Read idege Ehile Ọmada 32 Bible Online

Ehile Ọmada 32 - idege bible

Ehile Ọmada 32

¹“Uhye-ọgba, wo ooo! Wo ẹla ọlẹ kam wẹẹ ka ya. Eji wo ooo! Wo ẹla ọlọnụ nyam.

²Ang ọmẹjẹ nyam ka do lala enyi, Ẹla ọlọnụ nyam ka kpụ̀ lala amwụ. Ị ka lala emyo oluhye nya amẹ, lala atẹ nya enyi oluhye nya ekpichi nya amẹ.

³M̀ ka gwogbo ha ẹnyị nya Amk paa. Ohe Oluhye nyahị chakpa lụmẹ-ụmẹ!

⁴“Ọwa-à ri ẹjwọ ọkpịbaa lẹ, ọhọhọ nyamwụ wuu la kpẹẹkpẹẹ bala ọ-la kpakpa. Ọ ri Ohe Oluhye ọ-họ ọnụ ọmyịmyị nyamwụ jịra, Ọ́ọ họ ang ọtịpyọ ka, Ẹla ọkpakpa bala opwoku ọ kaa họ lẹ.

⁵Ị họ abwẹla obírí-bìrī ẹ-ẹga nyamwụ. Abyịkọtọ ịwẹ du kị ri anyị nyamwụ ri wẹẹ kaka, ị ri alụma ị-pyị anyoko bala ọ-ka kụ́rwa-kụ̀rwa.

⁶Anụ aluchi ị-jẹ ịngịngịhyẹ ka ee, ịịwẹ anụ ka bwu họ ẹla ẹ-ẹga nya Amkpaa lẹ-ẹ́? Ọ́ọwa-à ri adanụ ọhọnụ họ kaka-á? Ọwa-à họnụ huunu ri ẹpwụma lẹ.

⁷“Anụ kpịtịya nya igbalẹ wẹẹ-ẹ̄, aloyi datị-datị ịlẹ kị bwu ene nyanụ. Anụ tọ adanụ wo kị gbe ego jenu, anụ to angịgbahị wo, ị ka tịrọnụ nya ala inyogo kpẹẹkpẹẹ ya jenu.

⁸Ụka ká Agụgụ ga ọpyị ha ẹpwụma ọnyọnyọọnyị, kọ chị ebwo ẹpwa ha ụma nya angịnyị ehe datị-datị, ẹpwụma ọnyọnyọọnyị la ojiga nya ịlọmwụ-ịlọmwụ kịị kpụ,

⁹Anyị nya iJekọbụ tị lẹ, ọ chwaa kọọwa-à ka Ohe Oluhye nyaa.

¹⁰“Ọ yaa ye u-ugbileji, ababayịreji ọlẹ ká ọngọngọhẹ-ẹ́ ji ka. Ọ yụbwọ nyamwụ ke juwa kpẹhị rịraa yọ̀yọ̀ọyọ̀ lala ọnyị-ẹhị nya ịlọmwụ.

¹¹Amkpaa lala idu ọlẹ kọọ du anyị nyamwụ kuukuu nyọka hụhụ, kọọ hụ u-uhye dọgịlẹ jwaa, kọọ pyẹ achwọ maaa nyọka waa kpa u-uhye nya arụrụ nyamwụ.

¹²Amkpaa ụbwọọmwụ à kpa angịnyị nyamwụ ụgbẹyị lẹ, ojiga ọhẹ-lọhẹ-ẹ́ dọọ ụbwọ ka.

¹³“Ọ họ kị kụrụ ịpyị ilikiti, ọ kpaa la ang oriri o-bwu ẹrụ. Ị ye inwa ru bwu apewa nya ajwọ, ị ye ida nya olivu bwu ẹga i-ri ajwọ-ajwọ.

¹⁴Ọ kpaa la enyi-ẹmẹ nya ịna bala ịnya ịmwụ, bala iyo nya ịkpịlọ bala imbiri. Ọ ya imilodo bala imbiri ịlẹhị-ịlẹhị i-bwu ịBachan haa, tụ ịrayịsị iwiiti ịlahịchịng bala ere nya alakọnụ ọnyịịla-ọnyịịla.

¹⁵“Angịnyị nya Amkpaa tị ri ang hye kpọbọ-kpọbọ, ị ri ang gbee họ tibí-tibí. Ị nyẹẹkpẹ da Ohe Oluhye ọlẹ kọ haa-a họ, ị pwa Ẹjwọ ọ-chaa da deeji.

¹⁶Ị họ Amkpaa wuleji lijiiji jahị da ijiga nya alụma ịkịla, ijiga ịkpụkpụ nyaa du agbama jwoo.

¹⁷Ị kịla iya ha alegu inyibyi ịlẹ kị ri Ohe Oluhye ka, ijiga ịlẹ kịịwa ayịdang jẹ ẹnẹhẹ lẹka, ijiga ịlẹ kị wo ẹla nyaa kpanjẹ, ijiga ịlẹ ká adaa igogo anyị-ị́ gbịgba ha ka.

¹⁸I deeri la Ẹjwọ ọlẹ kọ ri adaa, ị nyẹẹkpẹ da Ohe Oluhye ọlẹ kọ maa.

¹⁹“Amkpaa yẹ ọhọhọ ọwẹ wuu lẹ, ị tọọ ànyị, ọ nyẹẹkpẹ da anyị alẹng bala anyị anyang nyamwụ, chajị ị du agbama jwoo.

²⁰Ịnyị, ọ yẹkẹẹ, ‘M̀ ka nyẹẹkpẹ daa lẹ, kam yẹ jaabwọ kị ka họ mẹ. Aloyi ị-la egbeju-ọngịrị ị tị́ ri, angị ju ọdahịhile ka ịwẹ lee!

²¹Ị wule ijiiji ọlẹpwụ nyam eji bwula ọ-kpụ eteji ha ang ịlẹ kị ri Ohe ka. Ị du agbama jum lekpeku ihideeji nyaa. M̀ tị̀tị̀ du ẹpwụma ọ-kpụ ịngịngịhyẹ-ka kele ka wule ijiiji nyaa eji, ẹpwụma ọ-jẹ ịngịngịhyẹ-ka tị̀tị̀ ka du agbama jwaa.

²²Agbama nyam ka wuru lala ila, ọ ka rụ odehe tụ ẹrụ ịlụwa wuu, ọ ka wuru lalaala ju ka ejegu, ọ ka rụ itiwe nya ịgbọdọ kị ka kpụ pwụrẹ-pwụrẹ wuu.

²³“ ‘M̀ ka do akama ku awụlẹ ẹkpẹ-ẹkpẹ ka uhye nyaa, m̀ ka haa elego lịcha nyam.

²⁴Ị ka gbu igu nya imyi, ọchịpwuu bala ẹdụrụ inyibyi ka nwaa bẹlẹ-bẹlẹ. Iyo ịnyẹẹgẹga ka yaa dada, ịgbịjị bala agbaka ka chaa.

²⁵Ẹwụ ka ri angịnyị u-ugbọdọda, uhi ọtụka-ọtụka ka ju alẹpwa ọnyị myị ọnyị, ikolobya bala ịyẹẹnọ ka gbu, tụ anyị ị-kpa ẹmẹ nyẹ bala ikwirichi ịdaabụmwụ.

²⁶Ịnọ m̀ tị́ ka taa ayịreji gbanggbang, ká ọngọhẹ-ẹ́ ka wo ẹnyị-ehe nyaa e-ekpeleji nya ẹnụ kaka.

²⁷M̀ tị chị uko ká aluji nyaa ka chị ọgọm, kị ka byị ịlaa ịwa nyaa kụrụ angịnyị nyam-m̀ wẹ lẹ, aam Amkpaa nyaa yaa akama wẹ ka.’

²⁸“Ala Isirẹlụ ri ụma ọ-la irya ka, ị́ jẹ ẹla ụpẹnị-ụpẹnị ka.

²⁹Ang pyii kị ka jẹ ẹla, kị ka la irya ọ-jẹ ang rige-rige! Ịnọ ị tị́ ka jẹ ẹbyị ọlẹ kọ wẹẹ ka hāā lẹ.

³⁰Ányị ịnọ ọngọ ookpokpo à tị́ ka ku angị ụnọ myị lee angị imiiye ọ-ka ku angị ụnọ iwo rụ myị? Amkpaa Ohe Oluhye nyaa-à tị́ nyẹẹkpẹ daa ju ọmwụ nya ẹla-à wẹ. Ẹjwọ ọkpịbaa nyaa hwaa ha aluji ra lẹ.

³¹Anụ tị́ jẹ lẹ, ijiga nya aluji-í lala Ohe Oluhye nya ala Isirẹlụ ka, aluji ayịdang jẹ ọọwa jẹjẹ ịnyịnyị.

³²Aluji nyaa tịpyọ lala alakọnụ i-bwu ịSọdọm, ịlẹ kị bwu ẹrụ nya ala iGomora. Ị lala egbe nya alakọnụ i-ju ẹhwa, íku ọnyọnyọọnyị nyaa wuu lejwejwo.

³³Ere nyaa lala ịnyaa ya ẹhwa nya ilo jwaa, ẹhwa nya ịgbịjị.

³⁴“ ‘M̀ kpa ẹla nyaa ẹ-ẹpwụ, tọọ kụrụ a-ang kpịrẹ-kpịrẹ.

³⁵Am kpangga à la ọ-họ kwiwa lẹ, m̀ ka nwụ̀ uri jaabwọ kọ pwoku. Ụka-á pwụ, ị ka pyị kpịra bwu ẹga kị godayị, ẹnụ nya akama ọyẹyẹ nyaa ju chwẹẹ lẹ. Ẹbyị ọlẹ kọ ka hāā wẹẹ rụnyẹ yahị daa lẹ.’

³⁶Amkpaa ka ya eje rụ angịnyị nyamwụ, ụka kọ yẹ kị chị ẹpẹtẹkẹẹ. Ọ ka yẹ ahyẹẹrwẹrwa nya anchẹ nyamwụ ụka ká angị ri anyịhị ri lee angị riri ka lẹpwụ nyaa-á hi ju ahịchịng kaka.

³⁷Ọ ka tọ angịnyị nyamwụ wo yẹkẹẹ, ‘Ijiga nyanụ tị́ lee mẹ? Ijiga ịtụka ịlẹ kanụ dahịhile bẹẹ?

³⁸Ịwa anụ tị́ị̀ ya eyo nya iyo ikiliya ha, tụ ere nya iya ịlẹ kanụ-ụ̀ kịla. Ị wẹ kaka danụ ụbwọ-ọ̀ wẹ mẹ-ẹ̀! Ị kẹwẹ kị chẹwụ keenu kahị yẹ mẹ-ẹ̀!

³⁹“ ‘Ánụ yẹ-ẹ̀ wẹ ka-á? Am kem, am ụbwọm à ri Ohe Oluhye lẹ, ojiga-á ri Ohe Oluhye tam ka! Am à kaa nwụ ọhịhị lẹ, am à tịị hu ọhịhị ha ọngịnyị lẹ. Am à kaa chị ọngịnyị ẹbẹ lẹ, am à tịị họ ọngọọwa uda ịnyịnyị lẹ. Ọngọ ka dam otàáa ji ka!

⁴⁰M̀ kpa ụbwọ ka uhye jam ya nya ịlẹhị-ịlẹhị ya jaabwọ ká am Ohe Oluhye jam hịhị lẹ,

⁴¹Ụka kam jwo oge nyam iri weri-weri, kam dọmwụ nyọka leje aalẹ, m̀ ka họ aluji nyam kwiwa, kam ka yẹ angị bam ẹtẹ wuu akama.

⁴²Ịwọ ka nyà teteete cheeji bwu ịcha nyam, oge nyam tị̀tị̀ ka ye iro ri, ọ ka chị ịwọ nya angịlẹ kị nwụ tụ ịnya alagba, ọ ka kpa egbeju nya alegbeju nya aluji ụ-ụbwọ.’ ”

⁴³IMosisi à yẹkẹẹ, “Anụ alẹpwụma wuu, anụ mịla oja nya angịnyị nya Amkpaa mẹ oo! Amkpaa jam byi uri nya angịnyị nyamwụ lẹ! Ọ jam họ aluji nyamwụ kwiwa lẹ! Ọ họ ká ọpyị nyamwụ bala angịnyị nyamwụ la charị-charị lẹ.”

⁴⁴IMosisi bala iJochuwa ọnyị nya iNun wa ẹla ọlẹpwụ nya eje ọwẹ kpẹẹkpẹẹ wuu ha ala Isirẹlụ wo.

⁴⁵Ụka ká iMosisi ya ala ịwẹ je ala Isirẹlụ kpá lẹ,

⁴⁶ọ byaa yẹkẹẹ, “Anụ-ụ̀ kpa ehile ịlẹ wuu kam ya hanụ alẹ-ẹ̀ wẹ kanụ maa ya je anyị nyanụ chajị kị ka ju ihi nya ọmẹjẹ nya Ohe Oluhye wuu kpẹẹkpẹẹ mẹ.

⁴⁷Ọmẹjẹ ịwẹ-ẹ́ ri ẹla nya ayịlọ koo. Ịwa ọhịhị nyanụ à dopịlẹ lẹ. Ó-ri kanụ ju ihi nyaa, anụ ka hị tata ọ-ọpyị ọlẹ kanụ wẹẹ kpoye nya Ihu ịJọdan kaka kụ.”

⁴⁸Ẹnẹwẹ-ẹnẹwẹ kpangga, Amkpaa-à byi iMosis yẹkẹẹ,

⁴⁹“Kele ka uhye nya Ịgbọdọ nya Abarim ọ-ọpyị nya iMowabụ ọlẹ kọ jahị da iJeriko wẹ mẹ. Kpụ uhye nya Ọgbọdọ nya iNebo ká yẹ ọpyị nya iKenan ọlẹ kam wẹẹ ka ya ha ala Isirẹlụ la mẹ.

⁵⁰U-uhye nya ọgbọdọ ọwẹ ā ka gbu jaabwọ ká Erọn ọnyịnang gbu lẹẹ ọ-Ọgbọdọ nya ịHọọ lẹẹ lẹ,

⁵¹chajị anụ angị imimiiye ịwẹ-ẹ́ jum ihi ị-ịlahị nya ala Isirẹlụ ka. Ụka kanụ juwa ẹ-ẹga nya ẹmwụ-enyi nya iMeriba ọ-ọnụ nya epweji nya ịKadẹchị u-ugbileji nya iSiin, anụ ya ẹpẹpẹ jum a-ahị nya ala Isirẹlụ.

⁵²Lẹẹlẹ, à ka godayị yẹ ọpyị ọwẹ hwẹẹẹ kem ịnyị. Á ka ya ẹta chị ọpyị ọlẹ kam wẹẹ ya ha ala Isirẹlụ kaka.”