Read idege Ehile Ọmada 26 Bible Online

Ehile Ọmada 26 - idege bible

Ehile Ọmada 26

¹“Ụka kanụ pwụ ọpyị ọlẹ ká Amkpaa Ohe Oluhye nyanụ wẹẹ ya hanụ nya ang ọlala nyanụ kanụ kụ ụwa lẹ,

²ọngọngọọng nyanụ ā kpa ebwo ọhẹ nya ang-ẹrụ inyeewe ịlẹ kanụ ka kpa bwu ẹrụ nyanụ kele ka ẹga ká Amkpaa Ohe Oluhye nyanụ ka chụ nyọka gbịgba họọ mẹ.

³Ọng myị ọng ka kpa kele ka ẹga nya ọngọkiliya ọlẹ kọ kpa ụkụrwọ ụ-ụbwọ ụka ọọwa kọ ka byoo yẹkẹẹ, ‘M̀ kpa ọhaha ọlẹ warị nya ang ibeenu ha Amkpaa Ohe Oluhye nyahị nyori m̀ kpa ẹta nyam pwụ ọpyị ọlẹ kọ nwa iro ha adahị igogo anyị nyọka ya hahị lẹ.’

⁴“Ọngọkiliya-à ka ye udo bwu ụbwọ nya ọngọọwa kpa ka rịrị ị-ịlahị nya ogidi nya Amkpaa Ohe Oluhye nyanụ lẹlẹ.

⁵Ọọwa, ọngọọwa-à ka ya i-ijata nya Amkpaa yẹkẹẹ, ‘Adam ogogo ri ọngọ la edawụ ka—ọla Aram kọ rụ kele kaka kụ Ijipiti lugbiyegu-ugbiyegu nyamwụ. Ị la wure-wure ụka kị kele, Ị tị pyẹ kaka ri ẹpwụma ọtụka, bala ọ-la ọngịrị.

⁶Ala Ijipiti yẹhị ụhị, yẹẹhị la anyịhị, kpahị họ ụkụrwọ ọnyọọngịrị.

⁷Ahị chị eko bịlẹ ụbwọ ọdada bwu ẹga nya Amkpaa Ohe Oluhye nyahị. Ọ wo lahị, ọ yẹ ichi bala uhila nya akama bala ẹpwụ nya ọtụpyịpyị ọlẹ kahị ji.

⁸Ọọwa, Amkpaa-à gbahị kpehe bwu Ijipiti lụbwọ ọnyọọngịrị bala ọngịrị ọtụka nyamwụ. Ọ họ ụkụrwọ ịlẹbyẹbyị iluhi-uhi bala ang-ẹjẹẹ i-wu ejiri.

⁹Ọ kpahị wẹ ẹgẹlẹ, ya ọpyị o-ju eyo bala ọ-há ang ẹlẹ hahị.

¹⁰Lẹẹlẹ, m̀ kpa ebwo nya ang inyeewe wẹ Amkpaa bwu ẹpwụ nya ang-ẹrụ ịlẹ kọ ya ham lẹ.’ “Ụka kọ ya ala ịwẹ kpá wuu lẹ, ọ ya udo ọọwa rịrị ị-ịlahị nya Amkpaa, kọ hirikpẹẹ gbịgba họọ ụ-ụwa mẹ.

¹¹Ụka kanụ họ ịnyị kpá lẹ, anụ la ọhụhụ, ri ang nya ọkẹkẹnị chajị nya ang-ẹrụ ịnyịịla ịlẹ ká Amkpaa ya hanụ-ụ̀ wẹ mẹ. Anụ-ụ̀ wụrụ ala iLivayị bala angga ịlẹ kị kụ tanụ kaka la ọhụhụ ọọwa tanụ mẹ.

¹²“Ẹ-ẹpwụ nya ẹka ọhata ọnyị myị ọnyị anụ ka hu ebwo ookpokpo ẹ-ẹpwụ nya iwo nọ nya ọhaha ọdatị-datị. Anụ ya ọhaha ọọwa ha ala iLivayị bala angga bala anyị-egu bala ịhụ-egu, chajị kịịwa tị̀tị̀ ka ye ang ri wu ẹpwụ e-epweji nyanụ ọnyị myị ọnyị.

¹³Ọọwa lẹ, kanụ ya dodehe ẹ-ẹga nya Amkpaa ịịlẹ mẹ, ‘M̀ hu ang ookpokpo ẹ-ẹpwụ nya iwo ọlẹ kọ ri ọhaha ọlịgọgọ ha ala iLivayị bala angga bala anyị-egu bala ịhụ-egu jaabwọ ká dam ehile lẹ. Ḿ bịrị ehile nyang lee ọ-pẹhi ọhẹ deeji la ọkpakpa kaka.

¹⁴Ḿ hu ụpịlẹ nya ọhaha ọwẹ ri ụka kam ji ẹpwụ nya ida ọbaba lee o-hu ọhẹ nyamwụ kpa kpehe bwu ẹpwa nyam ụka kam ji libyi ka. Ḿ tị ya ụpịlẹ nyamwụ kịla iya ha egu ileji ka. Amkpaa, m̀ ju ihi nyang kpẹẹkpẹẹ kpụ m̄ họ ang myị ang ịlẹ ká da ehile nyị họ ẹ-ẹga nya ọhaha ọwẹ lẹ.

¹⁵Lẹẹlẹ, chẹhị weji bwu ẹpwa ọlịgọgọ nyang olepwoohe ka wahị kụrụ ala Isirẹlụ angịnyị nyang mẹ. Wahị kụrụ ọpyị o-ju eyo bala ọ-há ang ọlẹ ká ya hahị jaabwọ ká nwa iro nyamwụ ha adahị igogo anyị ịnyịnyị mẹ.’

¹⁶“Alẹ oleeri ọlẹ Amkpaa jam danụ ehile kanụ ka ju ihi nya ehile bala ọmẹjẹ ịwẹ wuu. Lẹẹlẹ, anụ ju ihi nyaa kpẹẹkpẹẹ bwu ẹpwụ nya ọkịlẹtụ nyanụ wuu mẹ.

¹⁷Anụ lịlọnụ ya dodehe wẹ alẹ ya Amkpaa nyaa ri Ohe Oluhye nyịwa lẹ. Anụ myị ọnụ nyọka ju ihi nyamwụ bala ọ-ka ba ehile bala ọmẹjẹ nyamwụ wuu jẹ kpẹẹkpẹẹ.

¹⁸Amkpaa tị̀tị̀ ya dodehe alẹ ịnyịnyị ya anụ nyị ri angịnyị ịlahịchịng nyọwa lẹ. Ọ tị ya anụ nyị kpa ehile nyọwa wuu.

¹⁹Ọ ya ịnyịnyị ya ọwa nyị ka họ kaanụ nyị ka lụmẹ gụ ẹpwụma ọkịla ọhẹ-lọhẹ ọlẹ kọọwa nyị họ. Anyị nyị ka lehe bala o-lihi bala angịnyị ọ-ka mịla oja ọnyịịla nyanụ bala anụ ọ-ka ri ẹpwụma nya ịlọmwụ lụbwọ-lẹta jaabwọ kọ myị ọnụ.”