Read idege Ehile Ọmada 28 Bible Online

Ehile Ọmada 28 - idege bible

Ehile Ọmada 28

¹“Ó-ri kanụ ju ihi nya Amkpaa Ohe Oluhye nyanụ kanụ juwa ba ehile nyamwụ ịlẹ kam wẹẹ ya hanụ alẹ jẹ kpẹẹkpẹẹ aalẹ, ọ ka họ kanụ ka ri ẹpwụma ọtụka gụ ẹpwụma ịkịla ilodehe ọlẹ wuu.

²Ahị ọwawa ịlẹ wuu ka ri ịnyanụ ó-ri kanụ ju ihi nya Amkpaa Ohe Oluhye nyanụ.

³“Amkpaa ka wahị kụrụụnụ ụka kanụ juwa ẹ-ẹpwụ nya epweji bala ụka kanụ juwa ẹ-ẹrụ nyanụ.

⁴“Amkpaa ka wahị kụrụụnụ la iru nya anyị bala ang-ẹrụ nyanụ ọ-ka pyẹ pyọ́ọ̀ọ. Ịna bala ịmwụ nyanụ ka gu anyị ju ịlaa lala ụgbọ.

⁵“Amkpaa ka wahị kụrụ ẹrụ nya ambakpa nyanụ bala ang oriri ịlẹ kanụ-ụ̀ họ.

⁶“Amkpaa ka wahị kụrụụnụ ẹ-ẹga myị ẹga kanụ ka ụka nya ọkàka bala ọnyànya.

⁷“Amkpaa ka kụrụ aluji nyanụ ụka kị mwẹla tanụ. Ị́ ya ogu dawụlẹ hyọọ́ọ́ warị kaka mwẹla tanụ, ị tị ka mwụ ata bịmwụ nyi epepe hi awụlẹ rụ hiinu la ọ-jẹ ọgụ nya awụlẹ ka.

⁸“Amkpaa ka wahị kụrụ ụkụrwọ ọnyị myị ọnyị ọlẹ kanụ kaa họ ká ang oriri ka myị̀ ukuna nyanụ. Ọ ka wahị kụrụụnụ ọ-ọpyị ọlẹ kọ wẹẹ ya hanụ.

⁹“Ó-ri kanụ ju ihi nya Amkpaa Ohe Oluhye nyanụ kanụ họ ang myị ang ịlẹ kọ danụ ehile nyọka họ aalẹ, ọ ka huunu nya angịnyị nya ịlọmwụ lụbwọ-lẹta.

¹⁰Ọọwa, alodehe wuu à ka yẹ jaabwọ ká Amkpaa huunu nya angịnyị nya ịlọmwụ lẹ, ị ka ju uhi nyanụ lẹlẹ.

¹¹Amkpaa ka ya iru nya anyị hanụ ma, iyo ileji nyanụ ka pyẹ ju iru, ang-ẹrụ nyanụ ka há yẹẹyẹẹ ọ-ọpyị ọlẹ kọ myị ọnụ ha adanụ igogo anyị nyọka ya hanụ.

¹²“Amkpaa ka wụrụ ẹpwang nya ụdụ nyamwụ da kọ ka do enyi hanụ bwọbwọọbwọ ụka kọ pwoku bala ọ-ka wahị kụrụ ụkụrwọ nyanụ wuu, chajị kanụ la ang kpa kpịla alụma ịkịla. Ọ́ tị ka da wunu nyọka kpịla ang bwu ẹga nya alụma ọhẹ-lọhẹ kong-kpong ka.

¹³Amkpaa ka họ kanụ ka ri alegbeju ọkọkọ nyọka ri alekpeleji nya angịkịla. Ó-ri kanụ ju ihi nya ehile ịlẹ kam wẹẹ ya hanụ alẹ kpẹẹkpẹẹ aalẹ, anụ ka ji ịlahị pyịyọọ, ánụ ka ri eji o-ku ọmwụ ka.

¹⁴Ānụ pẹhi ọhẹ-lọhẹ nya ehile deeji la ọhọhọ lee o-kele ka kpụ eteji bala ọ-myị ẹrụ ha ijiga ịkịla kokoo.

¹⁵“Ọ́ ti ri kaanụ ala Isirẹlụ-ụ́ myị ju ihi nya ehile bala ọmẹjẹ ịlẹ kam wẹẹ ya hanụ alẹ kpẹẹkpẹẹ ka aalẹ, ang ịtịpyọ ịlẹ ka wẹ chịnụ ọgụ.

¹⁶“Amkpaa ka gọlọ junu ụka kanụ juwa ẹ-ẹpwụ nya epweji bala ụka kanụ juwa ẹ-ẹrụ nyanụ.

¹⁷“Amkpaa ka gọlọ ju ẹrụ nya ambakpa nyanụ bala ang oriri ịlẹ kanụ-ụ̀ họ.

¹⁸“Amkpaa ka gọlọ junu ká anyị nyanụ ka la wure-wure bala ang-ẹrụ nyanụ ọ-ka họ ákpichi. Ịna bala ịmwụ nyanụ-ụ́ ka há ụma gbuu ka.

¹⁹“Amkpaa ka gọlọ junu ẹ-ẹga myị ẹga kanụ ka ụka nya ọkàka bala ọnyànya.

²⁰“Amkpaa ka gọlọ junu ká ọhịhị nyanụ ka lanụ jígi-jìgi kanụ ka wu ichinji ẹ-ẹpwụ nya ang myị ang kanụ tịtọ nyọka họhọ wuu gbee kanụ ka ta ayịreji gbanggbang ọọ-lajị nya ang onyobyi nyanụ bala ọlẹ kanụ nyẹẹkpẹ da Amkpaa.

²¹Ọ ka du ụma nya ẹdụrụ datị-datị ku awụlẹ ẹkpẹ-ẹkpẹ wẹ uhye nyanụ gbee ká ọngọngọhẹ nyanụ-ụ́ ka hi ọ-ọpyị ọlẹ kanụ wẹẹ kele nyọka ya la kaka.

²²Amkpaa ka du ẹdụrụ ị-chị kịla angịnyị wẹ uhye nyanụ ká ohu ka họnụ bala ịnyịrọ nyanụ ọ-ka mịrị. Ọ ka họ ká ịpyị ọ-chị ọhụ kịra-kịra bala ọchịpwuu tụ ang-ẹrụ ọ-ka da ebwubwu ka ta ẹrụ nyanụ ayịreji wuu. Akama ịwẹ-ẹ́ tị ka pwuru hiinu kaka gbee kanụ ka gbu.

²³Enyi-í ka do ka. Ọpyị nyanụ ka lọngịrị lala ọgọdọ.

²⁴Ọkọkọ nya enyi ododo, Amkpaa ka da igbachịwụ lekuruwa-ekuruwa bwu uhye-ọgba chịnụ ọgụ gbee kanụ ka ta ayịreji.

²⁵“Amkpaa ka họ ká aluji nyanụ ka kụrụụnụ. Anụ ka ya ogu dawụlẹ hyọọ́ọ kaka mwẹla taa. Anụ tị ka mwụ ata bịmwụ nyi epepe hi awụlẹ rụ hyaa la ọ-jẹ ọgụ nya awụlẹ ka. Ejiri ka wu alodehe wuu ụka kị yẹ ang ọlẹ kọ họ ẹ-ẹga nyanụ.

²⁶Ụka kanụ gbu akịrakpa nyanụ ka chụwa ha ịchịnụ bala iyo ịlẹpwamẹ kị ka kpa ri, ọngọngọhẹ-ẹ́ tị ka juwa da o-taaá kong-kong ka.

²⁷Amkpaa ka jụụnụ ẹdụrụ la iyi ọkụkụ jaabwọ kọ họ ala Ijipiti. Ịnyịrọ nyanụ ka pyẹ ri abẹ-abẹ ịlẹ kị ka wọọnụ bala ọ-ba ego kụrwọ-kụrwọ. Ị́ tị ka jẹ-ẹ̀ myị hiinu kaka.

²⁸Amkpaa ka hyanụ ụla, kpụnụ idu chwiichwii bala ọ-ya iribwu junu.

²⁹Ẹnụ-ụ́ rịrị ẹ-ẹtẹ rịrị gịrọng-ng, anụ ka juwa kpa abwọ mà kpokpookpo lala olidu. Ụkụrwọ nyanụ ọhẹ-lọhẹ-ẹ́ ka kịlahị hanụ ka. Ị ka juwa kpanụ ẹkpa ri eji bala o-nunu ang lagbụrụ, ánụ tị ka ye olewe kaka.

³⁰“Anụ ka chị ahụ rịrị wuu, ọlẹng ọkịla ka chịnụ ẹkpẹ eku woo chị beji. Ánụ nwụ́ ube nwụ́, ánụ tị ka kụ ụwa ka. Anụ ka wu ẹrụ nya alakọnụ, ánụ tị ka kpa ugbe nyaa ka ọnụ jẹ ịpyọ nyamwụ kpong-kpong ka.

³¹Ị ka wu ẹnụ nyanụ nwụ chahị junu, ánụ tị ka kpa iyo nyamwụ ka ọnụ ka. Ị ka wu ibyiyó nyanụ, gbilaa kpịla-kpịla rụ a-ahị nyanụ ka ẹga kị ka pẹhyaa nyà ẹnẹnẹhẹ kaka. Ị ka go ịkpịlọ nyanụ ha aluji nyanụ, ánụ tị ka ye olewe kaka.

³²Ị ka go anyị alẹng bala anyị anyang nyanụ ha angga kị ka ri anyịhị nyaa lahị họnụ korii. Anụ ka ya ẹhị nọ ụ-ụgbẹyị gbaa kị ka nyà. Ẹhị ka tà ọyị, ánụ tị ka la ụchụ ọ-wọ ugbe ka.

³³Alụma ọlẹ kanụ jẹjẹ ka kà wẹ kaka goonu ang-ẹrụ ịlẹ kanụ họ akama ju wuu kpa rụ ka ri. Anụ ka kụ abwabwọ. Ang ọlẹ kanụ ka ye kẹnẹ-kẹnẹ ri ọtụpyịpyị bala uhila nya akama ọlẹ kọ ka kpanụ ẹkpa ri eji pyịyọọ.

³⁴Akama ịdagaga junu ịwẹ wuu ka họ ká irya nyanụ-ụ́ ka jịra kaka.

³⁵Amkpaa ka họ kanụ ka chị abẹ ịmyị̀myị̀-ka myị ịnyịrọ-ịnyịrọ wuu bwu uhye wẹ eji.

³⁶“Amkpaa ka kpanụ ladịrahụ-adịrahụ nyanụ rụ ka kụ ẹ-ẹpwụma ọlẹ kaanụ lee adanụ igogo anyị-ị́ kụ ẹnẹnẹhẹ lẹka. Anụ ka kpụ eteji ha ijiga ịlẹ kị kpa ekeji bala ajwọ họ.

³⁷Ọhịhị nyanụ ka wu angịnyị ejiri, ị ka kpanụ hu utungguru bala ọ-kpanụ ya ịhwẹ ẹ-ẹpwụma ịlẹ ká Amkpaa wẹẹ ka kunu kaka kụ.

³⁸“Anụ ka hụ ajẹ ẹ-ẹrụ nyanụ bwọbwọọbwọ, ánụ tị ka ye chị gbuu ka, chajị ịyịrị ka wẹ kaka rinu ang-ẹrụ wuu.

³⁹Anụ wu alakọnụ, kpẹhị rịraa yẹẹyẹẹ. Ánụ tị ka ye egbe nyaa yile lee o-ye ere nyaa nwà ka, chajị ị ka jụ ekpunjuju wuu.

⁴⁰Anụ ka wu ẹrụ nya olivu tụ ẹga myị ẹga nya ọpyị nyanụ da wuu. Ánụ tị ka ye ida bwu uhye nyaa ka, chajị egbe nyaa wo hụrụ ene nya ụka ọgaga nyaa.

⁴¹Anyị alẹng bala anyang lẹ, anụ ka ma lẹẹ. Ị́ tị ka hụ tanụ ka, chajị ị ka waa kpa rụ bwu ẹwụ lala alagba.

⁴²Iwoowila ka nẹ ekeji bala ang-ẹrụ nyanụ wuu kịrẹ-kịrẹ.

⁴³“Angga ịlẹ kị kụ ịnyanụ ka lọngịrị gụ ọọwa kịlahị-ịlahị, anụ tị ka tịrị bwụjẹ-bwụjẹ.

⁴⁴Ị ka ye okpoko kpụ ị ka ya kpịlaanụ, ánụ tị ka yẹ ịngịngịhyẹ kpịlaa ka. Ị ka yẹ ka ri alegbeju nyanụ, kanụ ka rị alekpeleji nyaa.

⁴⁵“Akama ịwẹ wuu ka wẹ uhye nyanụ, yẹẹnụ dada gbee kanụ ka ta ayịreji, chajị ánụ myị ju ihi nya ehile bala ọmẹjẹ nya Amkpaa Ohe Oluhye ịlẹ kọ ya hanụ ka.

⁴⁶Ịwa-à ka ri ang-ẹjẹẹ bala ọna ọdada hanụ bala anyị ịtụma nyanụ gbe oyi myị oyi lẹlẹ.

⁴⁷Ánụ myị myị ẹrụ ha Amkpaa Ohe Oluhye nyanụ lọkẹkẹnị bala lọkịlẹtụ ọ-hụ jeje lụka ká ang há hanụ ka lẹ,

⁴⁸aluji ịlẹ ká Amkpaa wẹẹ ka du jahị danụ anụ ka myị ẹrụ ha lẹlẹ. Ụka ọọwa, imyi bala imyi-enyi ka nwụnụ, la ang gu ene hiinu ọ-ọmwụ. Ị ka tụụnụ pyị ụka gbee kanụ ka ta ayịreji.

⁴⁹“Amkpaa ka kpa ẹpwụma ọhẹ chị ohe da leji kpátaka bwu ẹgẹhẹ ẹgẹlẹ ka jahị danụ. Ánụ wo oja nya nya alụma ọọwa wo kpong-kong ka. Ẹpwụma ọọwa ka chabwọ junu lọngịrị-ọngịrị jaabwọ ká ogbe kaa chabwọ ju ọnyị-ụnụ.

⁵⁰Ọ ka ri ẹpwụma oluhi-uhi ọlẹ kọ ka jujwo nya ọngọngọhẹ ka—angịgbahị tụ anjwo.

⁵¹Alụma ọọwa ka goonu iyo ileji tụ ang-ẹrụ nyanụ ri wuu, ānụ ka kụ abwabwọ gbee kanụ ka gbu igu imyi lẹlẹ. Ị́ ka tụụbwọ hi ụpịlẹ nya ịngịngịhyẹ lala ambakpa lee ere lee ida nya olivu lee anyị nya ịna bala ịkpịlọ hanụ ka du ká ọọwa ka ju ọmwụ nya ayịreji ọtata nyanụ.

⁵²Ị ka mwẹla ta epweji ọnyị myị ọnyị ọ-ọpyị ọlẹ ká Amkpaa Ohe Oluhye nyanụ wẹẹ ya hanụ gbee ká egwalọ ị-la uhye ịtụka ịdagaga ju epweji nyanụ ịlẹ kanụ dahịhile ka gu cheji.

⁵³“Uhila nya akama ọlẹ kanụ ka yẹ lụka ká aluji ka yẹ epweji nyanụ dada ka lụmẹ gbee kanụ dọmwụ ka nwụ anyị ịlẹ ká Amkpaa Ohe Oluhye nyanụ ya hanụ ri, chajị ang oriri-í ka ji ẹgẹgẹhẹ kaka.

⁵⁴Ọlẹng ọdọhụ ree nya ẹla, kọ kaa lẹjẹ nya ọngọkịla gụ wuu lẹpwụ nyanụ-ụ́ dọmwụ ka jujwo nya ọnyịnamwụ ọlẹng bala ahụ olikẹjẹ nyamwụ bala anyị nya ịlọmwụ ịlẹ kị hi lọhịhị kpong-kpong ka.

⁵⁵Ọ́ ka myị-ị̀ chị iyo nya anyị nya ịlọmwụ ọlẹ kọ wẹẹ kpa ri ha ọngọngọhẹ nya angịwẹ ka, chajị ang oriri ọkịla ọhẹ-ẹ́ juwa ọ ka ye ri lụka ká aluji ka wẹẹ goo guruunu kaka.

⁵⁶Ọnyang ọdọhụ ree nya ẹla, kọ kaa lẹjẹ nya ọngọkịla gụ wuu lẹpwụ nyanụ, ká ẹpẹtẹ ọ-ya ba ọpyị dọmwụ kaa moo imahị, á ka kpahị nya ọrụmwụ olikẹjẹ nyamwụ lee ọnyị nyamwụ ọhẹ-lọhẹ kpong-kpong ka.

⁵⁷Ọnyang ọọwa-á ma ọnyị kpá, ọ ka hu abyị nya ọnyị tụ ọnyị ọlẹ kọ ma kpa kaka kpịbaa hyaa, chajị kọ ka ya ri kpịbaa-kpịbaa. Ọ ka họ ịnyị, chajị ang oriri ọhẹ-lọhẹ-ẹ́ ji ọ ka ye lụka ka aluji wẹẹ ka mwẹla ta epweji nyanụ kaka.

⁵⁸“Anụ ka ju ihi nya ehile ịlẹ wuu kị da ụ-ụpwụ ọlẹ. Ó-ri kanụ ju ihi nyaa bala o-ju ihi nya ẹnyị ọlụmẹ-ụmẹ bala oluhi-uhi nya Amkpaa Ohe Oluhye nyanụ ka aalẹ,

⁵⁹Amkpaa ka du ẹdụrụ iluda ọhọhọ ka bala ịdọlọ-dọlọ ịlẹ kị ka jẹ-ẹ̀ kpụba ka wẹ uhye nya anyị nyanụ bala anyị ịtụma nyanụ.

⁶⁰Ọ ka kpa ẹdụrụ ịlẹ kọ ya jụ ala Ijipiti kị lanụ uhi-uhi lụmẹ lẹẹ kaka jụụnụ, ánụ tị ka be myị ka.

⁶¹Amkpaa ka du ẹdụrụ datị-datị bala ịdọlọ-dọlọ datị-datị ịlẹ kị dọmwụ ya ẹla ya rụ ụ-ụpwụ nya ehile ọlẹ ka wẹ uhye nyanụ gbee kanụ ka ta ayịreji.

⁶²Ịnọ anụ pyẹ ju iru kpá lala ịdịchụ iluhye-ọgba, angịnyị nyanụ ịlẹ kị tị ka hi ka la wure-wure, chajị ánụ myị ju ihi nya Amkpaa Ohe Oluhye nyanụ ka.

⁶³Jaabwọ kọ há Amkpaa kpụ kọ họ anụ pyẹ pyọ́ọ̀ọ wẹ, ịnyịnyị-ịnyịnyị ọ ka họọ nyọka họ kanụ ka tịrị bwụjẹ-bwụjẹ gbee kanụ ka ta ayịreji gbanggbang lẹlẹ. Ọ ka hunu latẹ-latẹ hi ọpyị ọlẹ kanụ wẹẹ kaka ye kụ.

⁶⁴“Ụka ọọwa, Amkpaa ka nyiinu epepe chị ka ẹpwụ nya ẹpwụma ilodehe ọlẹ wuu bwu ọbaba ọhẹ ka ọkịla. Ánụ pwụ ụwa, anụ ka kpụ ijiga ịlẹ kaanụ lee adanụ anyị-ị́ kpụ eteji ha ẹnẹhẹ ene lẹka.

⁶⁵Ánụ ka dọhụ rwẹẹ lee ọ-la ẹgẹhẹ ọlẹ kanụ ka dahịhile lala egeji nya ịlọnụ ka. Amkpaa ka hu imahị omeme bala igbeene ọ-kpaa a-abwabwọ bala ẹhị ọ-ta ọyị danụ.

⁶⁶Anụ ka kụ luko kooo ụka wuu. Lodu tụ ẹnụ, anụ ka juwa ju uhi nyori ọhẹka ahị ọkịla nyị́ ka pyẹ tịwa kaka.

⁶⁷Ang iluhi-uhi ịlẹ kanụ ka yẹ wuu ka gunu ugbodu ene ụka wuu. Ahị-ị́ pyẹ, ọ ka haanụ ká obyi-ì hi. Obyi-í hi, ọ ka haanụ ká ahị-ị̀ pyẹ.

⁶⁸Amkpaa ka yanụ ju agbọ nya enyi du rụ ka Ijipiti, ịnọ ọwa ayịdang ya anụ nyị kele ẹnẹnẹhẹ kaka. Anụ ka kpa ịlọnụ dịnya ká aluji nyanụ ka ranụ nya anyịhị, ọngọngọhẹ-ẹ́ tị ka myị-ị̀ gba ideri lee ịchangkpa gunu ka.”