Read idege Ehile Ọmada 23 Bible Online

Ehile Ọmada 23 - idege bible

Ehile Ọmada 23

¹“Ọlẹng ọhẹ-lọhẹ kị ru ụ́gba lee ọ-chị alẹng nyamwụ eku aalẹ, ị ka be ọngọọwa deeji hi ẹpwụ nya angịnyị nya Amkpaa.

²“Angịlẹ wuu kị ma e-eji lee anyị ịtụma nyaa kpá gbee ju ka oyi okiriwo-ó ka ri alẹpwụ nya angịnyị nya Amkpaa ka.

³“Ị́ ka wa ọla Amọn lee ọla iMowabụ ọhẹ-lọhẹ tụ anyị ịtụma nyaa kpá gbee ju ka oyi okiriwo jula angịnyị nya Amkpaa ka.

⁴Ị pwa ọ-ya ang oriri bala enyi ọnwanwa hanụ ụka kanụ lẹẹ jẹ kpehe bwu Ijipiti ugbeene. Ịwa-ịwa-à diro ịBẹlam ọnyị nya ịBẹyọọ bwu epweji nya ịPẹtoo i-iMesopotemiya warị kọ ka gọlọ junu lẹẹ ịnyịnyị lẹ.

⁵Amkpaa Ohe Oluhye nyanụ-ụ́ tị ke ụrụ la ịBẹlam ka. Ọ yẹ ọlọ ọlẹ ịnọ ká ịBẹlam ka ga junu la ahị ọwawa, chajị anụ há Amkpaa Ohe Oluhye nyanụ.

⁶Ẹ-ẹpwụ nya ọhịhị nyanụ wuu, ānụ da ala Amọn lee ala iMowabụ ịwẹ ụbwọ ụ-ụgbẹyị ọhẹ-lọhẹ ẹnẹnẹhẹ koo.

⁷“Ala Ẹdọm ā wụụnụ ẹjẹ koo, aananụ ị ri lẹ. Ala Ijipiti ā tị wụụnụ ẹjẹ ka ịnyịnyị, chajị anụ ri angga ọ-ọpyị nyaa ẹnẹhẹ lẹ.

⁸Anyị ịtụma iloyi ọhata nya ala Ijipiti bala ala Ẹdọm ịlẹpwụ nyanụ ka yẹ ri angịnyị nyanụ myị.

⁹“Ụka kanụ tụguru nyọka dẹwụ ta aluji nyanụ, anụ chị ịgọ hi ịngịngịhyẹ ọlẹ kọ ka kpa ibyi wẹ uhye nyanụ.

¹⁰Ọlẹng nyanụ ọnyị myị ọnyị kọ da ang ju ịlọmwụ u-une lodu aalẹ, ọngọọwa ka kpehe hi ịkampụ nyanụ ka ohwodehe kaka hụ ụ-ụwa.

¹¹Ụka nya ẹnụ-obyi, ọ ka hyo enyi cheri-cheri, kọ ka nyà tịrẹkpẹ wẹ ẹpwụ nya ịkampụ lụka nya ẹnụ o-hu ẹchị-ẹgbụ.

¹²“Anụ ka hu ẹgẹhẹ nọ o-ohwodehe nya ịkampụ nyanụ ẹga kanụ ka kpa ata kaka ju amẹ.

¹³Ọngọngọọng nyanụ ka kpa ang-abwọ lala ichu-ụlẹ ba ịlọmwụ. Ụka myị ụka kanụ ka ya ata ju amẹ, anụ ka wu ụjẹ, ya ụlẹ ọọwa chị ịpyị baa ụka kanụ họ kpá.

¹⁴Anụ ka kpa ịkampụ nyanụ charị-charị, chajị Amkpaa Ohe Oluhye nyanụ juwa ụ-ụwa tanụ nyọka họ kanụ ka kụrụ aluji nyanụ. Ānụ họ ang ochwiichwii ọhẹ-lọhẹ ọlẹ kọ ka du ká Amkpaa ka nyẹẹkpẹ danụ koo.

¹⁵“Ó-ri ká ọnyọhị-ị́ rụnyẹ hi ayịbamwụ kaka baanụ ba, ānụ gbọọ kpehe du tịrẹkpẹ kịla ayịbamwụ ka.

¹⁶Anụ bahyoo kọ kụ e-epweji nyanụ ọnyị myị ọnyị ọlẹ kọ họọ. Ānụ kpọọ nmaanmaa ka.

¹⁷“Ọlẹng lee ọnyang nya ala Isirẹlụ ọhẹ-lọhẹ ā ri ọlakpara ọlẹga kịị gbịgba koo.

¹⁸Ānụ kpa okpoko nya ọlẹng lee ọnyang ọlẹ kọ la bwula akpara ọhọhọ wẹ ẹpwa nya Amkpaa Ohe Oluhye nyanụ nyọka ya nwụ uri nya ọnụ ọmyịmyị ka, chajị alakpara wụ Amkpaa ẹjẹ.

¹⁹“Ụka kanụ ya okpoko lee ang oriri lee ịngịhyẹ ọkịla kpịla ọla Isirẹlụ ọọnanụ, ānụ byaa kị ya apyobwuna haju ọmwụ nya ang ọọwa koo.

²⁰Ó-ri ọngga, anụ ka ye apyobwuna ọhajụ u-uhye nya ang myị ang kanụ ya kpịlọọ myị. Ānụ tị họ ịnyị ẹ-ẹga nya ọla Isirẹlụ ọọnanụ ka. Ánụ ju ihi nya ehile ọwẹ aalẹ, Amkpaa Ohe Oluhye nyanụ ka wahị kụrụụnụ ẹ-ẹpwụ nya ang myị ọlẹ kanụ ka họ ọ-ọpyị ọlẹ kanụ wẹẹ kele kaka ye kụ.

²¹“Ụka kanụ nwa iro nya ịngịhyẹ ha Amkpaa Ohe Oluhye, ānụ họ atịmẹ nyọka họ ọnụ ọmyịmyị ọọwa jịra koo. Amkpaa ya ẹta chị ọnụ ọmyịmyị nyang ọwẹ beji lẹ, lẹ ọ ri ang onyobyi ó-ri ká myị họọ jịra ka.

²²Ọ́ tị ri ká myị ọnụ ọhẹ ha Amkpaa ka aalẹ, ọọwa-á ri ọhọbịrị abwọhẹ ka.

²³Ó-ri ká myị ọnụ nya ịngịhyẹ bwu ẹpwụ nya ọkịlẹtụ nyang lẹ aalẹ, à jẹ myị̀myị̀ ká họọ jịra mẹ.

²⁴“Ó-ri kanụ juwa chịpwụrụ bwu ẹpwụ nya ẹrụ nya alakọnụ nya ọngịnyị ọọnanụ, anụ ka hyà alakọnụ nyamwụ nẹ jaabwọ myị abwọ kọ ka nwanụ myị. Ānụ tị hyaa ju a-ang kpa rụ kpịlọ koo.

²⁵Ó-ri kanụ juwa chịpwụrụ bwu ẹpwụ nya ẹrụ nya igbi nya ọngịnyị ọọnanụ, anụ ka pwaa pwọ̀ọọ jaabwọ kanụ ka kpa ụbwọ pwọ kaka ba myị, ānụ ti kpa ẹma chị ju a-ang nyọka kpa rụ koo.