Read idege ILUKU 12 Bible Online

ILUKU 12 - idege bible

ILUKU 12

¹Ụka ọọwa, Iru nya angịnyị lala ụnọ ukuku kele kaka tụguru ẹ-ẹga nya iJisọsị. I ju iru lụmẹ gbee kị juwa kpa ata bawụlẹ. Ọhọhẹ-ọhọhẹ, iJisọsị ya ẹla ta angịjụgbẹyị nyamwụ ụ-ụwa byaa yẹkẹẹ, “Anụ juwa kpahị ju ịlọnụ ọgwọgụ ẹ-ẹga nya ịjọnwa ọ-kpa ịkaa mịrị nya ala ịFarịsii mẹ. Ahị imiiye nya ala ịFarịsii ịwẹ, m wẹẹ ya ẹla rụ́ lẹ.” IJisọsị myịmyị byaa yẹkẹẹ,

²“Anụ wo mẹ! Ịngịngịhyẹ á juwa ọlẹ ká ọngịnyị ehe á chị ang ke ene lẹ, kọ ka jẹ́-ẹ chị ehe kaka lẹ ka. Lee, ang myị́ ang ọlẹ kị tụ kpịbaa ene lẹ, kọ ka jẹ́-ẹ chị ehe a-ahịgboo kaka lẹ ka ịnyịnyị.

³Chajị nya ọọwa lẹ, ẹla myị́ ẹla ọlẹ kanụ ya ẹ-ẹpwụ nya ukpowu, ị ka wo ẹla ọọwa a-ahịgboo. Ẹla myị́ ẹla ọlẹ kanụ tị juwa chayị nyamwụ ụ-ụwa ikwowe nyanụ, ị ka da ọna nyamwụ u-uhye nya achịnawụ ya je angịkịla wuu ịnyịnyị.”

⁴IJisọsị myịmyị byi angịjụgbẹyị nyamwụ yẹkẹẹ, “Anụ aligu nyam, anụ wo mẹ! Anụ juwa juhi nya angịnyị ehe ịlẹ kọ ri kị nwụ ugbinyịrọ nyanụ kpá kem lẹ, kị ka jụ ịngịngịhyẹ ọkịla họ gụ ọọwa myị́ kaka lẹ ka.

⁵Ma, m ka danụ ọna u-uhye nya Ọngọlẹ kanụ ka juhi nyamwụ. Ọngọọwa a ri Ohe Oluhye lẹ. Ụka kọ nwụ ugbinyịrọ nya ọngịnyị kpá, ọwa-à myịmyị kaa la ọngịrị hu ọngọọwa ju ka ẹpwụ nya obwila myị́ lẹlẹ. Ee, m jam byinu yẹkẹẹ, Ọwa Ohe Oluhye, anụ ka juhi nyamwụ lẹlẹ.”

⁶IJisọsị myịmyị byaa yẹkẹẹ, “Anụ tị́ yẹ ịchịnụ ịlẹ kị wụrụ egwe ká angịnyị kaa ya ịrụ lẹpwụ nyaa ra ịkọbọ imiiye wẹ lẹ! Ịlịnyị la kpá nyaa lẹ, Ohe Oluhye á kaa deeri nya ọhẹ-lọhẹ nyaa kpong-kpong ka.

⁷Anụ wo mẹ! Ohe Oluhye dọmwụ jẹ́ ịnọmba nya uke-inyi olegbeju nyanụ wuu jịra. Lẹ, anụ juhi kpong-kpong ka. Chajị anụ kpụ ịnya ọtụka ị-ịlahị nya Ohe Oluhye lụmẹ gụ iru nya egwe.”

⁸IJisọsị myịmyị byaa yẹkẹẹ, “Anụ wo mẹ! Ọng myị́ ọng ọlẹ kọ ka kpa ọnụ nya ịlọmwụ yam dodehe lala ọngọchịda nyamwụ aalẹ, am Ọnyị nya ọngịnyị ehe ọlẹ tịtị ka ya ọngọọwa dodehe ị-ịlahị nya alegu-ẹrụ nya Ohe Oluhye lala ọngọ bam jẹ ịnyịnyị.

⁹Ma, ọng myị́ ọng ọlẹ kọ tị ka pwam am ịKịrayịsị rwarụ yẹkẹẹ, ọwa nyị́ ri ọngịnyị nyam kpong-kpong ka aalẹ, am Ọnyị nya ọngịnyị ehe ọlẹ tịtị ka pwa ọngọọwa rwarụ ị-ịlahị nya alegu-ẹrụ nya Ohe Oluhye ịnyịnyị.

¹⁰Ọng myị́ ọng ọlẹ kọ ya ẹla pyịm am Ọnyị nya ọngịnyị ehe ọlẹ aalẹ, Ohe Oluhye ka hịnyọhi ha ọngọọwa myị́. Ma, ọng myị́ ọng ọlẹ kọ tị ya ẹla onyobyi ba Olegu Ịgọgọ nya Ohe Oluhye ene lẹ aalẹ, Ohe Oluhye á ka hịnyọhi ha ọngọọwa kpá ẹnẹnẹhẹ kaka.”

¹¹“Ụka ká aluji nyanụ á wụrụụnụ eje kele ka ẹga nya alegbeju ilube ị-mẹ ẹla nya Ohe Oluhye jẹ nya ala iJuu lee ọ-kpanụ kele ka ẹga nya ịdịrịhụ bala alegbeju nya ọpyị nyanụ aalẹ, anụ juwa chị uko jaabwọ kanụ ka bwu wẹ ịtọ ẹla ị-ịlahị nyaa ka. Anụ chị uko jaabwọ kanụ ka bwu ya ẹla ọọwa ụ-ụwa ka ịnyịnyị.

¹²Chajị ụka kanụ godayị rịrị ụ-ụwa, Olegu Ịgọgọ nya Ohe Oluhye ayịdang a ka hu ugbe nya ẹla ọlẹ kanụ ka wẹ ụka ọọwa junu ọnụ lẹlẹ.”

¹³Ụka ọọwa, ọngọhẹ ẹ-ẹpwụ nya iru nya angịnyị ịịwa byi iJisọsị yẹkẹẹ, “Ayịbahị ịtịcha, chuchuu, byi ọnyadam ọlaanyị kọ chị ang ugu nya adahị ebwo ham chẹẹ mẹ!”

¹⁴IJisọsị wẹ byoo yẹkẹẹ, “Ẹnwa ọlẹng, o-owo a tị́ chịm ịmọnọ yẹkẹẹ, am nyị chị eje ọọwa hanụ, kaam nyị chị ang ugu ebwo hanụ ịnyị, ene?”

¹⁵Ịnyị, iJisọsị a byi alụwa wuu yẹkẹẹ, “Anụ kpahị ju ịlọnụ ọgwọgụ kanụ cheji ba imajẹ ọlala ẹ-ẹga nya ang nya angịnyị aananụ mẹ. Chajị, ẹ-ẹpwụ nya ụdụ ọkpụkpụ nya odehe ọlẹ, ọhịhị nya ọngịnyị ehe a do pịlẹ kpong-kpong ka.”

¹⁶Ọọwa lẹ, iJisọsị a chụ oja ọlẹ kpịta byaa yẹkẹẹ, “Ọlụdụ ọhẹ juwa ọlẹ ká ang nya ẹrụ nyamwụ hiigu lụmẹ kaka kpoye.

¹⁷Ịnyị, ọlụdụ ọọwa a me irya, juwa tọ ịlọmwụ ịtọ yẹkẹẹ, ‘Anyị, m tị́ ka họ kpá lẹẹ mẹ? Chajị, ḿ ye ẹga ọ-ka tụ ang nya ẹrụ nyam guru jịra kaka.’

¹⁸Ọọwa lẹ, ọ byi ịlọmwụ yẹkẹẹ, ‘M jaabwọ kam ka họ ugbẹnyị lẹ! M ka kele kaka tụrụ ukuna onyogo nyam, kam ka bá ukuna onyeewe ọtụka-ọtụka, chajị kam ka jẹ́-ẹ go ang nya ẹrụ nyam wuu kaka guru ụwa lẹ.

¹⁹Ụka kam họ ịnyị kpá lẹ, m ka byi ịlọm yẹkẹẹ, ugbodu okpukpuru nyam, ang ọlẹ ká la wẹ lẹ, ọ ka nwang lala ẹka lụmẹ-lụmẹ lẹ. Lẹ, aa juwa mwụ ịnyọ nyang kem, ká hu ọhịhị hukee ịnyịnyị mẹ. Ká juwa ri ang oriri bala o-juwa nwa ang ọnwanwa, juwa chị ọkẹkẹnị jaabwọ kọ háng odu mẹ.’

²⁰Ma, ụka ọọwa, Ohe Oluhye tị byi ọngọọwa yẹkẹẹ, ‘Ahụ oluchi ọwẹ, m ka ye ugbodu okpukpuru nyang kpa rụ hing la odu alẹ lẹ. Ee lẹ, ụka ọlẹ ká gbu kpá lẹ, iru nya ịngịịwẹ wuu, ká tụguru wẹ lẹ, o-owo a tị́ ka laa mẹ?’ ”

²¹Ịnyị, iJisọsị a kpa ẹla ọlẹ tụ ẹla ọọwa ku yẹkẹẹ, “Ịnyịnyị, ọ ka la ẹ-ẹga nya ọngọlẹ kọ juwa tụ ụdụ nya odehe ọlẹ guru gbe ịlọmwụ, kọ ri ká ọngọọwa á tị kpụ ụdụ nya ẹla nya Ohe Oluhye ẹ-ẹpwụ nya ọkịlẹtụ nyamwụ kpong-kpong kaka lẹlẹ.”

²²Ụka ọọwa, iJisọsị byi angịjụgbẹyị nyamwụ yẹkẹẹ, “Chajị nya ọọwa lẹ, m juwa byinu yẹkẹẹ, anụ juwa nwụ ịlọnụ la imahị chajị nya ọhịhị ọlẹ kpong-kpong ka. Anụ chị uko nya ang oriri ọlẹ kanụ ka ri lee ọ-chị uko u-uhye nya ịwụrụ ịkụrụ-kụrụ nyanụ kpong-kpong ka ịnyịnyị.

²³Chajị ọhịhị nyanụ a baba gụ ang oriri lẹ. Ugbinyịrọ nyanụ a tị baba gụ awụrụ ọkụrụ kụrụ ịnyịnyị lẹ!

²⁴Anụ me irya chajị nya agarụ ịchịnụ ịlẹpwamẹ wẹẹ! Agarụ ịwẹ á kaa wu ẹrụ ka. Ị́ tị kaa tụ ang nya ẹrụ guru ukuna ka ịnyịnyị. Ma, Ohe Oluhye tị wẹẹ kpaa la ang oriri. Lee, ánụ tị́ jẹ́ yẹkẹẹ, ịwa ayịdang nyaa ri ang nya ịlẹhị ọ-kpụ ịnya ọtụka ị-ịlahị nya Ohe Oluhye gụ ịchịnụ ịwẹ kpong-kpong ka?

²⁵Kpakpakpa lẹ, o-owo lẹpwụ nyanụ a tị́ ka jẹ́-ẹ hu ụka ochiche-ochiche ọhẹ-lọhẹ da ehe oriri nya ịlọmwụ uhye wẹ myị́ bwula uko ọchịchị nyamwụ kpong-kpong?

²⁶Ee lẹ, ó-ri ká uko ọchịchị nyanụ á ka jụ ang ochiche-ochiche ọlịịwẹ họ myị́ kaka lẹ, anyị, anụ tị́ me irya ká uko ọchịchị ọọwa ka jụ iru nya ang ihihi ịkịla wuu họ hanụ myị́ mẹ?

²⁷Anụ me irya chajị nya ododo nya ọkpakụ bala ikoko nya ekeji bala amẹ ịnyịịla-ịnyịịla jaabwọ kị kaa nwa wẹẹ! Ịwa ayịdang á kaa họ ụkụrwọ ọhẹ-lọhẹ la ịlaa ka. Ị́ tị kaa nụ apwụ ọhẹ-lọhẹ duru ịlaa kpong-kpong ka ịnyịnyị. Ma, m tị juwa byinu yẹkẹẹ, adịrahụ iSolomọn onyogo kọ ri ọlụdụ ọtụka chakụ-chakụ ri lẹ, ọ́ la ịwụrụ ịkụrụ-kụrụ ịnyịịla ju iru lala ịnya ekeji bala amẹ ịwẹ myị́ kpong-kpong kaka.

²⁸Ee lẹ, ó-ri ká Ohe Oluhye á juwa ya ịwụrụ kụrụ amẹ ịlẹpwamẹ ịlẹ kị nwa alẹ, ká angịnyị kaa nwaa ijuju, jwaa ila hụrụ lẹ, anyanyị anụ tị́ me irya ká Ohe Oluhye a tịtị ka kụrụụnụ anụ ịwụrụ lụmẹ kaka ba? Anụ angị la ọmyịmyị ochiche!

²⁹Anụ juwa hu irya nyanụ wuu lẹpwụ-lẹpwụ kpụ nịrọ ang oriri bala ang ọnwanwa nyanụ kaka. Lee, o-juwa nwụ ịlọnụ la uko ọchịchị u-uhye nya ịngịngịhyẹ kaka ịnyịnyị.

³⁰Chajị alepwoja ịkịla ilodehe, ịlẹ kị jẹ́ Ohe Oluhye ka lẹ, ụma nya ang ịlịịwẹ wuu, ị kaa hu irya nyaa wuu lẹpwụ-lẹpwụ kpụ nịrọ lẹ. Ma, Ohe Oluhye Adanụ tị jẹ́ ene-ene yẹkẹẹ, ang ịlịịlẹ wuu nyị baba hanụ lẹ.

³¹Ọkọkọ nya ọọwa lẹ, anụ tụtụ juwa kpa irya nyanụ wuu tịtọ nya ọhịhị nya ịpyị Adịrahụ nya Ohe Oluhye odu mẹ. Aalẹ, ọ ka ya ang ịkịla ịwẹ wuu hanụ ịnyịnyị lẹ.”

³²IJisọsị myịmyị byaa yẹkẹẹ, “Anụ chị uko ka, anụ anyị ịkpịlọ ichiche nya Ohe Oluhye. Chajị, ọ ri ang ọ-kpụ Ohe Oluhye Adanụ ịpyọ lụmẹ nyọka hu ịpyị adịrahụ nyamwụ hanụ.

³³Anụ kele kaka go ang myị́ ang nyanụ wuu ra, kanụ hu okpoko ọọwa da ikpehika ụbwọ mẹ. Aalẹ, anụ juwa nwụla ụdụ ọlẹ kọ ka jẹ́-ẹ myị́ kaka, nọ gbe ịlọnụ e-epwoohe lẹ. Aalẹ, ịbang nya ụdụ nyanụ ọọwa á ka chị iwa kpá ẹnẹnẹhẹ kaka ịnyịnyị. Aloyi á tị ka jẹ́-ẹ pwụ ụwa kaka gaa yi oyi kaka. Ikiriwewe á tị ka jẹ́-ẹ kele kaka taa ayịreji ụ-ụwa myị́ kaka ịnyịnyị.

³⁴Chajị ẹga myị́ ẹga ọlẹ ká ụdụ nya ọngịnyị á ji lẹ, ụ-ụwa irya nya ọkịlẹtụ nyamwụ ọwa ayịdang wuu a kaa ji ịnyịnyị lẹlẹ.”

³⁵IJisọsị myịmyị byaa yẹkẹẹ, “Anụ juwa gbe eji giri-giri lala ịsọja ịlẹ kị kaa gbe eji lodu, juwa wuru ila nya otinika nyaa bala ọ-tụ ugba ọ-chị ọhị nyaa pịrị gogoogo mẹ.

³⁶Jaabwọ ká anchẹ kaa kụ ọlọyị gbe ayịbaba nyaa lụka ọlẹ kọ ka ọjịra-jịra nya ahụ onyeewe oyeye a ji, chajị kị ka jẹ́-ẹ wụrụ ụgbẹyị họọ ụka kọ nya pwụ ẹpwa wẹẹ, anụ juwa gbeji giri-giri ịnyịnyị mẹ.

³⁷Ahị ọwawa ka juwa ha anchẹ ịlẹ kịịwa ayịdang á nune ka, kị juwa kụ lahị gbe ụka ọlẹ ká ayịbaa ka nya wẹ ẹpwa. Nya ịlẹhị-ịlẹhị, m byinu yẹkẹẹ, ụka ká ayịdẹpwa ọọwa á nya, kọ go ịwụrụ nyamwụ kụrụ kpá wuu, ọ ka byi anchẹ ịịwa, nyị kaka hụhụ i-itebwuru kịị nyị ri ang ta ọwa mẹ. Ọọwa lẹ, ọwa ayịdang a ka myị ẹrụ haa ụ-ụwa lẹlẹ.

³⁸Ó-ri ká ayịdẹpwa ọọwa á nya lụka nya epwodu jijiji lee lụka nya ewu-ụtụrụ, kọ tọ anchẹ ịịwa ẹ-ẹpwụ nya eji ogbegbe lẹ aalẹ, ọ ka ri ang nya ahị ọwawa ọtụka ha anchẹ ịịwa lẹlẹ.”

³⁹IJisọsị myịmyị byaa yẹkẹẹ, “Anụ tị́ jẹ́ yẹkẹẹ, ó-ri ká ayịdẹpwa á kaa jẹ́ ụka ọlẹ ká oloyi kaa kele ka ẹpwa nyamwụ kpangga lẹ ịnọ, ọwa ayịdang á ka myị ya ẹga da ha oloyi ọọwa kpụ ọ-jụ kele ka ube kaka go ịngịngịhyẹ kpa rụ myị́ kpong-kpong kaka.

⁴⁰Chajị nya ọọwa lẹ, ọ chịla kaanụ ayịdang ka juwa nwụla ịlọnụ nọ giri-giri, chajị ụka ọlẹ kanụ me irya kpong-kpong ka, Ọnyị nya ọngịnyị ehe a ka tịrẹkpẹ warị lẹlẹ.”

⁴¹Ọọwa lẹ, iPita a byi iJisọsị yẹkẹẹ, “Ọngọlahị ee! Ahị ụbwọọhị a tị́ ja oja ọkpịta ọlẹ ha lee angịnyị wuu tị́?”

⁴²Ịnyị, iJisọsị a wẹ byoo yẹkẹẹ, “Ee lẹ, o-owo lẹpwarịrị nya anchẹ a tị́ ka ri ọngọ chịla ọ-hụ ọkịlẹtụ ha bala ọngọ jẹ́ ẹla lẹẹ mẹ? Ọnchẹ ọlịnyị, ayịbamwụ a ka hu olegbeju nya anchẹ ịkịla wuu lẹ. Chajị ká ọnchẹ ọọwa ka ri ọngọ hu ebwo nya ang oriri nya anchẹ ịkịla haa ri lụka ọchịla-chịla lẹlẹ.

⁴³Ahị ọwawa ọtụka ka juwa ha ọnchẹ ọọwa lụmẹ, ó-ri ká ayịbamwụ á ka nya tịrẹkpẹ kele kaka tọọ ẹ-ẹpwụ nya ụkụrwọ ọnyịịla ọlọdọdẹpwa ọọwa ọhọhọ.

⁴⁴Nya ịlẹhị-ịlẹhị, m byinu yẹkẹẹ, ọnchẹ ọọwa kpangga, ayịbamwụ a ka hu, kọ ka ri olegbeju nya ang myị́ ang nya ayịbamwụ ọọwa wuu lẹlẹ.

⁴⁵Ma, ọ́ tị ri ká ọnchẹ ọọwa á mwọọgịlẹ byi ịlọmwụ yẹkẹẹ, ‘Ayịbam ọhẹ á juwa ka mwẹẹkpẹ warị ahyaahị lẹka. Ayịbam ka bịrị ụka lụmẹ wẹẹ.’ Ká ọnchẹ ọọwa á mwọọgịlẹ juwa mịla anchẹ alẹng bala anyang ịkịla nyi ịnyịnyị, kọ juwa ri ang oriri bala o-juwa nwa ere, juwa ya nya ịlẹhị-ịlẹhị jaabwọ kọ họ́ọ.

⁴⁶Aalẹ, lụka ọ-mwaa, ayịbaba nya ọnchẹ ọọwa ka nya la ẹnụtụrụ bala ụka ọlẹ ká ọnchẹ ọwẹ á jẹ́ ka lee ọdahịhile kpong-kpong ka. Ọọwa lẹ, ayịbamwụ a ka hu akama ọtụka-ọtụka họọ bala ọ-chọọ ebwo ju ka ẹpwụ nya ogu nya angị chịla o-hu ọkịlẹtụ ha kpong-kpong kaka lẹlẹ.”

⁴⁷“Ọnchẹ ọlẹ kọọwa ayịdang á jẹ́ irya nya ayịbamwụ wuu, kọ tị myị nwụla ang myị́ ang wuu nọ jaabwọ kọ ka há ayịbamwụ ka aalẹ, ọnchẹ ọọwa, ayịbamwụ a ka nyi lụmẹ kpá gụ angịkịla wuu lẹlẹ.

⁴⁸Ma, ọnchẹ ọlẹ kọ tị jẹ́ irya nya ayịbamwụ ene ka, kọ tị họ ẹla nya enyiri aalẹ, ayịbamwụ ka nyi ọnchẹ ọọwa enyiri opwuru abwọ. Ọng myị́ ọng ọlẹ ká Ohe Oluhye á hu ang lụmẹ-lụmẹ ha, ọngọọwa, Ohe Oluhye a tịtị kaa tịtọ nya ang lụmẹ-lụmẹ bwu ẹpwụtụbwọ nyamwụ lẹ. Chajị, ọngọlẹ ká angịnyị ehe á ya ang lụmẹ-lụmẹ ju ụ-ụbwọ, ọngọọwa, ị tịtị kaa tịtọ nya ang lụmẹ-lụmẹ ka ẹpwụtụbwọ nyamwụ ịnyịnyị lẹ.”

⁴⁹IJisọsị byi angịjụgbẹyị nyamwụ yẹkẹẹ, “Anụ wo mẹ! Ọwarị wẹ odehe nyam ọlẹ ri ila ọ-tụ ju ám odehe ọlẹ. Ó-ri ká ila ọọwa á tị cha, juwa wuru lẹẹlẹẹ lẹ, ịnọ, ọ ka hám lụmẹ.

⁵⁰I juwa ka nyi ịlọ hụ́m, bwula akama ọtụka-ọtụka ọlẹ kam juwa ka yẹ. Irya nya akama ọtụka ọọwa á ka tụ kịnyaa hi ẹpwụ nyam myị́ kaka gbee pwụ ụka ọlẹ ká akama ọọwa ka chị eju kpá.

⁵¹Anụ me irya yẹkẹẹ, okpunyi kem, am nyaa kpa warị wẹ odehe ọlẹ lẹ lee? Ehe! Ịnyị, ọ la ka! Ma, ọwarị wẹ nyam ọlẹ ka họ ká angịnyị ehe ka chị ebwo hi awụlẹ.

⁵²Chajị, ó-ri ká angịnyị á la angị ịrụ ọdọdẹpwa ookpokpo, ị ka chị awụlẹ ebwo imiiye, ka juwa tụ awụlẹ pyịpyị. Angị ịta ịlụwa ka ri alẹla nya angị imiiye ihihi.

⁵³Ụka ọọwa, ebwo ọchịchị ka ji. Adịda ka jahị da anyị nyaa. Anyị tị ka jahị da adịda nyaa ịnyịnyị. Ịnịna tị ka jahị da anyị anyang nyaa. Anyị anyang tị, tịtị ka jahị da ịnịna nyaa ịnyịnyị. Ịnịna-ẹpwa ka jahị da ịhụ nya anyị nyaa. Ịhụ tị, tịtị ka jahị da ịnaa ẹpwa ịnyịnyị.”

⁵⁴IJisọsị myịmyị byi iru nya angịnyị ịlẹga nyamwụ yẹkẹẹ, “Ụka kanụ chẹhị kaka yẹ egbamwụ kị tụguru o-oye nya ọmwẹnụ obyi, anụ kaa ya je angịnyị yẹkẹẹ, ohe nyị juwa ka do enyi lẹ. Enyi ọọwa tị kaa do ịnyịlẹhị.

⁵⁵Ụka ọlẹ kanụ tị yẹ ká igbachịwụ á juwa da bwu oye nya edii, anụ kaa ya dodehe yẹkẹẹ, ịnyịrọ nyị juwa chị pwuu lẹ. Ọ tị kaa la ịnyị ịnyịlẹhị.

⁵⁶Anụ alahị imiiye, ee, ịnọ, kaanụ kiji wẹẹ jẹ́ etu nya ang o-ju ẹjẹẹ oluhye nya egbamwụ kaa ya dodehe hiigu-hiigu lẹ. Ee lẹ, ịịyẹ a tị́ du, kanụ tị jé etu nya ang o-ju ẹjẹẹ o-bwu ẹga nya Ohe Oluhye ọlụka ọlẹ, kpụ anụ ya dodehe je angịkịla chajị nya ang ọlẹ kọ juwa ka họ ijuju ịnyịnyị kaka wẹ mẹ?”

⁵⁷IJisọsị myịmyị byaa yẹkẹẹ, “Ịịyẹ a tị́ du kanụ kaa chị eje nya ang ọnyịịla ọhọhọ ha ịlọnụ kpong-kpong ka ịnyị?

⁵⁸Ahụ ọngọ kpa eje e-egbeju, wo mẹ! Maga ká họ okpunyi bala ọ-la ẹla nyang kanụ tụ eje ọọwa ku ụ-ụgbẹyị ene kanụ ka pwụ ube nya eje mẹ. Ó-ri ịnyị ka aalẹ, ọngọọwa ka kpang pwụ ube nya eje ọọwa. Ụka ká ọngọ la eje á ya eje tung kpá, ọ ka ka tụụbwọ hing ju olegbeju nya ube nya agba ụ-ụbwọ, chajị kọ ka kpang rụ kaka ju agba pyịyọọ!

⁵⁹Nya ịlẹhị, m byinu yẹkẹẹ, u-ube nya agba ọọwa, a ka ji gbee pwụ ụka ọlẹ ká ka nwụ uri nya okpoko ọlẹ wuu kị tịtọ ká ka nwụ ene ká ka kpehe bwu ụwa myị́ lẹlẹ.”