Read idege ILUKU 18 Bible Online

ILUKU 18 - idege bible

ILUKU 18

¹IJisọsị juwa kpa oja ọkpịta mẹ ang jẹ angịjụgbẹyị nyamwụ jaabwọ kọ chịla ká angịnyị nya Ohe Oluhye ka juwa raabwọ ha Ohe Oluhye ụka myị́ ụka, chajị kị ka la ọkịlẹtụ ọ-chị́ pyẹpyẹ ụka ọhẹ-lọhẹ kpong-kpong ka. Ọọwa lẹ, ọ jaa oja ọkpịta ọọwa yẹkẹẹ,

²“Anụ wo mẹ! Agaba oleje ọhẹ juwa e-epweji ọhẹ ọlẹ kọ kaa juhi nya Ohe Oluhye kpong-kpong ka. Lee, ọ-chị ihi ju ọngọngọhẹ kaka ịnyịnyị.

³Ọnyang ahụ-ogu ọhẹ juwa e-epweji ọọwa. Ọ wụrụ ọlẹla nyamwụ eje ka ẹga nya agaba ọọwa. Ọnyang ọọwa kaa kele ẹnẹnẹẹnụ kaka byi agaba ọọwa yẹkẹẹ, ‘Ayịbahị, chuchuu, chị oku nya eje nyahị ham alẹ mẹ! Chuchuu, chị oku nya eje nyahị ham alẹ mẹ!’

⁴Ịnọ, ụka myị́ ụka, agaba ọọwa kaa pwa ọbịlẹ bịlẹ nya ahụ-ogu ọọwa ịnyịnyịịnyị. Ma, ụka ohyẹẹkpẹ, ọ byi ịlọmwụ yẹkẹẹ, ‘O ri nya ịlẹhị, uhi nya Ohe Oluhye bala uhi nya ẹhị nya ọngịnyị ehe lẹ, ḿ ju kokoo!

⁵Ma, chajị nyọlẹ ká ọbịlẹ bịlẹ nya ahụ-ogu ọlẹ chịm aga lụmẹ lẹlẹ, m ka chị oku nya eje ọọwa họọ lẹ. Ó-ri ịnyị ka aalẹ, ọwẹwẹ ụka myị́ ụka nya ọnyang ọlẹ á ka myị ham kpụ, m ka da ịhụ rwẹẹ myị́ kpong-kpong kaka.’ ”

⁶Ịnyị, Ọngọlahị a byi angịjụgbẹyị nyamwụ yẹkẹẹ, “Anụ tị́ wo ẹla ọlẹ ká agaba ọtịpyọ ọ-ọkịlẹtụ ọwẹ ya wẹ lẹ.

⁷Ọwẹ, á tụtụm mẹjẹẹnụ yẹkẹẹ, Ohe Oluhye nyị ka hu ọwẹwẹ ọnyịịla u-uhye nya ang myị́ ang ọlẹ wuu ká angịnyị nyamwụ ịlẹ kọ chụchụ ha ịlọmwụ, juwa jida jwọọ, chajị nyaa lodu bala alẹnụ lẹka? Anụ me ká Ohe Oluhye ka bịrị ụka ene kọ ka wẹ abwọ ọrịrị nyaa ọọwa?

⁸Ehe! nya ịlẹhị-ịlẹhị, m byinu yẹkẹẹ, Ohe Oluhye ka wẹ abwọ ọrịrị nyaa ọọwa ahyaahị-ahyaahị. Anụ ya jem wẹẹ. Ụka ọlẹ kaam Ọnyị nya ọngịnyị ehe ka mwẹẹkpẹ warị wẹ odehe ọlẹ lẹ, anụ ya kam ka ye angịlẹ kị ka la ọmyịmyị nya ịlẹhị-ịlẹhị wẹẹ?”

⁹Ịnyị, iJisọsị a kpa oja ọkpịta ọlẹ, juwa mẹ ang jáa u-uhye nya angịlẹ kị dahịhile ịlaa u-uhye nya alabwẹla ọnyịịla nya ịlaa lụmẹ du kị juwa yẹhị da angịkịla bwee.

¹⁰Ọ jaa oja ọọwa yẹkẹẹ, “Alẹng angị imiiye ịhyẹ kele ka ube ịgọgọ ọtụka nya Ohe Oluhye nya ala iJuu kaka raabwọ. Ọngọhẹ nyaa ri ọla ịFarịsii. Ọngọkịla ri ọngọ nyẹ angịnyị ẹpwa.

¹¹Ịnyị, ọla ịFarịsii ọwẹ a godayị rịrị ụ-ụwa, juwa raabwọ ha Ohe Oluhye la ịlọmwụ ịlọmwụ yẹkẹẹ, ‘Ohe Oluhye, m jing obe chajị nyọlẹ kam ri ọngọhọbịrị lala angị ịkịla ka. Angị ịkịla ịwẹ kị ri angị họ angịnyị ri bala alabwẹla onyobyi bala angị da ẹla-ahụ nya angịnyị lee o-ri ọngọhọbịrị lala ọngọ nyẹ angịnyị ẹpwa ọlẹ kọọ wẹ ka ịnyịnyị.

¹²Am kaa nọ limyi hang Ahụ Ohe Oluhye ụka imiiye ẹ-ẹpwụ nya epwihi. M kaa nwụ ang ookpokpo ẹ-ẹpwụ nya ang iwo bwu ẹpwụ nya ang ịlẹ kam la wuu hang Ahụ Ohe Oluhye ịnyịnyị.’ ”

¹³“Ma, ọngọ nyẹ angịnyị ẹpwa ọọwa kele kaka godayị rịrị hwẹẹẹ, yahị nyamwụ cheji, ya abwọ ba egbeju, chajị nyọlẹ ká ọhọbịrị nyamwụ tọọ olujwo lụmẹ. Ọ juwa raabwọ byi Ohe Oluhye yẹkẹẹ, ‘Ohe Oluhye, chuchuu, yẹm ahyẹẹrwẹrwa, ká hịnyọhi ham mẹ! Chajị, m ri ọngọhọbịrị lụmẹ.’ ”

¹⁴Ịnyị, iJisọsị a byaa yẹkẹẹ, “Nya ịlẹhị, m byinu yẹkẹẹ, ọngọ nyẹ angịnyị ẹpwa ọwẹ a rụ la ọkịlẹtụ onyoowuru bwu ijata nya Ohe Oluhye ọngọ hịnyọhi ọhọbịrị lẹ. Ma, ọla ịFarịsii rụ la ọkịlẹtụ olilo. Chajị ọng myị́ ọng ọlẹ kọ kpa ịlọmwụ ka uhye, Ohe Oluhye ka kpa ọngọọwa weji. Ma, ọng myị́ ọng ọlẹ kọ tị kpa ịlọmwụ weji, Ohe Oluhye ka kpa ọngọọwa ka uhye ịnyịnyị.”

¹⁵Ụka ọhẹ, angịhyẹ kpa anyị anjwo ịlabwọ nyaa kele ka ẹga nya iJisọsị, chajị kọ ka yụbwọ nịraa, wahị kụrwaa ụ-ụwa. Ma, ụka ká angịjụgbẹyị nyamwụ yẹ angịịwa, ị yalibyi táa pyịpyị.

¹⁶Ma, iJisọsị ayịdang be ẹkọ wụrụ anjwo ichiche ịịwa ka ẹga nyamwụ lẹ, ọ byi angịjụgbẹyị nyamwụ yẹkẹẹ, “Anụ ba hi anyị anjwo ichiche ịwẹ kị warị wẹ ẹga nyam mẹ! Anụ kwaa iwe ka. Chajị ịpyị Adịrahụ nya Ohe Oluhye ri ịnya angịlẹ kị ju ọkịlẹtụ ọgbagbịla lala anyị anjwo ichiche ịlịịlẹ.

¹⁷Nya ịlẹhị-ịlẹhị, m byinu yẹkẹẹ, ọng myị́ ọng ọlẹ kọ ka ye ịpyị Adịrahụ nya Ohe Oluhye la ọkịlẹtụ ọgbagbịla lala anyị anjwo ichiche ịlẹ ka aalẹ, ọ́ ka jẹ́-ẹ jụ kele ka ụwa myị́ kaka.”

¹⁸Ụka ọọwa, olegbeju nya ala iJuu ọhẹ kele ka ẹga nya iJisọsị, kaka byoo yẹkẹẹ, “Ayịbahị ịtịcha ọnyịịla, ịịyẹ m tị́ ka họ ene kam ka la ọhịhị ọmyịmyị-ka?”

¹⁹IJisọsị wẹ byoo yẹkẹẹ, “Ịịyẹ a tị́ du ká juwa wụrụm ‘Ọngọ ọnyịịla’ ene? Ọngọngọhẹ á ri ọngịnyị ọnyịịla kpong-kpong ka. Kẹnẹ-kẹnẹ, Ohe Oluhye ụbwọọmwụ mẹ ịnyị!”

²⁰IJisọsị myịmyị byoo yẹkẹẹ, “A tị́ jẹ́ ehile nya Ohe Oluhye ịlẹ kị da ụ-Ụpwụ Ịgọgọ ene-ene lẹ. Ịwa lẹẹ lẹ: A da ẹla-ahụ lee ọ-họ ụya ka. A nwụ ọngịnyị ka. A yoyi ka. A ri ibeenu ọnọọkịla ka. Ju ihi nya adang bala ịnang.”

²¹Ọọwa lẹ, ọlẹng ọọwa a wẹ byi iJisọsị yẹkẹẹ, “Ayịbahị, ịngịịwẹ wuu ri ang ịlẹ kaam ayịdang kaa họ ene-ene bwu enjwo-enjwo nyam lẹ!”

²²Ịnyị, ụka ká iJisọsị wo ẹla ọọwa, ọ byoo yẹkẹẹ, “Oligu nyam, ịngịhyẹ ookpokpo hi hang wẹẹ! Rụ kele ka ẹpwa, ká go ang myị́ ang nyang wuu ra, ká ya okpoko nyaa gịla ikpehika mẹ. Aalẹ, a ka la ụdụ olepwoohe lẹ. Ká kẹwẹ kaka bam jẹ mẹ.”

²³Ma, ụka ká ọlẹng ọwẹ wo ẹla ọlẹ ká iJisọsị ya tọọ ịnyị lẹ, ọ juwa bwọ ayiiji nya ịlẹhị-ịlẹhị lẹlẹ. Chajị ọwa ayịdang kpụ ụdụ lụmẹ kaka kpoye.

²⁴Ịnyị, ụka ká iJisọsị yẹ jaabwọ ká ọlẹng ọwẹ juwa bwọ ayiiji nya ịlẹhị-ịlẹhị lẹ, ọ yẹkẹẹ, “Ọ ka ri ang olujwo ọtụka nya ịlẹhị ha angịlẹ kị ri alụdụ nyọka jẹ́-ẹ jụ ka ịpyị Adịrahụ nya Ohe Oluhye myị́.

²⁵Chajị, ọ ka chịkpẹẹ ha ụnyịrẹ-ịkamẹlụ nyọka jụ bwu iwa nya ọgang ọ-ga apwụ kpoye, gụ alụdụ ọ-ka jụ kele ka ịpyị Adịrahụ nya Ohe Oluhye myị́.”

²⁶Ịnyị, angịlẹ kị wo ẹla ọọwa a tịtọ wo yẹkẹẹ, “Ó-ri ịnyị lẹ aalẹ, o-owo a tị́, tị tị ka chịda myị́ mẹ?”

²⁷IJisọsị wẹ byaa yẹkẹẹ, “Ang ọlẹ kọ la ujwo ha angịnyị ehe, ri ang ọchịkpẹẹ ha Ohe Oluhye!”

²⁸Ụka ọọwa, iPita ya ẹla dodehe yẹkẹẹ, “Ọngọlahị, a tị́ yẹ jaabwọ kaahị ayịdang tụụbwọ hi ẹpwa nyahị wuu, lẹẹ bang jẹ lẹ?”

²⁹IJisọsị wẹ byoo yẹkẹẹ, “Nya ịlẹhị-ịlẹhị, m bying yẹkẹẹ, ó-ri ká ọngọngọhẹ á tụụbwọ hi ẹpwa nyamwụ wuu lee ahụ nyamwụ lee anyịnịna alẹng bala anyang lee ịnamwụ bala adamwụ lee anyị nyamwụ, chajị nya ịpyị Adịrahụ nya Ohe Oluhye,

³⁰aalẹ, ọngọọwa ayịdang ka ye ịngịịwẹ wuu mwụ aba ba ịlọmwụ chịba-chịba ẹ-ẹpwụ nya ọhịhị olodehe ọlẹ ene kọ ka la ọhịhị ọmyịmyị-ka lụka ohyẹẹkpẹ ịnyịnyị.”

³¹Ịnyị, iJisọsị a wụrụ angịjụgbẹyị nyamwụ angị iwo kụrụ imiiye kele ka ọka lẹ, ọ byaa yẹkẹẹ, “Anụ yẹ mẹ! Ahị wẹẹ kele ka iJerusalẹm lẹ, ala ịlẹ wuu ká alọmwụ nya Ohe Oluhye da ẹ-ẹpwụ nya ụpwụ nyaa chajị nyam am Ọnyị nya ọngịnyị ehe ọlẹ lẹ, ị ka họ jịra ụ-ụwa lẹ!

³²Ị ka tụụbwọ him am Ọnyị nya ọngịnyị ehe ọlẹ ju ala iJentayịlị ụ-ụbwọ. Ụ-ụwa, ị ka juwa kpam họ, juwa chị oyoyi jum, ka juwa chị́ ide hụm ịnyịnyị.

³³Ị ka nyim enyiri la ugboji. Ọọwa lẹ, ị ka nwụm ụ-ụwa lẹlẹ. Ma, m tị ka wuleji bwula igu la ẹnụtụrụ ọhata, juwa hịhị.”

³⁴Ma, ụka ọọwa lẹ, angịjụgbẹyị nya iJisọsị á la ọ-jẹ́ myịmyị u-uhye nya ala ịịwa kpong-kpong ka. Ohe Oluhye ya etu nya ẹla ọọwa kpịbaa hyaa ụka ọọwa. Ịnyị a du kị wo myịmyị kpong-kpong ka lẹ.

³⁵Ụka ká iJisọsị anyị jẹ ju epweji nya iJeriko chwẹẹ, ị pwụ ẹga nya olidu ọhẹ ọlẹ kọ hụhụ ụ-ụgbẹyị, juwa bịlẹ ang.

³⁶Ụka ká olidu ọọwa wo anụ nya iru nya angịnyị ịlẹ kị juwa chịpwụrụ kam lẹ, ọ taa wo yẹkẹẹ, “Ẹla ịyẹ tị́ la iru ọtụka ọlẹ alẹ?”

³⁷Angịhyẹ wẹ byoo yẹkẹẹ, “IJisọsị ọla ịNasareti a wẹẹ chịpwụrụ kam lẹ!”

³⁸Ọọwa lẹ, olidu ọwẹ a hu ọnụ lẹ, ọ ya ẹla gboo yẹkẹẹ, “IJisọsị, ahụ ọnyị nya iDevidi, chuchuu, yẹm ahyẹẹrwẹrwa!”

³⁹Ịnyị, angịlẹ kị ji ịlahị a juwa kpọọ ịkata yẹkẹẹ, “Ba la ọmọnyọ ọwẹ pyii!” Ma, ọkọkọ nyọka ba chịng lẹ, ọ juwa ya ẹla gboo gụ olene-ene yẹkẹẹ, “IJisọsị! Ahụ ọnyị nya iDevidi, yẹm ahyẹẹrwẹrwa! Ahụ ọnyị nya iDevidi, yẹm ahyẹẹrwẹrwa!”

⁴⁰Ịnyị, iJisọsị a godayị lẹ, ọ byi angịhyẹ yẹkẹẹ, nyị kele kaka kpọọ warị mẹ. Ụka ká olidu ọọwa jẹ ju iJisọsị chwẹẹ, iJisọsị tọọ wo yẹkẹẹ,

⁴¹“Ịịyẹ a tị́ juwa tịtọ kam ka họ hang?” Ọ wẹ byi iJisọsị yẹkẹẹ, “Ọngọlahị, m tịtọ ká ka họ kam ka jẹ́-ẹ yọyị myịmyị.”

⁴²IJisọsị wẹ byoo yẹkẹẹ, “Yọyị lẹẹlẹẹ mẹ! Ọmyịmyị ọlala nyang họ ká idu ọkpụkpụ nyang myị́ alẹ lẹ!”

⁴³Ịnyị lẹ, ọlẹng ọwẹ a jẹ́ yọyị iijata-ijata lẹ, ọ juwa ba iJisọsị jẹ, juwa gwogbo ha Ohe Oluhye ụ-ụwa lẹlẹ. Ọọwa lẹ, angịlẹ wuu kị juwa ụ-ụwa kị yẹ ụkụrwọ ẹbyẹbyị ọwẹ, a juwa gwogbo ha Ohe Oluhye ịnyịnyị lẹlẹ.