Read idege Ehile Ọmada 25 Bible Online

Ehile Ọmada 25 - idege bible

Ehile Ọmada 25

¹“Ó-ri ká angị imiiye nya ala Isirẹlụ nyanụ-ụ́ ya ẹla ju awụlẹ, ị ka kpa ẹla ọọwa ịkọọtị ká angịleje ka chị eje ha ọngọ ri oku, kị ka ya eje wu ọngọ la abyị.

²Ó-ri ká akama ọlẹ kị ka yẹ ọngọ la abyị-ị́ ri enyiri onyinyi aalẹ, ọngọleje ka byoo kọ ka nọnọ yahị kụrụ eji kị ka nyoo chajị jwoo. Iru ojuju nya ọnụ-egbeji ịlẹ kị ka wọọ ka la jaabwọ ká ẹla ọlẹ kọ da tà atịra kaka ba.

³Ọnụ-egbiji iwo ine kem ị ka wọọ lẹ. Ọ́ ka kpoye nya ọọwa kaka. Ó-ri kọ gụ ọọwa, ọ ka ri oyi ọ-chị ju ọla Isirẹlụ ọọnanụ u-ugbọdọda.

⁴“Ānụ ya ang kụrụ ẹnụ ọ-ọnụ nyọka dọọ ang oriri yi ụka kọ juwa kpa ajẹ nya ang-ẹrụ ru koo.

⁵“Ó-ri ká anyịnịna alẹng imiiye-é kụ ẹga ookpokpo lawụlẹ, ká ọngọhẹ nyaa-á gbu la ọ-ma ọnyị ọlẹng ene ka aalẹ, ahụ-ogu ọwẹ-ẹ́ ka rụrwọ ọngọhẹ ka odehe hwẹẹ koo. Ọnyịnịna nya ogu oleji ọwẹ ka chị ahụ-ogu ọwẹ ida ye.

⁶Ọnyị ọlẹng nya ọgbanyẹ ọlẹ kị ka ma ka ri ọnyị nya ogu oleji nyọka wo ẹnyị-ehe nyamwụ, chajị ká ẹnyị nyamwụ-ụ́ ka byi hi Isirẹlụ ka.

⁷Ọ́ tị ri ká ọlẹng ọwẹ-ẹ́ tịtọ nyọka yoo ka aalẹ, ọnyang ọwẹ ka kele ka ẹga nya ịgabwọ ọ-ọnụ nya ogirigba nya epweji kọ ka byaa yẹkẹẹ, ‘Anụ yẹ mẹ, ọgọm-ḿ myị ọnụ nya ọ-wẹ ẹga nyam nyọka họ ẹla nya ọnyị ọlẹ kọ ka wo ẹnyị-ehe nya ọnyịnamwụ am̀ Isirẹlụ kaka.’

⁸Ọọwa, ịgabwọ à ka wụrụ ọlẹng ọwẹ kị ka ya ẹla tọọ lẹlẹ. Ó-ri kọ pwa ịnyịnyị nyi egbeju kile-kile nyọka nya ahụ-ogu nya ọnyịnamwụ aalẹ,

⁹ahụ-ogu nya ọnyịnamwụ ọwẹ ka jẹ tụ bọọ ị-ịlahị nya ịgabwọ nya epweji kọ ka pwọọ ẹta nya ugbẹtẹ ookpokpo bala ọ-chị ide hwọọ a-ahị. Ọọwa, ahụ-ogu à ka yẹkẹẹ, ‘Ang ọlẹ kị kaa ya họ ọlẹng ọlẹ kọ pwa ọ-ka họ ẹla nya ọnyị ọlẹ kọ ka wo ẹnyị-ehe nya ogu oleji ọnyịnamwụ à wẹ kam họng lẹ!’

¹⁰Bwu ụka ọwẹ kịlahị, ‘ị ka wụrụ ugbiyegu nya ọlẹng ọwẹ ugbiyegu nya ọngọlẹ kị pwọ ugbẹtẹ nyamwụ.’

¹¹“Ó-ri ká alẹng imiiye-é juwa ma uya, ká ahụ nya ọngọhẹ lẹpwụ nyaa-á wẹ kaka da ọrụmwụ ụbwọ bwula ọ-yụbwọ chị ọlẹng ọkịla ọlaanyị a-alẹng kịrẹkpẹẹ aalẹ,

¹²ānụ jujwo nya ọnyang ọlịnyị koo. Anụ chọọ ụbwọ eku.

¹³“Ānụ kpa ang ọ-kpa me ang ụma imiiye ọlẹ ká ọhẹ ka ri ọlahịchịng ká ọkịla ka ri ọhọ ọngịnyị ri ka.

¹⁴Ānụ kpa ome ọlam-ọlam bala ome ọ-jẹ ẹla me ang ị-ịnyanụ ka.

¹⁵Ang ị-kpa me ang ịlẹ kị ri ịlahịchịng ānụ ka kpa me ang ha angịnyị lẹ, chajị kanụ ka hị tata ọ-ọpyị ọlẹ ká Amkpaa Ohe Oluhye nyanụ wẹẹ ya hanụ mẹ.

¹⁶Anụ tị́ jẹ lẹ, angịlẹ kịị kpa ang ị-kpa me ang ị-jẹ ẹla họ angịnyị ri wụ Amkpaa ẹjẹ.

¹⁷“Ānụ deeri nya ang ọlẹ ká ala Amalẹkị họnụ ụka kanụ lẹẹ nyà bwu Ijipiti koo.

¹⁸Ị́ ju uhi nya Ohe Oluhye kpong-kpong ka. Ụka ká ịnyịrọ chịịnụ pyẹpyẹ, kanụ wẹẹ chị ẹpẹtẹkẹẹ ẹ-ẹpwụ nya ẹdịyẹ nyanụ, ị mwẹla tanụ bwu ẹkpẹ, kpụ ị go angịnyị nyanụ ịlẹ kị kpụ ịrwẹmbẹ juwa kpa ata gbileji wuu nwụ.

¹⁹Lẹẹlẹ, ụka ká Amkpaa Ohe Oluhye nyanụ-ụ́ ya ọpyị ọọwa hanụ kanụ kụ lokpunyi lụnụ ọhẹ-lọhẹ ọ-họnụ bwu ẹga nya aluji nyanụ ịdagaga junu kaka lẹ aalẹ, anụ ta ala Amalẹkị ayịreji gbanggbang, chajị ká ọngọngọhẹ ka hi wo ẹnyị-ehe nyaa odehe ọlẹ kaka mẹ. Ānụ deeri koo.