Read idege Ehile Ọmada 13 Bible Online

Ehile Ọmada 13 - idege bible

Ehile Ọmada 13

¹“Ọhẹka ọlọmwụ lee ọdụlaa wụlẹ ọhẹ ka hu kám ị-ịnyanụ ka juwa yẹ ọmwụ nya ụkụrwọ ẹbyẹbyị lee ang-ẹjẹẹ ọhẹ ọlẹ kọ ka họ ị-ịlahị myị.

²Ọngọọwa ka diroonu ẹpwa nyọka ihye ịkịla ịlẹ kanụ gbịgba ha ẹnẹnẹhẹ ene lẹka myị. Ó-riri ká ẹla ọlẹ kọ yẹ ọmwụ nyamwụ neeji-ì wẹ-ẹ́ họ jịra wẹwẹ,

³ānụ gbarụ pyooo nya ẹla nyamwụ koo. Amkpaa Ohe Oluhye nyanụ à wẹẹ manụ yẹ kọ ka jẹ ó-ri kọọwa ayịdang haanụ ka ọkịlẹtụ bala ugbodu okpukpuru nyanụ wuu lẹ.

⁴Amkpaa Ohe Oluhye nyanụ anụ ka ba jẹ bala o-ju ihi nyamwụ lẹ. Anụ kpa ehile nyamwụ jịra, kanụ juwa myị ẹrụ họọ bala ọ-la ọhịhị ọkpẹẹkpẹẹ ẹ-ẹga nyamwụ.

⁵Anụ wu ọlọmwụ lee ọlụlaa ọlịnyị kanụ nwọọ, chajị ọ juwa du angịnyị ju kị ka la egbeju-ọngịrị ta Amkpaa Ohe Oluhye nyanụ ọlẹ kọ gbanụ kpehe bwu Ijipiti ẹga kanụ ri anyịhị ene-ene. Ọlọmwụ ọlẹ kọ juwa maga nyọka tịrị angịnyị ẹkpẹ hi ụgbẹyị ọlẹ ká Amkpaa ya angịnyị nyamwụ nyị ba jẹ ịịwẹ ri ọngịnyị onyobyi. Anụ ka nwụ ọngọ lịnyị nyọka da ẹjwọ ku ang onyobyi hi ẹpwụ nyanụ.

⁶“Ó-ri ọnyịnang ọlẹng o-bwu igbeene ookpokpo lee ọnyị ọlẹng lee ọnyị ọnyang nyang lee ahụ nyang ọ-hang há lee oligu olikẹjẹ nyang ri, ọ ka dung ju ịbaa-ịbaa ya ahụ nyị kẹwẹ kịịwa nyị kpụ ijiga mẹ, kaahụ lee adanụ igogo anyị-ị́ tị kpụ ijiga ịlịnyị ẹnẹhẹ lẹka myị.

⁷Ijiga ịịwa ka ri ịlẹ ká alụma ị-kụ baanụ ba lee ọ-kụ hwẹẹẹ hiinu kaa kpụ eteji ha myị.

⁸Ā myị ká ọngọngọhẹ nyaa-ā mwụng ju koo. Ā ke ụrụ lọọ koo. Ā tị jujwo nyamwụ juwa tọọ kpịbaa koo.

⁹A ka nwọọ. Ahụ kpangga-à ya ẹjwọ mịlọọ họhẹ-họhẹ ene ká alụma wuu ka tụ gbiriri kaka nwọọ tang lẹ.

¹⁰Anụ mịlọọ ajwọ kọ gbu, chajị nyọlẹ kọ maga nyọka jing ahị kpata hi Amkpaa Ohe Oluhye nyanụ ọlẹ kọ gbanụ kpehe bwu Ijipiti ẹga kanụ ri anyịhị ene.

¹¹Ụka ọọwa, ala Isirẹlụ wuu ka wo ohi nya ẹlẹwẹ, uhi ka jwaa. Ọngọngọhẹ-ẹ́ tụtụm ka ma ang onyobyi ọlịịwẹ ọhọhọ yẹ gụ ọwẹ kaka.

¹²“Ọhẹka, ụka kanụ kụ e-epweji ịlẹ ká Amkpaa wẹẹ ya hanụ kpá, anụ ka wo o-oja ya

¹³eguru nya alịnyanụ ịhyẹ nyị kpa angịnyị aanaa ịlepweji-epweji nyaa rụ hwahị kaka kpụ ijiga ịlẹ kanụ kpụ eteji ha ẹnẹnẹhẹ lẹka lẹ myị.

¹⁴Ánụ wo oja ọlịnyị aalẹ, anụ towo, kanụ dịrẹ ẹlẹwẹ kpẹẹkpẹẹ. Ó-ri kanụ dịrẹ kaka wu, kọ ri ẹla nya ịlẹhị nyori ang onyobyi ọlịịwẹ họ aalẹ,

¹⁵anụ ka nwụ ọng myị ọng kọ kụ e-epweji ọọwa tụ iyo ileji nyaa wuu. Anụ ta epweji ọọwa ayịreji gbanggbang.

¹⁶Anụ go ang myị ang ịlẹ ká alụwa la wuu kpa kaka guru ojiya nya epweji ọọwa. Ọọwa lẹ, kanụ jụ epweji ọọwa tụ ang myị ang ịlụwa wuu ila ha Amkpaa Ohe Oluhye nyanụ lala iya ọ-rụ ila mẹ. Ị ka bà hi epweji ọọwa ri egwawụ-egwawụ pyịyọọ. Ọngọngọhẹ-ẹ́ ka mọọ nwụ ẹnẹnẹhẹ kaka.

¹⁷Ānụ hu ụpịlẹ nya ịngịngịhyẹ kpa rụ kaka la bwu ẹpwụ nya ang ịwẹ kị hunọ gbe ọ-ka taa ayịreji kokoo. Ọọwa, Amkpaa-à ka kpụba la agbama ọtụka nyamwụ lẹ, ọ ka yẹnụ ahyẹẹrwẹrwa lẹlẹ. Ọ ka yẹnụ ahyẹẹrwẹrwa kọ ka họ kanụ ka pyẹ ju iru lụmẹ-lụmẹ jaabwọ kọ myị ọnụ ha adanụ igogo anyị.

¹⁸Amkpaa Ohe Oluhye nyanụ ka yẹnụ ahyẹẹrwẹrwa ịịwẹ ó-ri kanụ ju ihi nya ehile nyamwụ wuu ịlẹ kam wẹẹ ya hanụ alẹ.