Read idege ILUKU 17 Bible Online

ILUKU 17 - idege bible

ILUKU 17

¹IJisọsị byi angịjụgbẹyị nyamwụ yẹkẹẹ, “Anụ wo mẹ! Ọmayẹ o-ju ọmwụ nya ọhọbịrị ọhọhọ lẹ, ọ́ ka dayi la ọwẹwẹ chị angịnyị ehe ọgụ kokoo! Ma, angịlẹ ká ọmayẹ ọlịnyị ka bwu ẹpwụtụbwọ nyaa chị angịkịla ọgụ wẹẹ, angịịwa ri enyi gu obyi lẹ!

²Chajị, ọkọkọ nyọlẹ ká eje nya ọpịrị anyị anjwo ichiche ịlẹ kị myị la Ohe Oluhye ka ẹpwụ nya ọhọbịrị ọhọhọ ọlịnyị ka wu ọngịnyị ehe lẹ, ọ ka hiigu ha ọngọọwa gụ, ó-ri kị hu ẹjwọọma ọtụka-ọtụka, da ori da ọngọọwa o-omyi, hwoo ju ka ẹpwụ nya ihu ọtụka jurum kọ ka byi-enyi ụ-ụwa pyịyọọ.

³Lẹ, anụ juwa kpahị ju ịlọnụ ọgwọgụ mẹ! Ó-ri ká ọnyadanụ ọhẹ-lọhẹ á họ ang onyobyi juwa aalẹ, anụ́-ụ yalibyi lọọ mẹ. Ụka kọ yẹ irya da lẹ, anụ hịnyọhi họọ mẹ.

⁴Ó-riri ká ọnyadanụ ookpokpo á họ ang onyobyi baanụ lala ugbabwọ irwiye ẹ-ẹpwụ nya ahị ọpyẹpyẹ ookpokpo, kọ tị juwa warị kaka yụbwọ ba eji, ịnyịnyịịnyị, jịra ugbabwọ irwiye ọọwa, juwa yẹkẹẹ, ḿ jẹ́ kaka, ọ gụm gụ lẹ aalẹ, anụ́-ụ hịnyọhi họọ ịnyịnyị mẹ.”

⁵Ọọwa lẹ, alẹrụ nya iJisọsị a byoo yẹkẹẹ, “Ọngọlahị, chuchuu, họ ká ọmyịmyị ọlala nyahị a nwa kịlahị-ịlahị mẹ!”

⁶Ọọwa lẹ, Ọngọlahị a wẹ byaa yẹkẹẹ, “Ó-ri ká ọmyịmyị ọlẹpwụ nyanụ á lala ẹjẹ nya okoji ọlẹ kị wụrụ ‘ịmọsịtadị’ la myị́ lẹ aalẹ, anụ ka la ọngịrị byi ọmwụ nya okoji nya isikamọ ọlẹ yẹkẹẹ, ‘Ahụ okoji ọwẹ, hu latẹ-latẹ ká kpa ịlọng kele kaka ju ka ẹpwụ nya ihu ọtụka ọlaanyị mẹ!’ Aalẹ, ọ ka ju ihi nya ẹla ọlọnụ nyanụ ọọwa ịnyịlẹhị lẹ.”

⁷IJisọsị myịmyị byaa yẹkẹẹ, “Anụ ya kọ ri ká ọngọngọhẹ nyanụ á la ọnchẹ ọlẹ kọ juwa họ ang ẹrụ nyamwụ. Lee, ọlẹ kọ juwa gbe ịkpịlọ nyamwụ á họ ụkụrwọ nyamwụ kpá, kọ nya wẹ ẹpwa ká ayịdẹpwa ọọwa ka byoo yẹkẹẹ, ahụ nyị kpụrụrụ kaka hụhụ i-itebwuru o-ri ang mẹ?

⁸Ọ́ ka jẹ́-ẹ lịnyị kaka. Ọkọkọ nya ọọwa lẹ, ayịdẹpwa ọọwa ka byi ọnchẹ ọwẹ yẹkẹẹ, ‘Kele kaka kpụ́ ang oriri mẹ! Ụka ká họ ang oriri kpá lẹ, aa warị kaka godayị, juwa myị ẹrụ ham gbee pwụ ụka ọlẹ kam ka ri ang oriri nyam bala ọ-nwa ang ọnwanwa kpá wuu ene ká ka la iwe ri ang oriri bala ọ-nwa ang ọnwanwa nya ịlọng mẹ!’

⁹Anụ wo kpá ká ayịbaba ọhẹ-lọhẹ jẹ́ juwa ji ọnchẹ nyamwụ obe ọhọhọ chajị nya o-ju ihi nya ehile ọlẹ ká ayịbamwụ dọọ ẹnẹhẹ lẹ?

¹⁰Ịnyịnyị, anụ la ị-ịlahị nya Ohe Oluhye lẹ. Ụka kanụ họ ebwo nya ụkụrwọ ọlẹ ká Ohe Oluhye ya junu ụ-ụbwọ kpá wuu aalẹ, ọ chịla kanụ ka juwa yẹkẹẹ, ‘Anchẹ ịchịla o-ji obe ka, ahị ri lẹ. Chajị ebwo nya ụkụrwọ ọlẹ kị ga hahị kem a lẹẹ kahị họ wẹẹ lẹ.’ ”

¹¹Ụka ká iJisọsị juwa jẹ kele ka iJerusalẹm, ọ chịpwụrụ bwu apewa nya ọpyị nya ịSameriya bala ịGalili.

¹²Ụka ká iJisọsị juwa ka jụ ka epweji ochiche ọhẹ lẹ, ọ tọ alekpo iwo chiriri ịhyẹ ịlẹ kị godayị rịrị hwẹẹẹ hyọọ lẹlẹ.

¹³Alekpo ịịwa hu omyi nyaa hwaa, juwa ya ẹla gboo yẹkẹẹ, “Ayịbahị iJisọsị, chuchuu, yẹhị ahyẹẹrwẹrwa ká họhị uda chẹẹ mẹ!”

¹⁴Ụka ká iJisọsị chẹhị kaka yaa, ọ byaa yẹkẹẹ, “Anụ rụ kele kaka mẹ ịlọnụ jẹ ọngọkiliya ha Ohe Oluhye mẹ.” Ịnyị, ụka kị yegiri juwa rụ kele lẹ, ekpo nyaa a myị́ hi aa cheri-cheri lẹlẹ.

¹⁵Ụka ká ọngọhẹ ẹ-ẹpwụ nya alekpo ịịwa chẹhị kaka yẹ jaabwọ ká ekpo nyamwụ myị́ wuu lẹ, ọ jahị nyamwụ kpata juwa rụ tịrẹkpẹ kele ka ẹga nya iJisọsị, juwa gwogbo ha Ohe Oluhye la omyi o-gboo nya ịlẹhị-ịlẹhị lẹlẹ.

¹⁶Ụka kọ pwụ ẹga nya iJisọsị, ọ ya ahị nyamwụ kụrụ eji birikiti i-ijata nya iJisọsị, juwa joo obe nya ịlẹhị-ịlẹhị lẹlẹ. Ọlẹng ọọwa ri ọla ịSameriya.

¹⁷Ọọwa lẹ, iJisọsị a yẹkẹẹ, “Aalekpo angị iwo chiriri, m họ uda lẹẹ igbinọ ka? Ee lẹ, angị ihikichu ihihi tị́ lee mẹ?

¹⁸Ọọwa ri yẹkẹẹ, ọngọngọhẹ nyaa á myị tịrẹkpẹ warị kaka gwogbo ha Ohe Oluhye dala ọngọlẹ kọ ri oloja ọkịla lẹẹ kaka.”

¹⁹Ịnyị, iJisọsị a byi olekpo ọọwa yẹkẹẹ, “Wuleji ká rụ mẹ, ẹnwa! Ọmyịmyị ọlala nyang họng uda nya ekpo nyang lẹ!”

²⁰Ụka ọọwa, ala ịFarịsii ịhyẹ kele kaka tọ iJisọsị ịtọ chajị nya ụka ọlẹ ká ịpyị Adịrahụ nya Ohe Oluhye ka warị. IJisọsị wẹ byaa yẹkẹẹ, “Ọwẹwẹ nya ịpyị Adịrahụ nya Ohe Oluhye á la ang o-ju ẹjẹẹ ọlẹ kị ka jẹ́-ẹ yẹ lẹhị ọlam-ọlam ọwẹ ka!

²¹Ịpyị Adịrahụ nya Ohe Oluhye á tị ri ang ọlẹ kị ka jẹ́-ẹ byinu yẹkẹẹ, ‘Ọ lẹẹ ẹ-ẹgẹlẹ lẹ!’ Lee, ‘Ọ lalẹẹ ẹ-ẹga ọlaanyị lẹ!’ ka ịnyịnyị. Chajị ịpyị Adịrahụ nya Ohe Oluhye jam ẹ-ẹpwarịrị nyanụ lẹẹlẹẹ lẹ.”

²²Ọọwa lẹ, iJisọsị a byi angịjụgbẹyị nyamwụ yẹkẹẹ, “Ụka juwa warị kaanụ ayịdang ka teleko nya ẹnụtụrụ ọlẹ ká am Ọnyị nya ọngịnyị ehe ọlẹ ka warị. Ma, ánụ tị ka yẹ ẹnụ ọọwa ẹ-ẹhị lụka ọọwa kpong-kpong ka.

²³Ụka ọlịnyị, angịhyẹ ka byinu yẹkẹẹ, ‘Ọnyị nya ọngịnyị ehe ọọwa lalẹẹ ẹ-ẹga ọlaanyị lẹ!’ Lee, ‘Ọ lẹẹ ẹ-ẹgẹlẹ lẹ!’ Ma, anụ kele kụwa ka. Lee, o-juwa ba angị ịlịnyị jẹ koo!

²⁴Chajị jaabwọ ká apya á chị lẹ, kọ kaa wuru manya-manya u-uhye nya egbamwụ bwu ịkịka ọhẹ kele ka ọkịla wuu wẹẹ, ịnyịnyị, ọwẹwẹ nyam am Ọnyị nya ọngịnyị ehe a ka la gede-gede ẹnụ ọọwa lẹlẹ.

²⁵Ma, ene nya ọọwa lẹ, Ọnyị nya ọngịnyị ehe ọlẹ ka yẹ akama ọtụka-ọtụka bwu ẹpwụtụbwọ nya angịnyị iloyi ọlẹ. Ị ka pwọọ, juwa ji ẹkpẹ nyaa dọọ ịnyịnyị.

²⁶Jaabwọ kọ la ha aloyi nya iNuwa lẹ, ịnyịnyị, ọ ka la ha aloyi ọlẹ la ẹnụtụrụ nya ọwẹwẹ nya Ọnyị nya ọngịnyị ehe lẹlẹ.

²⁷Chajị ụka ọọwa lẹ, angịnyị ehe juwa ri ang oriri bala o-juwa nwa ang ọnwanwa jaabwọ kọ háa. I juwa ye ịhụ. I juwa go anyị anyang nyaa da ọrụ ịnyịnyịịnyị gbee pwụ ụka ọlẹ ká iNuwa ju kele ka ẹpwụ nya ụgbọ nya enyi nyamwụ. Ọọwa lẹ, ukpenyi ọtụka-ọtụka ọọwa a do kaka taa ịwa wuu ayịreji gbanggbang lẹlẹ.

²⁸Jaabwọ kọ la ha aloyi nya ịLọtụ lẹ, ịnyịnyị, ọ tịtị ka la ha aloyi ọlẹ ụka ọọwa lẹlẹ. Chajị, ụka ọọwa, ala ịSọdọm anyị juwa ri ang oriri bala o-juwa nwa ang ọnwanwa jaabwọ kọ háa. I juwa go ang nyaa ra i-ihi. I juwa ra ang bwu ụbwọ nya angịnyị ịnyịnyị. Alẹrụ juwa wu. Alebe juwa nwụ́ ịnyịnyịịnyị,

²⁹gbee pwụ ẹnụtụrụ ọlẹ ká ịLọtụ gba kpehe bwu epweji nya ịSọdọm. Ọọwa lẹ, ila bala ajwọ, a do bwu epwoohe kaka taa ịwa wuu ayịreji gbanggbang lẹlẹ.

³⁰Ịnyịnyị-ịnyịnyị, ọ ka la la ẹnụtụrụ ọlẹ ká Ọnyị nya ọngịnyị ehe ọlẹ ka hi ehe warị wẹ odehe ọlẹ lẹlẹ.”

³¹“Ẹnụtụrụ ọọwa, ọng myị́ ọng ọlẹ kọ ka juwa u-uhye nya achịnawụ nya ube nyamwụ aalẹ, ọngọọwa a tụtụm myịmyị hireji bwu ụwa, juwa maga nyọka jụ ka ẹpwang nyamwụ kaka hu ịngịngịhyẹ kpa rụ bwu ụwa kaka. Ọngọlẹ kọ tị juwa ẹ-ẹrụ nyamwụ lẹ aalẹ, ọngọọwa a tụtụm myịmyị tịrẹkpẹ ka ẹpwa kaka hu ịngịngịhyẹ ene kaka ịnyịnyị.

³²Anụ kpịtịya nya ang ọlẹ kọ họ ẹ-ẹga nya ahụ nya ịLọtụ mẹ.

³³Ọng myị́ ọng ọlẹ kọ juwa maga nyọka chị ọhịhị nya ịlọmwụ da ẹ-ẹpwụ nya odehe ọlẹ aalẹ, ọhịhị nya ọngọọwa ka gwọọ byi. Ma, ọng myị́ ọng ọlẹ kọ tị tụụbwọ hi ọhịhị nyamwụ ga ha igu chajị nyam odehe ọlẹ aalẹ, ọngọọwa hu ọhịhị nyamwụ ju ịtọ gbe ịlọmwụ pyịyọọ lẹ.

³⁴Nya ịlẹhị-ịlẹhị, m byinu yẹkẹẹ, la odu ọọwa, alẹng angị imiiye ka nọnọ ị-ịbẹẹdị ookpokpo. Ị ka hu ọngọhẹ nyaa kpa rụ hi ọngọkịla.

³⁵Anyang angị imiiye ka juwa go ang ị-igo la awụlẹ. Ị ka hu ọngọhẹ nyaa kpa rụ hi ọngọkịla ịnyịnyị. [

³⁶Alẹng angị imiiye tị ka juwa ẹ-ẹrụ, juwa họ ang la awụlẹ. Ị ka hu ọngọhẹ nyaa kpa rụ hi ọngọkịla.]”

³⁷Angịjụgbẹyị nyamwụ tọọ wo yẹkẹẹ, “Ọngọlahị ee! Ale, ẹlẹwẹ a tị́ ka họ jịra?” IJisọsị wẹ byaa yẹkẹẹ, “Ẹ-ẹga myị́ ẹga ká ogu nya iyo á gbu da lẹ, ụ-ụwa, epwu a kaa kele kaka dagaga jwoo lẹlẹ.”