Read idege Ehile Ọmada 14 Bible Online

Ehile Ọmada 14 - idege bible

Ehile Ọmada 14

¹“Anụ à ri angịnyị nya Amkpaa Ohe Oluhye nyanụ lẹ. Ajị nya ọọwa lẹ, ụka kanụ ka kpa owuru chajị nya ọngịnyị nyanụ, ānụ be ịnyịrọ nyanụ lẹma lee iju lee ọ-pwọ inyi ịlịlahị hi ẹtẹ kpọngkpọng lala angịkịla ka.

²Anụ ri nya Amkpaa Ohe Oluhye nyanụ. Ẹ-ẹpwụ nya alẹpwụma nya odehe ọlẹ wuu, ọ chụnụ yụbwọ la angịkịla beji kanụ ka ri angịnyị nyamwụ lụbwọ-lẹta lẹ.

³“Ānụ kpa ịngịngịhyẹ ọlẹ kọ ri ibyi a-ahị nya Amkpaa ka ọnụ nyanụ koo.

⁴Iyo ịlẹ kanụ ka ri ri ẹna bala ọkpịlọ bala embiri

⁵bala ụma nya apyị datị-datị bala igbee bala ẹnụ.

⁶Anụ ka ri iyo ọnyị myị ọnyị ká ụchụ nyamwụ be abiiye kọ kaa ri ọ́wọ́.

⁷Iyo ọnyị myị ọnyị ká ụchụ nyamwụ-ụ́ be abiiye bala ọ-kaa ri ọ́wọ́ kaka lẹ aalẹ, anụ ryoo kaka. Ānụ ri ụnyịrẹ-ịkamẹlụ bala abya bala iyo-ọlẹjwọ ka. Iyo ịwẹ wuu kaa ri ọ́wọ́, achụ nyaa-á tị be abiiye ka lẹ, ị ri iyo ilibyi.

⁸Ānụ ri ikomba ka. Ịnọ achụ nyaa be abiiye, ị tị kaa ri ọ́wọ́ ka lẹ, ị ri iyo ilibyi. Ānụ ri iyo nyaa lee ọ-dọmwụ ya ịnyịrọ gu akịrakpa nyaa koo.

⁹“Anụ kị ri iyenyi ọnyị myị ọnyị ọlẹ kọ la ejwo ịlịkịka bala ego.

¹⁰Iyo ọlẹpwụ nya enyi ọnyị myị ọnyị kọ la ejwo ịlịkịka bala ego kaka lẹ aalẹ, ānụ ryoo kaka. Iyi ịlịnyị ri ilibyi.

¹¹“Anụ ka ri ọchịnụ ọcharị-charị ọnyị myị ọnyị myị.

¹²Ụma nya ịchịnụ ịlẹ kanụ ka ri ka ri idu bala epwu datị-datị bala

¹³igbe datị-datị bala ọchịnụ enyi bala

¹⁴ipyeekpo ụma datị-datị bala

¹⁵ịchịnụ-odu bala àpa datị-datị bala

¹⁶ụma nya epwii datị-datị bala

¹⁷ọgbangkịrọ bala ụma nya ụ̀má datị-datị bala

¹⁸ụma nya ogugu datị-datị bala ịtatịra bala erwo.

¹⁹“Ang ịwụlọọ-wụlọ i-bwu arụrụ wuu ri ang ilibyi. Ānụ ryaa ka.

²⁰Ang ịwụlọọ-wụlọ i-bwu arụrụ ịlẹ kị la charị-charị ānụ ka ri lẹ.

²¹“Anụ ri iyo ọhẹ-lọhẹ kọ gbu igu adoohe koo. Anụ ka ya ga ha ọngga ọlẹ kọ kụ ịnyanụ kọ ka ya ri lee anụ ọ-ka ya ha ọngga ọkịla ọhẹ ra myị. Anụ ayịdang tị lẹ, anụ ri angịnyị nya Amkpaa Ohe Oluhye nyanụ. “Ānụ kpa enyi-ẹmẹ nya ịnịna nya ẹmwụ kpụ́ ọnyị nyamwụ koo.

²²“Anụ-ụ̀ hu ang ookpokpo ẹ-ẹpwụ nya iwo nọ bwu ẹpwụ nya ang-ẹrụ nyanụ ẹka myị ẹka.

²³Ānụ họ lẹ, anụ kpa ang ookpokpo ẹ-ẹpwụ nya iwo bwu ẹpwụ nya ambakpa bala ere onyeewe bala ida nya olivu bala anyị nya ọgbanyẹ nya ịna bala ịmwụ nyanụ ịwẹ wuu kele ka ẹga ká Amkpaa Ohe Oluhye nyanụ chụ nyọka gbịgba họọ kanụ ya ri i-ijata nyamwụ mẹ. Ang ookpokpo ẹ-ẹpwụ nya iwo ọwẹ kanụ hu ha-à wẹ ri ọ-ka mẹjẹẹnụ kanụ ka ju ihi nya Amkpaa Ohe Oluhye nyanụ ụka wuu.

²⁴Ọhẹka, ẹga ká Amkpaa chụ nyọka gbịgba họọ ka lụrụ hi ẹpwa nyanụ myị.

²⁵Ó-ri kọ lịnyị aalẹ, anụ ka ang nya ọhaha ịwẹ ra kanụ ka kpa okpoko ọọwa kele ka ẹga ká Amkpaa Ohe Oluhye nyanụ chụ.

²⁶Ụka kanụ pwụ ụwa, anụ ka ya okpoko ọọwa ra ang myị ang kọ haanụ lala ẹna lee ọkpịlọ lee ere lee ere o-ju egbeju kaanụ bala alugbiyegu nyanụ ā ri ang bala ọ-yụya i-ijata nya Amkpaa Ohe Oluhye nyanụ mẹ.

²⁷Ānụ tị-ị̀ ri kpịtịya nya ala iLivayị ilepweji nyanụ mẹ. Anụ tị́ jẹ lẹ, ịwa-á la ọpyị nya ụbwọ nya ịlaa ọhẹ datị ka.

²⁸“Ụka kọ pwụ ọmyịmyị nya ẹka ọhata ọnyị myị ọnyị, anụ ka kpa ọhaha nya ookpokpo ẹ-ẹpwụ nya iwo ọlẹka ọọwa kele kaka tụchawụlẹ ẹ-ẹga ookpokpo e-epweji nyanụ.

²⁹Ọọwa lẹ, kanụ gyaa ha ala iLivayị kịịwa-á la ọpyị nya ịlaa datị ka-à wẹ bala angga bala anyị-egu bala ịhụ-egu ịlịnyanụ, chajị kị ka ye ang ri jaabwọ kọ baba haa mẹ. Lẹ, Amkpaa Ohe Oluhye nyanụ à ka wahị kụrụụnụ ẹ-ẹpwụ nya ụkụrwọ ọnyị myị ọnyị ọlẹ kanụ ka họ lẹlẹ.