Read idege ILUKU 21 Bible Online

ILUKU 21 - idege bible

ILUKU 21

¹Ụka ọhẹ ká iJisọsị juwa u-ube ịgọgọ ọtụka nya Ohe Oluhye nya ala iJuu, ọ yẹ alụdụ ịhyẹ kị juwa kpa ọhaha o-hu ha nyaa kaka ju ka ẹpwụ nya akpa nya ọhaha ọlụwa.

²Ọ myịmyị yẹ ahụ-ogu okpehika ọhẹ kọ kpa anini imiiye nyamwụ kaka ju ka ẹpwụ nya akpa nya ọhaha ọọwa ịnyịnyị.

³Ịnyị, iJisọsị a byi angịlẹ kị juwa tọọ yẹkẹẹ, “Nya ịlẹhị-ịlẹhị, m byinu yẹkẹẹ, ọnyang ahụ-ogu okpehika ọlaanyị a ri ọngọ hu ọhaha ha kpá gụ angịkịla wuu lẹlẹ.

⁴Chajị angịkịla ịwẹ wuu juwa hu ọhaha nyaa ịwa ha bwu ẹpwụ nya ụdụ nyaa chajị nya ang oyeye. Ma, ọnyang ahụ-ogu ọlẹ kọ ri ọlẹbyahị ọtụka-ọtụka, tị hu okpoko nyamwụ ọlẹ kọọwa ayịdang da kụ ẹ-ẹpwụ nya ọhịhị nyamwụ wuu kpa kaka ha ọhaha.”

⁵Ụka ọọwa, angịhyẹ juwa chabwọ nya ụhị ọháha lụmẹ nya ube ịgọgọ ọtụka nya Ohe Oluhye nya ala iJuu, jaabwọ kị kpa ụma nya ajwọ ị-há ụhị nwurwo-nwurwo me ube ọọwa bala jaabwọ kị kpa ang abwọ ịlịnya ịlẹ ká angịnyị hu ha ọhaha ha Ohe Oluhye kpa nwụla ube ọọwa wuu ịnyịnyị. IJisọsị wẹ byaa yẹkẹẹ,

⁶“Anụ wo mẹ! Ang ịwẹ wuu kanụ wẹẹ yẹ alẹ wẹẹ, ụka juwa warị, ká ẹjwọ ọhẹ-lọhẹ ọlẹ kị kpa me ube ọwẹ wuu á ka hị nụwa u-uhye nya ọkịla kpong-kpong kaka. Chajị, ị ka tụrụ ẹpwang ọwẹ wuu ju eji gbanggbang ị-ịlahị.”

⁷Ụka ọọwa, angịjụgbẹyị nya iJisọsị byoo yẹkẹẹ, “Ọngọlahị, chuchuu ya jehi wẹẹ! Ụka oyina kpangga, ịngịịwẹ wuu a tị́ ka họ jịra? Ịịyẹ a tị́ ka ri ang o-ju ẹjẹẹ ọlẹ kahị ka kpa jẹ́ ụka ọlẹ ká ịngịịwẹ wuu ka họ jịra datị?”

⁸IJisọsị wẹ byaa yẹkẹẹ, “Anụ́-ụ kpahị ju ịlọnụ ọgwọgụ, chajị ká ọngọngọhẹ a hụnụ ahị koo! Chajị ụka juwa warị ị-ịlahị ká angịhyẹ lụmẹ-lụmẹ ka warị la ẹnyị nyam kaka byi angịnyị ehe yẹkẹẹ, ịwa ayịdang kpakpakpa nyaa ri ịKịrayịsị ọọwa lẹlẹ. Ị ka myịmyị-ị̀ juwa yẹkẹẹ, ụka nya ọwẹwẹ nya ịKịrayịsị ọọwa nyị pwụ eji lẹ! Ụka kị ka juwa byinu ịnyị, anụ baa jẹ ka.

⁹Ụka kanụ ka juwa wo oja nya ẹwụ ọlẹga la datị-datị bala uyawụ ọtụka-ọtụka la datị-datị, anụ juwa juhi, juwa hụ́ kpákpakpa ka. Chajị ang ịlịịwẹ wuu ka ji pyii lẹ. Ma, ụka nya ọmyịmyị nya odehe ọlẹ ayịdang kpangga á tị ka pwụ eji ahyaahị lụka ọọwa lẹka.”

¹⁰iJisọsị myịmyị byaa yẹkẹẹ, “Ụka ọọwa, alepwoja ọhẹ ka wuleji, juwa dẹwụ tụ alepwoja ọkịla pyịpyị. Alịpyị adịrahụ ọhẹ ka wuleji kaka tụ alịpyị adịrahụ ọkịla pyịpyị ịnyịnyị.

¹¹Ọpyị ọ-hụ́ jigi-jigi ọtụka-ọtụka ka juwa ụ-ụwa ẹ-ẹga la datị-datị. Imyi nya uhi ọtụka-ọtụka ka nwụ ju ka ẹga la datị-datị ịnyịnyị. Ẹdụrụ nya ịdọlọ-dọlọ ka jụ angịnyị ju ka ẹga myị́ ẹga. Ụma nya ang iluhi-uhi la datị-datị ka ji ụka ọọwa. Ang i-ju ẹjẹẹ ịtụka-ịtụka ka hi ehe u-uhye-ọgba nya epwoohe ịnyịnyị.”

¹²IJisọsị myịmyị byaa yẹkẹẹ, “Ma, ene ká ang ịwẹ wuu ka họ jịra, angịhyẹ ka wunu. Ị ka tụụnụ pyịpyị. Ị ka kpanụ kaka la eje e-ebe ị-mẹ ẹla nya Ohe Oluhye jẹ nya ala iJuu. Ị ka kpanụ kaka ju agba. Ị ka wụrụụnụ eje kịlahị nya ịdịrịhụ bala alịgọvụnọ nya ọpyị nyanụ chajị nya ẹnyị nyam.

¹³Ụka ọlịnyị, anụ juwa ka kpa ri ibeenu nya ẹrụ ọnyịịla nyam je angịnyị ehe lẹlẹ.

¹⁴Lẹ, anụ la ọhụ o-wu kpa hiigu-hiigu ẹ-ẹpwụ nya irya nyanụ mẹ. Anụ juwa me irya u-uhye nya ẹla ọlẹ kanụ ka wẹ aluji nyanụ kpá ene kaka.

¹⁵Chajị, am ayịdang ka ya ọnụ o-ya ẹla myị́ hanụ bala ẹla ọjẹ́jẹ ọlẹ ká ọngọngọhẹ nya aluji nyanụ á ka godayị gbe myị́ ka lee ọ-ka jẹ́-ẹ la eje, ọọ kụrụụnụ myị́ kpong-kpong kaka.

¹⁶Lụka ọọwa, adanụ bala ịnanụ anyị lee anyịnanụ alẹng lee aananụ lee aligu nyanụ anyị ka pịrịịnụ ha aluji nyanụ. Ị dọmwụ ka nwụ angịhyẹ nyanụ kẹhị-kẹhị.

¹⁷Ụka ọọwa, anụ ka wụ angịnyị wuu ẹjẹ chajị nyọlẹ kanụ myị́ la ẹnyị nyam.

¹⁸Ma, anụ wo mẹ! Ohe Oluhye Ọngọ gbenu gbe á ka myị uke nya inyi nyanụ ọhẹ-lọhẹ ka ta ayịreji kpong-kpong ka.

¹⁹U-uhye nya ugbodu ojuju nyanụ ọ-kpa pwụ ọbaba, ọchịda nyanụ ọ-ka wu ọyị myị́, a do pịlẹ lẹlẹ.”

²⁰IJisọsị byaa yẹkẹẹ, “Ụka kanụ yẹ alẹwụ nya aluji nyanụ kị bá urwe dagaga ju epweji nya iJerusalẹm wuu chọnụ lẹ aalẹ, anụ jẹ́ mẹ. Ụka nya epepe onyinyi gbanggbang hi iJerusalẹm ju chwẹẹ lẹ.

²¹Ụka kanụ yẹ ịnyị lẹ aalẹ, angịlẹ wuu kị juwa i-iJudiya a rụnyẹ rụ kaka kpịbaa ẹ-ẹpwụ nya ịgbọdọ mẹ. Aalẹ, angịlẹ wuu kị juwa ẹ-ẹpwụ nya epweji nya iJerusalẹm a rụ kpehe hi ụwa ịnyịnyị mẹ. Angịlẹ kị tị juwa ẹ-ẹpwụ nya epweji ichiche lụka ọọwa lẹ, ị tụtụm tịrẹkpẹ ka epweji nya iJerusalẹm kokoo!

²²Chajị ẹnụtụrụ ọọwa ka ri ẹnụtụrụ nya akama ọyẹyẹ kwiwa ha ala iJuu jaabwọ ká Ohe Oluhye ya ẹ-ẹpwụ nya Ụpwụ Ịgọgọ nyamwụ ene-ene.

²³Ụka ọọwa, akama ọtụka-ọtụka ka juwa ha anyang ịlẹnyị wuu bala anyang ị-kpa ẹmẹ ha anyị nyẹ, chajị ịwa ayịdang á ka rụnyẹ hyaahyaa myị́ ka. Chajị ẹnụtụrụ ọọwa, ang ọjụjụ ọtụka-ọtụka ka ji odehe ọlẹ. Agbama nya Ohe Oluhye ka wuru ọtụka-ọtụka jahị da angịnyị ilodehe ọlẹ lụka ọọwa ịnyịnyị.

²⁴Ụka ọọwa, ẹma nya ẹwụ ka ri iru nya ala iJuu. Ị ka wu ala iJuu ịkịla kpa rụ ka epwoja la datị-datị bwu ẹwụ lala anyịhị. Ụka ọọwa, aluji nyaa ịịwa ka gá epweji nya iJerusalẹm ba eji pyẹẹpyẹẹ, gbee pwụ ụka ọlẹ ká eji ogbegbe nyaa ịwa ala iJentayịlị ka myị́.”

²⁵IJisọsị myịmyị byaa yẹkẹẹ, “Ụka ọọwa, ang i-ju ẹjẹẹ la datị-datị ka họ ẹ-ẹga nya ẹnụ bala ẹ-ẹga nya ọya bala ẹ-ẹga nya ịdịchụ iluhye-ọgba ịnyịnyị. Ụka ọọwa, odehe ka myị la ang ọjụjụ ọtụka. Alepwoja myị́ epwoja wuu ka juwa gu ugbodu ene ọtụka-ọtụka. Chajị ụka ọọwa, ihu ịtụka-ịtụka ka juwa hi ọmọnyọ nya ịlẹhị-ịlẹhị bala igbachịwụ ọtụka ịlẹpwụ nyaa.

²⁶Ụka ọọwa, ịngịrị myị́ ịngịrị oluhye-ọgba nya epwoohe ka hụ́ jigi-jigi. Ọọwa lẹ, uhi ojuju bala uko ọchịchị nya ang ọlịlahị ọlẹ kọ juwa ka họ odehe ọlẹ, a ka chị́ angịnyị ehe wuu enikpi ịnyịnyị lẹlẹ.

²⁷Ọọwa lẹ, alodehe ọlẹ a ka chẹhị kaka yẹ Ọnyị nya ọngịnyị ehe ọlẹ kọ ka hi ehe bwu ẹpwụ nya egbamwụ, juwa warị la ọngịrị bala ẹbyẹbyị ọtụka nyamwụ lẹlẹ.”

²⁸IJisọsị myịmyị byaa yẹkẹẹ, “Ụka kanụ yẹ ká ang ịlịịwẹ wuu á juwa họ jịra lẹ aalẹ, anụ́-ụ hu ẹhị nyanụ hwaa ka uhye mẹ. Chajị ụka nya ọchịda nyanụ juwa ju chwẹẹ lẹ.”

²⁹Ụka ọọwa, iJisọsị chụ oja ọlẹ kpịta byaa yẹkẹẹ, “Anụ́-ụ jẹ́ ang bwu ẹga nya okoji ifigi bala ekeji ịkịla wuu mẹ.

³⁰Chajị ụka myị́ ụka, kanụ yẹ ká ekeji ịwẹ á juwa ju apwụ lẹ aalẹ, anụ jẹ́ mẹ, ụka nya inehe ju chwẹẹ lụmẹ lẹ!

³¹Ịnyịnyị-ịnyịnyị, ọ ka la ẹ-ẹga nya ang i-ju ẹjẹẹ ịwẹ kam ya jenu wẹ wuu lẹlẹ. Ụka myị́ ụka kanụ juwa yaa lẹ aalẹ, anụ jẹ́ mẹ: Ụka nya ọwẹwẹ nya ịpyị Adịrahụ nya Ohe Oluhye ju chwẹẹ lụmẹ lẹ!

³²Nya ịlẹhị-ịlẹhị, m byinu yẹkẹẹ, aloyi ọlụka ọlẹ á ka chịpwụrụ kpá ene ká ịngịịwẹ wuu ka họ jịra kaka.

³³Uhye-ọgba nya epwoohe bala odehe ọlẹ ka chịpwụrụ myị́ wẹẹ. Ma, ẹla ọlọnụ nyam am ayịdang á tị ka chịpwụrụ kpá ẹnẹnẹhẹ kaka.”

³⁴IJisọsị myịmyị byaa yẹkẹẹ, “Anụ kpahị ju ịlọnụ ọgwọgụ, kanụ myị ká ang oriri kpoye nya oyi bala ere ọnwanwa juwa ya bala imahị nya ang-abwọ nya ọhịhị ọlẹ wuu, a hu ọkịlẹtụ okpenyi hanụ kpong-kpong ka! Ó-ri ịnyị ka aalẹ, ẹnụtụrụ ohyẹẹkpẹ ọọwa ka warị chịnụ ọgụ lụka ọkpahị ju ka, jaabwọ ká iyo ọlẹpwamẹ kaa kpa ịlọmwụ kaka wu ọnya!

³⁵Chajị, ịnyị, ẹnụtụrụ ọọwa a ka bwu angịlẹ wuu kị ka jam odehe ọlẹ agaga lụka ọọwa lẹlẹ.

³⁶Ma, anụ́-ụ cheri kanụ juwa gbe eji giri-giri ụka myị́ ụka wuu, kanụ juwa raabwọ ha Ohe Oluhye chajị kanụ ka ye ọngịrị ọ-ka kpa kụrụ ang ịlẹ wuu kị juwa ka họ jịra wuu ị-ịlahị mẹ. Kanụ ka godayị kpakpakpa gbee pwụ ụka nya ọwẹwẹ nya Ọnyị nya ọngịnyị ehe ọlẹ ịnyịnyị mẹ.”

³⁷Ụka ọọwa, iJisọsị juwa kaa mẹ ang jẹ u-ube ịgọgọ ọtụka nya Ohe Oluhye nya ala iJuu ẹnụ myị́ ẹnụ wuu. Ma, ọ tị kaa rụ kaka hụ u-uhye nya ọgbọdọ ọlẹ kị wụrụ Olivu lodu gbee da ka ahị ọpyẹpyẹ.

³⁸Ịnyị lẹ, ẹnụ myị́ ẹnụ la ụtụrụ wuu lẹ, angịnyị a kaa rụ kele ka ube ịgọgọ ọtụka nya Ohe Oluhye ọọwa kaka wo ang ọmẹjẹ nyamwụ ụ-ụwa lẹlẹ.