Read idege Ehile Ọmada 15 Bible Online

Ehile Ọmada 15 - idege bible

Ehile Ọmada 15

¹“Ụka kọ pwụ ọmyịmyị nya ẹka ọharwiye ọnyị myị ọnyị, anụ ka tụụbwọ hi uri ga ha ọng myị ọng kọ kpanụ uri.

²Jaabwọ kanụ ka bwu họ à lẹẹ lẹ. Ọngọngọhẹ kọ ya okpoko kpịla ọla Isirẹlụ ọọnamwụ ka tụụbwọ hi uri ọọwa gahị. Ọ́ tụtụm ka byi ọọnamwụ ọọwa nyị tịrị okpoko ọọwa ẹkpẹ mẹ kaka, chajị ụka ká Amkpaa hunọ nyọka tụụbwọ hi uri ọkpakpa gahị pwụ lẹ.

³Anụ ka ye okpoko ọlịnyị tịrẹkpẹ bwu ẹga nya ọngga myị. Anụ tị ka tụụbwọ hi ịnya alịnyanụ ga haa.

⁴Ọngọngọhẹ nyanụ anụ ala Isirlẹlụ-ụ́ ka ri ọlẹbyahị ka, chajị Amkpaa Ohe Oluhye nyanụ juwa ka wahị kụrụụnụ lụmẹ-lụmẹ ọ-ọpyị ọlẹ kọ wẹẹ ya hanụ.

⁵Anụ ka pyẹ̀ẹẹ ó-ri kanụ ju ihi nya ehile nya Amkpaa ịlẹ wuu kam wẹẹ ya hanụ alẹ.

⁶Amkpaa Ohe Oluhye nyanụ ka wahị kụrụụnụ jaabwọ kọ myị ọnụ. Anụ ka ya okpoko kpịla ẹpwụma lụmẹ-lụmẹ, ánụ tị ka kpịla ang bwu ẹga nya ẹpwụma ọhẹ-lọhẹ kpong-kpong ka. Ẹpwụma lụmẹ-lụmẹ ka ji ekpeleji nya ọngịrị nyanụ, anụ-ụ́ tị ka ji ekpeleji nya ọhẹ-lọhẹ nyaa ka.

⁷“Ó-ri ká ọla Isirẹlụ ọọnanụ ọhẹ-ẹ́ juwa e-epweji ọhẹ nya ọpyị ọlẹ ká Amkpaa Ohe Oluhye nyanụ wẹẹ ya hanụ aalẹ, ānụ lujwo lee ọ-tụụbwọ pịrị ang ẹ-ẹga nyamwụ ka.

⁸Ọkọkọ nya ọọwa lẹ, anụ pyẹ ụbwọ maaa juwa ya ang kpịlọọ jaabwọ myị abwọ kọ tịtọ kaka ba.

⁹Ānụ pwa ọ-ya ang kpịlọọ ajị nyori ẹka ọlẹ kị ka tụụbwọ hi uri gahị ju chwẹẹ lẹ koo. Ọ ri ang ọtịpyọ nyọka me irya ọlịịwẹ du ká ka pwa kwọọọ nyọka ya ang kpịla ọọnang. Ọngọ la ọbaba ọlịịwẹ-ẹ́ chị eru ju Amkpaa u-uhye nya ọhọhọ nyang ọwẹ, ahụ à ka ri ọngọ la abyị lẹ.

¹⁰Ya ang ha ọ-wu ụbwọ kpa ka bala la ọ-mwẹla ya ka. Ọọwa, Amkpa Ohe Oluhye nyanụ à ka wahị kụrụụnụ ẹ-ẹpwụ nya ụkụrwọ ọnyị myị ọnyị ọlẹ kanụ juwa họ lẹlẹ.

¹¹Angịhyẹ juwa ẹ-ẹpwụ nyanụ anụ ala Isirẹlụ kị ka ri alẹbyahị bala o-juwa ẹ-ẹpwụ nya ọbaba ịnyịnyịịnyị. Lẹẹlẹ, m̀ jam danụ ehile kanụ ka họ ọnahị ẹ-ẹga nya alịnyanụ ịlẹ kị ri alẹbyahị bala angịlẹ kị ji ẹpwụ nya ọbaba.

¹²“Ó-ri ká ọla iHiburu ọọnanụ ọlẹng lee ọnyang-ńg ya ịlọmwụ hanụ ra nya ọnyọhị aalẹ, anụ ka tụụbwọ hyoo rụ ẹ-ẹpwụ nya ẹka ọharwiye ụka kọ myị ẹrụ hanụ jịra ẹka ịrwọnyẹ gbẹgbịlẹ kpá.

¹³Ụka kanụ gbọọ kpehe nyọka la ịlọmwụ, ānụ pẹhyoo rụ labwabwọ ịịwẹ koo.

¹⁴Anụ ka gọọ ang-ahị yẹẹyẹẹ bwu ẹpwụ nya ang ịlẹ ká Amkpaa kpa wahị kụrụụnụ. Anụ ya ịmwụ bala ambakpa bala ere họọ.

¹⁵Anụ tị́ kpịtịya, anụ ayịdang ri anyịhị Ijipiti ẹnẹhẹ lẹ, Amkpaa Ohe Oluhye nyanụ à họ anụ la ịlọnụ-ụ̀ wẹ lẹ. Ịnyị à du kam wẹẹ danụ ehile ọwẹ alẹ lẹ.

¹⁶“Ọ́ tị ri ká ọnyọhị nyanụ ọọwa-á tịtọ nyọka rụ kaka la ịlọmwụ, kọ yẹkẹẹ, ‘Eheehe, ayịbam bala ugbiyegu nyamwụ hám lẹ, ọ-hụ am̀ hụ hám gụ, ḿ ka rụ kaka’ aalẹ,

¹⁷anụ kpọọ kele ka ọnang nya ẹpwang nyanụ, kanụ ya ọgang bwurwoo ụrụ iwa ụ-ụwa mẹ. Ọọwa, ọ ka ri ọnyọhị nyanụ pyịyọọ ẹ-ẹpwụ nya ọhịhị nyamwụ lẹlẹ. Ó-ri ọnyọhị ọlẹng lee ọnyang wẹwẹ, ịịwẹ anụ ka họ lẹlẹ.

¹⁸Ọ chịnụ ajila ụka nyọka pẹhi ọnyọhị kaka la ịlọmwụ koo. Yẹ wẹẹ, ụkụrwọ nya ọlẹ kị họ hanụ ẹ-ẹpwụ nya ẹka ịrwọnyẹ kem lụmẹ kpoye uri nya ọlẹ ká ọlụkụrwọ ọlẹ kị diroo-diro kaa ye ugbabwọ imiiye. Ánụ họ ịnyị lẹ, Amkpaa Ohe Oluhye nyanụ à ka wahị kụrụụnụ ẹ-ẹpwụ nya ang myị ang ọlẹ kanụ wẹẹ họ lẹlẹ.

¹⁹“Anụ ka yile anyị alẹng nya ọgbanyẹ nya ịnụ bala ịmwụ nyanụ guru ha Amkpaa Ohe Oluhye nyanụ. Ānụ kpa ịna ịịwa wu ẹrụ koo, ānụ tị pwọ ịmwụ ịịwa egbii ka ịnyịnyị.

²⁰Ẹka myị ẹka wuu anụ bala alugbiyegu nyanụ ka nwụ iyo ịwẹ ri ẹ-ẹga ọlẹ ká Amkpaa chụ nyọka gbịgba họọ.

²¹Ọ́ tị ri ká ehe-é họ iyo ịwẹ lala okuku ọchịchị lee idu ọkpụkpụ lee ẹjẹẹ ọtịpyọ-tịpyọ ọkịla ọhẹ aalẹ, ānụ ya ọlịnyị kịla iya ha Amkpaa Ohe Oluhye nyanụ koo.

²²Anụ ka ri iyo ịịwa ẹ-ẹpwa nyanụ myị. Ọngọ la charị-charị tụ ọngọ ji libyi ka ri myị ịnyịnyị jaabwọ kanụ wẹẹ ri iyo nya apyị bala igbee.

²³Ānụ tị ri ịwọ nya iyo koo. Anụ yọọ hụrụ ị-ịpyị lala enyi.