Read idege Ehile Ọmada 2 Bible Online

Ehile Ọmada 2 - idege bible

Ehile Ọmada 2

¹“Ọọwa, ahị jahị kpata juwa kịnyaa lẹdịyẹ ọjẹjẹ yahị da ka ugbileji ọlẹ kọ ji ụgbẹyị o-bwu ka Ihu Oletungkohyo jaabwọ ká Amkpaa ya nyị họ lẹlẹ. Ahị ga tụ ọpyị olikiti nya Ẹdọm ọwẹ lụka ọtata.

²“Ọọwa, Amkpaa-à byim yẹkẹẹ,

³‘Anụ ga dọgịlẹ ju ọpyị olikiti ọlẹ tata lụmẹ nwà lẹ, anụ jẹ yahị da ka ẹtẹ ugbẹnyị mẹ.

⁴Byi ala Isirẹlụ mẹ, anụ tụbwọọ ka chịpwụrụ bwu egeji nya anyadanụ ịlẹ kị ri anyị ịtụma nya Ịsọ kị kụ ọpyị olikiti nya Ẹdọm lẹ. Ị ka ju uhi nyanụ, ma anụ tị wu ịlọnụ kpa.

⁵Anụ dẹwụ taa koo, chajị ḿ juwa ka gu ụpa ọhẹ-lọhẹ nya ọpyị nyaa une jẹẹrịị hanụ kpong-kpong ka. M̀ ya ọpyị nya Ẹdọm ọwẹ ha anyị ịtụma nya Ịsọ kị ka lọọ lụbwọ-lẹta nya ang ọlala nyaa lẹ.

⁶Anụ ka ra ang oriri bala enyi ọnwanwa rara bwu ẹga nyaa myị.’

⁷“Ànụ tị́ kpịtịya jaabwọ ká Amkpaa Ohe Oluhye nyanụ wahị kụrụụnụ ẹ-ẹpwụ nya ụkụrwọ ọnyị myị ọnyị ọlẹ kanụ ho. Ọ kpẹhị rịrịịnụ lụka ọlẹ kanụ lẹẹ ga tụ ugbileji ọtụka ọlẹ da. Ọ hụ tanụ ẹ-ẹpwụ nya ẹka iwo ine ịlẹ wuu. Anụ la ang myị ang ịlẹ kị baba hanụ wuu.

⁸“Ịnyị, ahị jẹ kịlahị kpoye nya aanahị anyị ịtụma nya Ịsọ ịlẹ kị kụ Ẹdọm lẹlẹ. Ahị tụụbwọ hi ụgbẹyị ọ-ka Ọkpọọ nya ịJọdan ọlẹ kọ da bwu Elatị bala Esiyọn-ịgẹbẹẹ beji lẹ, ahị jẹ yahị da ka ụgbẹyị olugbileji nya iMowabụ lẹlẹ.

⁹“Ọọwa, Amkpaa-à byim yẹkẹẹ, ‘Anụ bẹ ẹnẹẹla nya ala iMowabụ anyị ịtụma nya ịLọtụ koo. Anụ tị dẹwụ taa ka ịnyịnyị. M̀ ya epweji nya Aarị ọwẹ haa kị ka lọọ lụbwọ-lẹta lẹ. Ḿ juwa ka gu ọpyị nyaa ọwẹ une jẹẹrịị hanụ koo.’ ” (

¹⁰Ene-ene lẹ, ụma nya angịnyị i-ri ịmaga bala o-ju iru ịhyẹ kị wụrụ ala Emim à ku epweji nya Aarị ọwẹ lẹ. Ị luhye gọng-gọng lala ala Anakị kị ri ịmaga ịnyịnyị.

¹¹Ị kaa wụrụ angịwẹ ala iRefa jaabwọ kịị wụrụ ala Anakị ịnyịnyị. Ma, ala iMowabụ kaa wụrwaa ala Emim.

¹²Ịnyịnyị-ịnyịnyị ala ịHọọ à kụ Ẹdọm ene-ene lẹ. Ma, ala Ẹdọm mwaa hi ụwa. Ị ta ụma ala ịHọọ ịwẹ ayịreji lẹ, ị ye ọpyị nyaa kụ jaabwọ ka ala Isirẹlụ mwụ aluji nyaa hi ọpyị ọlẹ ká Amkpaa ya haa lẹlẹ.)

¹³“Ọọwa, Amkpaa-à yẹkẹẹ, ‘Anụ yegiri kpoye nya Ọkpọọ nya ịSẹrẹdị mẹ.’ Ịnyị, ahị je kpoye nya ụwa lẹlẹ.

¹⁴O-bwu ẹnụ kahị yegiri bwu ịKadẹchị-ịbaniya gbee da wẹ ụka ọwẹ ri ẹka iwo ịta kụrụ ineku gbẹgbịlẹ. Ụka ọọwa, ikolobya ị-dẹwụ myị iloyi ọwẹ wuu gbu jaabwọ ká Amkpaa ya nyị ka la.

¹⁵Amkpaa yaa ụhị gbee kịịwa wuu gbu hi ẹpwụ nyahị.

¹⁶“Ụka ká ọng myị ọng nya ikolobya ịdẹwụ myị ịwẹ gbu kpá lẹ,

¹⁷Amkpaa-à byim yẹkẹẹ,

¹⁸‘Alẹ ọlẹ, anụ ka jẹ bwu epweji nya Aarị kpoye nya ọpyị nya ala iMowabụ.

¹⁹Ọọwa, anụ ka jẹ hi ala Amọn anyị ịtụma nya ịLọtụ hwehwehwe lẹlẹ. Anụ bẹ ẹnẹẹla nyaa lee ọ-dẹwụ taa koo. Ḿ ka hu ọpyị ọhẹ-lọhẹ ọlẹ kam ya haa tịrẹkpẹ hanụ kpong-kpong ka.’ ” (

²⁰Ị kaa wụrụ ẹgẹwẹ ọpyị nya ala iRefa, chajị ala iRefa à kụ ụwa ene-ene lẹ. Ma, ala Amọn ayịdang tị kaa wụrwaa ala ịSamsum.

²¹Ị luhye gọng-gọng lala ala Anakị. ị ri ịmaga ri, ị ju iru ju. Ma, Amkpaa taa ayịreji lẹ, ala Amọn à wẹ kaka ye ọpyị nyaa kụ lẹlẹ.

²²Amkpaa họ ịwẹ-ịwẹ ha ala Ẹdọm anyị ịtụma nya Ịsọ ịlẹ kị kụ Ẹdọm ịnyịnyị. Ọ ta ala ịHọọ ayịreji lẹ, anyị ịtụma nya Ịsọ à wẹ kaka ye ọpyị nyaa kụ lẹlẹ. Ị kụ ụwa daalẹ wẹẹ.

²³Ịnyịnyị ọ la ẹ-ẹga nya ala Avi ịlẹ kị nọ ẹpwa gbee ju ka ịGasa lẹ. Ala ịKafụtọ bwu iKiriiti warị kaka taa ayịreji lẹ, ị ye ọpyị nyaa kụ lẹlẹ.)

²⁴“Ọọwa lẹ, Amkpaa-à byihi yẹkẹẹ, ‘Anụ yegiri kpoye nya ọ̀bá nya Anọn mẹ. M̀ ya iSihọn Adịrahụ nya ala Amọ tụ ọpyị nyamwụ wuu lẹpwụ-lẹpwụ junu ụ-ụbwọ lẹ. Anụ mwẹla tọọ, kanụ dọmwụ nyọka noo ọpyị kụ mẹ.

²⁵Bwu alẹ ọlẹ kịlahị, m̀ ka họ ka alụma ọnyị myị ọnyị e-ekpeleji nya ẹnụ ka ju uhi nyanụ. Ụka myị ụka kị wo ẹla chajị nyanụ, ị ka ju uhi ọtụka-ọtụka juwa hụ́ kpakpakpa.’

²⁶“Ọọwa, m̄ du angịhyẹ ẹrụ nya okpunyi bwu ugbileji nya iKedemotu kaka byi iSihọn Adịrahụ nya ịHẹchịbọn yẹkẹẹ,

²⁷‘Hi iwe hahị kahị chịpwụrụ kam bwu ọpyị nyang chẹẹ mẹ. Ụgbẹyị kem ahị ka tụda kam lẹ. Áhị ka yẹgẹmwụ ka ẹga ọkịla kpong-kpong ka.

²⁸Ahị ka ra ang myị ang kahị ka ri bala enyi ọlẹ kahị ka nwa lokpoko bwu ẹga nyanụ. Ọkẹnẹ-kẹnẹ ri hi iwe hahị kahị chịpwụrụ kam̀,

²⁹kahị jẹ gbee kahị ka kpoye nya Ihu ịJọdan pwụ ọpyị ọlẹ ká Amkpaa Ohe Oluhye nyahị wẹẹ ya hahị mẹ. Anyị ịtụma nya Ịsọ ịlẹ kị kụ Ẹdọm bala ala iMowabụ ịlẹ kị kụ epweji nya Aarị ya iwe da ahị chịpwụrụ bwu egeji nyaa ịwa.’

³⁰“Ma iSihọn Adịrahụ á myị ahị nyị bwu ọpyị nyamwụ ka. Amkpaa Ohe Oluhye nyanụ họ kọ la egbeju-ọngịrị bala ọkịlẹtụ ochori chajị kọ ka yọọ junu ẹ-ẹpwụtụbwọ lọpyị-lọpyị nyamwụ ọlẹ kahị ku lee daalẹ.

³¹“Ọọwa, Amkpaa-à byim yẹkẹẹ, ‘Aa yẹ mẹ, m̀ dọmwụ nyọka ya iSihọn Adịrahụ bala ọpyị nyamwụ junu ẹ-ẹpwụtụbwọ lẹ. Anụ dọmwụ nyọka ye ọpyị nyamwụ la, kanụ kụu ụwa mẹ.’

³²“Ịnyị, iSihọn Adịrahụ bala angịdẹwụ nyamwụ à kpehe warị kaka dẹwụ tahị ụ-ụwa e-epweji nya ịJahasị lẹlẹ.

³³Amkpaa Ohe Oluhye nyahị tị yọọ juhi ụ-ụbwọ. Ahị nwọọ bala anyị alẹng nyamwụ bala angịdẹwụ nyamwụ wuu.

³⁴Ụka ọọwa, ahị nu epweji nyamwụ ọnyị myị ọnyị la bala ọ-taa ayịreji gbang-gbang. Ahị nwụ alẹng bala anyang bala anjwo ichiche ịlụwa wuu. Áhị pẹhi ọngọgohe lahị-lahị ka.

³⁵Ịna bala ang ịlẹ kahị go bwu epweji nyaa ahị kpa rụ kaka la lẹlẹ.

³⁶Amkpaa Ohe Oluhye nyahị họ kahị kụrụ epweji i-bwu Aroyẹẹ ọlẹ kọ kụ ọ-ọnụ nya Ọkpọọ nya Anọn bala o-bwu epweji ọlọkpọọ ayịdang lalaala ka ju ka iGiliyadị. Epweji ọhẹ-lọhẹ nyaa-á la ọngịrị kilaahị kila ka.

³⁷Ma, áhị tị jẹ pwụ ọpyị nya ala Amọn lee ọnụ nya Ihu ịJabọkụ lee epweji ịlịgbọdọ bala ẹga ịkịla ịhyẹ ka chajị Amkpaa Ohe Oluhye nyahị byihi ahị nyị kele ka.