Read idege Ehile Ọmada 1 Bible Online

Ehile Ọmada 1 - idege bible

Ehile Ọmada 1

¹Ụka ọhẹ, ala Isirẹlụ juwa u-ugbileji oloye nya ọmwẹnụ-ụtụrụ nya Ihu ịJọdan. Ẹga ọọwa ri Ọkpọọ nya ịJọdan ọlẹ kọ ba iSufu ba apewa nya ẹga kị wụrụ ịParan bala epweji nya iTofẹlụ bala ịLaban bala ịHaserotu bala iDisahabụ. Ẹla ịlẹ ká iMosisi ya taa ẹ-ẹgẹwẹ, ị da ụ-ụpwụ ọlẹ lẹ.

²Ẹnụtụrụ iwo kụrụ ookpokpo lẹpwụ-lẹpwụ ị kaa kpa jẹdịyẹ bwu Ọgbọdọ nya ịSayịnayị[1] kele ka ịKadẹchị-ịbaniya ó-ri kị bwu ụgbẹyị ọlẹ kọ da bwu Ọgbọdọ nya ịSẹyii lẹ.

³Ẹnụtụrụ nya ọgbanyẹ-ọgbanyẹ nya ọya iwo kụrụ ookpokpo nya ẹka iwo ine nyọlẹ kị yegiri bwu Ijipiti, iMosis à tịrọnụ nya ẹla ọnyị myị ọnyị ọlẹ ká Amkpaa doo ẹrụ tọ ala Isirẹlụ jaa lẹlẹ.

⁴IMosisi ya ẹla ọọwa ụka kọ[2] dẹwụ kụrụ iSihọn Adịrahụ nya ala Amọ ọlẹ kọ kụ epweji nya ịHẹchịbọn kpá, kọ tị kụrụ Ọọgụ Adịrahụ nya ala ịBachan ọlẹ kọ kụ e-epweji nya Edireyii bala Achịtarotu ịnyịnyị.

⁵Ụka ká ala Isirẹlụ juwa ọ-ọmwẹnụ-ụtụrụ nya Ihu ịJọdan ọ-ọpyị nya ala iMowabụ lẹ, iMosisi à dọmwụ nyọka da ehile nya Ohe Oluhye wụlẹ e-egeji nya ala iMowabụ ịịlẹ lẹlẹ. Ọ yẹkẹẹ,

⁶“Ụka kahị juwa ẹ-ẹga nya Ọgbọdọ nya ịSayịnayị ugbeene wẹẹ lẹ, Amkpaa Ohe Oluhye nyahị byihi yẹkẹẹ, ‘Anụ chịkụ am̀ ẹgẹlẹ tata nwa lẹ,

⁷anụ wa ọba, kanụ hu ang ẹdịyẹ kịnyaa kịlahị ka ọpyị nya ala Amọ ọlẹ kọ kụ ịgbọdọ lalẹẹ mẹ. Anụ-ụ̀ jẹ pwụ epweji ịlẹ kị kụ dagaga ju Ọkpọọ nya ịJọdan wuu bala iluhye nya ịgbọdọ bala ụteeji ịlụwa bala o-bwu oye nya edii kele ka ju ka ọnụ nya Ihu nya iMeditareniya mẹ. Anụ-ụ̀ jẹ ka bwu ọpyị nya ala iKenan kpoye kele ka iLibanọn gbee kaka pwụ Ihu iYufuretisi mẹ.

⁸Ọpyị ọwẹ wuu lẹpwụ-lẹpwụ m ka ya hanụ lẹlẹ. Lẹẹlẹ, anụ ju kele ka ụwa kanụ ye la mẹ, chajị ọwa-à ri ọpyị ọlẹ kam am Amkpaa myị ọnụ nyọka ya ha adanụ igogo Ebiraham bala Ayịsiki bala iJekọbụ anyị bala anyị ịtụma nyaa lẹ.’

⁹“Ụka kahị juwa ọ-ọgbọdọ nya ịSayịnayị wẹẹ lẹ, m̀ byinu yẹkẹẹ, ‘Ọkpakpa nyanụ yẹm nyẹẹnyẹẹ kaka kpoye lẹ. Ḿ ka jụụnụ kpa ụbwọm-ụbwọm kaka.

¹⁰Amkpaa Ohe Oluhye nyanụ họ anụ gu anyị ju ịlọnụ gbee kanụ ju iru lala ịdịchụ-ụ̀ wẹ lẹ!

¹¹Amkpaa Ohe Oluhye nya adanụ igogo ā họ kanụ pyebile gụ ọwẹ mwụ aba ba ugbabwọ ụnọ, ká iwe-ahụrụ ā há hanụ jaabwọ kọ myị ọnụ mẹ!

¹²Anyị am ụbwọm-ụbwọm à tị́ ka bwu chị ẹla nyanụ jụ la olo nya o-wo lawụlẹ-ka ịlẹpwụ nyanụ wuu lẹẹ mẹ?

¹³Anụ chụ alẹng ịhyẹ ịlẹ kị jẹ ẹla bala ọ-kaa wụlẹ ẹla yẹ rige-rige bala ọ-la irya yẹẹyẹẹ bwu imwawụ ọnyọnyọọnyị nyanụ mẹ. Aalẹ, m̄ ka ya ụkụrwọ nya ẹhị ọ-kpa rịrịịnụ jwaa ụ-ụbwọ lẹlẹ.’

¹⁴Anụ myị jum ụka ọọwa ya irya ọnyịịla ẹlẹwẹ nyaa ri lẹ.

¹⁵Ịnyị, m̄ go alegbeju ị-jẹ ẹla bala ọ-la ihi-ihi ịlẹ kanụ chụ lẹ, m̄ yaa ri alegbeju kpẹhị rịrịịnụ lẹẹ lẹ. Angịhyẹ nyaa ri angị ka kpẹhị rịrị ebwo nya angị ụnụnụụnọ, angịkịla kpẹhị rịrị ebwo nya angị ohwohwoohu. Angịwụlẹ kpẹhị rịrị ebwo nya angị iwo ịrwịrwịịrụ. Angị ihihi kpẹhị rịrị ebwo nya angị iwiwiiwo. M̀ chụ alegbeju ịkịla bwam-bwale nya imwawụ nyanụ wuu.

¹⁶Ụka ọọwa, m̀ byi alegbeju ịwẹ yẹkẹẹ, ‘Anụ ke ụrụ wo eje ịlẹ ká angịnyị ka wụrụ chịnụ ọgụ, kanụ chị oku ọlẹ kọ la kpakpa. Ó-ri ala Isirẹlụ aananụ lee angga ịlẹ kị kụ ọ-ọpyị nyanụ wẹwẹ ānụ ya ẹla yẹ ọngọngọhẹ ba koo.

¹⁷Ānụ jẹ oye-oye ẹ-ẹpwụ nya eje ọlala nyanụ, juwa chị oku ẹchụ-ọma koo. Ó-ri ọngọtụka ri lee ọngịnyị ochiche wẹwẹ kọ kpa ẹla kaka tọnụ, anụ-ụ̀ chị eje ọkpẹẹkpẹẹ. Ānụ ju uhi-ahị nya ọngọngọhẹ ka, chajị Ohe Oluhye à ka kpanụ chị eje. Ẹla ọnyị myị ọnyị kọ la nyaanyaa kịlaanụ kịla, anụ kpa wẹ ẹga nyam kam yọnụ jwoo tanụ.’

¹⁸Ụka ọwẹ-ọwẹ m̄ mẹjẹẹnụ ang myị ang ọlẹ kanụ ka họ lẹ.

¹⁹“Ụka ọọwa, jaabwọ ká Amkpaa Ohe Oluhye nyahị byihi lẹ, āhị yegiri bwu Ọgbọdọ nya ịSayịnayị juwa bwu ugbileji ọgbamgbam oluhi-uhi ọla ọpyị nya ala Amọ lẹlẹ. Ahị jẹ gbee kaka pwụ ịKadẹchị-ịbaniya.

²⁰Ọọwa, m̄ byinu lẹẹ yẹkẹẹ, ‘Anụ jẹ pwụ ọpyị ilikiti nya ala Amọ ọlẹ ká Amkpaa Ohe Oluhye nyahị wẹẹ ya hahị lẹ.

²¹Anụ yẹ mẹẹ, ọ ya hanụ lẹ! Anụ kele kaka ye la jaabwọ ká Amkpaa Ohe Oluhye nya adanụ igogo anyị myị ọnụ nyamwụ hanụ mẹ. Ānụ ju uhi ka, ọkịlẹtụ tị kpụnụ enyi ka.’

²²“Anụ tị wẹ kaka byim yẹkẹẹ, ‘Ó-ri ịnyị aalẹ, ahị ka du alịbaje ịhyẹ kaka wụla ọpyị ọwẹ yẹ chajị kị ka nyà kaka ya jehi ụgbẹyị ọlẹ kọ há obwubwu gụ bala ọ-ka jẹ ụma nya epweji ịlẹ kahị wẹẹ ka ye la.’

²³“Irya nyanụ ọọwa-á wụm ẹjẹ ka lẹ, m̀ chụ alẹng angị iwo kụrụ imiiye. Ọngọ ookpokpo-ookpokpo bwu imwawụ ọnyọnyọọnyị.

²⁴Ị hu ang ẹdịyẹ kele ka ọpyị olikiti ọwẹ juwa jẹ lalaala ka pwụ Ọkpọọ nya Ẹchịkolu wụla ọpyị ọwẹ yẹ wuu jaabwọ kọ la.

²⁵Ị hyà egbe nya ekeji ịhyẹ kpa nyà bwu ọpyị ọọwa wahị. Ọọwa, ị tịrọnụ ẹdịyẹ ya jehi ya ọpyị ọlẹ ká Amkpaa Ohe Oluhye nyịwa nyị wẹẹ ya hịwa nyị ri ọpyị ọnyịịla lụmẹ.

²⁶“Anụ tị mwọọgịlẹ la egbeju-ọngịrị ta Amkpaa, ánụ myị jụ ka ọpyị ọọwa ka.

²⁷Anụ mwẹla ya juwa ye ọnụ ya juwa byi awụlẹ ẹ-ẹpwang nyanụ yẹkẹẹ, ‘Ahị chakpá wụ Amkpaa ẹjẹ lụmẹ. Ọọwa-à du kọ gbahị kpehe bwu Ijipiti kpahị warị ká ala Amọ ka goohi nwụ lẹẹ lẹka le!

²⁸Abwọ nyà kaka tọ ata meme lẹ, ẹdịyẹ-ẹ́ ju ọjẹ̀jẹ kaka. Alịbaje ịlẹ kahị du ẹrụ nyà kpa oja nya ẹdịyẹ kaka mịlaahị kpụ āhị dapwụ hụ amẹ wuu lẹ. Ị byihi alụwa nyị la gogo la gụụhị, nyị ri ekpongka nya angịnyị ịtụka-ịtụka lala ịnyaa ka ya egbeju kịla ohe. Ị ya angịịwa nyị me egwalọ ju epweji nyaa wuu. Ị ya ịnyịnyị ịwa nyị dọmwụ yẹ anyị igirima anyị nya Anakị ụ-ụwa!’

²⁹“Am tị byinụ ụka ọọwa yẹkẹẹ, ‘Ānụ ju uhi nya angịwẹ kpong-kpong ka!

³⁰Amkpaa Ohe Oluhye nyanụ ka kpanụ bala ọ-ma uya hanụ jaabwọ kọ họ Ijipiti ẹ-ẹhị nyanụ wuu.

³¹Anụ tị yẹ ịnyịnyị jaabwọ ká Amkpaa Ohe Oluhye nyanụ kpẹhị rịrịịnụ chịba-chịba am̀ u-ugbileji gbee kanụ-ụ̀ pwụ ẹgẹlẹ lokpunyi jaabwọ ká adịda kaa kpẹhị rịrị ọnyị nyamwụ.’

³²“Tị kpọkpọọkpọ, ánụ myị dahịhile Amkpaa ka,

³³ịnọ ọ kaa ye ịlahị nyahị ji juwa nwụla ẹga ọnyịịla ọlẹ kahị ka chịkụ nọ gbehi ịnyịnyịịnyị. Ụka ọwẹ, ọ juwa kpahị ụgbẹyị legbamwụ nyamwụ lẹnụ bala lila nyamwụ lodu.

³⁴“Ụka ká Amkpaa wo ala ị-mwọ ya nyanụ, ọ wụ ẹjẹ lụmẹ-lụmẹ du kọ yọnụ deeji ya

³⁵ọngọngọhẹ nyanụ anụ aloyi ọtịpyọ ọọwa nyị́ ka ya ẹhị nyanụ gu ọpyị ọnyịịla ọlẹ kọọwa nyị myị ọnụ nyamwụ ha adanụ igogo anyị kaka

³⁶kẹnẹ-kẹnẹ ịKalẹbụ ọnyị nya iJefune nyaa ka yọọ lẹlẹ. Ọ ya ajị nyọlẹ ká ịKalẹbụ nyị dịrọwa kpẹẹkpẹẹ lẹ, ọwa nyị ka ya ọpyị họọ bala anyị ịtụma nyamwụ ẹ-ẹpwụ nya ọpyị ọlẹ kịị nyị kaka wụlayẹ lụka kịị nyị daa ẹrụ.

³⁷“Ajị nyanụ à du ká Amkpaa wụ ẹjẹ tam kọ byim am nyị́ ka yẹta nyam chụwa ka ịnyịnyị lẹ.

³⁸Ọ byim ụka ọọwa ya iJochuwa kịị nyị lẹẹ dam ụbwọ nyị ka pwụ ọpyị ọọwa. Lẹẹlẹ, am nyị jwoo ọhụ mẹ, chajị ọwa nyaa wẹẹ ka kpa ala Isirẹlụ kele kaka ye ọpyị ọọwa kụ lẹ.

³⁹“Ọ byihi ịnyịnyị ya anjwo ị-jẹ ẹlẹlẹhẹ lẹka nyahị ịwẹ kaahị nyị lẹẹ chị uko nya aluji ọ-ka wu kpa rụ wẹẹ, ịwa nyị ka pwụ ọpyị ọọwa. Ọwa nyị ka ya ọpyị ọọwa haa kịị nyị ka ye kụ.

⁴⁰Ahị tị lẹ, ahị nyị jahị kpata kaahị nyị rụ tịrẹkpẹ kaka bwu ugbileji ọlụgbẹyị nya Ihu Oletungkohyo mẹ.

⁴¹“Ụka ọọwa, anụ byim ya ịwa nyị họ ang onyobyi ba Amkpaa lẹ. Ugbẹnyị lẹ, ịwa nyị ka kele ka ọpyị ọọwa kaka dẹwụ kịịwa nyị ka ye la jaabwọ ká Amkpaa Ohe Oluhye nyịwa nyị dịwa ehile lẹ.” Ọọwa, ọng myị ọng nyanụ à ju agidi nya ẹwụ ọ-ka dada lahị nwụnụ gbọọọ nyori anụ ka jụ ọpyị olikiti ọwẹ kụrụ pịlẹtẹ myị lẹlẹ.

⁴²Amkpaa tị byim yẹkẹẹ, “Daa ọna mẹ. Ị kele kaka ju aluji nyaa ịwẹ jwẹẹ koo, chajị ḿ ka juwa taa koo. Ị ka kụrwaa chẹẹchẹẹ.”

⁴³M̀ ya ẹlẹwẹ ká Amkpaa ya wẹ tịrọnụ ya jenu, ánụ tị myị ju ihi ny ẹla ọọwa ka. Anụ la egbeju-ọngịrị ta Amkpaa, nwà ịlọng gẹdẹẹ chị ẹwụ kele kaka mwẹla ta alọpyị olikiti ọwẹ.

⁴⁴Ọọwa, ala Amọ ịlẹ kị kụ ụwa à kpehe bwọọọ lala iru nya inwa yahị danụ lẹ. Ị kunu lalaala ka ju ka ọpyị nya Ẹdọm lẹ, ị hịrọọ danụ e-epweji nya ịHọma lẹlẹ.

⁴⁵Anụ nyà warị kaka jida ju Amkpaa kọ ka danụ ụbwọ. Ọ́ tị dọnụ wẹẹnụ ka.

⁴⁶Ọọwa, anụ hụ ị-ịKadẹchị lụka ọtata lẹlẹ.