Read idege ILUKU 15 Bible Online

ILUKU 15 - idege bible

ILUKU 15

¹Ụka ọhẹ, angị nyẹ angịnyị ẹpwa bala alọhọbịrị ịkịla ịhyẹ kele ka ẹga nya iJisọsị juwa wo ẹla ọmẹjẹ nyamwụ.

²Ịnyị, ala ịFarịsii bala ịtịcha ị-mẹ ehile nya iMosisi jẹ ịhyẹ ịlụwa a juwa mwọ ala ya yẹkẹẹ, “Anụ yẹ jaabwọ ká ọlẹng ọwẹ jam ye alọhọbịrị i-hi deeji ịwẹ ju ụbwọ, juwa ri ang oriri taa ịnyịnyị wẹẹ!”

³Ọọwa lẹ, iJisọsị a jaa oja ọkpịta ọlẹ yẹkẹẹ:

⁴“Oowo lẹpwarịrị nyanụ a tị́ juwa kọ ri kọ la ịkpịlọ ohu, ká ọkpịlọ ookpokpo lẹpwụ nyaa á kpa ịlọmwụ hwahị gbee kọ gwọọ byi, ká ọngọọwa á ka tụụbwọ hi ịkpịlọ iwo ihikichukụrụ ihikichu ihihi ịkịla ụ-ụwa u-ugbileji, ọ ka rụ kele kaka pịlahị nya ọkpịlọ obyibyi ookpokpo ọọwa gbee kọ ka yọọ ka?

⁵Ụka ká ọngọọwa á yẹ ọkpịlọ obyibyi nyamwụ ọọwa lẹ, ọ kaa hwoo nọ o-omyi, juwa chị ọkẹkẹnị nya ịlẹhị-ịlẹhị lẹlẹ.

⁶Ụka kọ nya pwụ ẹpwa kpá lẹ, ọ kaa be ẹkọ wụrụ aligu nyamwụ bala aloye-ẹpwa nyamwụ wuu kaka jịra lẹ, ọ kaa byaa yẹkẹẹ, ‘Anụ kẹwẹ, kaka chị ọkẹkẹnị tam mẹ. Chajị, ọkpịlọ nyam ọlẹ kọ hwahị gbee kọ byi lẹ, m yọọ lẹ!’ ”

⁷Ọọwa lẹ, iJisọsị a byaa yẹkẹẹ, “Ịnyịnyị, ọ la lẹ, m byinu yẹkẹẹ, ọkẹkẹnị ọtụka ka juwa e-epwoohe u-uhye nya ọngọhọbịrị ookpokpo ọlẹ kọ yẹ irya da gụ ọkẹkẹnị oluhye nya alabwẹla ọnyịịla ohu ine kụrụ iwo, iwo kụrụ ihikichu ịlẹ kị yẹ irya da kpá gbalẹ-gbalẹ ene-ene lẹ.”

⁸IJisọsị myịmyị ja oja ọkpịta ọkịla byaa yẹkẹẹ, “Lee, ọnyang oyina, a tị́ juwa kọ ri kọ la ihiri iwo chiriri, ká ọhẹ lẹpwụ nyaa á gwọọ byi, ká ọnyang ọọwa á ka chị ila ju otinika nyamwụ, ọọ tụ ube nyamwụ yẹẹyẹẹ gbee kọ ka yẹ ohiri obyibyi nyamwụ ọọwa ka?

⁹Ụka kọ yẹ ohiri ọọwa kpá, ọ kaa be ẹkọ wụrụ aligu nyamwụ bala alọyawụ ẹpwa nyamwụ wuu, kaka byaa yẹkẹẹ, ‘Anụ chị ọkẹkẹnị tam mẹ. Chajị ohiri nyam ọlẹ kọ byi lẹ, m yọọ lẹ!’ ”

¹⁰Ọọwa lẹ, iJisọsị a byaa yẹkẹẹ, “Ịnyịnyị, ọ la lẹ, m jam byinu yẹkẹẹ, alegu-ẹrụ nya Ohe Oluhye kaa chị ọkẹkẹnị ọtụka-ọtụka u-uhye nya ọngọhọbịrị ookpokpo ọlẹ kọ yẹ irya da!”

¹¹IJisọsị myịmyị jaa oja ọkpịta ọkịla yẹkẹẹ, “Adịda ọhẹ juwa ọlẹ kọ ma anyị alẹng imiiye.

¹²Ọnyị ọlẹ kọ ri onjwo byi adaa yẹkẹẹ, ‘Adada ee, chị ang ugu nyang ebwo, ká hu ọlẹ kọ ka hi pwụm ham alẹ mẹ.’ Ịnyị, adaa a chị ang ugu nyamwụ ebwo imiiye ha anyị nyamwụ ịịwa lẹlẹ.

¹³Ụka kọ nọ chẹẹ lẹ, ọnyị ọlẹ kọ ri onjwo, a go ang ugu nyamwụ ọọwa wuu ra lẹ, ọ hu okpoko nyamwụ kpa rụ kanyị ka ọpyị ọkịla ọlẹ kọ lụrụ hi ẹpwa lẹlẹ. Ụka kọ pwụ ọpyị ọlụrụ ọọwa lẹ, ọ bịrị okpoko nyamwụ ọọwa ụ-ụwa wuu bwula ụchị ọhọhọ la datị-datị lẹlẹ.

¹⁴Ụka ká ọnyị oluhwo ọọwa ya okpoko nyamwụ nyi epepe ju ang ododu kpá wuu lẹ, uhi ọtụka-ọtụka a kpeji ọ-ọpyị ọọwa lẹlẹ. Ma, ọwa ayịdang á tị ye ịngịngịhyẹ ka ri kpong-kpong kaka.

¹⁵Ọọwa lẹ, ọ kpa ịlọmwụ kele kaka yẹ ba ọlẹng ọlọpyị ọọwa ọhẹ lẹlẹ. Ayịbamwụ ọọwa byoo, nyị kpẹhị rịrị ikomba nya ọọwa, kịị nyị juwa ya ang oriri haa ri mẹ.

¹⁶Ụka ọọwa, imyi nwụ ọnyị oluhwo ọwẹ lụmẹ gbee kọ juwa tịtọ nyọka ri ang oriri nya ikomba ịịwa taa. Ma, ọngọngọhẹ á tị myị ya họọ ri kpong-kpong kaka.

¹⁷Ịnyị, ụka ká ọnyị ọọwa da ọhụ pịlẹ, kọ jẹ́ ịlọmwụ ogu kpá lẹ, ọ byi ịlọmwụ yẹkẹẹ, ‘Ahyu! Angịlẹ kị lalẹẹ họ ụkụrwọ nya okpoko ha adam lẹ, ang oriri dịda haa, gbee kị lalẹẹ kpa da ajwọ. Ọọwa lẹ, am ọnyị nyamwụ a mwọọgịlẹ lẹẹ ka gbu igu imyi ẹ-ẹgẹlẹ lẹka?

¹⁸Eheehe! M ka wuleji kam ka rụ tịrẹkpẹ kele ka ẹga nya adam, kam ka byoo yẹkẹẹ, Adada ee, am họ ang onyobyi ba Ohe Oluhye bala ahụ ayịdang lụmẹ kaka kpoye lẹ.

¹⁹Lẹ, ḿ chịla ká ka wụrụm ọnyị nyang kaka. Ma, hum lala ọngọhẹ ẹ-ẹpwụ nya angịlẹ ká diro-diro kaka họ ụkụrwọ nya okpoko hang mẹ.’

²⁰Ọọwa lẹ, ọ wuleji, hu ang juwa rụ ka ẹga nya adamwụ ịnyịlẹhị lẹlẹ. Ma, ụka ọlẹ ká adamwụ chẹhị kaka yọọ ẹ-ẹga ọlụrụ kọ juwa nya wẹ ẹpwa lẹ, ọ la adamwụ ahyẹẹrwẹrwa lụmẹ lẹlẹ. Ọọwa lẹ, ọ rụnyẹ kele kaka tọọ ụ-ụgbẹyị, juwa woo ba ajẹ, juwa jwoo ọnụ ụ-ụwa ịnyịnyị lẹlẹ.

²¹Ịnyị, ọnyị oluhwo ọọwa a byi adamwụ yẹkẹẹ, ‘Adada ee, am họ ang onyobyi ba Ohe Oluhye bala ahụ ayịdang lụmẹ kaka kpoye lẹlẹ, ḿ chịla ká ka wụrụm ọnyị nyang kaka.’

²²Ma, ụka ọọwa, adamwụ byi anchẹ nyamwụ yẹkẹẹ, ‘Anụ rụnyẹ kele kaka hu awụrụ ogbileji ọlẹ kọ hiigu gụ ịkịla wuu warị kaka kụrwọọ, kanụ hu ọmapẹ jwọọ ụ-ụkụchụ, kanụ go egbatẹ jwọọ a-ata ahyaahị mẹ.

²³Kanụ kele kaka wu ụgba nya ẹna o-ju eyo warị, kanụ nwọọ, kanụ ya họ ang oriri ọtụka-ọtụka kahị ri, juwa chị ọkẹkẹnị mẹ.

²⁴Chajị ọnyị nyam ọlẹ lala ịnyaa gbugbu ene-ene, ma, lẹẹlẹẹ lẹ, ọ tị la ọhịhị lẹ. Ịnọ, ọ gum byi gbalẹ-gbalẹ, ma, lẹẹlẹẹ lẹ, m tị yọọ ịnyịnyị lẹ.’ ” “Ịnyị lẹ, ịwa wuu a juwa chị ọkẹkẹnị ọtụka-ọtụka ịnyịlẹhị lẹlẹ.

²⁵Ụka ọọwa lẹ, ọnyị ọgbahị nya ọlẹng ọwẹ ka ẹrụ. Ịnyị, ụka ká ọnyị ọgbahị ọọwa juwa jẹ nya bwu ẹrụ kọ pwụ ọnụ ẹpwa nyaa lẹ, ọ chị ụrụ kaka wo iru nya alayịlọ odudu bala ewo ọchịchị kị juwa chị ọkẹkẹnị ọtụka-ọtụka ẹ-ẹpwa nya adamwụ lẹlẹ.

²⁶Ụka kọ nya pwụ ẹpwa, ọ be ẹkọ wụrụ ọnchẹ nya adamwụ ọhẹ kaka tọọ wo nya ang odudu kị juwa chị ọkẹkẹnị ọtụka ọọwa.

²⁷Ọnchẹ nya adamwụ ọọwa wẹ byoo yẹkẹẹ, ‘Ọnyịnang ọlẹ kọ rụ ka obyibyi lẹ, ọ nya alẹ lẹ! Ọọwa, adang a nwụ ẹna o-ju eyo, jam chị ọkẹkẹnị chajị nyọlẹ kọ nya la okpunyi bala ịnyịrọ gogo lẹ!’

²⁸Ma, ẹla ọọwa hu agbama ju ọnyị ọgbahị ọọwa, jahị da adamwụ lụmẹ kaka kpoye. Ọọwa lẹ, ọ pwa, ọwa nyị́ ka jụ ka ẹpwa kaka lẹlẹ. Adamwụ bọọ kpehe kele kaka raabwọ bịlọọ yẹkẹẹ, nyị chuchuu, kịị nyị wẹ ẹpwa mẹ.

²⁹Ọọwa lẹ, ọnyị ọgbahị ọwẹ a wẹ byi adamwụ yẹkẹẹ, ‘Adada ee, yẹ wẹẹ! Ang amalẹ kaka, kam jam myị ẹrụ hang la iru nya ẹka lụmẹ-lụmẹ lẹ. M kaa ju ẹla myị́ ẹla ọlọnụ nyang ihi ịnyịnyị. Ma, á tị byẹjẹ wu ugbe-ẹmwụ ochiche ọhẹ-lọhẹ nwụ ham kpụ, m ka kpa chị ọkẹkẹnị ta aligu nyam ẹnẹnẹhẹ lẹka.

³⁰Ọọwa lẹ, ọnyị nyang ọlẹ kọ kịla iru nya ikpoko nyang, kpa kaka họ ụchị bala alakpara a nya wẹ ẹpwa alẹ lẹ, a mwọọgịlẹ wu ụgba nya ẹna o-ju eyo nwụ họọ wẹ lẹ ka, lee?’

³¹Adamwụ wẹ byoo yẹkẹẹ, ‘Ọnyị nyam, yẹ mẹ! Ahụ ká jam ẹ-ẹpwa tam lẹ, ang myị́ ang nyam wuu ri ịnyang lụbwọ-lẹta.

³²Lẹ, a wụ ẹjẹ ka. Ọ ri ang ọchịla-chịla kahị ka chị ọkẹkẹnị u-uhye nya ọnyanya nya ọnyịnang ọlẹ. Chajị ọ-lala ịnyaa gbugbu ene-ene. Ma, lẹẹlẹẹ lẹ, ọ tị jam hịhị lẹ. Ịnọ, ọ byibyi ene-ene, ma, lẹẹlẹẹ lẹ, ahị tị yọọ lẹ.’ ”