Read idege ILUKU 14 Bible Online

ILUKU 14 - idege bible

ILUKU 14

¹Ẹnụtụrụ Ọhịnyọ Lụkụrwọ nya ala iJuu ọhẹ, iJisọsị ka ẹpwa nya olegbeju ọhẹ ọlẹ kọ ri ọla ịFarịsii kaka ri ang ụ-ụwa. Ụka ọọwa, angịhyẹ ịlụwa juwa ya ẹhị rịrị iJisọsị ẹ-ẹla.

²Ụ-ụwa, ọlẹng ọhẹ ọlẹ ká itobyi ịtụka họ, kele ka ẹga nya iJisọsị.

³Ụka ọọwa, iJisọsị tọ Angị mẹ ehile nya ehile nya iMosisi jẹ bala ala ịFarịsii ịlụwa ịtọ yẹkẹẹ, “Ehile nya Ohe Oluhye tị́ myị ọnụ hahị kahị ka họ ọlẹdụrụ uda Ẹnụtụrụ Ọhịnyọ Lụkụrwọ lee ọ́ tị́ chịla ịnyị ka?”

⁴Ma, ịwa wuu hwọọ ujiji kpini-kpini. Ọọwa lẹ, iJisọsị a yụbwọ chị ọlẹdụrụ ọọwa lẹ, ọ họọ uda ụ-ụwa, byoo yẹkẹẹ, nyị rụ mẹ lẹlẹ.

⁵Ịnyị, iJisọsị a taa wo yẹkẹẹ, “Oowo lẹpwụ nyanụ a tị́ juwa ká ọnyị nyamwụ lee ẹna[1] nyamwụ-ụ́ chabwọ kpụ ụjẹ nya enyi Ẹnụtụrụ Ọhịnyọ Lụkụrwọ, ká ọngọọwa á ka gbọọ kpehe ahyaahị ka-à?”

⁶Ma, ọngọngọhẹ nyaa wuu á wẹ iJisọsị ịtọ ọọwa myị́ kpong-kpong ka.

⁷Ụka ọọwa, angịhyẹ ịlẹ ká ọlẹng ọọwa diro ẹpwa, juwa kele kaka chụ iwe-ahụrụ ọhụhụ olihi-ihi ha ịlaa ụ-ụwa. Ịnyị, ụka ká iJisọsị yaa lẹ, ọ kpa ẹla ọlẹ mẹ ang jaa yẹkẹẹ,

⁸“Ụka kị wụrụụnụ ẹpwa nya ọjịra-jịra nya ang oriri nya ahụ oyeye aalẹ, anụ kpa ịlọnụ kaka hụhụ i-iwe ahụrụ olihi-ihi kpong-kpong ka. Chajị ó-ri ká ayịdẹpwa ọọwa, á wụrụ angị lihi gụụnụ ẹpwa kele ịnyịnyị, ánụ jẹ́ datị ka.

⁹Ó-ri ịnyị ka aalẹ, ayịdẹpwa ọọwa ọlẹ kọ wụrụụnụ anụ angị imimiiye ẹpwa ka warị kaka wuleenu eji bwu ẹga olihi-ihi ọọwa ha ọngọ ọtụka ọ-gụụnụ gụ. Ọọwa lẹ, oyoyi ọtụka a ka junu ụka ọlẹ kanụ ka kele kaka hụhụ ẹ-ẹga ọlẹpẹpẹ gụ wuu lẹlẹ.

¹⁰Ma, ọkọkọ nyọka họ ịnyị lẹ, ụka kị wụrụụnụ ẹpwa, anụ tụtụ kpa ịlọnụ kele kaka hụhụ i-iwe ahụrụ ọlẹpẹpẹ. Chajị ụka ká ayịdẹpwa ayịdang á warị lẹ, kọ ka byinu yẹkẹẹ, ‘Ẹnwa ọlẹng, wuleji bwu ẹgẹlẹ ká kele kaka hụhụ i-iwe ahụrụ olihi-ihi ọlaanyị mẹ.’ Ọọwa lẹ, ahụ ayịdang a ka lihi ọtụka-ọtụka ị-ịlahị nya angịlẹ wuu kị diro ẹpwa ọọwa lẹlẹ.

¹¹Chajị ọng myị́ ọng ọlẹ kọ kpa ịlọmwụ ka uhye aalẹ, ị ka kpa ọngọọwa weji. Ma, ọng myị́ ọng ọlẹ kọ tị kpa ịlọmwụ keji aalẹ, ị ka kpa ọngọọwa ka uhye ịnyịnyị.”

¹²Ịnyị, iJisọsị a ya ẹla ta ayịdẹpwa ọọwa byoo yẹkẹẹ, “Ẹnwa ọlẹng, ụka myị́ ụka ká ka wụrụ angịnyị aanang ẹpwa nya ụma nya ang oriri ọnyị myị ọnyị lẹ aalẹ, aangịlẹ kị ri aligu nyang lee anyadang bwu ẹpwụ lee aanang ịkịla wuu lee alụdụ ịlọyawụ ẹpwa nyang kem a ka wụrụ ẹpwa kpong-kpong ka. Ó-ri ịnyị ka aalẹ, ị tịtị ka wụrụng ẹpwa kwiwa ịnyịnyị. Ọọwa lẹ, a ka ye uri nya ụkụrwọ nyang ọọwa bwu ụbwọ nyaa lẹlẹ.

¹³Ọkọkọ nya ọọwa lẹ, ụka ká ka họ ang oriri wụrụ angịnyị ẹpwa lẹ aalẹ, angịlẹ kị ri ikpehika bala alikiri bala ikuku bala alidu anyị kem, a ka wụrụ ẹpwa ọọwa lẹlẹ.

¹⁴Aalẹ, ahị ọwawa ọtụka-ọtụka ka juwa hang ụka ọọwa lẹ. Chajị angịwẹ ayịdang á ka ye ịngịngịhyẹ họ hang kwiwa myị́ odehe ọlẹ kpong-kpong ka. Ọọwa lẹ, Ohe Oluhye a ka nwụng uri nya ụkụrwọ ọọwa lụka ọlẹ ká alabwẹla ịnyịịla ka wuleji bwula igu lẹlẹ.”

¹⁵Ụka ká ọngọhẹ lẹpwarịrị nya angịlẹ kị bá hụhụ ri ang oriri ọọwa ta iJisọsị, wo ẹlẹwẹ ká iJisọsị ya kpá wuu lẹ, ọ byoo yẹkẹẹ, “Ayịbahị, ọ ka ri ang nya ahị ọwawa ọtụka ha ọng myị́ ọng ọlẹ kị ka wụrụ ẹpwa kaka ri ang oriri ụ-ụwa ị-ịpyị Adịrahụ nya Ohe Oluhye!”

¹⁶Ịnyị, iJisọsị a kpa oja ọkpịta ọlẹ wẹ byoo yẹkẹẹ, “Wo mẹ! Ụka ọhẹ juwa ká ọlụdụ ọhẹ họ ang oriri ọtụka-ọtụka wụrụ iru nya angịnyị lụmẹ-lụmẹ ẹpwa.

¹⁷Ịnyị, ụka ká ayịdẹpwa ọọwa nwụlanọ kpá, ká ụka nya ang oriri ọọwa pwụ lẹ, ọ du ọnchẹ nyamwụ ẹrụ kele kaka byi angga nyamwụ yẹkẹẹ, ‘Anụ kẹwẹ mẹ! M nwụla ang wuu nọ gbenu kpá lẹ.’

¹⁸Ma, ọngọngọọng lẹpwụ nya angịịwa wuu juwa hi iwe ha ịlaa nya ang odudu kị ka ka ọ-la ang oriri ọọwa myị́ kpong-kpong kaka. Ọngọhọhẹ nyaa ya ịnyamwụ dodehe je ọnchẹ ọọwa yẹkẹẹ, ‘Am ra ọpyị o-wu ẹrụ onyeewe-onyeewe ọhẹ lalẹẹ. M ka kele pyii kaka wụlọọ yẹ lẹlẹ, a wụ ẹjẹ kaka, hi iwe ham mẹ, ẹnwa!’

¹⁹Ọngọkịla nyaa ya ịnyamwụ dodehe yẹkẹẹ, ‘Am ra ịna ị-kpa wu ẹrụ iwo chiriri lalẹ. M jam ka kpaa kaka mayẹ ẹ-ẹrụ lẹlẹ, a wụ ẹjẹ kaka, hi iwe ham mẹ, ẹnwa!’

²⁰Ọngọkịla nyaa ya ịnyamwụ dodehe yẹkẹẹ, ‘Am ye ahụ onyeewe-onyeewe lalẹ. Lẹ, ḿ ka jẹ́-ẹ tụụbwọ hyọọ warị myị́ kaka, ẹnwa!’

²¹Ịnyị lẹ, ọnchẹ nya ayịdẹpwa ọọwa a tịrẹkpẹ kaka ya je ayịbamwụ jaabwọ ká angịwẹ dọọ ẹrụ wuu lẹlẹ. Ọọwa lẹ, ayịdẹpwa ọọwa a wụ ẹjẹ nya ịlẹhị-ịlẹhị lẹ, ọ byi ọnchẹ nyamwụ ọwẹ yẹkẹẹ, ‘Rụ kele ahyaahị ká kaka wụrụ ikpehika bala alikiri bala alidu bala ikuku ịlẹ wuu ká ka yẹ o-opeje bala agbayị myị́ agbayị nya epweji ọlẹ wuu warị mẹ.’

²²Ịnyị, ụka ká ọnchẹ ọọwa họ jaabwọ ká ayịbamwụ byoo kpá lẹ, ọ byi ayịbamwụ yẹkẹẹ, ‘Ayịbahị ee, yẹ mẹ! Am kele kaka kpa angịlẹ wuu ká rụ́ warị lẹ! Ma, ekeji ịhụhụ ilube nya ọjịra-jịra ọọwa tị hi chị ụwa e-eji lụmẹ wẹẹ!’

²³Ayịdẹpwa ọọwa myịmyị byi ọnchẹ ọwẹ yẹkẹẹ, ‘Myị́myị tịrẹkpẹ kele ka agbayị ịtụka wuu bala ichwiiwa mẹ. Ká yẹda angịlẹ ká ka yẹ ụ-ụwa wuu nya ịlẹhị-ịlẹhị gbee ká ka kpaa warị, chajị ká angịnyị ka myị ube nya ọhụhụ nya ang oriri nyam ọwẹ kpọng-kpọng mẹ.’

²⁴Ọọwa lẹ, ayịdẹpwa ọwẹ a myịmyị byi ọnchẹ nyamwụ yẹkẹẹ, ‘Wo mẹ! Angịlẹ wuu kam wụrụ ẹpwa wẹ nya ọgbanyẹ-ọgbanyẹ kị pwa ọwẹwẹ lẹ, ọngọngọhẹ nyaa á ka kpa ụpịlẹ nya ịngịngịhyẹ nya ang oriri nyam ọlẹ ka ọnụ nyaa kpong-kpong kaka!’ ”

²⁵Ụka ọọwa, iru nya angịnyị lụmẹ-lụmẹ juwa ba iJisọsị jẹ. Ịnyị, ụka kọ jahị nyamwụ kpata daa lẹ, ọ byaa yẹkẹẹ,

²⁶“Anụ wo mẹ! Ọng myị́ ọng ọlẹ kọ warị wẹ ẹga nyam, kọ ri ká ọháha ọlẹ kọ la ẹ-ẹga nya adamwụ lee ịnamwụ lee ahụ nyamwụ lee anyị nyamwụ lee anyịnamwụ alẹng bala anyang, dọmwụ tụ ọhịhị nya ịlọmwụ ọwa ayịdang, á chụ hi gụ ọháha ọlẹ ká ọngọọwa la ẹ-ẹga nyam am ayịdang ka aalẹ, ọngọọwa á chịla kọ ka ri ọngọjụgbẹyị nyam kpong-kpong kaka.

²⁷Ọng myị́ ọng ọlẹ kọ juwa ka hu agurube nya akama ọyẹyẹ tam nyamwụ chụ e-egbeju, ka juwa bam jẹ ka aalẹ, ọngọọwa á chịla kọ ka ri ọngọjụgbẹyị nyam kpong-kpong ka, ịnyịnyị.

²⁸Anụ me irya nya ẹla ọlẹ wẹẹ. Oowo lẹpwụ nyanụ a tị́ juwa kọ ri kọ juwa tịtọ nyọka nwụ́ ube-oluhye kọ ka hụhụ, kụ okpoko nyamwụ achụ wuu, jẹ́ yẹkẹẹ, okpoko ọọwa nyị ka nwa ọwa lẹ, ene kọ ka dọmwụ nya ube ọọwa ọnwụnwụ ka?

²⁹Ó-ri ịnyị kaka lẹ aalẹ, ụka kọ dọmwụ nya ube ọọwa omeme, kọ tị jwọọ nwụ́ chị eju myị́ kaka lẹ, angịnyị wuu a ka juwa kpa ọnụ họọ chajị nya ọọwa lẹlẹ.

³⁰Ị ka juwa kpọọ họ yẹkẹẹ, ‘Wuu! Ala ịtụka dọmwụ họ́ọ lụmẹ. Ọ dọmwụ nya ube lẹ, ọ jwọọ nwụ́ myị́ chị eju wẹ wẹẹ?’ ”

³¹IJisọsị myịmyị byaa yẹkẹẹ, “Lee, adịrahụ oyina, ọlẹ kọ juwa tịtọ nyọka kaka dẹwụ tụ adịrahụ ọkịla pyịpyị, a tị́ ka hụhụ, me irya yẹẹyẹẹ jẹ́ yẹkẹẹ, alẹwụ ụnọ ohu kụrụ ịrụ nya ọọwa ịlẹ nyị ka dẹwụ kụrụ alẹwụ ụnọ ohu-iye kụrụ iwo nya adịrahụ oluji nya ọọwa ọọwa myị́ ene kọ ka chị eko nya ẹwụ ọọwa ka?

³²Ma, ọ́ tị ri kọọwa ayịdang á jẹ́ yẹkẹẹ, ọwa nyị́ ka kụrụ oluji nya ọọwa ọọwa myị́ kaka lẹ aalẹ, ọ ka du angịhyẹ ẹrụ ku ọmwakpa nya ịlọmwụ kele kaka họ okpunyi ụ-ụgbẹyị ẹ-ẹga ọlụrụ, chajị ká alẹwụ nya oluji nyamwụ ọọwa ka kele kaka dọọ ẹwụ kaka lẹlẹ.

³³Chajị nya ọọwa lẹ, ọng myị́ ọng ọlẹ kọ ka byẹjẹ ka tụụbwọ hi ang myị́ ang nya ịlọmwụ wuu deeji chajị nyam ka aalẹ, ọ́ ka jẹ́-ẹ ri ọngọjụgbẹyị nyam myị́ kaka.”

³⁴IJisọsị myịmyị byaa yẹkẹẹ, “Ịnọ, ịma ri ang ọlịpyọ! Ma, ọ́ tị ri ká ịma á gba ịpyọ ọlala nyamwụ daarụ hi ịlọmwụ lẹ, ale, ịma ọọwa a tị́ ka jẹ́-ẹ ye ịpyọ ọlala nyamwụ bwu myịmyị wẹẹ?

³⁵Ụma nya ịma ọlịnyị, á ju apyobwuna ha ịpyị ọ-kpa họ ang lee o-ju apyobwuna nyọka hwọọ jula ọtẹwụụ ọ-kpa họ ang kaka. Kẹnẹ-kẹnẹ, ọ-tụ ụbwọ hi ịma ọlịnyị daarụ pyịyọọ mẹ ịnyị!” IJisọsị kpa ẹla ọlẹ tụ ẹla ọọwa ku yẹkẹẹ, “Ọng myị́ ọng ọlẹ kọ ju ụrụ ọ-kpa wo ẹla lẹ aalẹ, ọ wo etu nya ẹla ọlẹ mẹ!”