹ, o-oluhye nyọlẹ kọọwa ayịdang ri ibeenu yẹkẹẹ, ịJọn ọwẹ nyị ri ọlabwẹla ọnyịịla lụmẹ bala o-ri ọngọ ịgọgọ nya Ohe Oluhye. Lẹ, iHerọdụ juwa kaa pyẹ achwọ nyamwụ ke ịJọn, chajị ká ọngọngọhẹ á ka họ ịJọn abwaabwọhẹ kpong-kpong ka. O-ri nya ịlẹhị, ẹla nya Ohe Oluhye oyaya nya ịJọn kaa gu iHerọdụ ọwẹ ugbodu ene lụmẹ ka kpoye. Ma, ọwa ayịdang tị kaa juwa ke ụrụ la ẹla nya ịJọn ọọwa ụka myị́ ụka wuu.

²¹Ụka kọ nụwa ịnyịnyịịnyị lẹ, ẹnụtụrụ ọlẹ ká iHerodiyasị ka wu ịJọn myị́ a pwụ eji lẹlẹ. Ẹnụtụrụ ọọwa ri ẹnụtụrụ nya ọ-chị ọkẹkẹnị ọ-kpa kpịtịya nya ọmama nya iHerọdụ. Ụka ọọwa, iHerọdụ họ ang oriri nya ọkẹkẹnị ọchịchị ọọwa wụrụ alegbeju alukido nya ịgọmenti nyamwụ wuu bala alegbeju ịgbahị nya ịsọja nyamwụ wuu kele kaka tụguru ụ-ụwa bala alegbeju ị-kụ ịlahị nya ala ịGalili wuu, juwa chị ọkẹkẹnị ọọwa tọọ.

²²Ọọwa lẹ, ọnyị ọnyang nya iHerodiyasị ọwẹ a juwa chewo hiigu-hiigu lẹ, ọ kpụ iHerọdụ ịpyọ lụmẹ bala angga nyamwụ ịwẹ wuu lẹlẹ. Ọọwa lẹ, adịrahụ iHerọdụ ọwẹ a byi ọnyị ọnyang ọọwa yẹkẹẹ, “Ọnyị ọnyịịla, a chewo hiigu lụmẹ. Lẹ, ang myị́ ang ọlẹ kọ háng ká bịlẹm aalẹ, m ka hu ang ọọwa dang ewo.”

²³IHerọdụ nwa iro byi ọnyị ọnyang ọwẹ yẹkẹẹ, “M jam myị ọnụ hang la iro ọnwanwa lẹ. Ang myị́ ang ọlẹ wuu kọ háng lẹ, a bịlẹm mẹ! Ọ́ dọmwụ ri ẹhya nya ịpyị adịrahụ nyam riri ká bịlẹ aalẹ, m ka hwoo hang lẹ.”

²⁴Ọọwa lẹ, ọnyị ọnyang ọwẹ a kele kaka tọ iHerodiyasị ịnamwụ wo yẹkẹẹ, “Ịmama, ịịyẹ m tị́ ka bịlẹ?” Ụka ọọwa, ịnamwụ wẹ byoo yẹkẹẹ, “Kele kaka bịlẹ egbeju nya ịJọn ọngọ hụ enyi Ohe mẹ!”

²⁵Ọọwa lẹ, ọnyị ọnyang ọwẹ a chagaga kele ka ẹga nya adịrahụ iHerọdụ kaka byoo yẹkẹẹ, “M tịtọ ká ka chị egbeju nya ịJọn ọngọ hụ enyi Ohe ju ọ-ọkpịla kpa wam wẹ ẹgẹlẹ lẹẹlẹẹ lẹ!”

²⁶Ọbịlẹ-bịlẹ nya ọnyị ọnyang ọọwa tọ iHerọdụ olujwo lụmẹ ka kpoye. Ma, chajị nyọlẹ kọọwa ayịdang tị nwa iro ha ọnyị ọwẹ wuu ene-ene i-ijata nya angga ilihi-ihi nyamwụ ịwẹ wuu lẹ, iHerọdụ á tịtọ kọ ka bịrị ọnụ ọmyịmyị ọọwa kaka.

²⁷Ọọwa lẹ, adịrahụ a be ẹkọ wụrụ ịsọja nyamwụ ọhẹ lẹ, ọ dọọ ehile yẹkẹẹ, nyị kaka chị ịJọn egbeju kpa warị mẹ lẹlẹ. Ọọwa lẹ, ịsọja ọọwa a rụ kele ka ube nya agba kaka chị ịJọn egbeju kpa kele kịlọọ ịnyịlẹhị lẹlẹ.

²⁸Ịnyị, iHerọdụ a hu egbeju nya ịJọn ọọwa ẹ-ẹpwụ nya ọkpịla ha ọnyị ọnyang ọwẹ lẹ, ọ ye kpa kele kịla iHerodiyasị ịnamwụ lẹlẹ.

²⁹Ụka ká angịjụgbẹyị nya ịJọn wo oja chajị nya igu ogbugbu nya ayịbaa lẹ, ị kele kaka hu eku nya ogu nya ịJọn, kpa rụ kaka ju eji lẹlẹ.

³⁰Ụka ká alẹrụ angị iwo kụrụ imiiye ịwẹ ká iJisọsị du ẹrụ kpehe nya kpá lẹ, ị juwa tịrọnụ nya ẹdịyẹ ya jọọ jaabwọ kị họ ụkụrwọ bala ọ-mẹ ang jẹ angịnyị kaka ba lẹlẹ.

³¹Ụka ọọwa, iru nya angịnyị lụmẹ-lụmẹ juwa kele warị wuru wuru gbee kị myị ha iJisọsị bala angịjụgbẹyị nyamwụ, ị la ụka ri ang oriri kpong-kpong kaka. Ịnyị, iJisọsị a byi angịjụgbẹyị nyamwụ yẹkẹẹ, “Anụ kẹwẹ kahị rụ hi ẹgẹlẹ kele ka ẹga ochinyee ọhẹ kaka hụhụ ụ-ụwa kanụ mwụ ịnyọ chẹẹ wẹẹ mẹ.”

³²Ọọwa lẹ, iJisọsị bala angịjụgbẹyị nyamwụ a ju ụmwụ nya enyi, juwa rụ ụbwaa ụbwaa kele ka ẹga ochinyee ọhẹ ịnyịlẹhị lẹlẹ.

³³Ma, ụka ká iru nya angịnyị lụmẹ-lụmẹ chẹhị kaka yẹ iJisọsị bala angịjụgbẹyị nyamwụ ẹ-ẹpwụ nya ụmwụ nya enyi, kị jáa ogu datị lẹ, ị rụnyẹ la ẹpẹtẹ bwu epweji la datị-datị ịlụwa gbee kị pwụ ụwa jene nya iJisọsị bala angịjụgbẹyị nyamwụ lẹlẹ.

³⁴Ụka ká iJisọsị gba kpehe bwu ẹpwụ nya ụmwụ nya enyi ọọwa, ọ yẹ iru nya angịlẹ kị juwa ẹ-ẹga ọọwa lẹlẹ. Ụka ọọwa, ahyẹẹrwẹrwa lụmẹ ẹ-ẹpwụ ọkịlẹtụ nyamwụ jahị daa. Chajị, ịwa ayịdang juwa chelele lala ịkpịlọ ịlẹ kị ye ọngọgbikpịlọ ọhẹ-lọhẹ juwa kpẹhị rịraa kaka. Ọọwa lẹ, iJisọsị a pyẹ ọnụ nyamwụ maa juwa mẹ iru nya ang lụmẹ-lụmẹ jaa ụ-ụwa lẹlẹ.

³⁵Ụka kị hụwa gbee ká obyi juwa ka hi lẹ, angịjụgbẹyị nya iJisọsị a kele kaka byoo yẹkẹẹ, “Ayịbahị, a tị́ yẹ jaabwọ ká odu wẹẹ ka hi lẹ, ugbileji, a tị lẹẹ lẹ.

³⁶Chajị nya ọọwa lẹ, Ayịbahị, byi angịlẹ wuu kị rụ kele ka epweji ịwẹ bala ẹpwa olodehe nyaa kaka ra ang oriri ha ịlaa ri ụ-ụwa mẹ!”

³⁷iJisọsị wẹ byaa yẹkẹẹ, “Anụ ayịdang bẹ? Anụ ya ang oriri haa ri mẹ!” Angịjụgbẹyị nyamwụ wẹ byoo yẹkẹẹ, “Ayịbahị, ọọwa ri yẹkẹẹ, a juwa tịtọ kahị ka hu akpa nya okpoko imiiye lẹpwụ-lẹpwụ kpa kaka ra ịkaa oriri ha angịlẹ lẹ?”

³⁸Ọọwa lẹ, iJisọsị a byaa yẹkẹẹ, “Abẹ nya ịkaa ịmanyị, anụ tị́ la juwa ene? Anụ kele kaka wụlaa yẹ wẹẹ.” Ụka kị kele lẹ, ị tịrẹkpẹ warị kaka byoo yẹkẹẹ, “Abẹ nya ịkaa ịrụ bala iyenyi imiiye a lẹẹ lẹ, Ayịbahị.”

³⁹Ịnyị, iJisọsị a da iru nya angịnyị ịịwa ehile yẹkẹẹ, nyị kele kaka hụhụ u-uhye nya amẹ ilekpo-lekpo ịlaanyị bẹẹbẹẹ ebwebweebwo mẹ.

⁴⁰Ọọwa lẹ, iru nya angịnyị ịịwa a hụhụ ebwebweebwo jaabwọ kọ ya lẹlẹ. Alebwo ọhẹ la angịnyị angị ohu ịrụ ọ-ọgba ọnyọnyọọnyị. Alebwo ọkịla la angịnyị angị ohu-iye kụrụ iwo ọ-ọgba ọnyọnyọọnyị ịnyịnyị.

⁴¹Ọọwa lẹ, iJisọsị a hu abẹ nya ịkaa ịrụ bala iyenyi imiiye ịịwa kpa ụ-ụbwọ lẹ, ọ hu ẹhị nyamwụ hwaa, kele ka epwoohe lẹ, ọ ji Ohe Oluhye obe ẹ-ẹpwụ nya abwọ ọrịrị lẹlẹ. Ọọwa lẹ, ọ gu ịkaa ọọwa ene lẹ, ọ hwọọ ha angịjụgbẹyị nyamwụ, nyị kpa kele kịla iru nya angịnyị ịịwa mẹ lẹlẹ. Ọọwa lẹ, ọ ga iyenyi imiiye ịịwa haa kpa kịla iru nya angịnyị ịịwa wuu ịnyịnyị lẹlẹ.

⁴²Ọọwa lẹ, iru nya angịịwa a ri ang oriri ọọwa wu ẹpwụ kpọng-kpọng lẹlẹ.

⁴³Ọọwa lẹ, angịjụgbẹyị nya iJisọsị a kele kaka go apwụ nya ịkaa bala iyenyi ihihi myị edo iwo kụrụ imiiye lẹlẹ.

⁴⁴Iru ojuju nya alẹng angịgbahị ịlẹpwụ nya angịlẹ kị ri ang oriri ọọwa wuu lala alẹng angị ụnọ ịrụ gbegbịlẹ

⁴⁵Ahyaahị ahyaahị, iJisọsị byi angịjụgbẹyị nyamwụ yẹkẹẹ, anụ nyị ju ụmwụ nya enyi ji ịlahị nya ọọwa kele ka ịBẹtịsayịda ụ-ụwa ọ-ọnụụka ọkịla nya ihu ọkịlọlọ ọọwa mẹ. Ọọwa lẹ, iJisọsị a byi iru nya angịnyị ịịwa, nyị rụ ka ẹpwa mẹ lẹlẹ.

⁴⁶Ụka ká iJisọsị da angịwẹ ọkpahị kpá wuu lẹ, ọ rụ kele ka uhye nya ọgbọdọ ọhẹ kaka raabwọ ha Ohe Oluhye lẹlẹ.

⁴⁷Lụka nya ẹnụ obyi nya ẹnụtụrụ ọọwa lẹ, ụmwụ nya enyi nya angịjụgbẹyị nya iJisọsị jẹ pwụ ẹpwarịrị nya ihu ọkịlọlọ ọọwa lẹ. Ma, iJisọsị ayịdang tị juwa ụbwọọmwụ-ụbwọọmwụ odehe nya Ihu ọọwa wẹẹ.

⁴⁸Ụka ọọwa, iJisọsị yẹ jaabwọ ká angịjụgbẹyị nyamwụ juwa yẹ akama nya ụmwụ ojuju nya ịlẹhị-ịlẹhị, chajị igbachịwụ ọtụka juwa da tụ ụmwụ nya enyi nyaa pyịpyị lụmẹ kaka kpoye. Ịnyị, lụka ọhẹ ẹ-ẹpwarịrị nya oje ịta nya odu bala oje ịrwọnyẹ nya ụtụrụ lẹ, iJisọsị a juwa jẹdịyẹ u-uhye nya ugbenyi nya ihu ọọwa lẹlẹ. Ọ juwa jẹ kele kịlahị-ịlahị lala o-ri yẹkẹẹ, nyị juwa ka chịpwụrụ waa wẹ rụ ka ẹgẹhẹ.

⁴⁹Ụka ká angịjụgbẹyị nya iJisọsị chẹhị kaka yọọ kọ juwa jẹdịyẹ u-uhye nya ugbenyi ịnyị lẹ, ị juwa chị eko lẹlẹ. Chajị, ị me irya yẹkẹẹ, ebyabwọ nyaa wẹ lẹ.

⁵⁰Chajị, ụka kị yẹ iJisọsị ịnyị lẹ, ọ laa ịwa wuu uhi-uhi lụmẹ kaka kpoye. Ọọwa lẹ, iJisọsị a ya ẹla taa ahyaahị yẹkẹẹ, “Anụ la ẹjẹ ọkpụ́kpụ mẹ! Am a lẹẹ lẹ. Anụ juhi kaka!”

⁵¹Ịnyị, iJisọsị a gba ju ka ẹpwụ nya ụmwụ nya enyi ọọwa ịnyịnyị lẹ, igbachịwụ ọọwa a kpụ ba kem lẹlẹ. Ụkụrwọ ẹbyẹbyị ọwẹ la angịjụgbẹyị nya iJisọsị ahịbwuu lụmẹ kaka kpoye.

⁵²Ang odudu kọ la angịjụgbẹyị nya iJisọsị ahịbwuu lụmẹ ịnyị, ri yẹkẹẹ, ịwa ayịdang á jẹ́ etu nya ụkụrwọ ẹbyẹbyị nya ịkaa bala iyenyi ọlẹ ká iJisọsị họ ene-ene i-ijata nyaa kpong-kpong ka. Chajị ọkịlẹtụ nyaa la dịyọ-dịyọ lụmẹ.

⁵³Ịnyị, ụka ká iJisọsị anyị pwụ ọnụụka oloye ọlaanyị nya ihu ọọwa lẹ, ị wu ụmwụ nya enyi nyaa godayị i-iGenesareti lẹlẹ.

⁵⁴Ụka kị gba kpehe bwu ẹpwụ nya ụmwụ nya enyi ọọwa lẹ, iru nya angịnyị ịlụwa a jẹ́ iJisọsị ogu ahyaahị lẹlẹ.

⁵⁵Ụka ọọwa, ẹga myị́ ẹga ká iJisọsị á ji o-oye nya ọpyị ọọwa wuu, ị juwa kpa oja nyamwụ ya je awụlẹ wuu. Ịnyị lẹ, iru nya angịnyị a juwa kpa alẹdụrụ u-uhye nya ang ọ-da nọnọ nyaa bwu ẹga myị́ ẹga ọlụwa kele ka ẹga nya iJisọsị kọ ka haa uda lẹlẹ.

⁵⁶Ẹga myị́ ẹga ọlẹ ká iJisọsị juwa jẹ bwu wuu, ó ri epweji ichiche lee epweji ịtụka bala ẹpwa olodehe wuu, iru nya angịnyị kaa kpa alẹdụrụ bọọ kele ka ojiya nya ihi nyaa wuu. I juwa bịlọọ yẹkẹẹ, ahụ nyị chuchuu kaahụ nyị myị ká alẹdụrụ ịwẹ nyị yụbwọ nyaa gu ụgbọọnụ nya awụrụ nyang chẹẹ mẹ! Ọọwa lẹ, alẹdụrụ ịlẹ wuu kị yụbwọ nyaa gu awụrụ nya iJisọsị ụ-ụwa, a la gogo ịnyị ịnyịlẹhị lẹlẹ.