Read idege ILUKU 13 Bible Online

ILUKU 13 - idege bible

ILUKU 13

¹Ụka ọọwa, angịhyẹ ịlẹ kị juwa ta iJisọsị, joo oja chajị nyọlẹ ká adịrahụ ịPayịleti nwụ ala ịGalili ịhyẹ ụka kị juwa kịla iya ha Ohe Oluhye.

²IJisọsị kpa ịtọ ọlẹ wẹ byaa yẹkẹẹ, “Anụ juwa me irya yẹkẹẹ, ọhọbịrị nya ala ịGalili ịịwa ịlẹ ká ịPayịleti nyị nwụ, nyaa lụmẹ gụ ọhọbịrị nya ala ịGalili ihihi wuu, du kị gbu kwiwa nya ọọwa lẹ?

³Ehe! Ịnyị, ọ la ka. Nya ịlẹhị, m byinu yẹkẹẹ, ó-ri kaanụ ayịdang á yẹ irya da bwu ẹpwụ nya ịhọbịrị ịhọhọ nyanụ ka aalẹ, anụ wuu ka ta ayịreji ịnyịnyị wẹẹ!

⁴Lee, anụ tị́ me irya yẹkẹẹ, angịnyị angị iwo kụrụ ineku ịlẹ ká ugulọ nya ube ogbeji nya ịsọja kpụ nwụ lẹẹ ugbeene e-epweji nya iSilowam lẹ, angịịwa nyaa ri alọhọbịrị gụ ala iJerusalẹm wuu ịnyịnyị lẹ?

⁵Ehe! Ịnyị, ọ la ka. Nya ịlẹhị, m byinu yẹkẹẹ, ó-ri kaanụ ayịdang á yẹ irya da bwu ẹpwụ nya ịhọbịrị ịhọhọ nyanụ ka aalẹ, anụ ka ta ayịreji ịnyịnyị wẹẹ!”

⁶Ịnyị, iJisọsị a jaa oja ọkpịta ọhẹ yẹkẹẹ, “Ọlẹng ọhẹ juwa ọlẹ kọ la okoji ọhẹ ọlẹ kị wụrụ ifigi ẹ-ẹrụ oliku nyamwụ. Ụka ọhẹ, ọlẹng ọọwa kele, juwa tịtọ nya ugbe ọlẹ kọ ka hya bwu uhye nya okoji ifigi ọọwa. Ma, ọ́ tị ye ugbe ọhẹ-lọhẹ hya ụ-ụwa ka.

⁷Ọọwa lẹ, ayịdọlẹrụ ọwẹ a byi ọngọ kpẹhị rịrị ẹrụ oliku nyamwụ ọọwa yẹkẹẹ, ‘Yẹ mẹ! Ihwẹnyị ju ẹka ọhata kam lẹẹ warị, kaka tịtọ nyọka hya ugbe bwu uhye nya okoji ifigi ọlẹ lẹ. Ma, ọ́ tị nwụ́ ugbe ọhẹ-lọhẹ kpụ, m ye hya kaka. Lẹ, m tịtọ ká ka hwọọ daarụ lẹ. Chajị, ahị tị́ ka tụụbwọ hyọọ rịrị ám, juwa bịrị ịpyị ododu nya ịyẹ?’

⁸Ọngọ kpẹhị rịrị ẹrụ ọọwa wẹ byi ayịdọlẹrụ ọwẹ yẹkẹẹ, ‘Ayịbahị ee, bahyoo ihwẹnyị wẹẹ mẹ. M ka wu ụjẹ dagaga jwọọ wuu kam ka jwọọ ọtẹwụụ.

⁹Ó-ri kọ nwụ́ egbe ihwọngkịla myị́, ọ hiigu. Ọ́ tị ri kọ myị nwụ́ egbe lụka ọọwa kpá kaka lẹ, aalẹ a tụrwọọ daarụ mẹ.’ ”

¹⁰Ụka ọhẹ, iJisọsị juwa mẹ ang jẹ u-ube ọ-mẹ ẹla nya Ohe Oluhye jẹ nya ala iJuu ọhẹ la Ẹnụtụrụ Ọhịnyọ Lụkụrwọ nya ala iJuu.

¹¹Ụka ọọwa, ọnyang ọhẹ juwa ọlẹ ká olegu onyobyi wu nya ịlẹhị-ịlẹhị. Ọ kọọ bawụlẹ kụracha, du kọ jẹ́ kaa godayị kọkọ kpakpakpa myị́ ka. Ẹdụrụ ọọwa kpọọ lala ẹka iwo kụrụ ineku lẹ.

¹²Ịnyị, ụka ká iJisọsị chẹhị kaka yẹ ọnyang ọọwa lẹ, ọ byoo yẹkẹẹ, “Ẹnwa ọnyang, a gbocho hi ẹdụrụ nyang ọwẹ alẹ lẹ!”

¹³Ịnyị, ụka ká iJisọsị nịra ụbwọ nyamwụ kaka gu ọnyang ọọwa lẹ, ọ jẹ́ nịra kpakpakpa, la gogo, juwa gwogbo ha Ohe Oluhye ụ-ụwa lẹlẹ.

¹⁴Ọọwa lẹ, olegbeju nya ube ọ-mẹ ẹla nya Ohe Oluhye jẹ nya ala iJuu ọlụwa, a juwa wụ ẹjẹ chajị nyọlẹ ká iJisọsị họ ụkụrwọ ẹbyẹbyị ọwẹ la Ẹnụtụrụ Ọhịnyọ Lụkụrwọ nyaa lẹlẹ. Ịnyị, olegbejwọọwa a juwa byi angịnyị ịlụwa yẹkẹẹ, “Ẹnụtụrụ ịrwọnyẹ kem a ri ẹnụtụrụ ọ-kpa họ ụkụrwọ nyahị lẹ! Ọng myị́ ọng ọlẹ kọ tịtọ nya uda ọhọhọ lẹ aalẹ, ọngọọwa a warị la ẹnụtụrụ ịịwa kem mẹ. Chajị, ẹ-Ẹnụtụrụ Ọhịnyọ Lụkụrwọ nyahị, anụ ka kpa warị nya uda ọ-họnụ họ kpong-kpong ka.”

¹⁵Ọọwa lẹ, Ọngọlahị a wẹ byoo yẹkẹẹ, “Anụ alahị imiiye ịwẹ, o-owo lẹpwarịrị nyanụ a tị́ juwa kọ ka yi ẹna nyamwụ lee ụnyịrẹ okpolo nyamwụ ori kpa kpehe ka ogo kaka nwa enyi la Ẹnụtụrụ Ọhịnyọ Lụkụrwọ nyahị ahị ala iJuu kpong-kpong ka wẹẹ?

¹⁶Ọnyang ọlẹ ká Ohe Onyobyi chị ori lala ẹka iwo kụrụ ineku lẹ wẹ lẹ, ọnyị nya Ebiraham, ọ ri lẹ. Ọọwa lẹ, anụ yẹkẹẹ, nyị́ chịla kaam nyị ka yi ori ọọwa hyọọ alẹ kpong-kpong kaka, chajị nyọlẹ ká alẹ ri Ẹnụtụrụ Ọhịnyọ Lụkụrwọ nyahị ahị ala iJuu lẹlẹ?”

¹⁷Ẹla ọwẹwẹ nya iJisọsị ọọwa chị oyoyi ju aluji nyamwụ ịịwa lụmẹ. Ma, angịkịla ihihi ịlụwa wuu tị lẹ, ị juwa chị ọkẹkẹnị ọtụka-ọtụka u-uhye nya ụkụrwọ ẹbyẹbyị ịlẹ wuu ká iJisọsị juwa họ.

¹⁸Ịnyị, iJisọsị a yẹkẹẹ, “Ịịyẹ ịpyị Adịrahụ nya Ohe Oluhye a tị́ me kpong-kpong? Ịịyẹ m tị́ ka chụ kaka pwoku ịpyị adịrahụ ọọwa kpá lẹẹ mẹ?

¹⁹Ịpyị Adịrahụ nya Ohe Oluhye lala ẹjẹ nya okoji ọlẹ kị wụrụ ịmọsịtadị, ọlẹ ká ọlẹng ọhẹ kpa kaka tọ ẹ-ẹrụ nya apwụ iriri nyamwụ. Ụka kọ bwu kpehe, ọ nwa kaka ri okoji ọtụka. Ọọwa lẹ, ịchịnụ iluhye-ọgba a kaa kele kaka nọ awụ u-uhye nya abwọ nyamwụ lẹlẹ.”

²⁰IJisọsị myịmyị yẹkẹẹ, “Ịịyẹ m tị́ ka chụ ịpyị Adịrahụ nya Ohe Oluhye kaka pwoku kpá lẹẹ mẹ?

²¹M ka chwọọ pwoku ịjọnwa ọ-kpa họ ịkaa ọlẹ ká ọnyang ọhẹ hu jula awụtọọ nya ọrụ nya ambakpa. Ọọwa lẹ, ọ yaa jula awụlẹ gbee ká ịjọnwa ọwẹ kpa ọrụ nya ambakpa ọọwa mịrị kaka ri ọtụka-ọtụka lẹlẹ.”

²²Ịnyị, iJisọsị a juwa jẹ bwu epweji ịtụka bala ichiche, juwa mẹ ang jẹ angịnyị ịnyịnyị, juwa jẹ kele koye nya iJerusalẹm lẹlẹ.

²³Ụka ọọwa, ọngọhẹ tọ iJisọsị ịtọ yẹkẹẹ, “Ọngọlahị ee, angịlẹ kị ka wu ọchịda nya Ohe Oluhye ọyị ka la gbuu wẹẹ?” IJisọsị wẹ byaa ịwa wuu yẹkẹẹ,

²⁴“Anụ cheri kanụ jụ bwu ọnụ ụgbẹyị okpiilee nya ọhịhị ka ẹpwụ nya ọhịhị ọmyịmyị-ka mẹ! Chajị, m jam ya jenu nya ịlẹhị-ịlẹhị yẹkẹẹ, iru nya angịnyị lụmẹ-lụmẹ juwa ka teleko nyọka jụ kele. Ma, ọ́ tị ka chịkpẹẹ haa myị́ kpong-kpong kaka.”

²⁵IJisọsị myịmyị byaa yẹkẹẹ, “Ụka ká ayịdẹpwa á wuleji tụ ụgbẹyị ku kpá ene lẹ aalẹ, anụ ka godayị rịrị ọ-ọnang, juwa yụbwọ kpụ ụgbẹyị, juwa bịlẹ yẹkẹẹ, ‘Ọngọlahị, chuchuu, wụrụ ụgbẹyị hahị mẹ!’ Ụka ọọwa, ọ ka wẹ byinu yẹkẹẹ, ‘Ale, anụ tị́ bwu warị ene? Am jẹẹnụ kpong-kpong ka!’

²⁶Ọọwa lẹ, anụ ka wẹ byoo yẹkẹẹ, ‘Ayịbahị, ahị kpakpakpa a ri angịlẹ kahị kaa ri ang oriri bala ọ-kaa nwa ang ọnwanwa tang ịnyịnyịịnyị lẹ! Ahị a tị ri angịlẹ ká lẹẹ mẹ ang jẹ o-opeje nyahị ugbeene ịnyịnyị lẹ.’

²⁷Ụka ọọwa, ayịdẹpwa ọọwa ka myịmyị wẹ byinu yẹkẹẹ, ‘Nya ịlẹhị-ịlẹhị, m byinu yẹkẹẹ, aḿ jẹẹnụ nya angịnyị nyam kpong-kpong ka. Chajị, anụ ri angị họ abwẹla inyibyi lụmẹ!’

²⁸Ọọwa lẹ, ụka ká Ohe Oluhye ka kunu kpehe hi ịpyị adịrahụ nyamwụ lẹ. Anụ ka jida bala ọ-wangịrị nya ịlẹhị-ịlẹhị ụ-ụwa ụka ọlẹ kanụ ka chẹhị kaka yẹ Ebiraham bala Ayịsiki bala iJekọbụ bala alọmwụ nya Ohe Oluhye anyị wuu ị-ịpyị Adịrahụ nya Ohe Oluhye lẹlẹ.

²⁹Ụka ọọwa, angịnyị lụmẹ-lụmẹ ka bwu ọmwẹnụ-ụtụrụ bala ọmwẹnụ obyi, oye nya ẹtẹ bala edii, kaka hụhụ i-itebwuru nya ang oriri olepwedii nya ịpyị Adịrahụ nya Ohe Oluhye.

³⁰Anụ yẹ mẹ, angịhyẹ ịlẹ kị ku ẹkpẹ, ka yẹ kaka ri angị ji ịlahị. Angị ịkịla ịlẹ kị tị ji ịlahị ka mwọọgịlẹ yẹ kaka ri angị ji ẹkpẹ ịnyịnyị.”

³¹Ụka ọọwa, ala ịFarịsii ịhyẹ kele kaka byi iJisọsị yẹkẹẹ, “Ayịbahị ịtịcha, rụ bwu ẹgẹlẹ mẹ! Chajị adịrahụ iHerọdụ juwa tịtọ kọ ka nwụng lẹ!”

³²IJisọsị wẹ byaa yẹkẹẹ, “O hiigu. Anụ kele kaka byi iHerọdụ abya olijẹẹhị ọwẹ yẹkẹẹ, am nyị jam ka ku alegu inyibyi dodehe bala ọ-họ alẹdụrụ uda lala ụtụrụ imiiye kịlahị myịmyị wẹẹ. Ụka kọ pwụ ẹnụtụrụ ọhata, lẹ, ụkụrwọ nyam ọọwa a ka chị eju lẹlẹ.

³³Nya ịlẹhị ịnyị! M ka jam la ọhịhị, juwa họ ụkụrwọ nyam alẹ bala ijuju gbee da ka ijuju deeji wẹẹ. Chajị, ọ́ chịla kị ka nwụ ọlọmwụ nya Ohe Oluhye ẹ-ẹgẹgẹhẹ dala epweji nya iJerusalẹm kaka.”

³⁴Ọọwa lẹ, iJisọsị a yẹkẹẹ, “Oo! IJerusalẹm, iJerusalẹm! Ahụ ọngọlẹ ká angịnyị nyang kaa nwụ alọmwụ nya Ohe Oluhye ịlẹ kị warị wẹ ẹga nyang bala ọ-da ajwọ nwụ angịlẹ ká Ohe Oluhye du ẹrụ tọng ịnyịnyị. Ahyu! Ang amalẹ kaka, kam jam maga nyọka tụ anyị nyang jwẹjẹ jaabwọ ká ịnịna nya ụnụ kaa tụ anyị nyamwụ ju ka ẹpwụ nya achwọ nyamwụ. Ma, ánụ tị myị wo lam kpong-kpong kaka.

³⁵Anụ yẹ mẹ! M jam ji ẹkpẹ nyam danụ nya ang o-ju ẹjẹẹ yẹkẹẹ, epweji nyanụ ka dụwa e-eji luhwo-luhwo lẹ. Nya ịlẹhị-ịlẹhị, m byinu yẹkẹẹ, ánụ ka yẹ ugbẹhị nyanụ gum, gụ ọlẹ kaka, gbee pwụ ụka ọlẹ kaanụ ayịdang ka kpa ọnụ nyanụ ya dodehe yẹkẹẹ, ‘Ká Ohe Oluhye a wahị kụrụng ahụ ọngọlẹ kaa wẹẹ warị la ẹnyị nya Ọngọlahị Ohe Oluhye.’ ”