Read idege Ehile Ọmada 18 Bible Online

Ehile Ọmada 18 - idege bible

Ehile Ọmada 18

¹“Alimwawụ nya iLivayị kị ri angịkiliya wẹ-ẹ́ ka la ọpyị ọhẹ nya ịnya ịlaa datị Isirẹlụ kaka. Bwu ẹpwụ nya ang ịwẹ kị kaa kpa kaka kịla iya ju ila ha Amkpaa ị ka ye ang oriri nyaa lẹ. Ang ikiliya ịwẹ à ri ang ọlala nyaa lẹlẹ.

²Ịwa-á ka la ọpyị nya ịlaa lala alimwawụ ịkịla ịla Isirẹlụ kaka. Amkpaa lịlọmwụ à ri ang ọlala nyaa jaabwọ kọ myị ọnụ haa lẹ.

³“Ụka kị ya ẹna lee ọkpịlọ kịla iya, ẹ̀ga nya iyo ịwẹ ịlẹ kị ka ri nya angịkiliya ri ụmwụchwọ bala ụ́baa bala ubwu.

⁴Anụ ka ya ebwo nya ọgbanyẹ bwu ẹpwụ nya ambakpa bala ere bala ida nya olivu bala egbii nya ịmwụ nyanụ haa.

⁵Anụ tị́ jẹ lẹ, Amkpaa-à chụ alimwawụ nya iLivayị bwu ẹpwụ nyanụ nyọka myị ẹrụ họọ lala angịkiliya lẹ.

⁶“Ọla iLivayị ka rụ bwu epweji ọlẹ kọ kụ ụka kọ họọ kele ka ẹga ọlẹ ká Amkpaa chụ kị ka gbịgba họọ myị.

⁷Ọ́ pwụ ẹga ọọwa, ọ ka myị ẹrụ lala ọngọkiliya nya Amkpaa Ohe Oluhye nyamwụ lala ala iLivayị ịkịla ịlẹ kị juwa myị ẹrụ ụ-ụwa myị́.

⁸Ị ka gọọ ang jaabwọ kị ka ga angịkiliya ịkịla ịlụwa ịnyịnyị ó-riri ká alẹpwụ nyamwụ-ụ́ juwa ye ang du wọọ.

⁹“Ụka kanụ pwụ ọpyị ọlẹ ká Amkpaa Ohe Oluhye nyanụ wẹẹ ya hanụ, ānụ gbịla ịhọhọ inyibyi nya alụwa koo.

¹⁰Ānụ ya anyị nyanụ kịla iya ju ila ogidi nyanụ koo. Ānụ yẹ ugono lee ọ-kpa ogbo yẹ ọla ọlịlahị ọ-yẹ angịnyị ọyị lee o-ri ọlụhwa koo.

¹¹Ānụ kpa ogbo họ angịnyị ang lee ọ-ka ẹga nya angị kaa ya ẹla ta alegu nya angị gbugbu koo.

¹²Ang họ ang ịlịịwẹ wuu ka wụ Amkpaa ẹjẹ. Ajị nya ang inyibyi ọhọhọ ịlịịwẹ wuu à du ká Amkpaa wẹẹ kwaa rụ hi ẹga da hanụ lẹ.

¹³Anụ ba irya nya Amkpaa Ohe Oluhye nyanụ jẹ la ọ-la abyị ẹ-ẹga nyamwụ kpong-kpong kaka mẹ.

¹⁴“Anụ tị́ jẹ lẹ, ọpyị ọlẹ kanụ wẹẹ ka ye laa-à wẹẹ, alụwa kaa ba ọmẹjẹ nya alegino bala alahwa jẹ-ẹ̄. Anụ tị lẹ, Amkpaa Ohe Oluhye nyanụ-ụ́ myị hanụ nyọka họ ịnyị koo.

¹⁵Ọkọkọ nya ọọwa lẹ, Amkpaa juwa ka du ọlọmwụ ọlala am iMosisi bwu ẹpwụ-ẹpwụ nyanụ wẹ ẹga nyanụ. Ọngọọwa anụ ka ke ụrụ la lẹ.

¹⁶Ajị nya ọbịlẹ-bịlẹ nyanụ à du lẹ. Ụka kanụ tụguru ọ-Ọgbọdọ nya ịSayịnayị ugbeene lẹ, anụ lẹẹ bịlẹ ya Amkpaa nyị ya ẹla tịwa lịlọmwụ kaka lee ọ-họ kịịwa nyị yẹ ila nya ijata ojiji nyamwụ kaka ó-ri ịnyị ka ịwa nyị ka gbu.

¹⁷“Ọọwa, Amkpaa à tị́ byim lẹẹ yẹkẹẹ, ‘Ẹlẹwẹ kị ya wẹ hiigu.

¹⁸M̀ ka ya ọlọmwụ ọlala ahụ iMosisi du kịlaa bwu ẹpwụ-ẹpwụ nyaa ịwa ala Isirẹlụ. M̀ ka ya je ọlọmwụ ọọwa ẹlẹlẹ kọ ka ya ya. Ọọwa, ọ ka ya je angịnyị ehile ọnyị myị ọnyị kam da lẹlẹ.

¹⁹Am à wẹẹ ka doo ẹrụ lẹ. Lẹẹlẹ, ọngọlẹ kọ myị ke ụrụ wo ẹla nyam ọlẹ ká ọlọmwụ ọọwa ka ya ka aalẹ, am lịlọm ka ba ọngọọwa ụbwọ.

²⁰Ọ́ tị ri ká ọlọmwụ ọhẹ-ẹ́ byi ịlọmwụ ọwa nyị juwa nyam dodehe ká am à tị doo ẹrụ ka lee o-juwa kpa ẹla nya ijiga pyebile aalẹ, ị ka nwụ ọngọọwa.’

²¹“Anụ ka juwa kpa ịtọ chị ịlọnụ okuku ya anyị ịwa nyaa tị́ ka họ kịịwa nyị ka jẹ ó-ri ká ẹla nya ọlọmwụ nyị bwu ẹga nya Amkpaa lee nyị bwu ụwa ka-à?

²²Ó-ri ká ọlọmwụ-ụ́ ya ẹla lẹnyị nya Amkpaa, ká ẹla ọọwa-á tị họ jịra ka aalẹ, ẹẹla nya Amkpaa-à wẹ ka. Ọ ya ẹla ọọwa lirya nya ịlọmwụ ịnyị. Ānụ ju uhi nyamwụ ka.