Read idege ILUKU 9 Bible Online

ILUKU 9 - idege bible

ILUKU 9

¹Ụka ọọwa, iJisọsị be ẹkọ wụrụ angịjụgbẹyị nyamwụ angị iwo kụrụ imiiye kaka jịra ẹ-ẹga nyamwụ. Ịnyị, ụka ká iJisọsị ya ọda ọ-kpa họ ụkụrwọ ẹbyẹbyị haa lẹ, ọ ya ọngịrị ọ-kpa ku alegu inyibyi dodehe bala ọngịrị ọ-kpa họ uda nya ẹdụrụ myị́ ẹdụrụ wuu haa ụ-ụwa ịnyịnyị lẹlẹ.

²Ịnyị, iJisọsị a daa ẹrụ kpehe, nyị kele kaka ya ẹrụ ọnyịịla nya ịpyị Adịrahụ nya Ohe Oluhye je angịnyị wuu, kịị nyị juwa họ uda nya ẹdụrụ myị́ ẹdụrụ wuu ịnyịnyị mẹ lẹlẹ.

³IJisọsị gbilaa ụbwọ ụ-ụrụ yẹkẹẹ, “Anụ wẹẹ ka jẹ lẹ, anụ kpa ịngịngịhyẹ ba ịlọnụ kanyị ọwẹ koo! Anụ kpa ọgọdọ o-cheji nyanụ lee ịbang ọ-ya ang ju nyanụ lee ang oriri lee okpoko lee ọ-kpa ịwụrụ ịkịla ba ịlọnụ kpong-kpong ka.”

⁴IJisọsị myịmyị byaa yẹkẹẹ, “Epweji myị́ epweji ọlẹ kanụ pwụ, ẹpwa nya ọng myị́ ọng ọlẹ kanụ ju ụga ene lẹ aalẹ, ẹ-ẹpwa ọọwa kem, anụ ka hụ pyịyọọ gbee pwụ ụka ọlẹ kanụ ka rụ bwu epweji ọọwa lẹlẹ.

⁵Ma, epweji myị́ epweji ọlẹ kanụ pwụ, ká alụwa á myị yenu ka ẹpwa nyaa ka aalẹ, ụka kanụ ka rụ bwu ụwa, anụ wụ ọrụ nya ọpyị ọlẹpẹtẹ nyanụ hụrụ cheeji ụ-ụwa. Chajị kọ ka ri ang ibeenu tụ alụwa pyịpyị mẹ.”

⁶Ịnyị, angịjụgbẹyị nya iJisọsị angị iwo kụrụ imiiye ịịwa a yegiri rụ kpehe, juwa ya ẹrụ ọnyịịla nya Ohe Oluhye pyẹ tụ epweji-epweji da wuu, juwa họ alẹdụrụ uda ịnyịnyịịnyị lẹlẹ.

⁷Ụka ọọwa, ọ la adịrahụ iHerọdụ jigi-jigi ẹ-ẹpwụ nya ọkịlẹtụ nyamwụ u-uhye nya oja nya ụkụrwọ ẹbyẹbyị ọhọhọ nya iJisọsị ọlẹ kọ juwa wo. Chajị ụka ọọwa, angịhyẹ kele kaka byoo yẹkẹẹ, ịJọn ọngọ hụ enyi Ohe nyaa wuleji bwula igu wẹ lẹ.

⁸Ma, angịkịla tị juwa byoo yẹkẹẹ, Ịlayịja ọlọmwụ nya Ohe Oluhye nyaa chị ịlọmwụ ehe wẹ lẹ. Angị ịkịla juwa yẹkẹẹ, ọngọhẹ nya alọmwụ nya Ohe Oluhye inyogo nyaa wuleji bwula igu wẹ lẹ.

⁹Ma, iHerọdụ ayịdang yẹkẹẹ, “M tị́ chị ịJọn ọngọ hụ enyi Ohe ọọwa egbeju lẹẹ ugbeene lẹ! Ee lẹ, o-owo a tị́, tị tị wẹ kịị ya ẹla rụ́ ịnyịnyịịnyị mẹ?” Ọọwa lẹ, iHerọdụ ọwẹ a juwa tọ eleko nyọka yẹ iJisọsị ayịdang pyii lẹlẹ.

¹⁰Ịnyị, ụka ká alẹrụ angị iwo kụrụ imiiye nya iJisọsị ịwẹ nya bwu ọ-la ehe ọkpụkpụ kpá lẹ, ị tịrọnụ nya ẹdịyẹ nyaa ya je iJisọsị jaabwọ kị bwu họ ụkụrwọ kaka ba wuu lẹlẹ. Ọọwa lẹ, iJisọsị a kpaa rụ ba ịlọmwụ ụbwaa-ụbwaa kele ka epweji ọhẹ ọlẹ kị wụrụ ịBẹtịsayịda lẹlẹ.

¹¹Ụka ọlẹ ká iru nya angịnyị jẹ́ yẹkẹẹ, iJisọsị nyị juwa ụ-ụwa lẹ, ị bọọ kele lẹlẹ. Ọọwa lẹ, iJisọsị a daa ọwụraba lẹ, ọ juwa ya ẹrụ ọnyịịla chajị nya ịpyị Adịrahụ nya Ohe Oluhye jaa ụ-ụwa lẹlẹ. Angịlẹ wuu ká uda ọhọhọ nya ẹdụrụ baba haa ụ-ụwa lẹ, iJisọsị haa uda ịnyịnyị.

¹²Ịnyị, ụka ká iru nya angịnyị ịịwa juwa taa gbee ká obyi juwa hi nya ịlẹhị-ịlẹhị lẹ, angịjụgbẹyị nya iJisọsị a kele kaka byoo yẹkẹẹ, “Ayịbahị, byi iru nya angịnyị ịwẹ kị rụ kele ka epweji ịwẹ kị dagaga juhi wuu bala ẹpwa olodehe nyaa kaka ju ụga ụ-ụwa, chajị kị ka ra ang oriri ha ịlaa ri mẹ. Chajị ugbileji a lẹẹ kahị ji lẹ.”

¹³Ma, iJisọsị wẹ byaa yẹkẹẹ, “Anụ ayịdang bẹ? Anụ ya ang oriri haa ri mẹ!” Ị wẹ byoo yẹkẹẹ, “Abẹ nya ịkaa ịrụ bala iyenyi imiiye kem, ahị la jam lẹ, Ayịbahị. Aalẹ, ó-ri kahị ka kele kaka ra ang oriri ọlẹ kọ ka nwa iru nya angịnyị ịwẹ wuu lẹ mẹ ịnyị!”

¹⁴Iru ojuju nya alẹng ịlẹpwụ nya angịịwa kem lala angịnyị angị ụnọ ịrụ gbẹ̀gbịlẹ̀. Ọọwa lẹ, iJisọsị a byi angịjụgbẹyị nyamwụ yẹkẹẹ, “Anụ kele kaka nwụ iru nya angịwẹ hụhụ ogu iwo ịrụ, ịrụ mẹ.”

¹⁵Ịnyị, angịjụgbẹyị ịịwa a kele kaka nwụ angịnyị hụhụ jaabwọ kọ ya lẹlẹ.

¹⁶Ịnyị, iJisọsị a go abẹ nya ịkaa ịrụ ịịwa bala iyenyi imiiye ịwẹ lẹ, ọ hu ẹhị nyamwụ hwaa rịrị ka epwoohe lẹ, ọ ji Ohe Oluhye obe ẹ-ẹpwụ nya abwọ ọrịrị lẹlẹ. Ụka kọ gwaa ene lẹ, ọ gaa ha angịjụgbẹyị nyamwụ, nyị kpa kele kịla iru nya angịnyị ịịwa mẹ lẹlẹ.

¹⁷Ọọwa lẹ, iru nya angịịwa a ri ang oriri wu ẹpwụ kpọng-kpọng lẹlẹ. Ọọwa lẹ, angịjụgbẹyị nya iJisọsị a go apwụ ihihi nya ịkaa bala iyenyi ịịwa myị edo iwo kụrụ imiiye lẹlẹ.

¹⁸Ụka ọhẹ juwa ká iJisọsị juwa raabwọ ha Ohe Oluhye ụbwọọmwụ-ụbwọọmwụ ẹ-ẹgẹhẹ. Ụka ká angịjụgbẹyị nyamwụ bọọ kele, iJisọsị taa ịtọ ọhẹ yẹkẹẹ, “Oowo, angịnyị ehe a tị́ ya, am ayịdang nyị ri kpong-kpong?”

¹⁹Ụka ọọwa, angịjụgbẹyị nyamwụ wẹ byoo yẹkẹẹ, “Ayịbahị, angịhyẹ juwa yẹkẹẹ, ahụ nyaa ri ịJọn ọngọ hụ enyi Ohe lẹ. Angị ịkịla yẹkẹẹ, ahụ nyaa ri Ịlayịja lẹ. Angị ịkịla myịmyị yẹkẹẹ, ahụ nyị ri ọngọhẹ lẹpwụ nya alọmwụ onyogo nya Ohe Oluhye ọlẹ kịị nyị wuleji bwula igu.”

²⁰IJisọsị myịmyị taa wo yẹkẹẹ, “Lẹ, anụ ayịdang bẹ? Oowo, anụ tị́ ya, am nyị ri lẹẹ mẹ?” Ọọwa lẹ, iPita a wẹ byoo yẹkẹẹ, “Ayịbahị, ahụ ayịdang kpakpakpa a ri ịKịrayịsị ọọwa ọlẹ ká Ohe Oluhye du ẹrụ warị wẹ odehe ọlẹ lẹ.”

²¹Ma, iJisọsị tị gbilaa ụbwọ ụ-ụrụ, nya ịlẹhị-ịlẹhị yẹkẹẹ, “Anụ ya je ọngọngọhẹ, ụma nya ọngọlẹ kam ri kpong-kpong koo!”

²²IJisọsị myịmyị byaa yẹkẹẹ, “Anụ wo mẹ! Am Ọnyị nya ọngịnyị ehe ọlẹ ka yẹ akama ọtụka-ọtụka bwu ẹpwụtụbwọ nya ịgabwọ nya ala iJuu wuu bala alegbeju nya angịkiliya nya Ohe Oluhye bala ịtịcha ị-mẹ ehile nya iMosisi jẹ wuu. Ịwa wuu ka pwam, ji ẹkpẹ dam, ị ka nwụm. Ma, m tị ka wuleji bwula igu la ẹnụtụrụ ọhata myịmyị juwa hịhị.”

²³Ịnyị, iJisọsị a byaa ịwa wuu yẹkẹẹ, “Anụ wo mẹ! Ọng myị́ ọng ọlẹ kọ juwa tịtọ kọ ka bam jẹ nya ịlẹhị-ịlẹhị lẹ aalẹ, ọngọọwa a pwa ịlọmwụ rwarụ, kọ juwa hu agurube nya akama ọyẹyẹ tam chụ ịlọmwụ e-egbeju ẹnụ myị́ ẹnụ wuu, kọọwa ayịdang a kẹwẹ kaka bam jẹ mẹ.

²⁴Chajị ọng myị́ ọng ọlẹ kọ juwa tịtọ nyọka chị ọhịhị nya ịlọmwụ dodehe ọlẹ aalẹ, ọhịhị nyamwụ ọọwa ka gwọọ byi pyịyọọ. Ma, ọng myị́ ọng ọlẹ kọ tị ka tụụbwọ hi ọhịhị nyamwụ ga ha igu chajị nya ẹnyị nyam aalẹ, ọngọọwa juwa ju ọhịhị nyamwụ ịtọ gbe ịlọmwụ pyịyọọ lẹ.

²⁵Chajị, ịịyẹ a tị́ ka ri apyobwuna ha ọngịnyị ehe tụtụm wẹẹ? Ko ri ká ọngọọwa ụbwọọmwụ kem á go ang myị́ ang ilodehe ọlẹ wuu ká ugbodu okpukpuru nyamwụ ọwa ayịdang á tị gwọọ byi lee ọ-ta ayịreji?

²⁶Chajị ọng myị́ ọng ọlẹ kọ ka juwa ju oyi nya o-ya ịlọmwụ dodehe lala ọngọ ji oye nyam bala ẹrụ ọnyịịla nyam ọlẹ aalẹ, am ayịdang tịtị ka ju oyi nya o-ya ọngọọwa dodehe lala ọngịnyị nyam ka lụka ọlẹ kaam Ọnyị nya ọngịnyị ehe ọlẹ ka mwọọgịlẹ warị wẹ odehe ọlẹ la ogbo ọtụka nyam bala ogbo ọtụka nya Ohe Oluhye Adịda bala ịnya alegu-ẹrụ ịgọgọ nyamwụ ịnyịnyị.”

²⁷IJisọsị myịmyị byaa yẹkẹẹ, “Nya ịlẹhị-ịlẹhị, m byinu yẹkẹẹ, angịhyẹ jam ẹ-ẹgẹlẹ lẹẹlẹẹ, kịịwa ayịdang á ka yẹ igu kpong-kpong ene kị ka yẹ ịpyị Adịrahụ nya Ohe Oluhye kaka.”

²⁸Ụka ká ẹnụtụrụ ineku chịpwụrụ kam kpá, ẹ-ẹkpẹ nyọlẹ ká iJisọsị ya ala ịwẹ wuu da ohehe lẹ, iJisọsị a kpa iPita, ịJọn bala iJemsi ba ịlọmwụ kele ka uhye nya ọgbọdọ ọtụka ọhẹ kaka raabwọ ha Ohe Oluhye lẹlẹ.

²⁹Ịnyị, ụka ká iJisọsị juwa raabwọ ha Ohe Oluhye ụ-ụwa ịnyịnyịịnyị lẹ, ahị nya iJisọsị wuu a yẹda abwụma ọkịla lẹlẹ. Ịnyị awụrụ ọlịnyịrọ nya iJisọsị a yẹda ri onyoowuru keri-keri, juwa hụ́ tang-tang ịnyịnyị lẹlẹ.

³⁰Angịjụgbẹyị angị ịta ịịwa chẹhị kaka yẹ iMosisi bala Ịlayịja kị juwa ya ẹla ta iJisọsị ụ-ụwa.

³¹Ụka ọọwa, iMosisi bala Ịlayịja ịwẹ godayị rịrị ẹ-ẹpwụ nya ogbo ọtụka ọlẹ kọ chị kụrwaa, juwa ya ẹla ta iJisọsị chajị nya akama bala igu ọlẹ kọ juwa ka chị iJisọsị ọgụ i-iJerusalẹm.

³²Ụka ọọwa, une juwa yẹ rịrị iPita anyị a-ahị nya ịlẹhị-ịlẹhị. Ịnyị, ụka kị chahị lẹ, ị chẹhị kaka yẹ ogbo ọtụka-ọtụka nya iJisọsị bala angị imiiye ịịwa kị godayị rịrị ụ-ụwa tọọ.

³³Ịnyị, ụka ọlẹ ká angị imiiye ịịwa juwa yegiri rụ lẹ, iPita a byi iJisọsị yẹkẹẹ, “Ayịbahị, ọ ri ang ọnyịịla lụmẹ chajị nyọlẹ kahị lẹẹ ẹ-ẹgẹlẹ lẹẹlẹẹ, ó-ri ká ka myị, ịnọ, ahị nwụ́ adaa ịlịgọgọ ịta ám ẹgẹlẹ mẹ! Ụdaa ọhẹ á ri nyang lẹ, ká ọkịla á ri ịnya iMosisi lẹ, ká ụdaa ọhata a ri ịnya Ịlayịja ịnyịnyị mẹ!” IPita ayịdang á jẹ́ egbeju nya ẹla ọlẹ kọ ka ya bwu ọnụ datị ụka ọọwa ka.

³⁴Ụka ọlẹ ká iPita juwa kpa ẹla ọọwa ya lẹ, egbamwụ ọtụka-ọtụka ọhẹ a chị kụrwaa ịwa wuu ụ-ụwa lẹ, iPita anyị a juwa juhi nya ịlẹhị-ịlẹhị ẹ-ẹpwụ nya egbamwụ ọọwa lẹlẹ.

³⁵Ụka ọọwa, omyi ọhẹ juwa ya ẹla bwu ẹpwụ nya egbamwụ ọọwa, dodehe yẹkẹẹ, “Ọngọlẹ ayịdang kpangga a ri Ọnyẹwẹ nyam ọlẹ kaam ayịdang chụchụ lẹ, anụ angịnyị ehe, anụ́-ụ wo omyi nyamwụ mẹ!”

³⁶Ịnyị, ụka ká omyi ọọwa ya ẹlẹwẹ kpá wuu lẹ, angịjụgbẹyị ịwẹ a chẹhị kaka yẹ iJisọsị ụbwọọmwụ kem, godayị rịrị ụ-ụwa lẹlẹ. Ma, angịjụgbẹyị angị ịta ịwẹ kpa ọhọhọ ọwẹ ẹ-ẹpwụ nya ọkịlẹtụ nyaa kem. Ị́ myị ya je ọngọngọhẹ kpong-kpong ka.

³⁷Ịnyị, ụka ká iJisọsị bala angịjụgbẹyị nyamwụ angị ịta ịwẹ nya bwu uhye nya ọgbọdọ ọọwa la ahị ọpyẹpyẹ ọkịla lẹ, iru nya angịnyị lụmẹ-lụmẹ a kele kaka tọ iJisọsị ụ-ụgbẹyị lẹlẹ.

³⁸Ịnyị, ọlẹng ọhẹ bwu ẹpwarịrị nya iru nya angịnyị ịịwa, a juwa ya ẹla gboo byi iJisọsị yẹkẹẹ, “Ayịbahị, ịtịcha, chuchuu, yẹ ọnyị ọlẹng nyam ọlẹ ahyẹẹrwẹrwa ham chẹẹ mẹ! Chajị, ọwa ụbwọọmwụ a ri ọnyị olookpokpo nyam wuu lẹlẹ.

³⁹Olegu onyobyi a woo lẹ. Ụka kọ wẹ lọọ lẹ, ọ kaa chị eko gboo, juwa rị ebilo ị-ịpyị, juwa ru awụụ ku ịnụ chụchụchụ lẹlẹ. Olegu onyobyi ọọwa kaa kpọọ tata, juwa họọ hiko-hiko lụmẹ kaka kpoye.

⁴⁰Ịnọ, m kpọọ warị kaka bịlẹ angịjụgbẹyị nyang, kị ka ku olegu onyobyi ọọwa dodehe hyoo ụka ọhẹ lẹ. Ma, ị́ tị jwọọ họ myị́ kaka.”

⁴¹Ụka ọọwa, iJisọsị ya ẹla dodehe yẹkẹẹ, “Anụ alichẹnẹ ị-la ọmyịmyị-ka, la ọmyịmyị-ka bala ọ-pyị ẹla nya ịlẹhị anyoko ịwẹ lee! Anụ tị́ tịtọ kam ka hụ tanụ tata kaka ba anyị ene kanụ ka la ọmyịmyị mẹ? Anyanyị anụ tị́ tịtọ kam ka juwa ju ugbodu tanụ tata kaka ba ene kanụ ka la ọmyịmyị mẹ?” Ọọwa lẹ, iJisọsị a byi adịda ọ-ma ọnyị ọọwa yẹkẹẹ, “Kpa ọnyị nyang warị wẹ ẹgẹlẹ mẹ, ẹnwa!”

⁴²Ụka kị juwa kpa ọnyị ọwẹ kele lẹ, olegu onyobyi ọọwa a hu ọnyị ọwẹ mileji, juwa kpọọ yaya ị-ịpyị biri-biri lẹlẹ. Ma, iJisọsị kpụ olegu onyobyi ọọwa ịkata gbirong lẹ, olegu ọọwa a gba kpehe hi ọnyị ọwẹ lẹ, ọ la gogo hiigu-hiigu lẹlẹ. Ịnyị, iJisọsị a hu ọnyị ọọwa tịrẹkpẹ ju adamwụ ụ-ụbwọ lẹlẹ.

⁴³Ọọwa lẹ, ejiri ọtụka-ọtụka a juwa wu alụwa wuu o-oluhye nya ọngịrị ọ-họ uda ọtụka nya Ohe Oluhye lẹlẹ. Ụka ká angịwẹ wuu juwa ẹ-ẹpwụ nya ahịbwuu chajị nya ụkụrwọ ẹbyẹbyị nya iJisọsị ọọwa wẹẹ, iJisọsị a byi angịjụgbẹyị nyamwụ yẹkẹẹ,

⁴⁴“Anụ myị ká ẹla ọlẹ kam wẹẹ ka ya jenu a gụụnụ deeri kokoo! Ị jam tụbwọọ ka pịrịm am Ọnyị nya ọngịnyị ehe ọlẹ ha, ka ẹpwụtụbwọ nya angịnyị inyibyi lẹ!”

⁴⁵Ma ụka ọwẹ lẹ, angịjụgbẹyị nyamwụ ịwẹ á jẹ́ etu nya ẹla ọọwa kpong-kpong lẹka. Ẹla ọọwa kpịbaa hyaa ụka ọọwa wẹẹ. Ịnyị a du kị jẹ́ etu nyamwụ ka lẹ. Ma, ịwa ayịdang á tị byẹjẹ tọ iJisọsị wo myị́ kpong-kpong ka. Chajị, ọ laa uhi-uhi.

⁴⁶Ụka ọọwa, angịjụgbẹyị nya iJisọsị juwa da ịwẹẹ ta awụlẹ u-uhye nya ọngọ ka ri ọngọ ọtụka ọgụgụ wuu ẹ-ẹpwụ nyaa.

⁴⁷Ụka ká iJisọsị jẹ́ irya ọlọkịlẹtụ nyaa lẹ, ọ kpa ọnyị onjwo ochiche ọhẹ kaka godayị rịrị ẹ-ẹga nya ịlọmwụ lẹlẹ.

⁴⁸Ọọwa lẹ, ọ byaa yẹkẹẹ, “Anụ wo mẹ! Ọng myị́ ọng ọlẹ kọ ka kpa ẹnyị nyam ye ọnyị onjwo ochiche ọlịịlẹ ọhẹ-lọhẹ lẹ aalẹ, am ayịdang a wẹ ká ọngọọwa wẹẹ pẹ ẹpwa lẹlẹ. Ọng myị́ ọng ọlẹ kọ tị myị yem am ayịdang lẹ aalẹ, ọngọlẹ kọ dum ẹrụ warị wẹ odehe ọlẹ kpangga a wẹ ká ọngọọwa wẹẹ ye ịnyịnyị lẹlẹ. Chajị, ọngọlẹ kọ byẹhị lala ochiku ẹ-ẹpwarịrị nyanụ wuu ị-ịlahị nya angịnyị ehe wẹẹ, ọngọọwa a ka ri ọtụka lala inyi ị-ịlahị nya Ohe Oluhye lẹlẹ.”

⁴⁹Ụka ọhẹ, ịJọn byi iJisọsị yẹkẹẹ, “Ọngọlahị yẹ mẹ! Ụka kahị chẹhị yẹ ọlẹng ọhẹ kọ juwa kpa ẹnyị nyang ku alegu inyibyi dodehe lẹ, ahị hu ọngọọwa abwọ, chajị nyọlẹ kọ ri alogu nyahị ka!”

⁵⁰Ma, iJisọsị wẹ byoo yẹkẹẹ, “Eheehe! Anụ ku ọngọngọhẹ iwe kpong-kpong koo. Chajị ọng myị́ ọng ọlẹ kọ juwa tụụnụ pyịpyị kaka lẹ aalẹ, oloye nyanụ, ọngọọwa ayịdang a ri lẹlẹ.”

⁵¹Ịnyị, ụka ọlẹ ká ẹnụtụrụ ọlẹ ká iJisọsị juwa ka rụ kele ka epwoohe lahị-lahị juwa ju chwẹẹ lụmẹ lẹ, iJisọsị a chị eje yẹkẹẹ, ọwa nyị ka ka iJerusalẹm lẹ, ọ rụ kele lẹlẹ.

⁵²Ọọwa lẹ, ọ du angịhyẹ ẹrụ ji ịlahị nyamwụ yẹkẹẹ, nyị kele ka epweji ọla ịSameriya ọhẹ kaka nwụla iwe-ahụrụ nọ gbe ọwa ụ-ụwa mẹ lẹlẹ.

⁵³Ma ụka kị pwụ ụwa lẹ, alepweji nya ịSameriya ọọwa á myị da iJisọsị ọwụraba ka ụwa kpong-kpong ka. Chajị nyọlẹ ká iJisọsị nwụla ẹdịyẹ nyamwụ nọ jahị da ka iJerusalẹm ene-ene.

⁵⁴Ụka ká iJemsi bala ịJọn ịlẹ kị ri angịhyẹ ẹ-ẹpwụ nya angịjụgbẹyị nya iJisọsị yẹ ọhọhọ nya alepweji nya ịSameriya ọọwa lẹ, ị byi iJisọsị yẹkẹẹ, “Ọngọlahị, ahị raabwọ bịlẹ Ohe Oluhye kọ do ila bwu epwoohe kaka rụ alepweji ọwẹ mẹ?”

⁵⁵Ịnyị, iJisọsị a jahị nyamwụ kpata daa lẹ, ọ yalibyi laa nya ịlẹhị-ịlẹhị ụ-ụwa lẹlẹ.

⁵⁶Ọọwa lẹ, ị rụ hi epweji ọọwa kele ka epweji ọkịla lẹlẹ.

⁵⁷Ịnyị, ụka ká iJisọsị bala angịjụgbẹyị nyamwụ juwa jẹ rụ ịnyịnyịịnyị lẹ, ọlẹng ọhẹ a byi iJisọsị ụ-ụgbẹyị ọọwa yẹkẹẹ, “Ayịbahị ịtịcha ee! M tịtọ kam ka bang jẹ ka ẹga myị́ ẹga ọlẹ wuu ká ka ka!”

⁵⁸IJisọsị wẹ byoo yẹkẹẹ, “Ẹnwa ọlẹng wo mẹ! Otenyi-ogbo la ụjẹ ọlẹ kọ kaa kụ, ịchịnụ iluhye-ọgba tị la awụ nyaa ịlẹ kị kaa nọ. Ma, am Ọnyị nya ọngịnyị ehe lẹ, ḿ tị la ube ọhẹ-lọhẹ nya ịlọm ka ya egbeju jụ kpẹẹ ka kpong-kpong ka!”

⁵⁹Ụka ọọwa, iJisọsị byi ọlẹng ọkịla ọhẹ ụ-ụwa yẹkẹẹ, “Ẹnwa ọlẹng! Kẹwẹ kaka bam jẹ mẹ!” Ma, ọlẹng ọọwa wẹ byi iJisọsị yẹkẹẹ, “Ọngọlahị, chuchuu, hi iwe ham chẹẹ gbee pwụ ụka ọlẹ kam ka ju adam eji kpá ene kam ka tịrẹkpẹ warị kaka bang jẹ mẹ!”

⁶⁰IJisọsị wẹ byoo yẹkẹẹ, “Ẹnwa ọlẹng! Tụ ụbwọ hi ọhọhọ nya ogu o-ju eji ha angịlẹ kịịwa ayịdang gbugbu ẹ-ẹpwụ nya olegu ene-ene lẹ mẹ. Ká wuleji kele kaka ya ẹrụ ọnyịịla nya ịpyị Adịrahụ nya Ohe Oluhye je angịkịla mẹ.”

⁶¹Ọlẹng ọkịla ọhẹ ụ-ụwa byi iJisọsị yẹkẹẹ, “Ọngọlahị, am lẹ, ọ hám kam ka bang jẹ! Ma, tị chuchuu, hi iwe ham kam kele kaka da alẹpwa nyam ọkpahị ene kam ka tịrẹkpẹ warị chẹẹ mẹ!”

⁶²IJisọsị wẹ byoo yẹkẹẹ, “Ẹnwa ọlẹng, wo mẹ! Ọng myị́ ọng ọlẹ kọọwa ayịdang á juwa kpa olo nya ẹrụ ọnyịịla ọlẹ e-egbeju nyamwụ kọ myịmyị juwa kpa ata da ikwongkuna lẹ aalẹ, ọngọọwa á ju apyobwuna nyọka ri ọlụkụrwọ nya ịpyị Adịrahụ nya Ohe Oluhye kpong-kpong kaka.”