Read idege ỊMAKỊ 7 Bible Online

ỊMAKỊ 7 - idege bible

ỊMAKỊ 7

¹Ụka ọọwa, ala ịFarịsii bala ịtịcha ị-mẹ ehile nya iMosisi jẹ ịhyẹ bwu iJerusalẹm kele kaka jịra ẹ-ẹga nya iJisọsị.

²Ụ-ụwa, ala ịFarịsii anyị ịwẹ yẹ jaabwọ ká angịjụgbẹyị nya iJisọsị bịrị ehile nya ịgọgọ ọlala nyaa, chajị nyọlẹ ká angịjụgbẹyị ịịwa á myị kpa enyi nyi ịlọ hụ́ abwọ nyaa ene kị juwa ri ang oriri kpong-kpong ka.

³Chajị ala ịFarịsii ịwẹ bala ala iJuu ịkịla wuu lẹ, ị́ kaa ri ang oriri nyaa kpong-kpong ka aalẹ, ị́ kpa enyi nyi ịlọ hụ́ abwọ nyaa wuu, jaabwọ ká ehile nya adaa igogo ya, nyị họ ene lẹ mẹ ịnyị.

⁴Ụka kị nya bwu ihi, ị́ kaa ri ang oriri kpong-kpong ka. Aalẹ, ị kpa enyi nyi ịlọ hụ́ ịlaa ene lẹ, mẹ ịnyị. Ị la ehile ọ-kpa nyi enyi ịlọ hụ́ ukoku ọ-kpa nwa enyi lee ịta nya enyi bala ịja nyaa wuu, tụ ang ọ-da nọnọ nyaa.

⁵Ịnyị, ala ịFarịsii bala ịtịcha ị-mẹ ehile nya iMosisi jẹ ịịwa a tọ iJisọsị ịtọ yẹkẹẹ, “Ayịbahị ịtịcha, ịịyẹ a tị́ du ká angịjụgbẹyị nyang pwa ọ-ba ọmẹjẹ nya ehile nya adahị igogo anyị jẹ, du kị kaa myị-ị kpa enyi nyi ịlọ hụ́ abwọ nyaa kpong-kpong ene kị kaa ri ang oriri nyaa ka ịnyị?”

⁶IJisọsị wẹ byaa yẹkẹẹ, “Ọọwa ri yẹkẹẹ, ẹla ọlẹ ká Ayịsaya yẹ ọmwụ nyamwụ u-uhye nya angị ri alahị imiiye ugbeene lẹ, ọ ri nya ịlẹhị ẹ-ẹga nyanụ lẹ. Chajị Ohe Oluhye ya ẹla bwu ọnụ nya Ayịsaya yẹkẹẹ, ‘Angịlẹ jam kpa ẹlẹlẹ nyaa kem ụbwọọmwụ jum Am Ohe Oluhye ihi. Ma, ọkịlẹtụ nyaa ịwa ayịdang tị ji lụrụ pyiipyii, hi ẹga kam ji.

⁷Abwọ ọrịrị bala ịgba ọgbagba ham Am Ohe Oluhye nyaa, á ju apyobwuna ọhẹ-lọhẹ kpong-kpong ka. Chajị, ịwa ayịdang juwa mẹ ehile nya angịnyị ehe kem jẹ ku ọmwakpa nya ehile nyam Am Ohe Oluhye.’

⁸“Chajị anụ juwa tụụbwọ hi ụgbẹyị nya ehile nya Ohe Oluhye ọbajẹ deeji, mwọọgịlẹ juwa ba ọmẹjẹ nya angịnyị ehe kem jẹ ịnyịlẹhị jaabwọ ká Ayịsaya ya lẹ.”

⁹IJisọsị myịmyị byaa yẹkẹẹ, “Anụ ayịdang jẹ́ jaabwọ kanụ kaa kpa ijẹẹhị tụụbwọ hi ụgbẹyị nya ehile nya Ohe Oluhye ọbajẹ, chajị kanụ ka jẹ́-ẹ juwa ba ụgbẹyị nya ehile nya ịlọnụ anụ kem jẹ.

¹⁰Chajị iMosisi danụ ehile yẹkẹẹ, ‘Anụ ju ihi nya adanụ bala ịnanụ. Ọng myị́ ọng ọlẹ kọ ka juwa yẹhị da adamwụ lee ịnamwụ bwee, kọ juwa ya achala taa aalẹ, ị ka nwụ ọngọọwa daarụ pyii.’

¹¹Ma, anụ tị mwọọgịlẹ, juwa mẹjẹ angịnyị yẹkẹẹ, ó-ri ká ọngịnyị ehe nyị́ la ang juwa, ịnọ, nyọka kpa da ịnamwụ lee adamwụ ụbwọ myị́, kọ ri ká ọngọọwa nyị́ byi adamwụ anyị ịịwa yẹkẹẹ, ‘Ang ọlẹ, ịnọ, kam lẹẹ ka ya hang lẹ, ọ ri ịkọọban lẹ.’ Etu nya ịkọọban ri, ‘M hwoo ha Ohe Oluhye lẹ.’

¹²Ọọwa lẹ, anụ kaa wọọnụ ha ọngọọwa nyọka hu ang ọọwa da adamwụ lee ịnamwụ ụbwọ ụka ọọwa kpong-kpong kaka lẹlẹ.

¹³Bwula agbayị ịlịịwẹ wuu, anụ kaa kpa tụụbwọ hi ihi nya ẹla nya Ohe Oluhye ojuju deeji lẹ, anụ mwọọgịlẹ, juwa ba ọmẹjẹ nya adanụ igogo anyị ịlẹ kị ya danụ e-eji jẹ, juwa maa jẹ angịkịla ịnyịnyị dachichi lẹlẹ. Iru nya ang ịkịla ịlịịwẹ ịlẹ kị kaa tụ ẹla nya Ohe Oluhye pyịpyị lụmẹ a ri ang ịlẹ kanụ kaa họ ịnyịnyịịnyị lẹ.”

¹⁴Ụka ọọwa, iJisọsị myịmyị be ẹkọ wụrụ iru nya angịnyị ịlụwa ya ẹla taa yẹkẹẹ, “Anụ angịnyị ehe wuu, anụ ke ụrụ lam pịlẹẹ, kanụ wo ẹla ọlẹ myịmyị mẹ.

¹⁵Aang ọlẹ kọ kaa bwu odehe ka ẹpwụ nya ọngịnyị a kaa kpịla ịgọgọ ọlala nya ọngịnyị ehe ahị ị-ịlahị nya Ohe Oluhye ka. Ma, ang onyobyi ọlẹ kọ kaa bwu ẹpwụ nya ọkịlẹtụ nya ọngịnyị ehe kpehe, a kaa bịrị ịgọgọ ọlala nyamwụ ị-ịlahị nya Ohe Oluhye lẹ. [

¹⁶Ọng myị́ ọng ọlẹ kọ ju ụrụ nya ọ-kpa wo ẹla lẹ aalẹ, ọngọọwa a wo etu nya ẹla ọlẹ mẹ!]”

¹⁷Ụka ká iJisọsị rụ bwu ẹga nya iru nya angịwẹ kele ka ẹpwang, angịjụgbẹyị nyamwụ bọọ kele kaka tọọ ịtọ chajị nya oja ọkpịta ọwẹ.

¹⁸IJisọsị wẹ byaa yẹkẹẹ, “Ahyu! Ọ ri yẹkẹẹ, anụ ayịdang á tụtụm wo ẹlẹwẹ myịmyị ka ịnyịnyị lala angịkịla? Ánụ́ jẹ́ ịnyịlẹhị yẹkẹẹ, a-ang o-bwu odehe ka ẹpwụ nya ọngịnyị ehe nyaa kaa chị ịgọgọ ọlala nyamwụ ịrị ị-ịlahị nya Ohe Oluhye ka lẹ ka?

¹⁹Chajị ang oriri ọlẹ ká ọngịnyị ehe kaa ri ka ẹpwụ nyamwụ lẹ, ang oriri ọọwa á kaa ka ẹpwụ nya ugbodu okpukpuru nyamwụ ka. Ma, ẹ-ẹpwụ, ọ kaa ri ang oriri ọọwa ju ka, ene kọ kaa chịpwụrụ kpehe bwu igbeene nyamwụ lẹ.” Bwula ẹla oyaya nya iJisọsị ọọwa, ọ họ kahị jẹ́ yẹkẹẹ, ang oriri ọnyị myị ọnyị wuu chịla ọ-ka riri nya ọngịnyị ehe lẹ.

²⁰Ọọwa lẹ, iJisọsị a byaa yẹkẹẹ, “Ang onyobyi ọlẹ kọ kaa bwu ẹpwụ nya ọkịlẹtụ nya ọngịnyị ehe kpehe, a kaa bịrị ịgọgọ ọlala nyamwụ ị-ịlahị nya Ohe Oluhye lẹ!

²¹Chajị ẹpwụ ọkịlẹtụ nya ọngịnyị ehe kpangga, ang inyibyi ịhọhọ ịlịịlẹ wuu a kaa da emyo bwu kpehe lẹ. Irya inyibyi imeme, ụya ọhọhọ, oyi oyiyi, ọngịnyị ehe ọnwụnwụ, ẹla-ahụ ọdada,

²²imajẹ ọlala, ọkwọ ọlala, ijẹẹhị ọ-kpa pịrị ọngịnyị ju, ang onyobyi oyọngọ-yọngọ ọhọhọ, olegu nya ijiiji onyobyi ọlala, ẹla onyobyi oyaya bịrị ọngọkịla, ịlọng ọ-kpa ka uhye bala ẹla nya oluchi ọhọhọ.

²³Ang inyibyi ịhọhọ ị-lala ịlịịwẹ wuu a ri ang ịlẹ kị kaa bwu ẹpwụ nya ọkịlẹtụ nya ọngịnyị ehe kpehe lẹ. Ịngịịwẹ a tị kaa chị ịgọgọ ọlala nya ọngịnyị ehe ịrị ị-ịlahị nya Ohe Oluhye lẹlẹ.”

²⁴Ụka ọọwa, iJisọsị rụ bwu ẹgẹwẹ kele koye nya ọpyị ọhẹ ọlẹ kọ ju epweji nya ịTaya [bala ịSayịdọn] chwẹẹ. IJisọsị jụ kele ka ẹpwụ nya ube ọhẹ ụ-ụwa. Ịnọ, ọ́ tịtọ kị ka jẹ́ yẹkẹẹ, nyị juwa ka. Ma, angịnyị tị jẹ́ yẹkẹẹ, iJisọsị nyị juwa ụ-ụwa.

²⁵Ọnyang ọhẹ juwa ọlẹ ká olegu onyobyi wu ọnyị ọnyang ochiche nyamwụ. Ahyaahị kọ wo yẹkẹẹ, iJisọsị nyị juwa ụ-ụwa lẹ, ọ kele kaka hịda keji i-ijata nya iJisọsị lẹlẹ.

²⁶Ọnyang ọwẹ ri ala iGirisi ọlẹ kị ma e-epweji nya iFonichiya ọlọpyị nya iSiriya. Ọnyang ọọwa juwa bịlẹ iJisọsị yẹkẹẹ, nyị chuchuu kịị nyị ku olegu onyobyi ọọwa dodehe hi ọnyị nya ọọwa mẹ.

²⁷Ma, iJisọsị wẹ byoo yẹkẹẹ, “Ọnyang, ba hi anyị anjwo ịlọdọdẹpwa kị ri ang oriri nyaa mẹ. Chajị, ọ́ chịla kị ka hu ang oriri ọlam-ọlam nya anyị anjwo ha ibwu ri kpong-kpong ka.”

²⁸Ma, ọnyang ọwẹ wẹ byi iJisọsị yẹkẹẹ, “Ọngọlahị, á me ọnụ ka. Ẹla nya ịlẹhị a wẹ ká ya lẹ. Ma, ibwu tị kaa yile apwụ nya ang oriri ịlẹ kị chabwọ bwu uhye nya itebwuru nya anyị ịlọdọdẹpwa ri ịnyịnyị myị́, ịnọ, tị!”

²⁹IJisọsị wẹ byoo yẹkẹẹ, “Ọnyang, bwula ọwẹwẹ nyang ọwẹ, rụ ka ẹpwa mẹ! Chajị olegu onyobyi gba kpehe hi ẹpwụ nya ọnyị ọnyang nyang ọọwa lẹ.”

³⁰Ọnyang ọwẹ rụ kele ka ẹpwa kaka yẹ ọnyị ọnyang nyamwụ ọọwa nọnọ nụwa ị-ịbẹẹdị onune nyamwụ. Chajị, olegu onyobyi ọọwa gba kpehe hi ẹpwụ nyamwụ ịnyịlẹhị lẹ.

³¹Ụka ọọwa, iJisọsị rụ bwu ọpyị oloye nya epweji nya ịTaya lẹ, ọ chịpwụrụ bwu epweji nya ịSayịdọn kele ka Ihu ọkịlọlọ nya ịGalili lẹlẹ. Ọ chịpwụrụ bwu ọpyị nya iDikapọlisi ọlẹ kị wụrụ “Epweji iwo chiriri” ịnyịnyị ene kọ pwụ ịGalili.

³²Ụka ọọwa, angịhyẹ kpa ọlẹng ọhẹ ọlẹ kọ ri ọngọ kpịla bala ọngọ ku ọnụ warị wẹ ẹga nya iJisọsị, juwa raabwọ họọ yẹkẹẹ, nyị chuchuu kịị nyị yụbwọ nịra ọlẹdụrụ ọọwa kịị nyị raabwọ jwọọ ha ịwa mẹ.

³³Ụka ká iJisọsị yụbwọ chị ọlẹng ọọwa kpa kele ka ọka hi ẹpwụ nya iru nya angịnyị ịịwa lẹ, ọ ya akachụ dụrụ ka ẹpwụ nya arụ nya ọlẹng ọọwa lẹ, ọ chị́ ide da ụkụchụ kpa kaka gwọọ ẹ-ẹlẹlẹ ịnyịnyị lẹlẹ.

³⁴Ụka ká iJisọsị hu ẹhị nyamwụ hwaa kele ka epwoohe, ọ chaarụ gboo ọtụka-ọtụka. Ọ byi ọlẹdụrụ ọwẹ yẹkẹẹ, “Ẹfata.” Etu nya Ẹfata ri yẹkẹẹ, “Wụrụ mẹ!”

³⁵Ịnyị lẹ, arụ nya ọlẹng ọwẹ a wụrụ hwoo lẹ, ọkụrụ nya ẹlẹlẹ nyamwụ a yi da ịnyịnyị lẹ, ọ jẹ́ wo ẹla bala ọ-jẹ́ juwa ya ẹla myị́ lẹlẹ.

³⁶Ụka ọọwa, iJisọsị gbile alụwa wuu ụbwọ ụ-ụrụ nya ịlẹhị-ịlẹhị yẹkẹẹ, nyị kpa ụkụrwọ ẹbyẹbyị ọọwa ja oja ya je angịnyị koo! Ma, ọkọkọ nyọka wo ụbwọ ogbile ụ-ụrụ nyamwụ ọọwa lẹ, ị dachichi mwọọgịlẹ juwa kpa ya pyẹ ju ka ẹga myị́ ẹga gụ olene.

³⁷Ọọwa lẹ, ọ la iru nya angịnyị ịlụwa wuu ahịbwuu ọtụka-ọtụka lẹlẹ. I juwa kpa ya, byi awụlẹ yẹkẹẹ, “Ahyu! Anụ chẹhị kaka yẹ ụma nya ang ọnyịịla ọlẹ ká ọnyị ọlẹng ọlẹ lẹẹ họ alẹ wẹẹ! Ọ họ ká angị kpịla jẹ́ juwa wo ẹla lẹ. Ọ myịmyị họ ká angị ku ọnụ jẹ́ juwa ya ẹla ịnyịnyị lẹ.”