Read idege Ehile Ọmada 21 Bible Online

Ehile Ọmada 21 - idege bible

Ehile Ọmada 21

¹Ụka ọhẹ, iMosisi byị ala Isirẹlụ yẹkẹẹ, “Ọhẹka anụ ka yẹ ogu nya ọngịnyị dụwa pátaa a-ababayịreji ọ-ọpyị ọlẹ ká Amkpaa Ohe Oluhye nyanụ wẹẹ ya hanụ, la ọ-jẹ ọngọ nwọọ-ọ nwụ ka myị.

²Ó-ri kọ lịnyị, alegbeju bala angịleje nyanụ ka me eji ori kị ka jẹ epweji ọlẹ kọ ju ẹga ká ogu ọwẹ da chwẹẹ gụ wuu.

³Ụka ọọwa, alegbeju nya ẹpweji ọọwa ka wu ụgba nya ẹna ọlẹ kị kpa wu ẹrụ ẹnẹnẹhẹ lẹka.

⁴Ị ka kpọọ kele ka ọkpọọ ọhẹ ọlẹ kị wu ẹrụ ụ-ụwa lee ọ-tọọ ang ka ká ọ̀bá ọlẹ kọọ mwụ ụka wuu ji. Ị́ họ lẹ, ị mwụ ẹna ọọwa ido ụ-ụwa mẹ.

⁵Angịkiliya anyị nya iLivayị ka kele ịnyịnyị, chajị ịwa-à ka kpa ọnụ chị eje nya owolawụlẹ-ka bala ẹla nya abwẹga ọhọhọ ọnyị myị ọnyị lẹ. Amkpaa Ohe Oluhye nyanụ chwaa kị ka myị ẹrụ họọ bala ọ-ka wahị kụrụ alụma lẹnyị nyamwụ.

⁶Alegbeju nya epweji ọlẹ kọ ju ẹga kị yẹ ogu nya ọngọlẹ kị nwụ-ụ̀ wẹ chwẹẹ gụgụ wuu ka tọ abwọ nya chị ụgba nya ẹna ọlẹ kị mwụ ido nyamwụ-ụ̀ wẹ lẹ,

⁷ị ka ya nyị ịlẹhị-ịlẹhị yẹkẹẹ, ‘Ụbwọ-lẹta nyahị-ị́ juwa ẹ-ẹpwụ nya igu nya ọngọlẹ ka, áhị tị jẹ ọngọ họ ẹlẹwẹ koo.

⁸Lẹẹlẹ, Amkpaa ee, hịnyọhiihi ahị angịnyị nyang ịlẹ ká gba kpehe bwu Ijipiti mẹ. Ā ya abyị nya igu ọngọ da ẹla-ka ọlẹ nịrọọhị koo.’ Aalẹ, ị ka gbocho hi abyị oluhye nya igu nya ọngọọwa lẹlẹ.

⁹Ánụ họ kpẹẹkpẹẹ jaabwọ ká Amkpaa tịtọ lẹ, anụ ka gba ịlọnụ kpehe hi ẹpwụ abyi ọlala chajị nya igu nya ọngọọwa lẹlẹ.

¹⁰“Ụka kanụ ka ẹwụ, ká Amkpaa Ohe Oluhye nyanụ-ụ́ họ kanụ kụrụ kpụ kanụ go angịnyị kpa nyà lala alagba,

¹¹ọ chịkpẹẹ ká ọngọhẹ nyanụ ka yẹ ọnyang ọlụhị nwuro-nwuro ọhẹ ọlẹ kọ ka họọ la oyeye myị.

¹²Ó-ri kọ lịnyị aalẹ, ọ ka kpọọ rụ ka ẹpwa ká ọnyang ọọwa ka pwọ inyi bala ọ-nwụ ego-akachụ nyamwụ.

¹³Ọnyang ọọwa ka pwọ ịwụrụ ịlẹ kọ kụrụ ụka kị woo bwu ẹwụ kọ ka go ịkịla kụrụ. Ọ ka hụ ẹ-ẹpwa nya ọlẹng ọwẹ juwa bida nya adamwụ bala ịnamwụ ọya lẹpwụ-lẹpwụ. Ụka kọ họ ọọwa kpá lẹ, ọlẹng ọwẹ à ka yoo nya ahụ lẹlẹ.

¹⁴Ụka ká ọlẹng ọọwa-á yoo kpá, ká ẹla nya ahụ nyamwụ-ụ́ họọ kaka, ọ ka pwa ahụ nyamwụ ọwẹ pẹhyoo rụ gịlála. Ọ ka ẹga nya ọnyang ọwẹ lala ahụ nyamwụ ene lẹ lẹ, ọ́ ka yọọ ra lee ọ kpọọ nmaanmaa lala ọnyọhị nya ịlọmwụ ka.

¹⁵“Ọlẹng ọhẹ ka ye ịhụ imiiye kpụ ọ hu ọngọhẹ nya ọnụ-ahụ myị. Ịwa wuu ka ma anyị alẹng họọ, ọhẹka ọnyị ọlẹng ọgbahị tị ri ọnyị nya ụchị-ahụ.

¹⁶Ó-ri ká ọlẹng ọọwa-á ka ga ang-ugu nyamwụ tọ ịlọmwụ a-ahị aalẹ, ọ́ ka họ ẹla oye-oye bwula o-hu ang-ugu nya ọnyị ọlẹng ọgbahị ha ọnyị nya ọnụ-ahụ kọọwa-à ri onjwo koo.

¹⁷Ọ ka ga ebwo ọ-mwụ aba ba opwoku ẹ-ẹpwụ nya ang ọlala nyamwụ ha ọnyị ọlẹng nya ọgbanyẹ nyamwụ, ọ ri ọnyị nya ụchị-ahụ ri kpá odu ịnyị.

¹⁸“Ọhẹka ọngọhẹ nyanụ ka ma ọnyị ọlẹng o-wo ẹla-ka bala ọ-la egbeju-ọngịrị ọlẹ kọ myị-ị̀ ju ihi nya adamwụ bala ịnamwụ ka, ịnọ ị tị kaa yalibyi lọọ.

¹⁹Ó-ri kọ lịnyị aalẹ, adamwụ anyị ka woo pyẹẹ kpọọ ka ịlahị nya alegbeju nya epweji ọ-ọnụ-ogirigba ẹga kịị hụ me ẹla.

²⁰Ọọwa, adamwụ anyị à ka byi alegbeju nya epweji yẹkẹẹ, ‘Anụ yẹ mẹ, ọnyị nyahị ọlẹ ri aruwoka. Ọ la egbeju-ọngịrị. Ọ́ myị-ị̀ ju ihi nyahị koo. Ọ́ ba ọọwẹ ka, ọọ họ úhwò họ, ene kọ ri ọngọ-ọ̀ nwa ere kpere nya ọdagbịlagada.’

²¹Ụka ọọwa lẹ, alẹng ilepweji ọwẹ wuu ā go ajwọ kị mịlọọ gbee kọ ka gbu kẹhị-kẹhị mẹ. Ánụ họ ịnyị lẹ, ang onyobyi ọhọhọ à ka yịlẹ bwu ẹpwarịrị nyanụ lẹlẹ. Ala Isirẹlụ wuu ka wo jaabwọ kị yẹ ọlẹng ọwẹ akama. Ọọwa, ị ka ju uhi lẹlẹ.

²²“Ó-ri ká eje nya igu-ú wu ọngịnyị chajị nya ang onyobyi ọlẹ kọ họ, kị nwọọ, hu ogu nyamwụ pịlẹ o-okoji,

²³ānụ pẹhi ogu nyamwụ pịlẹ ụ-ụwa lodu gbe ụtụrụ koo. Ẹnụ alẹ-alẹ ọlẹ kị nwọọ anụ ka jwoo eji lẹ, chajị ọng myị ọng ọlẹ kị nwụ pịlẹ o-okoji aalẹ, ọlọ nya Ohe Oluhye wu ọngọọwa.