Read idege Ehile Ọmada 12 Bible Online

Ehile Ọmada 12 - idege bible

Ehile Ọmada 12

¹Ụka ọọwa, iMosisi byi ala Isirẹlụ yẹkẹẹ, “Ehile bala ọmẹjẹ datị-datị ịlẹ kanụ ka bajẹ jaabwọ myị abwọ kanụ hịhị ka ba ọ-ọpyị ọlẹ ká Amkpaa Ohe Oluhye nya adanụ igogo anyị wẹẹ ya hanụ à lẹẹ lẹ.

²Ụka kanụ pwụ ụwa, anụ ka ta ẹga ká alụwa kaa kpụ ijiga nyaa ị-ịgbọdọ bala i-ikiti bala ị-ịmwụ nya ekeji ayịreji.

³Anụ tụrụ ogidi ikiliya bala ajwọ iweji irigọgọ nyaa cheeji. Anụ chị Achẹra ojiga ọnyang nyaa ila kanụ tụrụ ekpeku nyaa cheeji. Anụ bịraa chịkẹ-chịkẹ, chajị kị tụtụm ka kpụ eteji ha ijiga ịwẹ ụ-ụwa kaka mẹ.

⁴“Ānụ gbịgba ha Amkpaa Ohe Oluhye nyanụ la abwụma ọlẹ ká angịwẹ kaa bwu kpụ ijiga nyaa koo.

⁵Amkpaa juwa ka chụ ẹgẹhẹ bwu ẹpwụ nya ịpyị nya alimwawụ nyanụ wuu. Ẹga ọọwa ānụ ka wẹ ijata nyamwụ kaka gbịgba họọ lẹ.

⁶Ẹga ọọwa ānụ ka kpa iya ị-rụ ila bala iya ịkịla ịlẹ kanụ ka kịla ha Amkpaa wẹ lẹ. Anụ ka kpa ebwo nya ang ookpokpo ẹ-ẹpwụ nya iwo bala ọhaha nyanụ bala ang-ahị ịlẹ kanụ myị ọnụ họọ u-uhye nyaa bala ọhaha i-bwu irya nyanụ kpehe tụ anyị nya ọgbanyẹ nya ịna bala ịkpịlọ nyanụ wuu wẹ ụwa ịnyịnyị.

⁷Ẹ-ẹga ọọwa i-ijata nya Amkpaa, ànụ bala alugbiyegu nyanụ wuu ka hụhụ ri ang lawụlẹ. Anụ ka chị ọkẹkẹnị ju ang ịlẹ kanụ jụ họ wuu, chajị Amkpaa Ohe Oluhye nyanụ wahị kụrụụnụ lẹ.

⁸“Jaabwọ ká ọng myị ọng wẹẹ họ ang ọlẹ kọ họọ i-irya lẹẹlẹẹ wẹẹ, ịnyị anụ ka họ ị-ịlahị koo.

⁹Ánụ pwụ ọpyị ọlẹ ká Amkpaa wẹẹ ya hanụ ẹga kanụ ka kụ lokpunyi kpangga lẹka.

¹⁰Ụka kanụ kpoye nya Ihu ịJọdan lẹ, anụ ka pwụ ọpyị ọlẹ ká Amkpaa Ohe Oluhye nyanụ wẹẹ ya hanụ nya ang-ahị kanụ ka kụ lẹlẹ. Ọ ka họ kanụ ka kụ lokpunyi. Anụ ka lịlọnụ bwu ẹga nya aluji nyanụ wuu.

¹¹Ụka ọọwa lẹ, ānụ ka kpa ang ịlẹ ká Amkpaa danụ ehile wẹ wuu ka ẹga kọ ka chụ lẹlẹ. Ang ịịwa ri iya ị-rụ ila bala iya ịkịla bala ebwo nya ang ookpokpo ẹ-ẹpwụ nya iwo bala ọhaha ịkịla tụ ang-ahị ịlẹ kanụ myị ọnụ ha Amkpaa chajị nyaa.

¹²Anụ ka la ọhụhụ bala anyị nyanụ bala anchẹ nyanụ wuu. Ánụ-ụ̀ kpịtịya mẹ, ala iLivayị ịlẹ kị kụ epweji nyanụ á ka la ọpyị nya ịlaa datị ka lẹ, anụ ka wụrwaa kaka yẹ julanụ ẹ-ẹpwụ nya ọhụhụ nya ọkẹkẹnị ọwẹ ịnyịnyị.

¹³Ánụ ka kịla iya ọ-rụ ila nyanụ ẹ-ẹga ododu koo.

¹⁴Anụ tị́ jẹ lẹ, ẹga ká Amkpaa wẹẹ ka chụ ọ-ọpyị nya imwawụ ọhẹ nyanụ kẹnẹ-kẹnẹ ịnyị. Ụ-ụwa anụ ka kịla iya ọ-rụ ila nyanụ bala ọ-họ ang ịkịla ịlẹ wuu ká Amkpaa danụ ehile lẹ.

¹⁵“Anụ tị ka nwụ iyo ileji nyanụ ri ẹ-ẹga myị ẹga kọ haanụ myị jaabwọ myị abwọ ká Amkpaa-á ya hanụ kaka ba. Angịnyị nyanụ ịlẹ kị la charị-charị la tụ angịlẹ kị ji libyi ka ryaa ịnyịnyị myị jaabwọ kanụ wẹẹ ri iyọ nya apyị bala igbee.

¹⁶Ọkẹnẹ-kẹnẹ ri ānụ ri ịwọ nya iwo kpong-kpong koo. Anụ ka ya ịwọ nyamwụ hụrụ ị-ịpyị lala enyi.

¹⁷Ánụ ka ya ịngịngịhyẹ ịlẹ kanụ ya ha ọhaha ha Amkpaa wẹẹ ri ẹ-ẹpwa ẹga kanụ kụ koo. Ó-ri ebwo ookpokpo ẹ-ẹpwụ nya iwo ịlẹ kanụ ya ha bwu ẹpwụ nya ajẹ nya ang-ẹrụ lee ere lee ida nya olivu lee ọnyị nya ọgbanyẹ nya ịna and ịkpịlọ nyanụ tụ ang-ahị ịlẹ kanụ myị ọnụ nyaa ha Amkpaa bala ọhaha i-bwu irya nyanụ bala ọhaha ọkịla ọnyị myị ọnyị wẹwẹ, anụ ryaa ẹ-ẹpwa nyanụ koo.

¹⁸Ẹga ọlẹ ká Amkpaa Ohe Oluhye nyanụ chụ anụ ka ryaa lẹ. Anụ bala anyị nyanụ bala anchẹ nyanụ tụ ala iLivayị ịlẹ kị kụ epweji nyanụ ka ri ang ịwẹ i-ijata nya Amkpaa Ohe Oluhye nyanụ. Anụ ka chị ọkẹkẹnị ụ-ụwa lawụlẹ, chajị nya ang ịlẹ wuu kanụ họ.

¹⁹Ánụ-ụ̀ kpẹhị chịng mẹ, ānụ deeri la ala iLivayị ẹnẹnẹhẹ jaabwọ kanụ ka kụ ọpyị nyanụ ọwẹ tata ka ba kokoo.

²⁰“Ụka ká Amkpaa Ohe Oluhye nyanụ-ụ́ pyẹ ọpyị nyanụ ẹpwụ maaa jaabwọ kọ myị ọnụ, anụ ka ri iyo ụka myị ụka kọ haanụ myị.

²¹Ọhẹka ẹga ká Amkpaa Ohe Oluhye nyanụ ka chụ nya ẹga ọlẹ kị ka gbịgba họọ ka ji lụrụ hwẹẹẹ hi ẹpwa nyanụ myị. Ó-ri kọ lịnyị aalẹ, anụ ka nwụ ịna lee ịkpịlọ ịlẹ ká Amkpaa ya hanụ-ụ̀ wẹ kanụ ka ya ri ẹ-ẹpwa jaabwọ kam byinu-ù wẹ myị.

²²Ọngọ la charị-charị la tụ ọngọ ji libyi ẹ-ẹpwụ nyanụ ka ri iyo ọọwa ịnyịnyị myị jaabwọ kanụ wẹẹ ri iyọ nya apyị bala igbee.

²³Ọkẹnẹ-kẹnẹ ri ānụ ri ịwọ nya iwo kpong-kpong koo, chajị ịwọ à ri ọhịhị lẹ. Ánụ ka ri ọhịhị nya iyo tụ iyo ọọwa ayịdang ka.

²⁴Ọkọkọ nya ọọwa lẹ, anụ ka ya ịwọ nyamwụ hụrụ ị-ịpyị lala enyi.

²⁵Ánụ ba ehile ọwẹ jẹ lẹ aalẹ, ẹla nyanụ ka kpụ Amkpaa ịpyọ. Ọ ka họ kaanụ bala anyị ịtụma nyanụ ka kịlahị ẹ-ẹpwụ nya ang myị ang ọlẹ kanụ ka họ.

²⁶Ọhaha bala ang-ahị ịlẹ kanụ myị ọnụ ha Amkpaa wẹẹ, anụ-ụ̀ kpaa kịlọọ ka ẹga ọgbịgba ọlẹ kọ chụ hanụ mẹ.

²⁷Ánụ pwụ ụwa lẹ, anụ-ụ̀ kịla iya ịlẹ kị ri iya ọ-rụ ila mẹ. Anụ kịla iya ịkịla ịlẹ kanụ kaa ya iyo nyaa ri wẹ ịnyịnyị, kanụ ya ịwọ yẹ hụ ogidi mẹ.

²⁸Anụ-ụ̀ họ ehile ịlẹ wuu jịra kpẹẹkpẹẹ mẹ. Ọọwa, ẹla nyanụ à ka kpụ Amkpaa Ohe Oluhye nyanụ ịpyọ lẹ, anụ bala anyị ịtụma nyanụ gbe oyi myị oyi à ka kịlahị ẹ-ẹpwụ nya ang myị ang ọlẹ kanụ ka họ lẹlẹ.

²⁹“Amkpaa Ohe Oluhye nyanụ juwa ka ta alẹpwụma ịlẹ kanụ wẹẹ ka be ẹpwa ye ọpyị nyaa la-à ayịreji. Ọọwa, ānụ ka kụ ụwa lẹlẹ.

³⁰Ụka ká Amkpaa-á taa ayịreji hi iwe hanụ kpá, anụ-ụ̀ kpẹhị chịng mẹ, anụ ba ọhọhọ nyaa jẹ koo. Ānụ dọmwụ tọtọ wo yẹkẹẹ, ‘Anyị alụma ịlẹ à tị́-ị̀ bwu kpụ ijiga nyaa ene-è?’ lee ọ byi ịlọnụ yẹkẹẹ, ‘Ẹhẹẹ, āhị gbịgba ha Amkpaa dịrẹ ọgụ nyaa mẹ-ẹ̀!’ koo.

³¹Ānụ gbịgba ha Amkpaa Ohe Oluhye nyanụ labwụma ọlẹ kịị bwu kpụ ijiga nyaa koo, chajị ẹ-ẹpwụ nya ijiga ịkpụkpụ nyaa, ị kaa họ iru nya ang inyibyi ịlẹ kị wụ Amkpaa ẹjẹ. Ị dọmwụ họ gbee kịị ya anyị nyaa kịla iya ju ila u-uhye nya ogidi ha ijiga nyaa.

³²“Ehile ịlẹ kam danụ-ụ̀ wuu wẹẹ, anụ-ụ̀ ju ihi nyaa wuu kpẹẹkpẹẹ mẹ. Ānụ ya ẹlẹhẹ hajwaa lee ọ-gba ọhẹ-lọhẹ nyaa hi koo.