Read idege Ehile Ọmada 17 Bible Online

Ehile Ọmada 17 - idege bible

Ehile Ọmada 17

¹“Ānụ ya ẹnụ lee ọkpịlọ ọlẹ ká ehe họ kịla iya ha Amkpaa Ohe Oluhye nyanụ koo. Ọhaha ọlịnyị wọọ ẹjẹ.

²“Ọhẹka anụ ka wo nyori ọlẹng lee ọnyang ọhẹ e-epweji ọhẹ nya ịlẹ ká Amkpaa wẹẹ ya hanụ kanụ ka kụ nyị họ ang onyobyi ba Amkpaa Ohe Oluhye nyanụ bala ọ-bịrị iro ọnwanwa

³bwula ọ-kpụ eteji bala ọ-myị ẹrụ ha ijiga lee ẹnụ lee ọya lee ịdịchụ lee ang ịlẹ kám hileenu nyọka kpụ eteji ha lẹ myị.

⁴Ánụ wo oja ọlịnyị aalẹ, anụ towo, kanụ dịrẹ ẹlẹwẹ kpẹẹkpẹẹ. Ó-ri kanụ dịrẹ kaka wu, kọ ri ẹla nya ịlẹhị nyori ang onyobyi ọlịịwẹ họ am̀ Isirẹlụ aalẹ,

⁵anụ wu ọlẹng lee ọnyang ọọwa kpa ka ọnụ-ogirigba, kanụ da ajwọ nwọọ ụ-ụwa.

⁶Ene nya ọọwa tị lẹ, angịnyị angị imiiye lee ọ-gụ ọọwa ka họ ibeenu, gbe ẹla jwoo. Ibeenu ọhọhọ nya ọngọ ookpokpo-ó nwa kpụ ị ka wu ọngịnyị nwụ koo.

⁷Alibeenu ịịwa-à ka ri angị da ajwọ nya ọgbanyẹ-ọgbanyẹ mịla ọngọọwa ene ká alụma wuu ka yụbwọ ju. Ịịwẹ anụ ka bwu da ẹjwọ ku ang onyobyi hi ẹpwarịrị nyanụ lẹ.

⁸“Ọhẹka eje ịhyẹ juwa kị ka la angịleje ịlịnyanụ nyaanyaa lọchịchị lala eje u-uhye nya ọngịnyị ọnwụnwụ tu ịmịmẹ lee ịnya ụbwọ-anịya lee eje nya ịwọ ọ-chị ọngịnyị chị lee eje nya ọpyị myị. Ụka ká eje ịlịnyị-ị́ ji, anụ kele ka ẹga ọlẹ ká Amkpaa Ohe Oluhye nyanụ chụ nyọka gbịgba họọ,

⁹kanụ ya eje ọọwa ta angịkiliya ịlẹ kị ri ala iLivayị bala ọngọleje ọlẹ kọ kpa ahụrụ nya eje ọlala ụ-ụbwọ ụka ọọwa. Ọọwa, ị ka chị eje ọọwa hanụ lẹlẹ.

¹⁰Jaabwọ kị chị eje ọọwa ẹ-ẹga ká Amkpaa chụ ānụ ka ye myị lẹ, kanụ ba ọmẹjẹ nyaa jẹ kpẹẹkpẹẹ mẹ.

¹¹Anụ ye eje ọchịchị nyaa myị, kanụ ba ọmẹjẹ nyaa jẹ kpẹẹkpẹẹ mẹ.

¹²Ọngọngọhẹ kọ hu ẹpẹpẹ ju ẹla nya ọngọleje lee ọngọkiliya ụka kị juwa kpa ụkụrwọ nyaa họ ẹ-ẹga nya Amkpaa aalẹ, ị ka nwụ ọngịnyị ọlịnyị. Ụgbẹyị ọlịịwẹ anụ ka bwu da ẹjwọ ku ang onyobyi ọlịnyị rụ hi ọpyị Isirẹlụ lẹ.

¹³Ụka ọọwa, angịnyị wuu ka wo, ị ka ju uhi. Ọngọngọhẹ-ẹ́ tụtụm ka họ ang ọlịnyị kaka.

¹⁴“Anụ tị́ jẹ lẹ, anụ tụbwọọ ka pwụ ọpyị ọlẹ ká Amkpaa Ohe Oluhye Oluhye nyanụ wẹẹ ya hanụ, kanụ kụ lẹ. Ụka kanụ pwụ ụwa kpá, irya nya adịrahụ ọ-ka la lala alẹpwụma ịkịla ịlẹ kị kụ dagaga junu-ù wẹ ka wẹpwụ hanụ myị.

¹⁵Ó-ri kọ lịnyị aalẹ, ọlẹng ọlẹ ká Amkpaa Ohe Oluhye nyanụ ka chụ anụ ka hu lẹ. Ọla Isirẹlụ ọọnanụ anụ ka hu lẹ. Ānụ hu ọngga ri adịrahụ nyanụ koo.

¹⁶Adịrahụ ọọwa-á baba nyọka la iru nya anyịrẹ chajị nya angịdẹwụ nyamwụ ka. Ọ́ tị ka du angịnyị kele ka Ijipiti kaka ra anyịrẹ bwu ụwa koo. Amkpaa ya anụ angịnyị nyamwụ nyị tịrẹkpẹ ka Ijipiti ẹnẹnẹhẹ kaka.

¹⁷Adịrahụ ọọwa-á ka ye iru nya ịhụ koo. Ọlịnyị ka gwoo ahị gboo hi Amkpaa. Ọ́ ka tụ́ ụdụ nya okpoko onyoowuru bala okpoko ịgọm rịrị ịlọmwụ ka ịnyịnyị.

¹⁸Ụka ká ọngọọwa-á hụ ẹ-ẹchị nya adịrahụ kpá, ọ ka la ụpwụ nya ehile bala ọmẹjẹ nya Ohe Oluhye ọlẹ. Ịnyamwụ ka ri ọmada nya ọlẹ ká angịkiliya ala iLivayị la kpangga.

¹⁹Ọ ka kpa ụpwụ ọwẹ ụ-ụwa kọ ka juwa kpa wa lụka nya ọhịhị nyamwụ wuu. Ọọwa ka du kọ ka ju ihi nya Amkpaa bala ọ-ba ọmẹjẹ bala ehile ịlụpwụ ọwẹ jẹ kpẹẹkpẹẹ.

²⁰Ọọwa ka du ịnyịnyị kọ ka nwà ịlọmwụ gẹdẹẹ nyori ọwa nyị hagụ ala Isirẹlụ aanamwụ ịkịla ka lee ọ-ka bịrị ehile nya Amkpaa ụ-ụgbẹyị ọhẹ-lọhẹ ka. Okoji-ahụrụ à bọọ ọ-ọmwụ lẹ, anyị ịtụma nyamwụ à tị̀tị̀ ka ri adịrahụ mwụba-mwụba Isirẹlụ lẹlẹ.