Read idege Ehile Ọmada 4 Bible Online

Ehile Ọmada 4 - idege bible

Ehile Ọmada 4

¹Ọọwa, iMosisi à byi ala Isirẹlụ yẹkẹẹ, “Anụ ala Isirẹlụ ee, anụ wo kpẹẹkpẹẹ kanụ ju ihi nya ehile bala ọmẹjẹ ịlẹ kam wẹẹ ka ya hanụ wuu, chajị kanụ ka hị bala ọ-jụ kele ka kụ ọpyị ọlẹ ká Amkpaa Ohe Oluhye nya adanụ igogo anyị wẹẹ ya hanụ mẹ.

²Anụ ya ẹlẹlẹhẹ haju ehile ịlẹ kam ya hanụ-ụ̀ wẹ ka, anụ tị pẹhi ọhẹ-lọhẹ nyaa deeji ka ịnyịnyị. Anụ-ụ̀ ju ihi nya ehile nya Amkpaa Ohe Oluhye nyanụ ịlẹ kam ya hanụ-ụ̀ wẹ kpẹẹkpẹẹ mẹ.

³Anụ ayịdang tị kpẹhị nya ịlọnụ yẹ ang ọlẹ ká Amkpaa họ ị-ịBẹtị-ịpẹyọ. Amkpaa Ohe Oluhye nyanụ ta alẹpwụ nyanụ ịlẹ kị kpụ ojiga ịBaalụ ụ-ụwa ị-ịPẹyọọ ayịreji.

⁴Ma, anụ angịlẹ kanụ ju ihi nya Amkpaa Ohe Oluhye nyanụ kpẹẹkpẹẹ à jam lọhịhị daalẹ lẹẹ lẹ.

⁵“Anụ yẹ mẹ, m̀ mẹ ehile jẹẹnụ kpẹẹkpẹẹ wuu jaabwọ ká Amkpaa Ohe Oluhye nyam byim am nyị họ mẹ lẹ. Anụ-ụ̀ kpaa jịra kpẹẹkpẹẹ ọ-ọpyị ọlẹ kanụ wẹẹ ka jụ ka nyọka ye la mẹ.

⁶Anụ kpa ehile ịwẹ wuu yẹẹyẹẹ nyọka mẹjẹ alẹpwụma ịkịla ya anụ jẹ ẹla lụmẹ mẹ, ụka kị wo ẹla chajị nya ehile iwe, ị ka juwa kpa ya yẹkẹẹ, ‘Ahyu! Ala Isirẹlụ ẹpwụma ọtụka ọlẹ jẹ ẹla lụmẹ.’

⁷“Alẹpwụma ọtụka ọkịla ọhẹ-lọhẹ-ẹ́ juwa kị la ojiga ọlẹ kọọ tụ jwaa chwẹẹ nyọka daa ụbwọ jaabwọ ká Amkpaa Ohe Oluhye nyahị kaa họ hahị ụka kahị bịlẹ ụbwọ ọdada bwu ẹga nyamwụ ka.

⁸Alẹpwụma ọtụka ọkịla ọhẹ-lọhẹ-ẹ́ juwa kị la ehile ị-la kpakpa lala ehile ịlẹ kam wẹẹ mẹjẹẹnụ alẹ kpong-kpong kaka.

⁹“Anụ-ụ̀ kpẹhị chịng mẹ. Anụ dụmwọ-dụmwọ ká ang ịlẹ kanụ kpẹhị nya ịlọnụ yẹ-ẹ̀ wẹ ā gụụnụ deeri ẹnẹnẹhẹ ẹ-ẹpwụ nya ọhịhị nyanụ koko. Anụ-ụ̀ tịrọnụ ya je anyị nyanụ bala anyị ịtụma nyanụ ịnyịnyị,

¹⁰ọgụgụ chajị nya ẹnụtụrụ ọlẹ kanụ godayi riri ị-ịlahị nya Amkpaa Ohe Oluhye nyanụ o-Ọgbọdọ nya ịSayịnayị. Ọ byim ẹnụ ọọwa yẹkẹẹ, ‘Kpa angịlẹ warị kaka tụguru ẹ-ẹga nyam kị ka wo ẹla ọlẹ kam wẹẹ ka ya taa chajị kị ka ju ihi nyam ẹ-ẹpwụ nya ẹnụtụrụ nya ohihi nyaa wuu o-ọpyị ọọwa bala ọ-ka mẹ ang ịlẹ jẹ anyị nyaa ịnyịnyị.’

¹¹Ọọwa, ānụ wẹ kaka godayị ọ-ọmwụ nya ọgbọdọ lẹlẹ. Ụka ọọwa, egbamwụ inyibiri hite-hite kpụ ke ọgbọdọ wuu bala ila o-juwa wuru u-uhye nyamwụ ju kele ka uhye-ọgba.

¹²Anụ ya jaa jaabwọ ká Amkpaa ya ẹla tanụ bwu ẹpwụ nya ila ọọwa. Anụ wo ẹla ọlẹ kọ juwa ya tanụ, anụ́ tị yọọ ọwa ayịdang lẹhị nya ịlọnụ jaabwọ ká abwụma nyamwụ la kpong-kpong ka.

¹³Ọ ya dodehe jenu iro ọnwanwa nyamwụ ọlẹ Ehile Iwo ịlẹ kọ danụ ehile kanụ ka kpa kpẹẹkpẹẹ. Ọ daa u-uhye nya ajwọ ịpapịla imiiye.

¹⁴Ụka ọọwa, Amkpaa byim am nyị mẹ ehile ịlẹ wuu kanụ wẹẹ ka kpa ọ-ọpyị ọlẹ kanụ wẹẹ ka jụ ka nyọka yẹ la jẹẹnụ.

¹⁵“Ụka ká Amkpaa ya ẹla tanụ bwu ẹpwụ nya ila ọ-Ọgbọdọ nya ịSayịnayị lẹ, ánụ yẹ abwụma nya ịngịngịhyẹ ka. Lẹẹlẹ, anụ-ụ̀ kpahị ju ịlọnụ yẹẹyẹẹ

¹⁶chajị kanụ ka họ ọnyobyi bwula ọ-họ ukpeku o-me ịngịngịhyẹ ka ịlọnụ kpong-kpong kaka. Anụ họ ukpeku o-me ọnyang lee ọlẹng,

¹⁷lee o-me ụma nya iyo ọhẹ-lọhẹ lee ọchịnụ ọhẹ-lọhẹ

¹⁸lee iyo ị-kpa apwụ gbileji lee iyenyi kpong-kpong kaka mẹ.

¹⁹Ụka kanụ hu ẹhị hwaa, anụ ka yẹ ẹnụ bala ọya bala ịdịchụ iluhye-ọgba myị. Ọkịlẹtụ ā tị gunu gbịla nyọka kpụ eteji lee ọ-myị ẹrụ haa koo. Amkpaa Ohe Oluhye nyanụ à ya ang ịwẹ ha angịnyị ehe ịkịla wuu nyọka kpụ eteji ha lẹ.

²⁰Ma, anụ tị lẹ, Amkpaa gbanụ kpehe bwu ọpyị nya iJipiti, ẹga nya uhila nya akama ọlala ila nya utiyo. Ọ huunu kaka ri angịnyị nyamwụ jaabwọ kanụ ri wẹ ale.

²¹Ọọ-lajị nyanụ à du ká Amkpaa wụ ẹjẹ tam lẹ. Ọ yọnụ deeji ya am nyị́ ka kpoye nya Ihu ịJọdan nyọka jụ ka ọpyị ọnyịịla ọlẹ kọọwa nyị wẹẹ ya hanụ ka.

²²Am jam ka gbu am̀ ọ-ọpyị ọlẹ lẹ. Ḿ ka kpoye nya Ihu ịJọdanụ ka ọpyị ọwẹ kaka. Anụ tị lẹ, anụ juwa ka kpoye kele ka ye ọpyị ọnyịịla ọọwa kụ lẹ.

²³Lẹẹlẹ, anụ kpahị ju ịlọnụ mẹ, kanụ deeri nya iro ọlẹ ká Amkpaa Ohe Oluhye nyanụ nwa tanụ koko. Ānụ tị họ ukpeku o-me ịngịngịhyẹ kaka jaabwọ ká Amkpaa Ohe Oluhye nyanụ danụ ehile wẹ mẹ,

²⁴chajị Amkpaa Ohe Oluhye nyanụ ri Ohe ọ-jẹ ijiiji. Ọ lala ila ọlẹ kọ kaa ta ang ayịreji.

²⁵“Oriri kanụ kụ ọ-ọpyị ọwẹ tata kpụ anụ ma anyị lanyị nyanụ tị̀tị̀ ma anyị wẹwẹ aalẹ, ānụ bịrị ịlọnụ bwula ọ-họ ukpeku o-me ịngịngịhyẹ ha ịlọnụ kpong-kpong koo. Ọhọhọ ọlịnyị ri ang onyobyi ị-ịlahị nya Amkpaa Ohe Oluhye nyanụ. Ọ ka wọọ ẹjẹ.

²⁶Ánụ ju ihi nya ẹlẹwẹ kam ya wẹ kaa aalẹ, m̀ jam wụrụ ohe bala eji nya alibeenu tuunu pyịpyị alẹ ọlẹ lẹ. Anụ ka myị́ kpá kụrwa-kụrwa wuu hi ọpyị ọlẹ kanụ wẹẹ jẹ kpoye nya Ihu iJọdan kaka ye la. Ánụ ka kụ ụwa tata ka. Anụ ka tayireji gbang-gbang wuu.

²⁷Amkpaa ka nyiinu epepe tụ ẹpwụma ịkịla da. Angịnyị nyanụ ịlẹ kị ka hi juwa lọhịhị ẹ-ẹpwụma ịịwa tị ka la wure-wure.

²⁸Ụ-ụwa ānụ ka kpụ eteji ha ijiga ịlẹ ká angịnyị ehe họ lekeji bala ajwọ lụbwọ ịlaa lẹlẹ. Ijiga ịịwa-á tị jẹ-ẹ̀ yọyị lee o-wo ẹla lee o-ri ang lee o-wo oru kpong-kpong ka.

²⁹Bwu ẹpwụ nya iwe-ahụrụ nyanụ ịwẹ, ànụ ka juwa tịtọ nya Amkpaa Ohe Oluhye nyanụ kekeeke. Ó-ri kanụ tịtọ nyamwụ lọkịlẹtụ nya nyanụ wuu aalẹ, anụ ka yọọ.

³⁰Ụka kanụ chịpwụrụ bwu ẹpwụ nya ụka olujwo ịwẹ wuu ị-ịlahị lẹ, ānụ ka nyà wẹ ẹga Amkpaa Ohe Oluhye nyanụ nyọka ju ihi nyamwụ lẹlẹ.

³¹Amkpaa Ohe Oluhye nyanụ ri Ohe ọ-yẹ ahyẹẹrwẹrwa. Ọ́ ka tụụbwọ hiinu lee ọ-tanụ ayịreji ka. Ọ́ tị ka deeri nya iro ọlẹ kọọwa ayịdang nwà ta adanụ igogo anyị ka ịnyịnyị.

³²“Ànụ tịtọ wo nya ang ịlẹ kị họ ene kịị manụ bala o-bwu ụka ká Ohe Oluhye họ angịnyị ehe jam odehe nya ọgbanyẹ-ọgbanyẹ wẹẹ. Anụ towo kekeeke bwu ọbaba nya odehe ọhẹ kele ka ọbaba ọkịla ịnyịnyị mẹ. Ang ọtụka o-me ọlẹ họ ẹnẹnẹhẹ lẹ-ẹ́? Ọngọhe wo oja nya ịngịhyẹ ọlịịlẹ ẹnẹnẹhẹ lẹ-ẹ́?

³³Alụma ọhẹ-lọhẹ ji kị wo omyi nya ohe ọhẹ kọ ya ẹla taa bwu ẹpwụ nya ila kpá, kị kụ ụwa lahị-ị̄ị́? Anụ tị-ị̀ wẹ lahị-lahị.

³⁴Anụ yẹ wẹẹ, ohe ọhẹ-lọhẹ byẹjẹ be bwụụụ kele ka gba alụma ọhẹ kpehe bwu ẹpwụ nya ụma ọkịla kpaa kaka ri angịnyị nya ịlọmwụ ẹnẹnẹhẹ lẹka. Amkpaa Ohe Oluhye nyanụ tị họ ịnyị hanụ ụ-ụwa Ijipiti. Anụ kpẹhị nya ịlọnụ yẹ gede-gede jaabwọ kọ kpa ịmayẹ bala ang-ẹjẹẹ bala ụkụrwọ ilẹbyẹbyị bala ẹwụ ọdada bala ọngịrị ọtụka nyamwụ họ ịnyị hanu.

³⁵Amkpaa mẹ ang ịwẹ jẹẹnụ chajị kanụ ka jẹ kọọwa ụbwọọmwụ à ri Ohe Oluhye. Ohe ọkịla ọhẹ-lọhẹ á ji dala ọwa kaka.

³⁶Ọ họ kanụ wo omyi nyamwụ bwu epwoohe, chajị kọ ka mẹ ang jẹẹnụ. Ọ họ kanụ yẹ ila ọtụka nyamwụ am̀ odehe, chajị kọ ka ya ẹla tanụ bwu ụwa.

³⁷Ọ la ọháha ẹ-ẹga nya adanụ igogo anyị à du kọ chụnụ anụ anyị ịtụma nyaa, kọ gbanụ kpehe lịlọmwụ bwu Ijipiti lọngịrị ọtụka nyamwụ lẹ.

³⁸Ọ ku alẹpwụma ịkịla ịlẹ kị lụmẹ bala ọ-la ọngịrị gụụnụ rụ hi ẹga hanụ chajị kọ ka kpanụ kele, kọ ka hu ọpyị nyaa hanụ la nya ọpyị nya ịlọnụ, jaabwọ kọ ri ịnyanụ-ụ̀ wẹ daalẹ ọlẹ.

³⁹Lẹẹlẹ, anụ-ụ̀ jẹ bala ọ-kpa ẹla ọlẹ i-irya mẹ, Amkpaa ụbwọọmwụ à ri Ohe Oluhye u-uhye-ọgba bala odehe wuu lẹ. Ohe ọkịla ọhẹ-lọhẹ-ẹ́ ji dala ọwa kaka.

⁴⁰Anụ-ụ̀ kpa ehile nyamwụ ịlẹ wuu kam wẹẹ ya hanụ alẹ ọlẹ mẹ. Ọọwa, okpunyi à ka ji hanụ bala anyị ịtụma nyanụ lẹlẹ. Anụ ka kinyaa ọ-kụ ọ-ọpyị ọlẹ ká Amkpaa Oluhye nyanụ wẹẹ ya hanụ la gbe oyi myị oyi.”

⁴¹Ọọwa lẹ, iMosisi à chụ epweji ịta ịhyẹ nọ o-oye ọlọmwẹnụ-ụtụrụ nya Ihu iJọdan lẹlẹ.

⁴²Epweji ịịwa ri ẹga ka ọlụbwọ-anịya ka kpa ọhịhị nya ịlọmwụ be rụnyẹ ka ó-ri kọọwa bala ọngọlẹ kọ nwụ-ụ́ ju awụlẹ uji ene ka. Ó-ri kọ rụnyẹ pwụ epweji ọhẹ lẹpwụ nya ịwẹ lẹ aalẹ, ọ be lẹ, ị́ ka nwọọ kaka.

⁴³Epweji ọlẹ kị chị nọ ha alimwawụ nya iRubẹn ri epweji nyaa ịBẹsẹẹ ọlẹ kọ ji ọpẹẹpẹẹ nya ikiti u-ugbileji. IMosisi chu epweji nya ịRamotu-igiliyadị ha alimwawụ nya ịGadị. Epweji nya iGolan ọla ịBachan à ri nya alimwawụ nya iManasẹ lẹ.

⁴⁴Ehile nya Ohe Oluhye bala ang ịmẹjẹ ịlẹ ká iMosisi ya haa ala Isirẹlụ a lẹẹ lẹ.

⁴⁵Ọ ya ehile ịlẹ haa ụka kị gba kpehe bwu Ijipiti kpá,

⁴⁶kị juwa ọ-Ọkpọọ ọlọmwẹnụ-ụtụrụ nya Ihu ịJọdan ụ-ụwa ịkịka ọkịla nya epweji nya ịBẹtị-ịpẹyọ. Ẹgẹwẹ ji egeji nya adịrahụ nya ala Amọ ọlẹ ka ẹnyị nyamwụ ri iSihọn. E-epweji nya ịHẹchịbọn iSihọn à hụ ri adịrahụ lẹ. IMosisi bala ala Isirẹlụ dẹwụ tọọ pyịpyị kpụ ị kụrwọọ ụka kị kpehe bwu ọpyị nya Ijipiti.

⁴⁷Ị ye ọpyị nyamwụ kụ ẹpwa bala ọpyị nya Ọọgụ Adịrahụ ọla ịBachan ọlẹ kọ ri adịrahụ oheeye nya ala Amọ.

⁴⁸Ọpyị ọwẹ bwu epweji Aroyẹẹ ọ-ọnụ nya Ihu Anọn lalaala ka ju ka Ọgbọdọ nya iSiriyọn ọlẹ kịị wụrụ ịHẹẹmọn ịnyịnyị.

⁴⁹Ọpyị ọwẹ juwa ịnyịnyị bwu ọkpọọ ọlọmwẹnụ-ụtụrụ nya Ihu ịJọdan gbee ka pwụ Ihu Ọlịma-ịma ụ-ụwa ọ-ọmwụ nya Ọgbọdọ nya iPisiga.