Read idege Ehile Ọmada 10 Bible Online

Ehile Ọmada 10 - idege bible

Ehile Ọmada 10

¹“Ụka ọọwa, Amkpaa byim yẹkẹẹ, ‘Gba ajwọ ịpapịla imiiye ịlala ịnya ọgbanyẹ, ká kọ akpa nya okoji ọlẹ ká ka yaa ju ịnyịnyị mẹ. Á họ ịnyị kpá lẹ, à kẹwẹ wẹ ẹga nyam u-uhye nya ọgbọdọ mẹ.

²Ọọwa, m̄ ka da baa u-uhye ala ịlẹ kam da ba ịnya ọgbanyẹ ịlẹ ka ya bene lẹlẹ. Ọọwa lẹ, ā ka ya ajwọ ịpapịla inyeewe ịwẹ ju ẹ-ẹpwụ nya akpa ọọwa lẹlẹ.’

³“Ọọwa, m̄ kọ akpa la okoji nya akechiya lẹlẹ. M̀ gba ajwọ ịpapịla imiiye ịlala ịnya ọgbanyẹ. Ọọwa, m̄ gyaa kpa ka uhye nya ọgbọdọ lẹlẹ.

⁴Ọọwa, Amkpaa-à da baa u-uhye ẹla ịlẹ kpangga kọ da ba ajwọ nya ọgbanyẹ u-uhye lẹlẹ. Ẹla ịịwa ri Ehile Iwo ịlẹ ká Amkpaa ya hanụ ụka ọlẹ kọ ya ẹla tanụ bwu ẹpwụ nya ila ẹnụtụrụ ọlẹ kanụ kele kaka tụguru ọ-ọgbọdọ lẹ. Ọọwa, Amkpaa-à ya ajwọ ịpapịla ịwẹ ham lẹ,

⁵m̄ jahị kpata hireji nyà bwu uhye nya ọgbọdọ lẹlẹ. M̀ ya ajwọ ịpapịla ịịwa ju ẹ-ẹpwụ nya akpa ọlẹ kam kọ jaabwọ ká Amkpaa ya am nyị họ. Ị juwa ẹ-ẹpwụ nya akpa ọọwa bwu ụka-ụka ọọwa da ọlẹẹlẹẹ.” (

⁶Ụka ọọwa, ala Isirẹlụ yegiri bwu ẹga nya ịwẹẹlụ nya ala ịJaakan hu ang ka ju ka iMosera. Erọn gbu ụ-ụwa ẹgẹwẹ, ị jwoo eji. Ọọwa, Eliyesa ọnyị nyamwụ à ri ọngọkiliya ku ọmwakpa nyamwụ lẹlẹ.

⁷Ụka kị yegiri bwu ẹgẹwẹ tị, ị jẹ kele ka pwụ ẹga kị wụrụ iGudugoda. Ị jẹ bwu ẹgẹwẹ gbee kaka pwụ iJotibata ọlẹ kọ ri ọpyị ọlẹ ka ị̀bá nya enyi lụmẹ-lụmẹ ji.

⁸Ụka ọwẹ, Amkpaa-à chụ alẹng i-bwu imwawụ nya iLivayị nyọka ri angị kpẹhị rịrị Akpa nya Iro nyamwụ lẹ. Ị ka ri angịkiliya nya Amkpaa bala ọ-ka wahị kụrụ angịnyị lẹnyị nyamwụ. Ị kaa họ ụkụrwọ ịwẹ bwu ụka ọwẹ pyịyọọ daalẹ.

⁹Ịnyị à du ka alimwawụ nya iLivayi-ị́ la ebwo nya ọpyị ọhẹ nya ụbwọ nya ịlaa jaabwọ kị ga ha alimwawụ ịkịla ka lẹ. Ang ọlẹ kị la-à ri iwe-ahụrụ nyọka ri angị myị ẹrụ ha Amkpaa lẹ. Ịnyị, Amkpaa Ohe Oluhye nyanụ à byaa lẹ.)

¹⁰“Ụka ọọwa, m̀ hụ u-uhye nya ọgbọdọ ahị ọpyẹpyẹ iwo ine bala odu iwo ine lala ụka nya ọgbanyẹ. Amkpaa wo lam ụka ọọwa ịnyịnyị. Lẹ, ọ myị ọnụ nyọka tanụ ayịreji kaka lẹlẹ.

¹¹Ọọwa, ọ byim am nyị kele ka kpanụ kụ ịlahị, chajị kanụ ka ye ọpyị ọlẹ kọ myị ọnụ nyamwụ ha adanụ igogo anyị mẹ lẹlẹ.

¹²“Lẹẹlẹ, anụ ala Isirẹlụ ee, anụ tị́ jẹ ang ọlẹ ká Amkpaa Ohe Oluhye nyanụ tịtọ kanụ ka họ lẹ. Ọ tịtọ kanụ ka ju uhi nyamwụ bala ọ-ba ụgbẹyị nyamwụ wuu jẹ, kọọwa ayịdang ka haanụ, kanụ ka myị ẹrụ họọ lọkịlẹtụ bala ugbodu okpukpuru nyanụ wuu ịnyị.

¹³Anụ ka họ ịnyị bwula o-ju ihi nya ehile bala ọmẹjẹ nyamwụ ịlẹ wuu kam wẹẹ ya hanụ alẹ, chajị nya ọháha nya ịlọnụ.

¹⁴Amkpaa Ohe Oluhye nyanụ à la uhye-ọgba oluhye gụgụ wuu lẹ. Odehe ọlẹ tụ ang myị ang ịlẹ kị juwa ẹ-ẹpwụ nyamwụ ri nyamwụ ịnyịnyị.

¹⁵Amkpaa tị yẹ chịng la ọháha ẹ-ẹga nya adanụ igogo anyị gbee kọ chụnụ anụ anyị ịtụma nyaa yụbwọ la alẹpwụma ịkịla nya odehe wuu beji. Gbee daalẹ, anụ à tị ri angịnyị nyamwụ ịlẹ kọ chụ wẹẹ lẹ.

¹⁶Lẹẹlẹ, anụ kpa ịlọnụ keji ha Amkpaa, kanụ kpụba la egbeju ọngịrị ọlala nyanụ mẹ.

¹⁷Amkpaa Ohe Oluhye nyanụ lụmẹ gụ ijiga bala ịngịrị ịkịla wuu. Ọ ri Ohe Oluhye ọlọngịrị ọtụka. Ọ chịla ká angịnyị wuu ka ju uhi nyamwụ. Ọ́ọ̀ chẹkpẹ ju ọngọhẹ datị hi ọngọkịla ka. Ọ́ tị kaa ye ang ochikiriju ka.

¹⁸Ọ kaa chẹkpẹ ju anyị-egu bala ịhụ-egu. Ọ kaa chị ọháha nyamwụ ehe ẹ-ẹga nya angga ịlịnyanụ, juwa ya ang oriri bala ang ọkụrụ-kụrụ haa.

¹⁹Lẹẹlẹ, anụ tị̀tị̀ ka la ọháha ẹ-ẹga nya angga ịnyịnyị, chajị anụ tị́ jẹ lẹ, anụ ayịdang ri angga ọ-ọpyị nya Ijipiti ẹnẹhẹ lẹ.

²⁰Anụ ju ihi nya Amkpaa Ohe Oluhye nyanụ, kanụ gbịgba họọ bala ọ-họ kpẹẹkpẹẹ ẹ-ẹga nyamwụ. Ẹnyị nyamwụ anụ ka kpa la ọnụ ọmyịmyị nyanụ ọnyị myị ọnyị lẹ.

²¹Ọwa-à ri Ohe Oluhye nyanụ ọlẹ kọ chịla kanụ ka gwogbo ha lẹ. Ọwa-à họ ang ịtụka iluhi-uhi ịlẹ kanụ kpẹhị nya ịlọnụ yẹ lẹ.

²²Ụka ká adanụ igogo anyị hu ang ka ju ka Ijipiti ugbeene lẹ, angịnyị angị iwo irwiye kem ị la lẹ. Ọlẹẹlẹẹ tị lẹ, Amkpaa Ohe Oluhye nyanụ họ anụ pyebile lala ịdịchụ iluhye-ọgba lẹ!