Read idege Ehile Ọmada 3 Bible Online

Ehile Ọmada 3 - idege bible

Ehile Ọmada 3

¹“Ọọwa lẹ, ahị jahị kpata juwa jẹ koye nya ẹtẹ tụ ụgbẹyị ọ-ka ịBachan da lẹlẹ. Ụka ọọwa, Ọọgụ Adịrahụ nya ala ịBachan kpehe la angịdẹwụ nyamwụ wuu warị kị ka mwẹla tahị ụ-ụwa Edireyii.

²Ma, Amkpaa byim yẹkẹẹ, ‘A ju uhi nya Ọọgụ koo. M̀ ka yọọ ọwa bala angịdẹwụ nyamwụ wuu bala ọpyị nyamwụ wuu lẹpwụ-lẹpwụ jung ẹ-ẹpwụtubwo. Aa họọ jaabwọ ka họ iSihọn Adịrahụ nya ala Amọ ọlẹ kọ kụ ịHẹchịbọn mẹ.’

³“Ọọwa, Amkpaa-à ya adịrahụ Ọọgụ bala angịnyị nyamwụ wuu juhi ụ-ụbwọ lẹ, ahị nwaa wuu la ọngọngohe nyaa hi lahị-lahị kaka lẹlẹ.

⁴Ụka ọọwa, ahị ye epweji nyamwụ wuu la. Epweji ọhẹ-lọhẹ-ẹ́ juwa kahị nu ka lẹ ka. Ahị nu epweji iwo ịrwọnyẹ ịlẹ wuu kị ji ọpyị nya Agobu ọlẹ ka Ọọgụ Adịrahụ nya ala ịBachan kpẹhị riri wuu gwọka-gwọka.

⁵Epweji ịwẹ wuu ri ịlẹ kị me egwalọ ịtụka-ịtụka dagaga ju kị la igirigba iloje-oje bala ekpileku ịlẹ kịị dachị. Iru nya epweji nyamwụ ịkịla tị juwa kị me egwalụ dagaga ju ka.

⁶Ahị ta epweji ọnyị myị ọnyị ịwẹ wuu ayịreji gbang-gbang bala ọ-nwụ alẹng bala anyang bala anjwo ichiche ịlụwa wuu jaabwọ kahị họ epweji ịlẹ kị ri nya iSihọn Adịrahụ nya ala ịHẹchịbọn.

⁷Ma, ahị tị kpa ịna bala ang-ẹwụ ịkịla ịlẹ kahị go bwu epweji ịwẹ rụ kaka la.

⁸“Lụka ọwẹ, ahị nu ọpyị olọmwẹnụ-ụtụrụ nya Ihu ịJọdan o-bwu Ihu nya Anon lalaala ka ju ka Ọgbọdọ nya ịHẹẹmọn bwu ẹga nya ịdịrịhụ imiiye nya ala Amọ ịwẹ.

⁹(Ala ịSayịdọn kaa wụrụ Ọgbọdọ nya ịHẹẹmọn ọwẹ iSiriyọn, ala Amọ tị kaa wụrwọọ iSenii.)

¹⁰Ahị nu epweji ịlẹ kị kụ ọpẹẹpẹẹ nya uhye ọgbọdọ bala iloye nya iGiliyadị bala ịBachan wuu lalaala ka ju ka epweji nya ịSalẹka bala Edireyii. Ẹga ịwẹ wuu ri egeji-egeji nya Ọọgụ Adịrahụ nya ala ịBachan.

¹¹(Ọọgụ Adịrahụ ọwẹ ụbwọọmwụ à ri ọngọ kwẹkpẹ nya angị ihihi nya ala iRefa lẹ. Oje-oje ị kpa họ akpa nyamwụ lẹ. Akpa ọọwa ludiyo gụ apatẹ iwo kụrụ ịta bala apatẹ ịrwọnyẹ ẹ-ẹpwụ ojuju. Ọ tị juwa e-epweji nya ịRaba ọ-ọpyị nya Amọn wẹẹ.)

¹²“Ụka ọlẹ kahị yẹ ọpyị ọlẹ la kpá, m̀ ga ọpyị okoye nya ẹtẹ nya epweji nya Aroyẹẹ ọlọnụ nya Ọkpọọ nya Anọn bala ụpa ọhẹ nya ọpyị ilikiti nya iGiliyadị bala epweji ịlụwa wuu ha alimwawụ nya iRubẹn bala ịGadị.

¹³Ẹhya nya imwawụ nya ịManasẹ m̄ ya ụpa ohihi nya ọpyị nya iGiliyadị bala ịBachan wuu ẹga ká Ọọgụ hụ ri adịrahụ nya ọpyị nya Agọbụ wuu ha lẹ. (Ị kaa wụrụ ịBachan ọwẹ ọpyị nya ala iRefa ụka ọọwa.

¹⁴ỊJayii ọlẹ kọ bwu imwawụ nya ịManasẹ ye oye nya Agọbụ ọlẹ kị wụrụ ịBachan wuu lalaala ka ju ka ọnụ nya ọpyị nya ala iGechu bala ịMaaka. Ọọwa, ọ ya ẹnyị nya epweji ịlẹ kọ ye wuu wụrụ ịlọmwụ lẹlẹ. Ị kaa wụrụ epweji ịịwa epweji nya ịJayii wẹẹ.)

¹⁵“M̀ ya iGiliyadi ha alogang nya iMakii.

¹⁶Imwawụ nya iRubẹn bala ịGadị m̄ ya ọpyị ọlẹ kọ dọmwụ bwu iGiliyadi kele ka ju ka Ọkpọọ nya Anọn ha lẹ. Ẹpwarịrị nya ọkpọọ ọwẹ à ri oyi nyaa oloye nya edii lẹ. Oyi nyaa oloye nya ẹtẹ à ri Ihu ịJabọkụ ọlẹ kọ ri oyi nya ala Amọn ịnyịnyị lẹ.

¹⁷Oyi ọlọmwẹnụ-obyi nya ọpyị nyaa ri Ihu ịJọdan. Oyi ọọwa jẹ ịnyịnyị bwu Ihu Ọlịma-ịma ọ-ọmwụ nya Ọgbọdọ nya iPisiga o-oye nya ọmwẹnụ-ụtụrụ.

¹⁸“Ụka ọọwa, m̀ daa ehile yẹkẹẹ, ‘Anụ yẹ mẹ, Amkpaa Ohe Oluhye nyanụ ya ọpyị olọmwẹnụ-ụtụrụ nya Ihu ịJọdan ọlẹ hanụ wuu lẹ. Anụ go ang-abwọ nya ẹwụ kanụ kpa ala Isirẹlụ aananụ ihihi chị kpoye nya Ihu ọlẹ mẹ.

¹⁹Ịhụ bala anjwo bala ịna nyanụ kem à ka hi am̀ e-epweji ịlẹ kam ya hanụ-ụ̀ wẹ lẹlẹ. M̀ jẹ anụ la iru nya iyo ileji. Ịwa wuu tị ka hụ am

²⁰gbee ká Amkpaa Ohe Oluhye nyanụ ka ya ẹga ha aananụ kụ lokpunyi ọ-ọpyị ọlọmwẹnụ-obyi nya Ihu ịJọdan ọlẹ kọ wẹẹ ka ya haa jaabwọ kọ ya ọpyị hanụ wẹ ịnyịnyị mẹ. Ánụ daa ụbwọ kpá lẹ, ene kanụ ka nyà tịrẹkpẹ wẹ ọpyị ọlẹ kam ya hanụ mẹ.’

²¹“Ọọwa, m̄ byi iJochuwa ụka ọọwa yẹkẹẹ, ‘Ahụ ayịdang tị́ kpẹhị nya ịlọng yẹ ang ọlẹ ká Amkpaa Ohe Oluhye nyang họ ẹ-ẹga nya iSihọn Adịrahụ bala Ọọgụ Adịrahụ-ụ̀ wẹ lẹ. Ịwẹ-ịwẹ ọ ka họ ọng myị ọng ọlẹ kanụ ju ka ọpyị nyamwụ lẹlẹ.

²²Ā ju uhi nyaa koo, chajị Amkpaa Ohe Oluhye nyang lịlọmwụ à ka ma uya ọọwa hang lẹ.’

²³“Ụka ọọwa, m̀ bịlẹ Amkpaa yẹkẹẹ,

²⁴‘Ọngọlahị Amkpaa ee, m̀ jẹ ọmwụ ọdada nya ụmụmẹ ọlala bala ọngịrị ọtụka nyang à wẹ ká mẹjẹm wẹẹ lẹ. Ojiga ọhẹ-ẹ́ ji uhye-ọgba lee odehe kọ ka jụ ụkụrwọ ịtụka ịlala ịnyang họ myị ka.

²⁵Chuchuu, ya ẹga da ham, kam kpoye koye ọlaanyị nya Ihu ịJọdan kaka yẹ ọpyị ọnyịịla olikiti ọọwa bala ịgbọdọ nya iLibanọn chee mẹ.’

²⁶“Ma, Amkpaa wụ ẹjẹ tam ọọ-lajị nyanụ. Ọ myị wo ọbịlẹ-bịlẹ nyam ka. Ọkọkọ nya ọọwa lẹ, ọ byim yẹkẹẹ, ‘Ọ nwà lẹ! Ā ya ẹla tam u-uhye nya ẹlẹwẹ gụ ọwẹ kokoo!

²⁷Kele ka kpu uhye ka achinege nya Ọgbọdọ nya iPisiga ka yẹ oyi okoye nya ẹtẹ bala oye nya edii bala ọmwẹnụ-ụtụrụ bala ọmwẹnụ-obyi dagaga ju wuu mẹ. Aa yẹ ẹga ka ẹhị nyang pwụ wuu yẹẹyẹẹ mẹ, chajị á juwa ka kpoye koye ọlaanyị nya Ihu ịJọdan ka.

²⁸Chụ iJochuwa, ka jwoo ọhụ bala o-jwoo ọngịrị mẹ, chajị ọwa-à ka kpa angịlẹ kpoye nya ihu kele ka kụ ọpyị ọlẹ ka yẹ lẹhị kem wẹ lẹ.’ ”

²⁹Ịnyị lẹ, ahị hụ ọ-ọkpọọ ọlịkịka nya epweji nya ịBẹtị-ịpẹyọ lẹlẹ.