Read idege Ehile Ọmada 11 Bible Online

Ehile Ọmada 11 - idege bible

Ehile Ọmada 11

¹“Anụ la ọháha ẹ-ẹga nya Amkpaa Ohe Oluhye nyanụ kanụ kpa ehile ọnyị myị ọnyị nyamwụ wuu mẹ.

²Anụ tị́ kpịtịya, anụ ayịdang ịnyị, aanyị nyanụ à juwa kpụ ị jẹ́ lịlaa lee ọ-kpẹhị nya ịlaa yẹ jaabwọ ká Amkpaa bwu nwụnụ rịrị bala ụmụmẹ bala ọngịrị ọtụka bala ogogo ọlala nyamwụ ka.

³Anụ-anụ à yẹ ụkụrwọ ẹbyẹbyị nyamwụ bala ang ịlẹ kọ họ adịrahụ nya Ijipiti bala ọpyị nyamwụ wuu lẹ.

⁴Anụ-anụ ayịdang à kpẹhị nya ịlọnụ yẹ jaabwọ kọ ta angịdẹwụ nya ala Ijipiti bala anyịrẹ bala ang ịrụnyẹ ị-kpa dẹwụ nyaa ayịreji gbanggbang pyịyọọ bwula ọ-yaa byi enyi ẹ-ẹpwụ nya Ihu Oletungkohyo ụka kị juwa kunu lẹ.

⁵Aanyị nyanụ ka, anụ-anụ à yẹ ang ọlẹ ká Amkpaa họ hanụ u-ugbileji ene kanụ-ụ̀ jẹe pwụ ẹgẹlẹ.

⁶Anụ tị kpịtịya ịnyịnyị ang ọlẹ kọ họ ẹ-ẹga nya ịDatan bala Abiram anyị alẹng nya Eliyabụ olimwawụ nya iRuben. Ị-ịlahị nya ala Isirẹlụ wuu ọpyị a gu ene kpoo ye angịwẹ bala alugbiyegu nyaa wuu bala ẹpwang nya ọdụ nyaa tụ anchẹ bala iyo ileji nyaa wuu mile lẹ.

⁷Anụ ayịdang kpangga-à kpẹhị nya ịlọnụ yẹ ụkụrwọ ịtụka ịwẹ wuu ká Amkpaa họ lẹ.

⁸“Anụ-ụ̀ kpa ehile ịlẹ wuu kam wẹẹ ya hanụ alẹ mẹ. Ọọwa, anụ ka lọngịrị nyọka kpoye kele kaka ye ọpyị ọlẹ kanụ wẹẹ ka jụ ka la myị lẹlẹ.

⁹Ọọwa, anụ ka hị tata ọ-ọpyị o-ju eyo bala ọ-há ang ọlẹ ká Amkpaa myị ọnụ nyamwụ ha adanụ igogo anyị bala anyị ịtụma nyaa ịnyịnyị lẹlẹ.

¹⁰Ọpyị ọlẹ kanụ wẹẹ kaka kụ á lala ọpyị nya Ijipiti ẹga kanụ kụ ene-è wẹ koo. Ijipiti lẹ, ánụ wu ẹrụ kpá, anụ kaa họ ụkụrwọ nya ọ-chị enyi hwaa lala ẹrụ nya apwu.

¹¹Ọpyị ọlẹ kanụ wẹẹ ka jụ ka ri ọpyị o-ju ịgbọdọ bala ọkpọọ. Enyi ododo bwu uhye-ọgba à kaa kpa ang ịlụwa há lẹ.

¹²Ọpyị ká Amkpaa Ohe Oluhye nyanụ kaa kpẹhị rịrị lịlọmwụ ịnyị. Ọ kaa kpẹhị riroo ụka wuu bwu ọmwụ ọdada nya ẹka kele ka ọmyịmyị nyamwụ.

¹³“Lẹẹlẹ, ó-ri kanụ ju ihi nya ehile ịlẹ kam wẹẹ ya hanụ alẹ kpẹẹkpẹẹ bwula ọ-la ọháha ẹ-ẹga nya Amkpaa Ohe Oluhye nyanụ, juwa myị ẹrụ họọ lọkịlẹtụ nyanụ wuu lẹ

¹⁴aalẹ, ọ ka do enyi hanụ ụka kọ pwoku chajị ká ambakpa bala alakọnụ bala olivu nyanụ ka há.

¹⁵Amẹ ka ji nwụga ha iyo ileji nyanụ. Anụ tị̀tị̀ ka ye ang ri jaabwọ kọ haanụ.

¹⁶“Ānụ myị ká ọngọhẹ ā pịrịịnụ ju, kpanụ rụ hi Amkpaa kaka kpụ ijiga bala ọ kpụ eteji haa koo.

¹⁷Ó-ri kanụ họ ịnyị, ikẹjẹ-awụrụ nya Amkpaa ka wuru jahị danụ. Ọ ka wu enyi kpa la ododo. Ọpyị nyanụ ka chị ọhụ kịra-kịra, ang-ẹrụ nyanụ-ụ́ ka há ka. Ọọwa, anụ ka gbu ta ayịreji ọ-ọpyị ọnyịịla ọlẹ ká Amkpaa wẹẹ ya hanụ lẹlẹ.

¹⁸“Anụ-ụ̀ kpịtịya nya ehile nyam ịwẹ, kanụ juwa kpa me irya ju mẹ. Anụ daa ju kanụ ya ori jwaa bwọ ịlọnụ ụ-ụbwọ bala ọ-ya ba ịlọnụ i-itochi chajị kanụ ka kpa kpịtịya ụka wuu.

¹⁹Anụ maa jẹ anjwo nyanụ. Anụ juwa ya ẹla rwaa ụka kanụ hụhụ ẹ-ẹpwa lee ụka kanụ juwa jẹ ka anyị bala ụka kanụ juwa mwụ ịnyọ lee o-juwa kpa ụkụrwọ họ.

²⁰Anụ ka daa ba ekeji i-wu ekpileku nya ẹpwa nyanụ kpa bala uhye nya ogirigba nya nyanụ.

²¹Ọọwa, anụ bala anyị nyanụ à ka hị tata ọ-ọpyị ọlẹ ká Amkpaa Ohe Oluhye nyanụ myị ọnụ nyamwụ ha adanụ igogo anyị lẹ. Jaabwọ ká uhye-ọgba-á ji uhye nya eji tata ka ba, anụ tị̀tị̀ ka kụ ụ-ụwa ịnyịnyị.

²²“Ó-ri kanụ ju ihi nya ehile ịlẹ kam wẹẹ ya hanụ kpẹẹkpẹẹ, juwa la ọháha ẹ-ẹga nya Amkpaa Ohe Oluhye nyanụ, kanụ juwa ba ẹla nyamwụ jẹ kpẹẹkpẹẹ

²³aalẹ, Amkpaa ka ku alẹpwụma ịwẹ wuu rụ hi ẹga da hanụ kanụ ka yẹ ọpyị nyaa la, ịnọ ị ri ụma ịlẹ kị lụmẹ bala ọ-la ọngịrị gụụnụ.

²⁴Ẹga myị ẹga kanụ ya ẹpẹtẹ nyanụ ba ọpyị lẹ aalẹ, ọpyị ọọwa wuu ka ri nyanụ lẹ. Egeji nyanụ ka dọmwụ bwu ugbileji e-edii lalaala ka ju ka Ịgbọdọ nya iLibanọn ẹ-ẹtẹ. Oyi ọlọmwẹnụ-ụtụrụ ka dọmwụ bwu Ihu iYufuretisi lalaala ka ju ka Ihu nya iMeditareniya ọ-ọmwẹnụ-obyi.

²⁵Ọngọngọhẹ-ẹ́ ka godayị bá ẹla tanụ myị kpong-kpong ka, chajị jaabwọ ká Amkpaa Ohe Oluhye nyanụ myị ọnụ lẹ, ọ ka họ angịnyị wuu ka ju uhi nyanụ ẹ-ẹga myị ẹga kanụ juwa jẹ yahị da kà.

²⁶“Alẹ oleeri ọlẹ, m̀ jam ya iwe da hanụ kanụ ka chụ ahị ọwawa lee ọlọ owuwu.

²⁷Ánụ ju ihi nya ehile nya Amkpaa Ohe Oluhye nyanụ ịlẹ kam wẹẹ ya hanụ alẹ aalẹ, anụ ka pyẹ̀ẹẹ.

²⁸Ọ́ tị ri kanụ ju ihi nya ehile ịlẹ, jahị kpata juwa kpụ ijiga ịlẹ kaanụ ayịdang dọmwụ kpụ eteji ẹnẹhẹ ene lẹka aalẹ, inyiribyi ri ịnyanụ lẹ.

²⁹Ụka ká Amkpaa Ohe Oluhye nyanụ-ụ́ kpanụ pwụ ọpyị ọlẹ kanụ wẹẹ ka ye la kpá, anụ ka godayị ọ-Ọgbọdọ nya iGesirim ya ahị ọwawa nya Amkpaa dodehe. Anụ ka godayị ọ-Ọgbọdọ nya Ebalụ ya ọlọ ọgaga nya nyamwụ dodehe ịnyịnyị. (

³⁰Ịgbọdọ imiiye ịwẹ ji ọmwẹnụ-obyi o-oye ọkịla nya Ihu ịJọdan ọ-Ọkpọọ nya ịJọdan e-egeji nya ala iKenan. Ị ji koye nya ọmwẹnụ-obyi ba ègbiji ịla iMore ba ọ-ọnụ nya epweji nya iGiligalụ.)

³¹Anụ tị́ jẹ lẹ, anụ tụbwọọ ka kpoye nya Ihu ịJọdan kaka kụ ọpyị ọlẹ ká Amkpaa Ohe Oluhye nyanụ wẹẹ ya hanụ lẹ. Ụka kanụ ye ọpyị ọwẹ la, kanụ kụ ụwa lẹ,

³²anụ-ụ̀ kpẹhị chịng kanụ kpa ehile ịlẹ wuu kam wẹẹ ya hanụ alẹ jịra kpẹẹkpẹẹ mẹ.”