Read idege Ehile Ọmada 30 Bible Online

Ehile Ọmada 30 - idege bible

Ehile Ọmada 30

¹“Ụka ká ang ịwẹ wuu-ú họ tanụ ẹ-ẹpwụma ịlẹ ká Amkpaa Ohe Oluhye nyanụ ka kunu ka, anụ ka kpịtịya nya ahị ọwawa bala ọlọ ịlẹ wuu kam wa chịnụ e-eji.

²Ó-ri kaanụ bala anyị nyanụ-ụ́ myị nyà wẹ ẹga nya Amkpaa kanụ dọmwụ nyọka ju ihi nya ehile nyamwụ ịlẹ kam wẹẹ ya hanụ alẹ lọkịlẹtụ ookpokpo aalẹ,

³Amkpa Ohe Oluhye nyanụ ka yẹnụ ahyẹẹrwẹrwa. Ọ ka kpanụ nyà bwu ẹpwụma datị-datị ịlẹ kọ nyiinu epepe pwụụpwụ̀ụ̀pwụụ ju ka wuu kọ ka họ kanụ ka pyẹ pyọ́ọ̀ọ myịmyị.

⁴Ó dọmwụ ri ẹbọligbo lalẹẹ ọ-ọbaba nya odehe kọ nyiinu epepe chị ka wẹwẹ, Amkpaa Ohe Oluhye nyanụ ka pwụ ụwa kaka kpanụ nyà bwu ụwa.

⁵Ọ kpanụ nyà ka ọpyị ọlẹ kọ ri nya adanụ igogo anyị, chajị kanụ ka ye la tịrẹkpẹ. Ọ ka họ kanụ ka pyẹ pyọ́ọ̀ọ bala ọ-dọmwụ ju iru ju gụ adanụ igogo anyị wẹẹ.

⁶Amkpaa Ohe Oluhye nyanụ ka ya ọkịlẹtụ o-ju ihi hanụ, chajị kanụ ka la ọháha ẹ-ẹga nyamwụ lọkịlẹtụ nyanụ wuu. Ọọwa, anụ ka hị lokpunyi lẹlẹ.

⁷Amkpaa Ohe Oluhye nyanụ ka ji ọlọ ịwẹ kpáta ka uhye nya aluji nyanụ ịlẹ kị tụụnụ pyịpyị.

⁸Ọọwa, ānụ ka juwa ju ihi nya Amkpaa kanụ ka ba ehile nyamwụ wuu ịlẹ kam wẹẹ ya hanụ alẹ lẹlẹ.

⁹Amkpaa ka họ kanụ ka kịlahị ẹ-ẹpwụ nya ang myị ang ọlẹ kanụ ka họ. Anụ ka ma iru nya anyị bala ọ-la iru nya iyo ileji. Ọpyị nyanụ ka há ang yẹẹyẹẹ. Ọ ka chị ọkẹkẹnị nya ọ-họ ang ọnyịịla ẹ-ẹga nyanụ jaabwọ kọ họ ẹ-ẹga nya adanụ anyị.

¹⁰Anụ tị ka chị eje nyọka ju ihi bala ọ-kpa ehile nyamwụ ịlẹ wuu kị da ju ụ-Ụpwụ nya Ehile ọlẹ kanụ ka nyà wẹ ẹga nyamwụ lọkịlẹtụ bala ugbodu okpukpuru nyanụ wuu.

¹¹“Ehile ọlẹ kam wẹẹ danụ alẹ á la ujwo kịlaanụ kịla lọkpakpa ka.

¹²Ọ́ nụwa u-uhye-ọgba teneee kpụ anụ ka towo yẹkẹẹ, ‘Oowo tị́ wule kele ka kpa ehile ọwẹ hireji kọ ka yoo dodehe jehi kpá lẹẹ, chajị kahị ka bọọ jẹ mẹ’ ka.

¹³Ọ́ tị juwa ábadoohe hwẹ̀ẹẹ o-oye ihu kpụ anụ ka towo yẹkẹẹ, ‘Oowo tị́ ka chị ohe da leji kele ka kpa ehile ọwẹ nyà warị bwu oyaalẹ nya ihu kọ ka yoo dodehe jehi kpá lẹẹ, chajị kahị ka bọọ jẹ mẹ’ ka.

¹⁴Ẹla ọọwa kpangga tị́ nụwẹ gede-gede. Anụ jọọ jẹ kpụ anụ kaa kpa chụ ya ịnyịnyịịnyị. Lẹẹlẹ, anụ-ụ̀ bọọ jẹ mẹ.

¹⁵“Anụ wo mẹ! Alẹ oleeri ọlẹ, m̀ jam ya iwe da hanụ kanụ ka chụ ọhẹ hi ọkịla ọlẹlẹ. Ang ọnyịịla lee ang onyobyi bala Ọhịhị lee igu ānụ tị́ ka chụ?

¹⁶Ó-ri kanụ ju ihi nya ehile nya Amkpaa Ohe Oluhye nyanụ[4] ịlẹ kam wẹẹ ya hanụ alẹ, kanụ la ọháha ẹ-ẹga nyamwụ, juwa ju ihi nyamwụ, kanụ kpa ehile nyamwụ wuu aalẹ, anụ ka pyẹ kịlahị kaka ri ẹpwụma o-ju iru. Amkpa Ohe Oluhye nyanụ ka wahị kụrụụnụ ọ-ọpyị ọlẹ kanụ wẹẹ kaka ye la.

¹⁷“Ọ́ tị ri kanụ gu ahị gboo kanụ ju ihi nya ẹlẹwẹ ka, kị kpanụ hwahị kaka kpụ ijiga aalẹ,

¹⁸m̀ jam ya jenu pwantị́ lẹẹlẹẹ ya anụ ka ta ayịreji pyii lẹ. Ánụ ka hị tata ọ-ọpyị ọlẹ kanụ wẹẹ kpoye nya ịJọdan kaka ye la koo.

¹⁹“Alẹ oleeri ọlẹ, m̀ wa ọhịhị bala igu tụ ahị ọwawa bala ọlọ owuwu chịnụ e-eji kanụ ka chụ ọhẹ hi ọkịla lẹ. M̀ jam wụrụ ohe bala eji kị ka ri ibeenu nyọlẹ kanụ ka chụ lẹ. Anụ chụ ọhịhị, chajị kaanụ bala anyị ịtụma nyanụ ka hị wẹ mẹ!

²⁰Anụ la ọháha ẹ-ẹga nya Amkpaa Ohe Oluhye nyanụ kanụ ju ihi nyamwụ juwa bọọ jẹ mẹ. Ọwa-à ka ya ọhịhị hanụ lẹ. Ọọwa, anụ bala anyị ịtụma nyanụ à ka hị tata ọ-ọpyị ọlẹ kọ myị ọnụ nyamwụ Ebiraham bala Ayịsiki bala iJekọbụ adanụ igogo anyị lẹ.”