Read idege Ehile Ọmada 27 Bible Online

Ehile Ọmada 27 - idege bible

Ehile Ọmada 27

¹Ụka ọọwa, iMosisi bala alegbeju nya ala Isirẹlụ da angịnyị ehile yẹkẹẹ, “Anụ-ụ̀ kpa ehile ịlẹ kam wẹẹ ya hanụ wuu alẹ mẹ.

²Ụka kanụ kpoye nya Ihu ịJọdan pwụ ọpyị ọlẹ ká Amkpaa Ohe Oluhye nyanụ wẹẹ ya hanụ kpá, anụ ka ya ajwọ ịtụka ịhyẹ yeji kanụ ka kwaa hịla-hịla lọpyị jaabwọ kịị du ube.

³Ọọwa lẹ, kanụ da ehile bala ọmẹjẹ ịlẹ wuu ba ajwọ ịịwa mẹ. Anụ tụbwọọ ka kpoye nya ihu ju ka ọpyị o-ju eyo bala ọ-há ang ọlẹ ká Amkpaa Ohe Oluhye nya adanụ igogo anyị wẹẹ ya hanụ jaabwọ kọ myị ọnụ hanụ lẹ.

⁴Ụka kanụ kpoye koye ọlaanyị nya Ihu ịJọdan lẹ, anụ ya ajwọ ịịwa yeji ọ-Ọgbọdọ nya Ebalụ jaabwọ kam wẹẹ danụ ehile alẹ, kanụ kwaa hịla-hịla jaabwọ kịị du ube mẹ.

⁵Anụ ka kpa ajwọ me ogidi ha Amkpaa Ohe Oluhye nyanụ ẹ-ẹgẹwẹ ịnyịnyị. Ajwọ ịlẹ ká ọngọngọhẹ-ẹ́ bebe ka anụ ka kpa lẹ.

⁶Ajwọ ịlẹ kanụ ka gbagba la o-baa be ka kem ānụ ka kpa me ogidi nya Amkpaa Ohe Oluhye nyanụ lẹ. U-uhye nya ogidi ọwẹ anụ ka kịla iya ị-rụ ila nyanụ ha Amkpaa Ohe Oluhye nyanụ lẹ.

⁷Anụ ka kịla iya nya ọhọlawụlẹ nyanụ ụ-ụwa ịnyịnyị kanụ la ọhụhụ nya ọkẹkẹnị ị-ịlahị nya Amkpaa Ohe Oluhye nyanụ.

⁸Anụ ka da ẹchẹ nya ehile nya Ohe Oluhye ọnyị myị ọnyị ba ajwọ ịlẹ kị kwo hịla-hịla-à wẹ gede-gede.”

⁹Ọọwa, iMosisi bala angịkiliya ala iLivayị à byi ala Isirẹlụ yẹkẹẹ, “Anụ ala Isirẹlụ ee, anụ ba táaa kanụ wo yẹẹyẹẹ mẹ! Alẹ oleeri ọlẹ, anụ ri angịnyị nya Amkpaa Ohe Oluhye nyanụ lẹ.

¹⁰Lẹ, anụ ju ihi nyamwụ kanụ kpa ehile nyamwụ ịlẹ wuu kam wẹẹ ya hanụ alẹ mẹ.”

¹¹Ẹnẹwẹ-ẹnẹwẹ, iMosisi da angịnyị ehile yẹkẹẹ,

¹²“Ụka kanụ kpoye nya Ihu ịJọdan kpá ala imwawụ nya iSimyọn bala ịnya iLivayị bala iJuda bala Isakaa bala ịnya iJosẹfụ bala ịnya iBenjamịn ka godayị ọ-Ọgbọdọ nya iGesirim kị ka wahị kụrụ alụma.

¹³Alimwawụ nya iRubẹn bala ịnya ịGadị bala ịnya Achẹẹ bala ịnya iSebulọn bala ịnya ịDan bala ịNafụtali ka godayị ọ-Ọgbọdọ nya Ebalụ kị ka ya ọlọ ọgaga nya Amkpaa dodehe ịnyịnyị.

¹⁴“Ala iLivayị ka ya ẹla dodehe gboo je ala Isirẹlụ yẹkẹẹ,

¹⁵“ ‘Ọlọ nya Ohe Oluhye ā wu ọngọngọhẹ ọlẹ kọ kpa ẹjwọ lee okoji lee oje họ ukpeku juwa kpụ eteji họọ kwiikwii.’ “Ọọwa, angịnyị wuu à ka myị dọ̀ọọ yẹkẹẹ, ‘Ọ ka lịnyị!’

¹⁶“ ‘Ọlọ nya Ohe Oluhye ā wu ọngọngọhẹ ọlẹ kọ ju adamwụ lee ịnamwụ ihi ka.’ “Ọọwa, angịnyị wuu à ka myị dọ̀ọọ yẹkẹẹ, ‘Ọ ka lịnyị!’

¹⁷“ ‘Ọlọ nya Ohe Oluhye ā wu ọngọngọhẹ ọlẹ kọ hu ẹjwọ o-ju oyi nya ọpyị nya ọngịnyị ọọnamwụ ẹjẹẹ.’ “Ọọwa, angịnyị wuu à ka myị dọ̀ọọ yẹkẹẹ, ‘Ọ ka lịnyị!’

¹⁸“ ‘Ọlọ nya Ohe Oluhye ā wu ọngọngọhẹ ọlẹ kọ kpa olidu ụgbẹyị kaka hwahị.’ “Ọọwa, angịnyị wuu à ka myị dọ̀ọọ yẹkẹẹ, ‘Ọ ka lịnyị!’

¹⁹“ ‘Ọlọ nya Ohe Oluhye ā wu ọngọngọhẹ ọlẹ kọ yẹ ọngga lee ọnyị-ogu lee ahụ-ogu ba.’ “Ọọwa, angịnyị wuu à ka myị dọ̀ọọ yẹkẹẹ, ‘Ọ ka lịnyị!’

²⁰“ ‘Ọlọ nya Ohe Oluhye ā wu ọngọngọhẹ ọlẹ kọ ju adamwụ ẹpẹ bwula o-dori kịla ahụ nya adamwụ.’ “Ọọwa, angịnyị wuu à ka myị dọ̀ọọ yẹkẹẹ, ‘Ọ ka lịnyị!’

²¹“ ‘Ọlọ nya Ohe Oluhye ā wu ọngọngọhẹ ọlẹ kọ nọ ta iyo oleji.’ “Ọọwa, angịnyị wuu à ka myị dọ̀ọọ yẹkẹẹ, ‘Ọ ka lịnyị!’

²²“ ‘Ọlọ nya Ohe Oluhye ā wu ọngọngọhẹ ọlẹ kọ dori kịla ọnyịnamwụ bwu igbeene lee ọnyadamwụ bwu ube kpehe.’ “Ọọwa, angịnyị wuu à ka myị dọ̀ọọ yẹkẹẹ, ‘Ọ ka lịnyị!’

²³“ ‘Ọlọ nya Ohe Oluhye ā wu ọngọngọhẹ ọlẹ kọ dori kịla ịnamwụ-ẹpwa.’ “Ọọwa, angịnyị wuu à ka myị dọ̀ọọ yẹkẹẹ, ‘Ọ ka lịnyị!’

²⁴“ ‘Ọlọ nya Ohe Oluhye ā wu ọngọngọhẹ ọlẹ kọ nwụ ọngịnyị ehe ọọnamwụ tụ ju oyi.’ “Ọọwa, angịnyị wuu à ka myị dọ̀ọọ yẹkẹẹ, ‘Ọ ka lịnyị!’

²⁵“ ‘Ọlọ nya Ohe Oluhye ā wu ọngọngọhẹ ọlẹ kọ ye okpoko ochikiriju chajị nyọka nwụ ọngọ da ẹlẹlẹhẹ-ka.’ “Ọọwa, angịnyị wuu à ka myị dọ̀ọọ yẹkẹẹ, ‘Ọ ka lịnyị!’

²⁶“ ‘Ọlọ nya Ohe Oluhye ā wu ọngọngọhẹ ọlẹ kọ myị ju ihi nya ehile bala ọmẹjẹ ịlẹ ka.’ “Ọọwa, angịnyị wuu à ka myị dọ̀ọọ yẹkẹẹ, ‘Ọ ka lịnyị!’