Read idege Ehile Ọmada 20 Bible Online

Ehile Ọmada 20 - idege bible

Ehile Ọmada 20

¹“Ụka kanụ hu nya ẹwụ yahị da aluji nyanụ, kanụ yẹ ang ịrụnyẹ ị-kpa dẹwụ bala anyịrẹ nya ẹwụ tụ alẹwụ i-ju iru gụụnụ, ānụ ju uhi nyaa koo. Amkpaa Ohe Oluhye nyanụ ọlẹ kọ gbanụ kpehe bwu Ijipiti ka juwa tanụ.

²Ene kanụ ka wuleji nya ẹwụ, ọngọkiliya ka warị kaka ya ẹla ta angịdẹwụ yẹkẹẹ,

³‘Anụ ala Isirẹlụ, anụ wo mẹ! Anụ wẹẹ kele ka ẹwụ alẹ-ẹ̀ wẹẹ, ānụ ju uhi dapwụ hụ amẹ lee ọkịlẹtụ ā kpụnụ enyi ọọ-la aluji nyanụ koo.

⁴Amkpaa Ohe Oluhye nyanụ juwa baanụ kele. Ọ ka ji oye nyanụ kọ ka ya ọkụrụ-kụrụ hanụ.’

⁵“Ọọwa, alegbeju nya angịdẹwụ à ka ya ẹla ta angịdẹwụ ịnyịnyị lẹ, ị ka byaa yẹkẹẹ, ‘Ọngọhẹ nyanụ juwa kọ nwụ ẹpwa onyeewe kpanjẹ la ọraabwọ jwoo lẹka le? Ó-ri ịnyị aalẹ, ọngọọwa ā rụ tịrẹkpẹ ka ẹpwa mẹ. Ó-ri ịnyị ka, ẹwụ-ụ́ ryoo, ọngọkịla ka dachichi raabwọ ju ẹpwa ọlẹ kọ nwụ.

⁶Ọngọhẹ nyanụ juwa kọ wu ẹrụ nya alakọnụ, kọ tị kpa ugbe nya ọhẹ-lọhẹ nyaa kọnụ lẹka-á? Ó-ri ịnyị aalẹ, ọngọọwa ā rụ tịrẹkpẹ ka ẹpwa mẹ. Ó-ri ịnyị ka, ẹwụ-ụ́ ryoo, ọngọkịla ka dachichi chị ọkẹkẹnị ju egbe nyamwụ lẹ.

⁷Ọngọhẹ nyanụ juwa kọ go ang nya ahụ hi ọ-ka yeye-é? Ó-ri ịnyị aalẹ, ọngọọwa ā rụ tịrẹkpẹ ka ẹpwa mẹ. Ó-ri ịnyị ka, ẹwụ-ụ́ ryoo, ọngọkịla ka dachichi ya ahụ ọlẹ kọ go ang nyamwụ-ụ̀ wẹ ye.’

⁸“Alegbeju nya angịdẹwụ ka myịmyị-ị̀ towo yẹkẹẹ, ‘Ọngọhẹ nyanụ juwa kọ kpa igbeene a-abwabwọ lee o-ju uhi-í? Ó-ri ịnyị aalẹ, ọngọọwa ā rụ tịrẹkpẹ ka ẹpwa mẹ. Ó-ri ịnyị ka, ọ ka gu enyi nya uhi ju angịdẹwụ ịkịla ọ-ọmwụ.’

⁹Ụka ká alegbeju nya angịdẹwụ-ụ́ ya ẹla ta angịdẹwụ kpá, ị chụ angị ka ri alegbeju kpẹhị rịrị ebwo ọnyọnyọọnyị mẹ.

¹⁰“Ụka kanụ juwa ka dẹwụ ta epweji ọhẹ, anụ-ụ̀ ya iwe da ó-ri ká alụwa-á ka myị ọnụ nya ọ-họ okpunyi.

¹¹Ó-ri kị myị ọnụ, kị ya ụpwụ-ụtụ wụ ịnawụ[3] nyaa aalẹ, alụwa wuu ka yẹ kaka ri anyịhị nyanụ, kị ka họ ụkụrwọ nya igwabwọ ụma ọnyị myị ọnyị hanụ.

¹²Ọ́ tị ri kị myị ọnụ nyọka họ okpunyi ka, kị kụ nyọka danụ ẹwụ aalẹ, anụ chịkụ dagaga ju epweji ọọwa kanụ yaa dada mẹ.

¹³Ụka ká Amkpaa Ohe Oluhye nyanụ-ụ́ họ kanụ kụrwaa lẹ, anụ nwụ ọlẹng ọnyị myị ọnyị ọlụwa mẹ.

¹⁴Anyang bala anjwo ichiche bala iyo ileji tụ ang myị ang ịkịla ịlụwa tị lẹ, anụ ka gyaa kpa rụ nya ang-ẹwụ myị. Anụ ka ya ang myị ang nya aluji nyanụ la myị. Amkpaa Ohe Oluhye nyanụ à ya hanụ lẹ.

¹⁵Ịịwẹ anụ ka họ ẹ-ẹga nya epweji ịlẹ wuu kị kụ hwẹẹ hi ọpyị ọlẹ kanụ wẹẹ ka nọ ẹpwa lẹ.

¹⁶“Ịnya epweji ịlọpyị ọlẹ ká Amkpaa Ohe Oluhye nyanụ wẹẹ ya hanụ tị lẹ, anụ ka nwụ ang ọhịhị ọnyị myị ọnyị wuu kẹhị-kẹhị.

¹⁷Anụ ta ọng myị ọng wuu ayịreji gbanggbang. Ọngọngọhẹ nya ala iHiiti bala ala Amọ bala ala iKenan bala ala ịPẹrisi bala ala iHivi bala ala iJebusi ịwẹ ā hi lọhịhị koo jaabwọ ká Amkpaa danụ ehile nyị họ.

¹⁸Ó-ri kanụ taa ayịreji gbanggbang ka, ị ka kpanụ kaka họ ang onyobyi ba Amkpaa bwula ọ-họ ang ịtịpyọ ịlẹ wuu kịị họ lụka kị kaa kpụ ijiga nyaa.

¹⁹“Ụka kanụ yẹ epweji dada nyọka yeye, jaabwọ myị abwọ ká ẹwụ ọọwa-á tata ka ba, ānụ tụrụ ekeji ịlụwa hụrụ koo. Anụ ka hya egbe nyaa ri myị, ānụ tị tụrwaa koo. Eekeji à ri aluji nyanụ kanụ ka kpẹla taa koo.

²⁰Ekeji ịkịla ịlẹ kị ri ị-nwụ egbe ka tị lẹ, anụ ka tụrwaa kpa họ ọchọọnyẹ bala ẹkpa ịlẹ kanụ ka dayị rịrị kpa kpụ uhye nya egwalọ nya epweji gbee kanụ ka kụrụ epweji ọọwa myị.”