Read idege ILUKU 16 Bible Online

ILUKU 16 - idege bible

ILUKU 16

¹Ụka ọọwa, iJisọsị myịmyị ja angịjụgbẹyị nyamwụ oja ọkpịta ọhẹ yẹkẹẹ, “Ọlụdụ ọhẹ juwa ọlẹ kọ la ọnchẹ ọgbahị ọkpẹhị rịrị ụdụ nyamwụ wuu. Ma, angịhyẹ tị ya je ayịbamwụ yẹkẹẹ, ọnchẹ ọọwa nyị juwa bịrị ayịbamwụ okpoko lụmẹ lẹ.

²Ọọwa lẹ, ọlụdụ ọọwa a wụrụ ọnchẹ ọgbahị nyamwụ ọwẹ kaka byoo yẹkẹẹ, ‘Yẹ mẹ! Ala iluhye nyang ịlẹ kam wo lẹ, ọ́ hám kaka. Lẹ, kele kaka go apwụ ịlẹ ká kaa da okpoko nyam wuu ju kpa warị kahị kụ ang achụ ha awụlẹ mẹ. Chajị á ka ri ọnchẹ nyam bwu alẹ kịlahị kaka.’

³Ịnyị, ụka ká ọnchẹ ọwẹ me irya chịng lẹ, ọ byi ịlọmwụ yẹkẹẹ, ‘Ahyu! Anyị, am tị́ ka họ kpá lẹẹ mẹ? Ayịbam jam ka kum hi ụkụrwọ lẹ, ḿ tị la gogo ka họ ang ẹ-ẹrụ myị́ ka. Ọ tị lam oyoyi nyọka kpa ogo bịlẹ ang.

⁴Ọ hiigu! Ang ọlẹ kam ka họ ri yẹkẹẹ, m ka họ angịnyị ọnahị, chajị kị ka yem ka ẹpwa nyaa ụka ká ayịbam á kum hi ụkụrwọ ọlẹ kpá.’

⁵Ịnyị, ọ be ẹkọ wụrụ angịlẹ wuu kị kpa ayịbamwụ uri ọngọhẹ, ọngọhẹ lẹlẹ. Ọ byi ọngịnyị nya ọgbanyẹ yẹkẹẹ, ‘Uri nya ịyẹ, a tị́ kpa ayịbam lẹẹ ene?’

⁶Ọngọọwa wẹ byoo yẹkẹẹ, ‘Abang nya ida ohu chiriri ịnyị!’ Ọnchẹ ọọwa byoo yẹkẹẹ, ‘Hụhụ ahyaahị ká gba ụpwụ nya uri nyang kpehe, ká da ju ụ-ụwa yẹkẹẹ, abang iwo ịrụ kem, ọwa nyaa kpa lẹ mẹ.’

⁷Ọnchẹ ọọwa byi oluri nya ayịbamwụ ọkịla yẹkẹẹ, ‘Uri nya ịyẹ, ahụ a tị́ kpa ayịbam ene?’ Ọ wẹ byoo yẹkẹẹ, ‘Obwuhu nya ịrayịsị ohu chiriri ịnyị!’ Ọnchẹ ọwẹ byoo yẹkẹẹ, ‘Gba ụpwụ nya uri nyang kpehe ká da ju ụ-ụwa yẹkẹẹ, obwuhu ohu ineku kem, ọwa nyaa kpa lẹ mẹ.’

⁸Ịnyị, ayịbaba nya ọnchẹ ọchịla o-hu ọkịlẹtụ ha ka ọwẹ, a juwa wa ẹla ọjẹ́jẹ lụmẹ ha ọnchẹ ọọwa, chajị nyọlẹ kọ jẹ́ chị uko nya ijuju nya ịlọmwụ lụmẹ lẹlẹ.” Ịnyị, iJisọsị a byi angịjụgbẹyị nyamwụ yẹkẹẹ, “Anụ tị́ yẹ jaabwọ ká alodehe ịlẹ kị kaa hu irya nyaa wuu nịrọ ụdụ nya odehe, kaa kpa ẹla ọjẹ́jẹ nyaa me irya ju ijuju nya ịlaa, mwọọgịlẹ gụ angịlẹ kị ri anyị nya Ohe Oluhye ịlẹ kị ji ẹpwụ nya ahịgboo nya Ohe Oluhye wẹ lẹ.”

⁹“Lẹ, m jam byinu yẹkẹẹ, anụ maga kanụ juwa kpa ụdụ ọlẹ kanụ la ẹ-ẹpwụ nya odehe ọlẹ họ angịnyị ụga, chajị kanụ ka la aligu ịnyịnyị mẹ. Chajị ká ụka ọlẹ ká ang-abwọ nya odehe ịịwa á myị́ lẹ, ká Ohe Oluhye ka yenu kele ka ẹpwa o-gbe oyi myị́ oyi nyamwụ mẹ.”

¹⁰IJisọsị myịmyị byaa yẹkẹẹ, “Ọng myị́ ọng ọlẹ kọ chịla o-hu ọkịlẹtụ ha ẹ-ẹga nya ang ochiche aalẹ, ọngọọwa tịtị ka chịla o-hu ọkịlẹtụ ha ẹ-ẹga nya ang ọtụka ịnyịnyị! Ma, ọngọlẹ kọ tị la kpẹẹkpẹẹ ẹ-ẹga nya ang ochiche ka aalẹ, ọngọọwa á tịtị ka jẹ́-ẹ la kpẹẹkpẹẹ ẹ-ẹga nya ang ọtụka ka, ịnyịnyị.

¹¹Ee lẹ, ó-ri kaanụ ayịdang á chịla o-hu ọkịlẹtụ ha ẹ-ẹga nya ụdụ nya odehe ọlẹ ka, o-owo, a tị́ ka myị-ị hu ụdụ nya epwoohe ọlẹ kọ ri ụdụ nya ịlẹhị hanụ mẹ?

¹²Ọ́ tị ri kanụ chịla o-hu ọkịlẹtụ ha ẹ-ẹga nya ang nya ọngọkịla ka, o-owo, a tị́ ka hu ang nya ịlọnụ anụ hanụ ịnyịnyị?”

¹³IJisọsị myịmyị byaa yẹkẹẹ, “Ọnchẹ ookpokpo á ka jẹ́-ẹ juwa myị ẹrụ ha ayịbaba imiiye lụka ookpokpo myị́ kpong-kpong ka. Chajị, ó-ri kọ họ ịnyị aalẹ, ayịbaba ọhẹ ka họ́ọ. Ma, ayịbaba ọkịla tị ka wọọ ẹjẹ. Ọ ka ju ọngọhẹ nyaa ihi. Ma, ọ ka ju ọngọkịla nyaa ẹpẹ ịnyịnyị. Ịnyịnyị, ọ la lẹ. Ánụ́ ka jẹ́-ẹ juwa myị ẹrụ ha ụdụ nya odehe ọlẹ lala ọnchẹ, anụ ka myịmyị jẹ́-ẹ juwa ju Ohe Oluhye ihi kpẹẹkpẹẹ myị́ kpong-kpong kaka.”

¹⁴Ụka ká ala ịFarịsii ịhyẹ ịlẹ ká okpoko kaa háa lụmẹ, wo ẹla oyaya nya iJisọsị ọọwa lẹ, ị juwa kpa iJisọsị họ lẹlẹ.

¹⁵Ịnyị, iJisọsị a wẹ byaa yẹkẹẹ, “Anụ ayịdang kaa hu ịlọnụ lala alabwẹla ọnyịịla ị-ịlahị nya angịnyị ehe, du ká angịnyị kaa junu ihi. Ma, Ohe Oluhye tị jẹ́ irya ịlẹpwụ nya ọkịlẹtụ nyanụ wuu. Chajị ang ọlẹ kọ ri ang olihi lụmẹ ị-ịlahị nya angịnyị ehe kaa ri ang ọ-la ịhịịhya ị-ịlahị nya Ohe Oluhye.”

¹⁶IJisọsị myịmyị byaa yẹkẹẹ, “Ene-ene lẹ, ehile nya iMosisi bala ẹla nya Ohe Oluhye oyaya nya alọmwụ inyogo nya Ohe Oluhye a lẹẹ kpanụ gbee pwụ ụka nya ọwẹwẹ nya ịJọn ọngọ hụ enyi Ohe lẹ. Bwu ụka nya ịJọn ọọwa tị lẹ, ẹla chajị nya ịpyị Adịrahụ nya Ohe Oluhye, ị tị jam ya jenu lẹlẹ. Ọọwa lẹ, ọng myị́ ọng a lẹẹ kpa ọngịrị-ọngịrị jụ kele ka ịpyị adịrahụ ọọwa lẹlẹ.

¹⁷Ọ ka ri ang ọchịkpẹẹ, ká epwoohe bala odehe ọlẹ ka chịpwụrụ gụ ụbẹẹtụ ochiche ochiche nya ehile nya Ohe Oluhye ọhẹ-lọhẹ ọ-ka chị deeji la ọhọhọ jịra gbanggbang.”

¹⁸“Ọrụ-ahụ ọnyị myị ọnyị ọlẹ kọ pwa ahụ nyamwụ kaka ye ọnyang ọkịla lẹ aalẹ, ụya a wẹ kọ họ ba ahụ onyogo nyamwụ lẹlẹ. Ọlẹng ọnyị myị ọnyị ọlẹ kọ tị ye ọnyang ahụ ọlẹ kị pwapwa lẹ aalẹ, ụya a wẹ, ká ọlẹng ọọwa họ ịnyịnyị lẹlẹ.”

¹⁹IJisọsị myịmyị jaa oja ọlẹ yẹkẹẹ, “Ọlẹng ọlụdụ ọhẹ juwa, ọlẹ kọ la iru nya ịwụrụ ịkụrụ-kụrụ ịlịnya myị ẹpwa. Ọ kaa ri ang oriri ọbọọchẹ ẹnụ myị́ ẹnụ wuu.

²⁰Ụka ọọwa, ọlẹng okpehika ọhẹ juwa, kọ kaa kele kaka godayị ọ-ọnụ ube nya ọlụdụ ọọwa, juwa bịlẹ ang. Ẹnyị nya okpehika ọọwa ri ịLasarọsị. Ọ chị abẹ myị́ ịnyịrọ-ịnyịrọ.

²¹Ẹhị ọrịrịị-rịrị nya ịLasarọsị ri yẹkẹẹ, ọ tịtọ kọ ka kele kaka bẹ apwụ nya ang oriri ịlẹ kị chị abwọ bwu uhye nya itebwuru nya ang oriri nya ọlụdụ ọọwa bwu eji ri. Ụka ọọwa, ibwu ịlụwa kaa kele kaka pịlẹ abẹ nya ịLasarọsị ọwẹ nẹ.

²²Ịnyị, ụka ká okpehika ọọwa gbu, alegu-ẹrụ nya Ohe Oluhye kpọọ kele kaka hụhụ i-iwe ahụrụ olihi-ihi ụ-ụwa e-epwedii ta Ebiraham e-epwoohe. Ụka ká ọlụdụ ọọwa gbu ịnyịnyị, ị jwọọ eji.

²³Ọọwa lẹ, ọlụdụ ọọwa a juwa yẹ akama ọtụka-ọtụka o-obwila lẹlẹ. Ụka kọ hu ẹhị nyamwụ hwaa ụ-ụwa, ọ chẹhị kaka yẹ Ebiraham ẹ-ẹga ọlụrụ ẹ-ẹpwụ nya okpunyi bala ịLasarọsị a-ata nyamwụ.

²⁴Ọlụdụ ọọwa chị eko la omyi o-gboo wụrụ Ebiraham yẹkẹẹ, ‘Ebiraham Adada, chuchuu, yẹm ahyẹẹrwẹrwa, ká du ịLasarọsị ẹrụ kọ ya ụkụchụ gu enyi kpa kaka kpụ ẹlẹlẹ nyam ba chẹẹ mẹ! Chajị ila nya obwila ọlẹ jam jụm lụmẹ lẹ!’

²⁵Ebiraham wẹ byoo yẹkẹẹ, ‘Ọnyị nyam, á kpịtịya kaka, lee? Ụka ká juwa odehe lẹ, a la iru nya ang ịnyịịla lụmẹ-lụmẹ. ỊLasarọsị tị juwa ẹ-ẹpwụ nya ang ọjụjụ. Ma, lẹẹlẹẹ lẹ, ịLasarọsị ji ẹpwụ nya ọkẹkẹnị ọtụka-ọtụka lẹ, ọọwa lẹ, ahụ ayịdang a tị wẹ ẹ-ẹpwụ nya ang ọjụjụ lẹlẹ.

²⁶Wo mẹ! Ọgụgụ wuu ri yẹkẹẹ, okpokpo ọtụka-ọtụka ọhẹ ọlẹ kọọ wẹ ẹ-ẹpwarịrị nyahị lẹ, ọ chịhị bala ahụ ebwo hi awụlẹ lẹ! Ọngọngọhẹ á ka jẹ́-ẹ bwu ẹga nyahị wẹ ẹga nyanụ myị́ kaka. Lee, o-bwu ẹga nyanụ anụ wẹ ẹga nyahị myị́ kpong-kpong kaka, ịnyịnyị.’

²⁷Ọlụdụ ọọwa myịmyị wẹ byi Ebiraham yẹkẹẹ, ‘Ó-ri ịnyị lẹ aalẹ, aa chuchuu mẹ, Adada! Ká du ịLasarọsị ẹrụ kele ka ẹpwa nya adam olodehe ham mẹ.

²⁸Chajị, m la anyịnịna alẹng angị ịrụ ịlẹ kị hi juwa odehe wẹẹ. Ká byoo kọ daa ọna yẹẹyẹẹ mẹ. Chajị kị ka myịmyị-ị̀ bam warị wẹ ẹga ọjụjụ ọtụka ọlẹ myịmyị kaka.’

²⁹Ebiraham wẹ byoo yẹkẹẹ, ‘IMosisi bala alọmwụ nya Ohe Oluhye tị́ juwa odehe. Anyadang ịịwa a wo ẹla nya Ohe Oluhye oyaya nyaa mẹ!’

³⁰Ọọwa lẹ, ọlụdụ ọọwa a myịmyị byi Ebiraham yẹkẹẹ, ‘Ehe, Adada Ebiraham, ó-ri ká anyadam ịịwa á wo ẹla nya Ohe Oluhye oyaya nya ọngọ wuleji bwula igu, ọọwa a ka họ kị ka yẹ irya da gụ lẹ.’

³¹Ebiraham wẹ byoo yẹkẹẹ, ‘Ó-ri ká ẹla nya Ohe Oluhye oyaya nya iMosisi bala ịnya alọmwụ nya Ohe Oluhye ịkịla á wu anyadang ịịwa ẹpwụ kpụ, ị yẹ irya da ka, tụbwọ aalẹ, ẹla nya Ohe Oluhye oyaya nya ọngọ wuleji bwula igu á ka wu aa ẹpwụ myị́ kpong-kpong ka, ịnyịnyị.’ ”