Read idege Ehile Ọmada 22 Bible Online

Ehile Ọmada 22 - idege bible

Ehile Ọmada 22

¹“Ó-ri ká yẹ ẹna lee ọkpịlọ nya ọngịnyị ọọnang kọ juwa rụ hwahị, ā gu ahị gboo hyoo ka. Woo pyẹẹ ká kpọọ kịlọọ.

²Ọngọlala ka kụ hwẹẹẹ hing myị lee á ka jẹ ayịdang nyamwụ kpangga ka myị. Ó-ri ịnyị aalẹ, kpọọ rụ ka ẹpwa nya ịlọng kaka bwọ eji gbee ká ayịdang ka tịtọ nyamwụ warị.

³Ịwẹ-ịwẹ ā ka họ ó-ri ka ye obyiyó lee awụrụ lee ịngịngịhyẹ nya ọla Isirẹlụ ọọnang ọlẹ kọ byi lẹ. Ā gu ahị gboo hyoo ka.

⁴“Ó-ri ká obyiyó lee ẹna nya ọla Isirẹlụ ọọnang-ńg keji mileji, ā gu ahị gboo hyoo rụ koo. Dọọ ụbwọ kọ wuloo eji dayị kọkọ.

⁵“Ọnyang-ńg ka kụrụ awụrụ nya ọlẹng ka, ọlẹng-ńg tị̀tị̀ ka kụrụ awụrụ nya ọnyang ka. Angị họ ang ịlịnyị họ ibyi ẹ-ẹga nya Amkpaa Ohe Oluhye nyanụ.

⁶“Á gba chị awụ nya ọchịnụ o-okoji lee ị-ịpyị ká yẹ ịnịna nya ọchịnụ kọ kụ eji lee ọ-pyẹ achwọ ke anyị nyamwụ ụ-ụwa, ā wu ịnịna lanyị-lanyị koo.

⁷À ka wu anyị myị, tị pẹhi ịnịna kọ rụ, chajị ká ka hị tata bala ang wuu ọ-ka há hang.

⁸“Ụka ká nwụ ẹpwang onyeewe ká ẹpwayịrẹtẹ nyamwụ-ụ́ la papịla aalẹ, a ka me ugbọọnụ nya ugulọ kọ ka kpíkpírí dagaga ju. Ó-ri ká họ ịnyị kpá, ká ọngọhẹ-ẹ́ chị abwọ bwu ụwa kaka gbu wẹẹ, ị́ tụtụm ka kpụng abyị nya ahụ o-ju ọmwụ-igu nya ọngọọwa kaka.

⁹“Ā tọ ụma nya ang-ẹrụ ọkịla jula alakọnụ ẹ-ẹrụ ookpokpo da ka. Á họ ịnyị lẹ aalẹ, à kpụhị lẹ. Á hya alakọnụ hya ri ka, á ka ya ang-ẹrụ ọkịla riri ka anyịnyị.

¹⁰“Ā ya ogbilo ju ẹna bala obyiyó wu awụlẹ kpa wu ẹrụ ka.

¹¹“Ā kụrụ awụrụ ọlẹ kị kpa egbii nya iyo bala ìwú dala awụlẹ kpa nụ̀ ka.

¹²“À ka ga owu do bwọ awụlẹ pịlẹ daaa u-ugbọọnụ ine-ine nya ịwụrụ ịlẹ ká ka kụrụ.

¹³“Ọhẹka ọngịnyị ka ye ahụ kpọọ ka ube kpá wuu, la ahụ nyamwụ gbọọ ịtịrọ kpụ

¹⁴ọ ka chị ẹla bọọ ya ahụ nyọwa nyị jẹ ọlẹng ene kịịwa nyị-ị̀ ye awụlẹ myị.

¹⁵“Ó-ri kọ lịnyị aalẹ, adịda bala ịnịna nya ọnyang ọọwa ka hu apwụ ọlẹ ká ọnyị nyaa nọ bala ọrụmwụ bá nune u-uhye nyamwụ kpa kịla alegbeju nya epweji lịwọ-lịwọ ọlẹ oluhye nyamwụ. Ị ka ya mẹjaa nya ang-ẹjẹẹ nyori ọnyị nyaa-á jẹ ọlẹng ene kọọ rwọ ọrụ ka.

¹⁶Adịda nya ọnyang ọọwa ka byi alegbeju nya epweji yẹkẹẹ, ‘Anụ yẹ ẹla-à wẹ wẹẹ! M̀ ya ọnyị nyam ha ọlẹng ọlẹ ye. Ọọwa, ọ mwọọgịlẹ wẹẹ pwa ọnyị nyam,

¹⁷chị ẹla bọọ ododu ya nyị jẹ ọlẹng ene kọọwa nyị-ị̀ yoo lẹlẹ. Ang-ẹjẹẹ nyori ọnyị nyam-ḿ jẹ ọlẹng ene kọọ yoo ka à lẹẹ kam kpa warị lẹ.’ Ọọwa, ị ka pyẹ apwụ ọọwa maaa ị-ịlahị nya alegbeju nya epweji lẹlẹ.

¹⁸Ọọwa, alegbeju nya epweji à ka wu ọrụ ọnyang ọwẹ kị ka nyoo enyiri lẹlẹ.

¹⁹Ị ka chọọ ijwo lokpoko onyoowuru ohu (100) kọ ka nwụ̀ ha adamwụ-ẹpwa, chajị nyọlẹ kọ chị oyoyi ju onjwo ịyang nya ala Isirẹlụ. Ọ́ ba ọọwẹ ka, ọnyang ọwẹ ka ri ahụ nyamwụ pyịyọọ. Ọ́ ka jẹ-ẹ̀ pwọọ ẹnẹnẹhẹ kaka gbee kọ ka gbu.

²⁰“Ọhẹka ẹlẹwẹ ká ọlẹng ọwẹ chị bọọ ri nya ịlẹhị kpụ ị́ ye ang-ẹjẹẹ nyori ọnyang ọwẹ ri onjwo ịyang lụka kọ rwọ ọrụ ka myị.

²¹Ó-ri kọ lịnyị aalẹ, alegbeju ka kpa ọnyang ọwẹ kele ka ọnang nya ẹpwa nya adamwụ. Ọọwa, alẹng ilepweji ọọwa-à ka da ajwọ nwọọ ụ-ụwa lẹlẹ. Ang oloyoyi ọtụka à wẹ kọ họ ẹ-ẹpwụ nya alịnyahị nyọlẹ kọ myị ọlẹng ka ẹga nyamwụ ụka kọ juwa ẹ-ẹpwa nya adamwụ ene kọọ rwọ ọrụ lẹ. Ụgbẹyị ọlịịwẹ anụ ka bwu da ẹjwọ ku ang onyobyi ọlịnyị rụ hi ịlọnụ lẹ.

²²“Ó-ri kị wu ọlẹng kọ juwa họ ụya ta ahụ nya ọngọkịla aalẹ, ị ka nwụ ọlẹng ọọwa tụ ọnyang ọlẹ kị họ ụya ta. Ụgbẹyị ọlịịwẹ anụ ka bwu da ẹjwọ ku ang onyobyi ọlịnyị rụ hi Isirẹlụ lẹ.

²³“Ọhẹka ị ka wu ọlẹng ọhẹ e-epweji ọhẹ kọ juwa chị onjwo ịyang ọlẹ kị ya ẹla nyamwụ nya oyeye lẹ beji myị.

²⁴Ó-ri kọ lịnyị aalẹ, anụ ka gbaa ịwa angị imimiiye kpehe ka ọnụ-ogirigba nya epweji ọọwa kanụ ka da ajwọ nwaa. Abyị ọlẹ ká ọnyang la ri ọ́ chị eko wụrụ angịnyị nyị kẹwẹ kaka dọwa ụbwọ ka. Ịnya ọlẹng lẹ, ị ka nwọọ chajị ọ bịrị ahụ nya ọngọkịla. Ụgbẹyị ọlịịwẹ anụ ka bwu da ẹjwọ ku ang onyobyi ọlịnyị rụ hi Isirẹlụ lẹ.

²⁵“Ọ́ tị ri ẹrụ lee ẹgẹhẹ hwẹẹẹ hi epweji ká ọlẹng ọọwa-á chị onjwo ịyang ọwẹ beji aalẹ, ọlẹng ụbwọọmwụ kem ị ka nwụ lẹ.

²⁶Ānụ họ ọnyang ọwẹ ịngịngịhyẹ koo, chajị ọ́ họ ang onyobyi ọhẹ ọlẹ kọ ka kpụ igu họọ ka. Ẹlẹwẹ la jaabwọ ká ọngọhẹ ka kụ ịnya gbe ọngọkịla, gba mịlọọ nmoo, nwọọ ju ka ịpyị.

²⁷Ẹ-ẹpwamẹ ọlẹng ọọwa-à chị ọnyang ọwẹ beji lẹ. Ịnọ ọ chị eko chị kpá, ọngọngọhẹ-ẹ́ tị ji ọnaabwọ ri olewe nyamwụ kaka.

²⁸“Ọhẹka ọlẹng ọhẹ ka wu onjwo ịyang ọlẹ kị ya ẹla nyamwụ lẹka chị beji myị. Ó-ri kị woo aalẹ,

²⁹ọ ka go ang nya ọnyang ọwẹ lokpoko onyoowuru iwo ịrụ ha adamwụ. Ọọwa, ọ ka ri ahụ nyamwụ lẹlẹ. Ọ ka yoo pyịị chajị ọwa-à bịrị ọnyang ọwẹ lẹ. Ọ́ tị ka jẹ-ẹ̀ pwoo ẹnẹnẹhẹ kaka gbee kọ ka gbu.

³⁰“Ọngọngọhẹ ā doru kịla ahụ nya adamwụ koo. Ọọwa ka ri ẹpẹpẹ o-hu ju adamwụ.