Read idege Ehile Ọmada 33 Bible Online

Ehile Ọmada 33 - idege bible

Ehile Ọmada 33

¹Ọlẹ ri ahị ọlẹ ká iMosisi ọngịnyị nya Ohe Oluhye wa kụrụ ala Isirẹlụ ene kọọ gbu.

²“Amkpaa wẹ bwu Ọgbọdọ nya ịSayịnayị, ọ kpehe lala ẹnụ ha angịnyị nyamwụ bwu Ẹdọm. Ọ hụ́ ya ahịgboo haa bwu Ọgbọdọ n ya ịParan. Ọ kpa alegu-ẹrụ angị ụnọ iwo ba ịlọmwụ, lẹlẹlẹ nya ila juwa wuru kowu-kowu ụ-ụbwọ upwuriri nyamwụ.

³Ịnyịlẹhị ịnyị, angịnyị nyang hán̄g, à chẹwụ ke angị ri ịnyang wuu. Ị dịrẹ ọgụ-ẹpẹtẹ nyang, juwa ba ọmẹjẹ nyang jẹ.

⁴IMosisi ya ehile hahị nya ang ọlala nyahị ahị anyị nya iJekọbụ.

⁵Amkpaa ri adịrahụ nya ala Isirẹlụ ụka ká alegbeju nya alụma tụguru, ká alimwawụ nya ala Isirẹlụ wẹẹ kaka jịra.”

⁶IMosisi ya ẹla rụ imwawụ nya iRubẹn yẹkẹẹ, “Alimwawụ nya iRubẹn ā hị, ị̄ gbu hụrụ koo, iru alụwa-à ju ka odu lẹ.”

⁷Ọ ya ẹla rụ imwawụ nya iJuda yẹkẹẹ, “Amkpaa ee, wo omyi nya ida nya imwawụ nya iJuda ká daa ụbwọ, kpaa nyà chị alimwawụ ịkịla ọgụ, ya ọngịrị ju ugburubwọ nyaa, ká daa ụbwọ kụrụ aluji nyaa!”

⁸Ọ ya ẹla rụ imwawụ nya iLivayị yẹkẹẹ, “Amkpaa ee, ya iTumim bala Urim nyang ha ala iLivayị anchẹ ịkpẹẹkpẹẹ nyang mẹ. À maa yẹ ị-ịMasa, à jaa i-iMeriba nyori ị la kpẹẹkpẹẹ.

⁹Ala iLivayị ju ihi nyang gụ adaa bala ịnaa tụ aanaa bala anyị nyaa. Ị ju ihi nya ehile nyang bala ọ-họ kpẹẹkpẹẹ ẹ-ẹga nya iro nyang.

¹⁰Ị ka mẹ ehile nyang jẹ anyị nya iJekọbụ. Ị ka ya ọmẹjẹ nyang ha ala Isirẹlụ. Ị ka ju iya nya ịtangare ila hang bala ọ-kịla iya ọ-rụ ila ogidi nyang.

¹¹Amkpaa ee, wahị kụrụ ala iLivayị, ká ye ụkụrwọ ọlẹ kị kaa họ myị. Du aluji nyaa abwọ yịgẹ-yịgẹ, ká gaa beji kpàlị-kpàlị, chajị kị jẹ wuleji myị ẹnẹnẹhẹ kaka.”

¹²Ọ ya ẹla rụ imwawụ nya iBenjamịn yẹkẹẹ, “Anụ alimwawụ nya iBenjamịn há Amkpaa, ọọ chẹwụ keenu lụka nya hị ọpyẹpyẹ wuu, ọ dagaga junu ụka myị ụka juwa gbenu hi ang ọtịpyọ ọnyị myị ọnyị.”

¹³Ọ ya ẹla rụ imwawụ nya iJosẹfụ yẹkẹẹ, “Amkpaa-ā wahị kụrụ ọpyị nya alimwawụ nya iJosẹfụ, lenyi ododo bwu uhye-ọgba bala enyi o-bwu ekpeleji nya ọpyị.

¹⁴Ọpyị nyaa-ā nwụ egbe kị ka kpa ẹnụ gā kị nwụ kụchọ-kụchọ lọya ọnyị myị ọnyị.

¹⁵Ekeji ịlịgbọdọ i-bwu orogo-orogo nyaa ịwẹ ā nwụ nyọ́ọ̀nyọ́ọ̀ tụ ilikiti inyogo-inyogo nyaa.

¹⁶Ọpyị nyaa-ā myị la ang ọnyịịla ọnyị myị ọnyị bala ọnahị nya ọngọlẹ kọ ya ẹla bwu ẹpwụ nya ụmẹ o-juwa rụ ila. Ahị ọwawa ịwẹ wuu ā wẹ uhye nya iJosẹfụ, kị kụrụ egbeju nyamwụ ọwa kọ ri adịrahụ lẹpwụ nya aanamwụ wuu.

¹⁷IJosẹfụ lọngịrị lala ẹnụ, àchụ nyamwụ la giri-giri lala ịnya ẹhya, àchụ ịịwa-à ri iru ụnụnụụnọ nya ala ịManasẹ bala ụnụnụụnọ nya ala Ifurem lẹ. Ọ ka kpaa chị iru nya ẹpwụma hụlẹẹ, taa tuuu lalaala ka ju ọbaba nya odehe ọlẹ.”

¹⁸Ọ ya ẹla rụ imwawụ nya iSebulọn yẹkẹẹ, “Alimwawụ nya iSebulọn ā pyẹ pyọ́ọ̀ọ̀ ẹ-ẹpwụ nya ọhị ọdada kele-warị nyaa, ká alimwawụ nya Isakaa-ā kụ ẹpwa-ẹpwa pyẹ pyọ́ọ̀ọ̀.

¹⁹Ịị diro angịnyị ka uhye ọgbọdọ, ịị kịla iya ipwoku ụ-ụwa. Ịị ye ụdụ nya bwu ẹpwụ nya ihu bala ang-ụdụ ịkpịbaa ị-ịpyị.”

²⁰Ọ ya ẹla rụ imwawụ nya ịGadị yẹkẹẹ, “Ogbo ā ri nya Ohe Oluhye ọngọ pyẹ egeji nya ịGadị ẹpwụ! ỊGadị kụ ị̀nya lala ugẹbẹ ya ẹhị rịrị nyọka hụla iyo ọlẹ kọ ka wu hwẹ́ẹ̀hẹ́ẹ̀;

²¹Ọchụ ọpyị ọhagụ wuu ha ịlọmwụ, ebwo nya ang opwoku olegbeju ị ya họọ lẹ. Ụka ká alegbeju nya ala Isirẹlụ tụguru, ị họ ehile nya Amkpaa jịra bala ọ-ba ọmẹjẹ nyamwụ jẹ.”

²²Ọ ya ẹla rụ imwawụ nya ịDan yẹkẹẹ, “ỊDan ri ụ́gba nya ugẹbẹ, ọ gbajị chirom-chirom bwu ịBachan.”

²³Ọ ya ẹla rụ ịNafụtali yẹkẹẹ, “ỊNafụtali ee, à kpụ ụdụ chakụ-chakụ lọnahị nya Amkpaa, Ahị ọwawa nya Amkpaa myịng pwẹẹpwẹẹ, ọpyị nyang ā jẹ bwu ihu ọkịlọlọ nya ịGalili lalaala ka ju ka edii mẹ.”

²⁴Ọ ya ẹla rụ imwawụ nya Achẹẹ yẹkẹẹ, “Ahị ọwawa nya Achẹẹ ā gụ ịnya imwawụ ịkịla, kọ ri ọnụ-ọnyị nya aanamwụ, Ekeji nya olivu ā myị̀ ọpyị nyamwụ yịrịtị̀tị̀ị̀tị̀.

²⁵Ogirigba ilepweji nyamwụ ā ri oje-oje, angịnyị nyang ā lọngịrị jaabwọ kanụ hị tata kaka ba.”

²⁶Anụ ala Isirẹlụ ee, ojiga ọhẹ-lọhẹ-ẹ́ lala Ohe Oluhye nyanụ koo. Ọ juwa wẹ bwu uhye-ọgba lihi ọlala nyamwụ tụ egbamwụ da yahị da warị nyọka danụ ụbwọ.

²⁷Ohe Oluhye o-gbe oyi myị oyi à ri ẹga ọkpịbaa nyanụ lẹ, Ọọ wuhi kpa legbirabwọ i-gbe oyi myị oyi nyamwụ. Ọ ku aluji nyanụ hi iwe hanụ ụka kanụ wẹẹ jẹ kịlahị-ịlahị, juwa duunu jwaa byinu anụ nyị nwaa, anụ nyị nwaa.

²⁸Lẹẹlẹ, ala Isirẹlụ kụ ẹ-ẹpwụ nya okpunyi, ịwa anyị ịtụma nya iJekọbụ lokpunyi, ọ-ọpyị ọlẹ ká ambakpa bala ere dịda, ká amwụ oluhye-ọgba kaa kpa ọpyị la hyẹ̀hyẹ̀.

²⁹Ala Isirẹlụ ee, Amkpaa chakpa wahị kụrụụnụ! Oowo tị́ lala anụ wẹẹ? Amkpaa chịnụ da, ọwa-à ri ọkụmada ọdanụ ụbwọ lẹ. Ọọwa-à ri oge ọ-ka ya ọkụrụ-kụrụ hanụ lẹ! Aluji nyanụ ka wẹ kaka chị arụụ eji bịlẹnụ nyị bà hi ịwa mẹ, anụ tị kpaa beji jaa chẹẹchẹẹ chẹẹ.