Read idege Ehile Ọmada 24 Bible Online

Ehile Ọmada 24 - idege bible

Ehile Ọmada 24

¹“Anụ tị́ jẹ lẹ, ó-ri ká ọngịnyị ye ahụ kpá, kọ tị tịtọ nya ahụ ọọwa kaka, chajị nyọlẹ kọ yẹ ịngịhyẹ ọ-chị jii u-uhye nyamwụ, ọ kaa da ụpwụ ọ-pwa ahụ. Ọ́ ya ụpwụ ọọwa họọ lẹ, ọọ byoo nyị rụ mẹ lẹlẹ.

²Ọhẹka, ọnyang ọwẹ ka rụ kaka rụrwọ ọlẹng ọkịla

³ọlẹ kọ tị̀tị̀ da ụpwụ pwọọ lee o-gbu hyoo myị.

⁴Ọ́ lịnyị aalẹ, ọrụ nya ọgbanyẹ ọlaanyị-ị́ ka jẹ-ẹ̀ tịrẹkpẹ hyaaa kaka ye ọnyang ọwẹ myịmyị kaka, chajị ọrụ onyeewe ọọwa ka ẹga nyamwụ ene lẹ. Ọ ka hu ọnyang ọwẹ nya olibyi. Awụlẹ ọ-ma ye ka wụ Amkpaa ẹjẹ. Ānụ kpa ang onyobyi ọhọhọ ọlịịwẹ wẹ ọpyị ọlẹ ká Amkpaa Ohe Oluhye nyanụ wẹẹ ya hanụ koo.

⁵“Ụka ká ọlẹng-ńg ye ahụ kpá bwaaa, ánụ ka chwọọ du kaka dẹwụ lee ọ-ya ụkụrwọ olugbọdọda họọ nyọka họhọ ịịwẹ ahyaahị ka gbee ẹ-ẹpwụ nya ẹka lẹpwụ-lẹpwụ. Anụ ka bahyoo hụ ẹ-ẹpwa kọ ka juwa tụ́ ịpẹpẹ hụ ahụ nyamwụ chẹẹ.

⁶“Ó-ri kanụ ya ang kpịla ọngịnyị, ānụ hu igo lee ọnyọdịyọ nya ọngọọwa nya ang ọ-ba ọkpa ku ọmwakpa nya ang ọlẹ kọ kpịlaanụ koo. Ánụ hụ igo ọ-kpa go ang oriri kpa hịrị ịlọmwụ lẹ aalẹ, anụ ya ọhịhị nyamwụ nọ apịlada lẹ.

⁷“Ọngọngọhẹ kọ wu ọla Isirẹlụ ọọnamwụ yi oyi, hwoo nya ọnyọhị nya ịlọmwụ lee ọ-yọọ ra aalẹ, ị ka nwụ ọngọọwa. Ịịwẹ anụ ka bwu da ẹjwọ ku ang onyobyi ọlịịwẹ hi ẹpwụ nya ịlọnụ lẹ.

⁸“Ẹ-ẹga nya ẹdụrụ olugba nya ịnyịrọ tị lẹ, anụ-ụ̀ họ kpẹẹkpẹẹ jaabwọ ká angịkiliya ala iLivayị ka byinu mẹ. Anụ ka ba ọmẹjẹ ịlẹ kam ya haa wuu jẹ kpẹẹkpẹẹ.

⁹Anụ tị́ kpịtịya nya ang ọlẹ ká Amkpaa Ohe Oluhye nyanụ họ iMiriyam ụka kanụ lẹẹ jẹ kpehe bwu Ijipiti.

¹⁰“Ụka kanụ ya ang kpịla ọọnanụ, ānụ bọọ ka ẹpwang nyọka hu ang ọlẹ kọ ka ya kunu unu wọnụ nya ang ọlẹ kanụ ya kpịlọọ ju ka.

¹¹Godayị rịrị odehe kọ hu ang ọọwa kpa wanụ lịlọmwụ.

¹²Ó-ri ká ọngọọwa-á ri ọlẹbyahị kpụ ká ang ọlẹ kọ ye hanụ kẹnẹ-kẹnẹ á ri awụrụ nyamwụ aalẹ, anụ kpọọ ụ-ụwa lodu gbe ụtụrụ koo.

¹³Anụ tịrị awụrụ ọọwa ẹkpẹ họ lụka nya ẹnụ o-hu ẹchị-ẹgbụ, chajị kọ ka jẹ-ẹ̀ ya kụrụ kpa nune. Ọọwa, ọhọhọ nyanụ ọwẹ à ka myọọ lẹhị lẹ, Amkpaa Ohe Oluhye nyanụ à tị̀tị̀ ka chị ọkẹkẹnị tang u-uhye nya ang ọnyịịla ọlẹ ká họ-ọ̀ wẹ lẹlẹ.

¹⁴“Anụ họ ọlẹbyahị bala ọngọ la ọbaba ọlẹ kanụ diro kaka họ ụkụrwọ ri ẹ-ẹpwụ nya uri ọlẹ kọ chịla kanụ ka nwụ̀ koo. Ọngọọwa-á ri ọla Isirẹlụ lee ọngga ọlẹ kọ kụ ịnyanụ wẹwẹ,

¹⁵anụ nwọọ uri nyamwụ ene ká ẹnụ ka hu ẹchị-ẹgbụ, chajị ọ ri ọlẹbyahị lẹ, uri ọwẹ kẹnẹ-kẹnẹ ọ dakụ lẹlẹ. Ó-ri kanụ nwaa uri ka, ị ka chị eru ju Amkpaa. Ọhọhọ nyanụ ọọwa ka ri ang onyobyi ọhọhọ ẹ-ẹga nyamwụ.

¹⁶“Ánụ ka wu adịda nwụ chajị nya ang onyobyi ọhọhọ nya ọnyị nyamwụ lee o-wu ọnyị nwụ chajị nya ang onyobyi nya adamwụ koo. Ọngọng-ọngọng ka gbu u-uhye nya ang onyobyi nya ịlọmwụ.

¹⁷“Ānụ ya angga ịlọpyị nyanụ chị ẹkpẹ-ẹwụ ka. Ānụ tị ye awụrụ nya ahụ-ogu nya ang o-kunu gu ang ọlẹ kọ kpịla bwu ẹga nyanụ ka.

¹⁸Anụ tị́ kpịtịya, anụ ri anyịhị Ijipiti ene ká Amkpaa Ohe Oluhye nyanụ-ụ̀ gbanụ kpehe bwu ụwa. Ịnyị à du kam wẹẹ danụ ehile ịlẹ lẹ.

¹⁹“Ụka kanụ chị igbi nyanụ, kanụ ya ẹhị hwo ẹbwọ ọhẹ hwo tụụbwọ hyoo ẹ-ẹrụ lẹ aalẹ, ānụ tịrẹkpẹ kele nyọka hwoo kpa nyà kaka. Anụ pẹhi ọọwa dụwa ha angga bala anyị-egu bala ịhụ-egu, chajị ká Amkpaa Ohe Oluhye nyanụ ka wahị kụrụ ụkụrwọ ọnyị myị ọnyị ọlẹ kanụ juwa họ mẹ.

²⁰Ánụ chị olivu nyanụ ju a-ang kpá ụka ọhẹ lẹ, anụ tụtụm mwọọgịlẹ kele ụka oheeye kaka da ụmwọ nya ịlẹ kị hi kpéngkpèngkpéng kaka. Ihihi ịwẹ ri nya angga bala anyị-egu bala ịhụ-egu lẹ.

²¹Ánụ hyà alakọnụ nyanụ ju a-ang kpa ụka ọhẹ lẹ, anụ tụtụm mwọọgịlẹ kele ụka oheeye kaka da ụmwọ nya egbe nyaa ịlẹ kị hi kpéngkpèngkpéng kaka. Ihihi ịwẹ ri nya angga bala anyị-egu bala ịhụ-egu lẹ.

²²Anụ tị́ kpịtịya kanụ ri anyịhị Ijipiti ẹnẹhẹ lẹ. Ịnyị à du kam wẹẹ ya ehile ọwẹ hanụ lẹ.