Read idege Ehile Ọmada 31 Bible Online

Ehile Ọmada 31 - idege bible

Ehile Ọmada 31

¹Ụka ọọwa, iMosisi kịnyaa juwa ya ẹla ta ala Isirẹlụ.

²Ọ byaa yẹkẹẹ, “Am ayịdang gu ẹka ohu da iwo imiiye (120) lẹẹlẹẹ lẹlẹ, ḿ lọngịrị nyọka kpanụ kụ ịlahị kaka. Amkpaa byim am nyị́ ka kpoye nya Ihu ịJọdan ka.

³Amkpaa Ohe Oluhye nyanụ lịlọmwụ ka ji ịlahị nyanụ kele kaka ta alẹpwụma ịlẹ kị kụ ụwa ayịreji, chajị kanụ ka ye ọpyị nyaa la. IJochuwa-à ri olegbeju onyeewe nyanụ ọlẹ kọ ka kpoye baanụ kele jaabwọ ká Amkpaa ya lẹlẹ.

⁴Amkpaa ka ta alọpyị ọwẹ ayịreji jaabwọ kọ ta iSihọn bala Ọọgụ ịdịrịhụ nya ala Amọ ayịreji bala ọpyị nyaa.

⁵Amkpaa ka ya ọkụrụ-kụrụ hanụ kanụ ka haa ang myị ịlẹ kam ya wẹ wuu.

⁶Anụ ju ugbodu kanụ godayị giri-giri. Ānụ ju uhi nyaa ka. Amkpaa Ohe Oluhye nyanụ ka juwa tanụ. Ọ ka chẹkpẹ junu, ọ́ ka nyẹẹkpẹ danụ ka.”

⁷Ọọwa, iMosisi à wụrụ iJochuwa ka ịlahị nya aluche nya Isirẹlụ wuu lẹ, ọ byoo yẹkẹẹ, “Aa ju ugbodu, ká godayị giri-giri mẹ. Ahụ à wẹẹ ka kpa angịlẹ kele ka kụ ọpyị ọlẹ ká Amkpaa nwa iro nyamwụ ha adaa igogo anyị lẹ. A ka ga ọpyị ọwẹ gịlaa nya ang ọlala nya.

⁸Amkpaa lịlọmwụ à ka kpa ịlahị hang bala o-juwa tang lẹ. Ọ ka chẹkpẹ jung. Ọ́ ka nyẹẹkpẹ dang ka. Lẹẹlẹ, ọkịlẹtụ ā kpụng enyi, ká juwa ju uhi koo.”

⁹Ọọwa, iMosisi à da ehile ọwẹ ju lẹ, ọ ya ha angịkiliya ala iLivayị ịlẹ kịị kpẹhị rịrị Akpa nya Iro nya Amkpaa bala alegbeju nya ala Isirẹlụ wuu lẹlẹ.

¹⁰IMosisi daa ehile byaa yẹkẹẹ, “Ọmyịmyị nya ẹka ọharwiye ọnyị myị ọnyị ọlẹ kị ka tụụbwọ hi uri gahị lụka nya Ọhụhụ nya Adáa,

¹¹anụ ka wa ehile ọlẹ je ala Isirẹlụ wuu ụka kị kele kaka jịra ị-ịlahị nya Amkpaa Ohe Oluhye nyanụ ẹ-ẹga ọlẹ kọ ka chị nyọka gbịgba họọ.

¹²Anụ ka wụrụ alẹng bala anyang bala anjwo tụ angga ịlẹ kị kụ ịnyanụ kaka jịra, chajị ká ọng myị ọng nyaa ka wo bala ọ-jẹ jaabwọ kị ka ju ihi nya Amkpaa Ohe Oluhye nyanụ bala ọ-ba ọmẹjẹ nyamwụ jẹ kpẹẹkpẹẹ.

¹³Anụ họ ịnyị, chajị ká anyị nyanụ ịlẹ kị jẹ ang chajị nya Ehile nya Amkpaa Ohe Oluhye nyanụ ka kà wo lụrụ nyaa kị ka jẹ ihi nya Amkpaa ojuju. Ịịwẹ anụ ka họ ẹ-ẹpwụ nya ọhịhị nyanụ wuu ọ-ọpyị ọlẹ kanụ wẹẹ kpoye nya iJọdan kaka kụ lẹlẹ.”

¹⁴Ụka ọọwa, Amkpaa byi iMosisi yẹkẹẹ, “Á juwa ka hị tata lụmẹ kịlahị kaka. Wụrụ iJochuwa kanụ warị wẹ ẹga nya Ọdụ nyam kam ya ụkụrwọ jwoo ụ-ụbwọ mẹ.” Ọọwa, iMosisi bala iJochuwa-à kele ka ẹga nya Ọdụ lẹlẹ.

¹⁵Amkpaa chị ịlọmwụ ehe haa labwụma nya egbamwụ ọ-ọnang nya Ọdụ,

¹⁶Amkpaa byi iMosisi yẹkẹẹ, “À tụbwọọ ka hẹbịlẹ tụụbwọ hi odehe ọlẹ lẹ. Angịnyị ịlẹ tị ka nyẹẹkpẹ dam juwa bịrị iro ọlẹ kam nwa taa. Ị ka jahị kpata kaka kpụ ijiga nya alẹpwụma ịkịla ịlọpyị ọlẹ kanụ wẹẹ jẹ kà-ā.

¹⁷Ụka kọ lịnyị, m̀ tị ka wụ ẹjẹ taa kam ka nyẹẹkpẹ daa. Ị ka ta ayịreji. Akama onyobyi-obyi datị-datị ka wẹ uhye nyaa. Ọọwa, ị ka chahị hwoóó lẹ, ị ka jẹ nyori ọlẹ kam juwa taa kaka à du ká akama ịwẹ wuu wẹẹ chaa ọgụ lẹ lẹlẹ.

¹⁸M̀ tị ka nyẹẹkpẹ daa ịnyịlẹhị ụka ọọwa, chajị ị họ ang onyobyi bwula ọ-kpụ ijiga.

¹⁹“Da eje ọlẹ ju, ká mọọ jẹ ala Isirẹlụ kị mwoo mẹ. Eje ọwẹ ka rim ibeenu ya eje waa u-uhye nya ọna ọlẹ kam daa wuu wẹ.

²⁰M̀ juwa kpaa ka ju ka ọpyị o-ju eyo ọ-há ang ọlẹ kam myị ọnụ nyamwụ ha adaa igogo anyị. Ụka kị pwụ ụwa, ị ka pyẹ pyọ́ọ̀ọ̀, ye ang ri wu ẹpwụ kpọngkpọng, há ịnyịrọ dịrẹ-dịrẹ. Ọọwa, ị tị ka jahị kpata kaka kpụ eteji ha ijiga ịkịla lẹlẹ. Ị ka nyẹẹkpẹ dam bala ọ-bịrị iro ọlẹ kam nwa taa.

²¹Ụka ọọwa, iru nya akama onyobyi-obyi datị-datị ka wẹ uhye nyaa. Eje ọlẹ ka ang ibeenu ọ-ya eje waa, chajị anyị ịtụma nyaa-á ka deeri nyọka mwoo mwu ka. M̀ jẹ ụma nya angịnyị ịlẹ ká angịlẹ ri. Ọlẹ kam dọmwụ kpaa kpa pwụ ọpyị ọlẹ kam myị ọnụ haa lẹka lẹ, m̀ jẹ ang ọlẹ kị wẹẹ me obyi ọ-ọkịlẹtụ nyaa wuu.”

²²Ẹnẹwẹ-ẹnẹwẹ kpangga iMosisi à da eje ọọwa ju lẹ, ọ mọọ jẹ ala Isirẹlụ lẹlẹ.

²³Ọọwa, Amkpaa-à ya ụkụrwọ ju iJochuwa ọnyị nya iNun ụ-ụbwọ, byoo yẹkẹẹ, “Aa ju ugbodu ká godayị giri-giri mẹ. Ahụ à ka kpa ala Isirẹlụ kele ka ọpyị ọlẹ kam nwa iro nyọka ya haa lẹ. M̀ ka juwa tang.”

²⁴Ụka ká iMosisi da Ehile nya Ohe Oluhye ju ụ-ụpwụ kpá, la ọ-pẹ hi ọhẹ-lọhẹ deeji kaka lẹ,

²⁵ọ da ala iLivayị angị kpẹhị rịrị Akpa nya Iro nya Amkpaa ehile yẹkẹẹ,

²⁶“Anụ ye ụpwụ nya Ehile nya Amkpaa ọlẹ kanụ ya nọ ịkịka nya Akpa nya Iro, chajị kọ ka ri ang ibeenu ọ-ya eje wu ala Isirẹlụ mẹ.

²⁷M̀ jẹ jaabwọ kị la egbeju-ọngịrị bala ọ-chị ọkịlẹtụ ori kaka ba. Lụka kam jam ji lọhịhị lẹ, ị la egbeju-ọngịrị ta Amkpaa. Ụka kam ka jam kaka, ọọwa-à ka ri elego ri wẹẹ lẹ!

²⁸Anụ wụrụ ịgabwọ bala alegbeju nya imwawụ-imwawụ nyanụ wuu wẹ ẹga nyam chajị kam ya ala ịlẹ jaa mẹ. M̀ ka wụrụ ohe bala eji kaka ri ịlọm ibeenu ya eje waa.

²⁹M̀ jẹ ụka kam gbu kpá, ala Isirẹlụ ka yụbwọ dụrụ ang onyobyi ọhọhọ kị ka pwa ẹla ọmẹjẹ nyam wuu deeji. Ị-ịlahị, akama ka hyo mịlaa, ọọ-lajị nya ang onyobyi ọlẹ kị ka họ du agbama ju Amkpaa.”

³⁰IMosisi wa ẹla ọlẹpwụ nya eje ọọwa wuu kpẹẹkpẹẹ ha ala Isirẹlụ wo.