Read idege Ehile Ọmada 16 Bible Online

Ehile Ọmada 16 - idege bible

Ehile Ọmada 16

¹“Anụ-ụ̀ ju ihi nya Amkpaa Ohe Oluhye nyanụ bwula ọ-la ọhụhụ nya Ang Oriri Ọchịpwuru ẹ-ẹpwụ nya ọya nya Abibu mẹ. Lodu ọhẹ ẹ-ẹpwụ nya ọya ọwẹ Amkpaa-à gbanụ kpehe bwu Ijipiti lẹ.

²Ẹ-ẹpwụ nya ịna lee ịmwụ nyanụ anụ ka kpa iyo okiliya nya ọhụhụ nya Ang Oriri Ọchịpwụrụ bwu lẹ. Anụ ka kpa kele kaka nwụ ha Amkpaa Ohe Oluhye nyanụ ẹ-ẹga kọ chụ nyọka gbịgba họọ.

³Lụka nya Ang Oriri Ọchịpwụrụ ọwẹ, anụ ka ri ịkaa ọlẹ kị ya ang ọ-mịrị ịkaa ju-ka. Ẹ-ẹpwụ nya ẹnụtụrụ irwiye gbẹgbịlẹ, ịkaa ọ-ya ang ọ-mịrị ịkaa ju-ka kem anụ ka ri jaabwọ kanụ họ ụ-ụwa Ijipiti ụka kanụ lẹẹ ka rụ lagaga lẹ. Ịkaa kem anụ ka ri lụka ọwẹ lẹ. Ịkaa nya akama ọyẹyẹ ịnyị, chajị ẹ-ẹpwụ nya ọhịhị nyanụ wuu, kanụ ka kpịtịya nya ẹnụ kanụ yegiri bwu Ijipiti.

⁴Ẹ-ẹpwụ nya ẹnụtụrụ irwiye ịwẹ wuu, ang ọ-mịrị ịkaa-ā hi juwa ẹ-ẹpwa nya ọngọngọhẹ ọ-ọpyị nyanụ kokoo. Iyo okiliya nya ọhụhụ ọwẹ ọlẹ kanụ nwụ lobyi nya ẹnụ nya ọgbanyẹ wẹẹ, anụ ka ryoo wuu ẹnụ alẹ-alẹ ọọwa. Ụpịlẹ nyamwụ ā hi ọchacha koo.

⁵“Ẹ-ẹga myị ẹga kọ haanụ ọ-ọpyị ọlẹ ká Amkpaa wẹẹ ya hanụ ānụ ka nwụ iyo okiliya nya Ang Oriri Ọchịpwụrụ koo.

⁶Ẹ-ẹga ookpokpo ọlẹ ká Amkpaa chụ nyọka gbịgba họọ ịnyị. Anụ ka kịla iya ọwẹ lụka nya ẹnụ o-hu ẹchị-ẹgbụ ẹnụ nya ẹka ogugu pwoku ụka kanụ yegiri bwu Ijipiti.

⁷Anụ kpụ̀ iyo ọọwa, kanụ ryoo ẹ-ẹga ọlẹ ká Amkpaa chụ nyọka gbịgba họọ. Alụtụrụ nya ahị ọpyẹpyẹ ọọnamwụ lẹ, anụ nyà ka ẹpwa nya ịlọnụ mẹ.

⁸Anụ ka ri ịkaa ọmịrịị-mịrị ka jịra ẹnụtụrụ ịrwọnyẹ. Ẹnụtụrụ ọharwiye lẹ, anụ la ọjịra-jịra nyọka gbịgba ha Amkpaa Ohe Oluhye nyanụ mẹ. Ānụ họ ụkụrwọ ẹnẹwẹ kokoo.

⁹“Anụ wa epwihi irwiye cheeji bwu ụka kanụ dọmwụ nyọka chị ang-ẹrụ nyanụ.

¹⁰Ọọwa lẹ, kanụ la Ọhụhụ nya Ang-ẹrụ Ọwụwụ nyọka chị ihi ju Amkpaa Ohe Oluhye nyanụ mẹ. Anụ ka kpa ọhaha o-bwu ọkịlẹtụ nyanụ wẹ Amkpaa pwoku jaabwọ ká ahị ọwawa ịlẹ kanụ ye bwu ẹga nyamwụ lụmẹ kaka ba.

¹¹Ụka ọwẹ ri ụka kanụ ka yụya i-ijata nya Amkpaa bala anjwo bala anchẹ nyanụ bala ala iLivayị bala angga bala anyị-egu bala ịhụ-egu ilepweji nyanụ. Ẹẹ-ga ọgbịgba nya Amkpaa anụ ka la ọhụhụ ọwẹ lẹ.

¹²Anụ tị́ kpịtịya kanụ ri anyịhị Ijipiti ẹnẹhẹ lẹ. Lẹẹlẹ, anụ-ụ̀ kpa ehile ịlẹ wuu kpẹẹkpẹẹ mẹ.

¹³“Anụ ka la ọhụhụ ọkịla ọlẹ kọ ri nya Adáa jịra ẹnụtụrụ irwiye gbẹgbịlẹ dọmwụ bwụ ẹnụ kanụ ru igbi bala ambakpa nyanụ ká bala ọ-họ ere nya alakọnụ ịlẹrụ nyanụ kpá.

¹⁴Anụ yụya lụka nya ọhụhụ ọlẹ bala anjwo bala anchẹ nyanụ bala ala iLivayị bala angga bala anyị-egu bala ịhụ-egu ilepweji nyanụ.

¹⁵Anụ la ọhụhụ ọlẹ jịra ẹnụtụrụ irwiye gbẹgbịlẹ nyọka chị ihi ju Amkpaa Ohe Oluhye nyanụ. Anụ wuu ka chị ọkẹkẹnị, chajị Amkpaa-à họ ká ang-ẹrụ nyanụ wuu há lụmẹ-lụmẹ lẹ.

¹⁶“Ẹka myị ẹka wuu ọlẹng ọnyị myị ọnyị nya ala Isirẹlụ ka wẹ ẹga nya Amkpaa kaka la ọhụhụ nya Ang Oriri Ọchịpwụrụ bala Ọhụhụ nya Ang-ẹrụ Ọwụwụ bala Ọhụhụ nya Adáa ẹ-ẹga ká Amkpaa chụ nyọka gbịgba họọ lụka nya ọhụhụ ịta ịwẹ. Ọ ri pyii ká ọngọngọọng ka kpa ang-ahị wẹ Amkpaa lụka ịwẹ

¹⁷jaabwọ kọ lọngịrị kaka ba. Jaabwọ ká ang-ẹrụ-ụ́ há lụmẹ kaka ba, ịnyịnyị-ịnyịnyị ọhaha nya ọngọọwa à tị̀tị̀ ka la yụụ́ụ́ lẹ.

¹⁸“Anụ chụ angịleje bala alegbeju ịkịla e-epweji-epweji ịlẹ wuu ká Amkpaa Ohe Oluhye nyanụ wẹẹ ka ya hanụ. Angịịwa ka la eje la ọ-jẹ oye-oye.

¹⁹Ānụ họ chị eje ịmịmẹ lee ọ-chị oku ẹchụ-ọma koo. Ānụ yẹ ang ochikiriju koo. Ang ọlịnyị kaa kpụ ọngịnyị ọnyịịla idu bala ọ-pyị eje ọkpẹẹkpẹẹ ọlẹ kị ka chị anyoko.

²⁰Anụ ba ụgbẹyị nya ẹla ọ-họ kpakpa jẹ, chajị kanụ ka kụ ọpyị ọlẹ ká Amkpaa Ohe Oluhye nyanụ wẹẹ ya hanụ pyịyọọ.

²¹“Ānụ ya okoji nya Achẹra ojiga ọnyang weji ba ogidi okiliya ọlẹ kanụ me ha Amkpaa Ohe Oluhye nyanụ koo.

²²Ānụ tị ya ẹjwọ ọhẹ weji rịrị kọkọ nyọka kpụ eteji họọ ka ịnyịnyị. Ang ịwẹ wụ Amkpaa Ohe Oluhye nyanụ ẹjẹ.