Read idege ỊMAKỊ 9 Bible Online

ỊMAKỊ 9 - idege bible

ỊMAKỊ 9

¹IJisọsị myịmyị byaa yẹkẹẹ, “Nya ịlẹhị-ịlẹhị, m byinu yẹkẹẹ, angịhyẹ jam ẹ-ẹgẹlẹ lẹẹlẹẹ, kịịwa ayịdang á ka yẹhị gu igu kpong-kpong ene kị dọmwụ ka yẹ ụka ọlẹ ká ịpyị nya Adịrahụ nya Ohe Oluhye ka warị la ọngịrị kaka.”

²Ụka ká ẹnụtụrụ ịrwọnyẹ chịpwụrụ kam kpá, iJisọsị be ẹkọ wụrụ iPita, iJemsi bala ịJọn. Ọ kpaa ba ịlọmwụ kele ka uhye nya ọgbọdọ ọtụka ọhẹ ụbwaa-ụbwaa. Ụka ọọwa lẹ, iJisọsị a yẹda abwụma ọkịla wuu myị́ ịnyịrọ-ịnyịrọ i-ijata nya angịjụgbẹyị nyamwụ ịwẹ lẹlẹ.

³Ụka ọọwa, awụrụ ọlịnyịrọ nya iJisọsị yẹda pwowuru keri-keri lụmẹ gbee, kị ka jẹ́-ẹ ye ịngịngịhyẹ ọkịla opwowuru ọlịnyị odehe ọlẹ ka chwọọ kaka pwoku kpong-kpong kaka.

⁴Ịnyị lẹ, angịjụgbẹyị nya iJisọsị angị ịta ịwẹ a chẹhị kaka yẹ jaabwọ ká iMosisi bala Ịlayịja hi ehe gẹgịlẹgẹ ụ-ụwa, juwa ya ẹla ta iJisọsị lẹlẹ.

⁵Ọọwa lẹ, iPita a byi iJisọsị yẹkẹẹ, “Ayịbahị, ọ ri ang ọnyịịla lụmẹ chajị nyọlẹ kahị lẹẹ ẹgẹlẹ lẹẹlẹẹ. Ó-ri kaahụ ayịdang á ka myị, ịnọ, ahị nwụ́ adaa ịlịgọgọ ịta ám ẹ-ẹgẹlẹ mẹ! Ụdaa ọhẹ á ri nyang, ká ọkịla á ri ịnya iMosisi lẹ, ká ụdaa ọhata a ri ịnya Ịlayịja ịnyịnyị mẹ.”

⁶Jaabwọ kịịwa wuu myị la uhi ojuju ọtụka-ọtụka nya ịlẹhị-ịlẹhị lẹ, iPita ayịdang á jẹ́ ụma nya ẹla ọlẹ kọ ka ya datị kaka. Ọọwa lẹ, ọ wẹẹ ya alaaga nya uhi ojuju ịịwẹ lẹlẹ.

⁷Ụka ọọwa, egbamwụ ọtụka-ọtụka ọhẹ chị kụrwaa ịwa wuu ụ-ụwa. Ụka ọọwa, omyi ọhẹ juwa ya ẹla bwu ẹpwụ nya egbamwụ ọọwa dodehe yẹkẹẹ, “Ọngọlẹ a ri Ọnyẹwẹ olikẹjẹ nyam am ayịdang lẹlẹ. Anụ angịnyị ehe, anụ́-ụ wo omyi nyamwụ mẹ.”

⁸Ịnyị lẹ, ahyaahị lụka ọ-mwaa lẹ, angịjụgbẹyị nya iJisọsị ịwẹ a yọyị dagaga ju wuu lẹ, ị yẹ ọngọngọhẹ ụ-ụwa dala iJisọsị ayịdang kem kaka lẹlẹ.

⁹Ịnyị, ụka kị juwa hireji bwu uhye nya ọgbọdọ ọọwa lẹ, iJisọsị a gbile angịjụgbẹyị nyamwụ ịịwa ụbwọ ụ-ụrụ nya ịlẹhị-ịlẹhị, yẹkẹẹ, nyị ya ẹlẹlẹhẹ je ọngọngọhẹ u-uhye nya ang ọwẹ kịị nyị yẹ wẹ a-arụrụ kpong-kpong ka, gbee pwụ ụka ọlẹ ká Ọnyị nya ọngịnyị ehe ayịdang nyị ka gbu, wuleji bwula igu juwa hịhị kpá wuu ene mẹ.

¹⁰Ọọwa lẹ, angịjụgbẹyị nya iJisọsị ịwẹ a ju ihi nya ụbwọ o-gbile ụ-ụrụ nya iJisọsị ọọwa lẹ, ị ya je ọngọngọhẹ kaka lẹlẹ. Ma, jaabwọ kịịwa ayịdang á tị jẹ́ etu nya ang ọlẹ ká owuleji bwula igu ọọwa ri kpong-kpong ka lẹ, ị juwa kpa ẹla ọọwa dọnụ wẹ awụlẹ ịnyịnyịịnyị.

¹¹Ịnyị, angịjụgbẹyị nyamwụ ịwẹ a tọ iJisọsị wo yẹkẹẹ, “Ee lẹ, ịịyẹ a tị́ du ká Ịtịcha ị-mẹ ehile nya iMosisi jẹ juwa yẹkẹẹ, Ịlayịja nyị tịtị ka warị myịmyị jene nya ịKịrayịsị ọọwa ọlẹ ká Ohe Oluhye nyị ka du warị?”

¹²IJisọsị wẹ byaa yẹkẹẹ, “Ee, ịnyịlẹhị ịnyị! Ịlayịja juwa ka jene-jene warị kaka nwụla ang wuu nọ ene nya ụka. Ma, ọlẹ ká Ụpwụ Ịgọgọ ya dodehe u-uhye nya ụma nya akama ọlẹ ká Ọnyị nya ọngịnyị ehe ka yẹ bala jaabwọ ká angịnyị ka pwọọ, ji ẹkpẹ nyaa dọọ tị bẹ?

¹³Anụ wo mẹ! Am jam byinu yẹkẹẹ, Ịlayịja ọọwa ayịdang dọmwụ warị jam ene-ene lẹ! Ma, jaabwọ ká ala iJuu anyị á tị jẹ́ Ịlayịja ọọwa ogu datị ka lẹ, ị juwa họọ ang onyobyi jaabwọ kọ háa. Ọhọhọ nyaa ọọwa ri ọ-họ jịra nya ẹla ọlẹ ká Ụpwụ Ịgọgọ ya ene-ene.”

¹⁴Ụka ká iJisọsị bala alẹdịyẹ nyamwụ pwụ ẹga nya angịjụgbẹyị nyamwụ ịkịla ihihi, ị yẹ iru nya angịnyị lụmẹ-lụmẹ kị jịra ụ-ụwa. Angịhyẹ ịlẹpwụ nya ịtịcha ị-mẹ ehile nya iMosisi jẹ juwa da ịwẹẹ ta angịjụgbẹyị nya iJisọsị ịlẹ kị hi juwa ẹ-ẹga ọọwa.

¹⁵Ahyaahị ká iru nya angịnyị ịwẹ chẹhị kaka yẹ iJisọsị, ọ laa ahịbwuu lụmẹ. Ọọwa lẹ, ị juwa rụnyẹ kele kaka da ọnụ chọọ lẹlẹ.

¹⁶IJisọsị tọ angịjụgbẹyị nyamwụ ihihi ịịwa wo yẹkẹẹ, “Ẹẹla ịyẹ, anụ bala ịtịcha ị-mẹ ehile nya iMosisi jẹ a tị́-ị da ịwẹẹ u-uhye nyamwụ?”

¹⁷Ụka ọọwa, ọlẹng ọhẹ bwu ẹpwụ nya Iru nya angịnyị ịịwa wẹ byi iJisọsị yẹkẹẹ, “Ayịbahị ịtịcha, am kpa ọnyị ọlẹng nyam ọlẹ warị wẹ ẹga nyang, chajị olegu onyobyi wọọ lẹ, ọ ku ọnụ.

¹⁸Ụka ká olegu onyobyi ọọwa á wẹ lọọ ene lẹ, ọ kaa kpọọ rị ebilo tụ ịpyị-ịpyị da. Lẹ, ọ kaa ru awụụ kwịnụ chụchụchụ, juwa wangịrị nyamwụ, juwa nịra kpakpakpa lọọ nyiri dẹyị-dẹyị lẹlẹ. M tị kpọọ warị wẹ ẹga nya angịjụgbẹyị nyang, ịnọ, kị ka ku olegu onyobyi ọọwa dodehe hyoo lẹ, ị́ jwọọ họ myị́ kaka!”

¹⁹Ụka ọọwa, iJisọsị yẹkẹẹ, “Anụ aloyi nya alichẹnẹ ị-la ọmyịmyị-ka la ọmyịmyị-ka ịwẹ lee! Anụ tị́ tịtọ kam ka hụ tanụ tata kaka ba anyị ene kanụ ka la ọmyịmyị mẹ? Anyanyị, anụ tị́ tịtọ kam ka ju ugbodu tanụ tata kaka ba ene kanụ ka la ọmyịmyị mẹ?” Ọọwa lẹ, ọ byi adịda ọ-ma ọnyị ọwẹ yẹkẹẹ, “Kpa ọnyị nyang warị wẹ ẹgẹlẹ mẹ, ẹnwa!”

²⁰Ọọwa lẹ, ị kpa ọnyị ọwẹ kele ka ẹga nya iJisọsị lẹlẹ. Ahyaahị ká olegu onyobyi ọọwa chẹhị kaka yẹ iJisọsị lẹ, ọ hu ọnyị ọọwa mileji, juwa kpọọ rị ebilo biri-biri ị-ịpyị, juwa ru ọnyị awụụ kwịnụ chụchụchụ lẹlẹ.

²¹Ụka ọọwa, iJisọsị tọ adịda ọ-ma ọnyị ọwẹ wo yẹkẹẹ, “Ẹdụrụ ọlẹ tị́ kpa ọnyị nyang ọwẹ tata kaka ba anyị?” Adịda ọ-ma ọnyị ọọwa wẹ byoo yẹkẹẹ, “Ọ kpọọ bwu enjwo-enjwo lẹ.”

²²Adịda ọwẹ myịmyị yẹkẹẹ, “Ụka myị́ ụka ká olegu onyobyi ọwẹ á ka wẹ lọọ ene lẹ, ọ kaa kpọọ rị ebilo ị-ịpyị biri-biri kaka ju ka ẹpwụ nya ila lee ẹpwụ nya enyi, juwa tịtọ nyọka ta ọhịhị nyamwụ ayịreji. Lẹ, ó-ri ká ịngịngịhyẹ á ji, ọlẹ ká ka họ u-uhye nyamwụ myị́ lẹ aalẹ, a chuchuu ká dahị ụbwọ ká họọ uda hahị mẹ, adam!”

²³IJisọsị wẹ byoo yẹkẹẹ, “Ó-ri kaahụ ayịdang á myị, la ọkịlẹtụ ookpokpo lẹ aalẹ, ọ́ ka ri ẹla kaka. Chajị ang wuu chịkpẹẹ ha ọngọ la ọmyịmyị la ọkịlẹtụ ookpokpo.”

²⁴Ụka ọọwa, adịda ọ-ma ọnyị ọọwa ya gboo ahyaahị yẹkẹẹ, “M myị lang lẹ, Ọngọlahị! Da ọmyịmyị ọlala gbuu-ka nyam ụbwọ mẹ!”

²⁵Ụka ká iJisọsị chẹhị yẹ iru nya angịnyị kị juwa tụ kele ka ẹga nyaa gbiriri lẹ, iJisọsị a kpa ịkata da olegu onyobyi ọwẹ ehile yẹkẹẹ, “Ahụ olegu nya ọnụ okuku bala ịla ọkpụkpụ, gba kpehe bwu ẹpwụ nya onjwo ọlẹng ochiche ọlẹ lẹẹlẹẹ, ká myịmyị tịrẹkpẹ kaka!”

²⁶Ịnyị, ụka ká olegu onyobyi ọọwa chị eko gboo lẹ, ọ juwa họ ọnyị hiko-hiko nya ịlẹhị-ịlẹhị, juwa chọọ ninini, nyiri dẹyị-dẹyị lala ogu lẹlẹ. Ọọwa lẹ, olegu onyobyi ọwẹ a gba kpehe hyọọ lẹlẹ. Ụka ọọwa, angịnyị wuu juwa yẹkẹẹ, “Ọnyị ọwẹ gbu lẹ!”

²⁷Ọọwa lẹ, iJisọsị a yụbwọ chị onjwo ochiche ọlẹng ọwẹ ụ-ụbwọ lẹ, ọ wulọọ eji godayị kọkọ lẹ, ọnyị ọwẹ a wuleji la gogo hiigu-hiigu lẹlẹ.

²⁸Ụka kịịwa ayịdang rụ ka ẹpwang ọhẹ, angịjụgbẹyị nya iJisọsị tọọ ịtọ ị-ịbaa-ịbaa yẹkẹẹ, “Ayịbahị, ịịyẹ a tị́ du kahị ku olegu onyobyi ọwẹ dodehe myị́ ka?”

²⁹IJisọsị wẹ byaa yẹkẹẹ, “Ọngịrị nya abwọ ọrịrị ha Ohe Oluhye [bala olimyi ọnọnọ ha Ohe Oluhye] ụbwọọmwụ kẹnẹ-kẹnẹ, ị jẹ́-ẹ kpa ku alegu inyibyi ịlịịwẹ dodehe myị́ lẹlẹ.”

³⁰Ụka kị rụ bwu ẹgẹwẹ, ị jẹ chịpwụrụ bwu ịpyị nya ịGalili. Ụka ọọwa, iJisọsị ayịdang á tịtọ ká ọngọngọhẹ ọkịla ka jẹ́ ẹga kọ ji datị ka.

³¹Chajị, ọ juwa kpa ang mẹjẹ angịjụgbẹyị nyamwụ kem. Ọ byaa yẹkẹẹ, “Ị tụbwọọ juwa ka pịrịm am Ọnyị nya ọngịnyị ehe ọlẹ ha ka ẹpwụtụbwọ nya angị inyibyi ịlẹ kị ka nwụm lẹ. Ma, m tị ka wuleji bwula igu lẹnụtụrụ ọhata, juwa hịhị myịmyị.”

³²Ma, ụka ọwẹ lẹ, angịjụgbẹyị nya iJisọsị ayịdang á jẹ́ etu nya ang ọmẹjẹ ọọwa lẹka. Ma, ọ tị laa uhi-uhi lẹ, ị́ bị ẹjẹ tọ iJisọsị ịtọ myị́ ka.

³³Ụka ká iJisọsị bala angịjụgbẹyị nyamwụ tịrẹkpẹ rụ kele ka epweji nya ịKapẹnawụm, kị juwa u-ube ọhẹ, iJisọsị taa wo yẹkẹẹ, “Ẹẹla ịyẹ, anụ tị́ lẹẹ kpa da ịwẹẹ ta awụlẹ ụ-ụgbẹyị igbinọ?”

³⁴Ma, ịwa wuu hu iJisọsị ujiji kpini-kpini. Chajị ang ọlẹ kị da ịwẹẹ u-uhye nyamwụ ụ-ụgbẹyị ri, ọngọlẹ kọ ka ri ọngọ ọgụgụ wuu ẹ-ẹpwarịrị nyaa.

³⁵Ịnyị, ụka ká iJisọsị hụhụ ụ-ụwa lẹ, ọ be ẹkọ wụrụ angịjụgbẹyị nyamwụ angị iwo kụrụ imiiye ịwẹ lẹ, ọ byaa yẹkẹẹ, “Ọng myị́ ọng ọlẹ kọ tịtọ kọọwa a ka ri ẹngịrị ọ-kụ ịlahị nyanụ wuu lẹ aalẹ, ọngọọwa a hu ịlọmwụ lala ọnchẹ ọ-myị ẹrụ nyanụ, anụ angịkịla wuu mẹ.”

³⁶Ọọwa lẹ, iJisọsị a kpa ọnyị onjwo ochiche ọhẹ kaka godayị rịrị ị-ịlahị nyaa lẹlẹ. Ụka kọ tụ ọnyị onjwo ochiche ọọwa jwẹjẹ lẹ, ọ byaa yẹkẹẹ,

³⁷“Anụ wo mẹ! Ọng myị́ ọng ọlẹ kọ ka kpa ẹnyị nyam, ye ọnyị onjwo ochiche ọhẹ-lọhẹ ọlịịlẹ la okpunyi lẹ aalẹ, am ayịdang, a wẹ ká ọngọọwa wẹẹ pẹ ẹpwa lẹlẹ. Ọng myị́ ọng kọ tị́ pẹm ẹpwa lẹ aalẹ, ám ụbwọm kem a wẹ kọ pẹ ẹpwa kaka. Aalẹ, ọngọọwa pẹ ọngọlẹ kọ dum ẹrụ warị wẹ odehe ọlẹ ẹpwa ịnyịnyị lẹ.”

³⁸ỊJọn byi iJisọsị yẹkẹẹ, “Ọngọlahị, yẹ mẹ! Ụka kahị chẹhị kaka yẹ ọlẹng ọhẹ kọ juwa kpa ẹnyị nyang ku alegu inyibyi dodehe lẹ, ahị hu ọngọọwa abwọ, chajị nyọlẹ kọ ri alogu nyahị ka.”

³⁹IJisọsị wẹ byoo yẹkẹẹ, “Anụ ku ọngọngọhẹ iwe ka. Chajị ọngọngọhẹ á juwa kọọwa ayịdang ka juwa kpa ẹnyị nyam họ ụkụrwọ ẹbyẹbyị ọlịnyị, kọ ka jẹ́-ẹ ji ẹkpẹ dam ahyaahị, ka juwa ya ẹla onyobyi rụ́m ka.

⁴⁰Chajị ọng myị́ ọng ọlẹ kọ juwa tụụhị pyịpyị kaka lẹ aalẹ, oloye nyahị, ọngọọwa a ri lẹlẹ.

⁴¹Nya ịlẹhị-ịlẹhị, m byinu yẹkẹẹ, ọng myị́ ọng ọlẹ kọ ka chị́ ukoku nya enyi ọnwanwa ookpokpo ọlam-ọlam ọlẹ hanụ chajị nyọlẹ kanụ ri angịnyị nyam aalẹ, ọngọọwa á ka dayi la o-ye uri nyamwụ kaka.”

⁴²IJisọsị myịmyị byaa yẹkẹẹ, “Ọng myị́ ọng ọlẹ kọ ka họ ká anyị anjwo ichiche ọhẹ-lọhẹ ịlẹ kị wẹẹ kpa ọkịlẹtụ nyaa wuu myị lam, ka wu ori nya ọhọbịrị ọhọhọ tụbwọ aalẹ, ọ ka hiigu ha ọngọọwa gụ, kọ ri kị hu ẹjwọọma ọtụka-ọtụka, da ori da ọngọọwa o-omyi, hwọọ ju ka ẹpwụ nya Ihu ọtụka jurum pyịyọọ!

⁴³Chajị nya ọọwa lẹ, ó-ri ụbwọ nyang ahụ ayịdang kọ wẹẹ ka kpang kaka wu ori lẹ aalẹ, aa chọọ eku daarụ hi ịlọng mẹ. Chajị ọ ka hiigu hang gụ, nyọka ri oleku ụbwọ, ká ka jụ ka ẹpwụ nya ọhịhị ọmyịmyị-ka, gụ, ọ-ka juwa la abwọ nyang imimiiye, kị tị ka hung ju ka ẹpwụ nya ila o-gbe oyi myị́ oyi, ọlẹ ká ila ọlụwa á jẹ́-ẹ myị́ kpá ẹnẹnẹhẹ kaka. [

⁴⁴Ụ-ụwa, ekpunjuju ịlẹ kị ka juwa ri alụwa lẹ, ị́ ka jẹ́-ẹ gbu kaka. Ila ọlụwa á tị ka jẹ́-ẹ myị́ kpá ẹnẹnẹhẹ kaka ịnyịnyị.]

⁴⁵Ọ́ tị ri ẹta nyang kọ wẹẹ ka kpang kaka wu ori lẹ aalẹ, aa chọọ eku daarụ hi ịlọng mẹ. Chajị ọ ka hiigu hang gụ, nyọka ri oleku ata, ká ka jụ ka ẹpwụ nya ọhịhị ọmyịmyị-ka, gụ, ọ-ka juwa la ata imimiiye kị tị ka hung ju ka ẹpwụ nya ila nya obwila. [

⁴⁶Ụ-ụwa, ekpunjuju ịlẹ kị ka juwa ri alụwa lẹ, ị́ ka jẹ́-ẹ gbu kpá ẹnẹnẹhẹ kaka. Ila ọlụwa á tị ka jẹ́-ẹ myị́ kpá ẹnẹnẹhẹ kaka ịnyịnyị.]

⁴⁷Ọ́ tị ri ugbẹhị nyang kọ wẹẹ ka kpang kaka wu ori lẹ aalẹ, aa gbọọ daarụ hi ịlọng mẹ. Chajị, ọ ka hiigu hang gụ, nyọka ri ọlẹhị ookpokpo, ká ka jụ kele ka ẹpwụ nya ịpyị Adịrahụ nya Ohe Oluhye, gụ, ọ-ka ri ọngọ ju egbahị imimiiye kị tị ka hung ju ka ẹpwụ nya ila nya obwila.

⁴⁸Ụ-ụwa, ekpunjuju ịlẹ kị ka juwa ri alụwa lẹ, ị́ ka jẹ́-ẹ gbu kpá ẹnẹnẹhẹ kaka. Ila ọlụwa á tị ka jẹ́-ẹ myị́ kpá ẹnẹnẹhẹ ka ịnyịnyị.”

⁴⁹“Jaabwọ ká ẹlẹlẹ nya ọngịnyị ehe a kaa da, ịpyọ ọlala nya ịma iwo wẹẹ, ịnyịnyị-ịnyịnyị, ị ka kpa ila da, ọhọhọ nya ọng myị́ ọng wuu iwo lẹlẹ. [Ị ka kpa ịma da iya ọkịlaakịla nya ọng myị́ ọng iwo ịnyịnyị.]”

⁵⁰“Ịnọ, ịma ri ang ọnyịịla lụmẹ. Ma, ọ́ tị ri kọ gba ịpyọ ọlala nyamwụ daarụ hi ịlọmwụ lẹ, ale, ọ tị́ ka ye ịpyọ ọlala nyamwụ bwu tịtị wẹẹ? Chajị nya ọọwa lẹ, anụ cheri kaanụ ayịdang a juwa la ịpyọ gẹnẹ-gẹnẹ lala ịma ẹ-ẹpwụ nyanụ, kanụ juwa la olegu nya okpunyi ẹ-ẹga nya awụlẹ ịnyịnyị mẹ.”