Read idege Ehile Ọmada 5 Bible Online

Ehile Ọmada 5 - idege bible

Ehile Ọmada 5

¹Ụka ọhẹ, iMosisi wụrụ ala Isirẹlụ wuu kaka jịra lẹ, ọ byaa yẹkẹẹ, “Anụ ala Isirẹlụ ee, anụ ke ụrụ wo ehile ịlẹ kam wẹẹ ya jenu alẹ mẹ. Anụ-ụ̀ jẹ ehile iwe kanụ kpaa jịra kpẹẹkpẹẹ mẹ.

²Amkpaa Ohe Oluhye nyahị nwa iro bala ahị ọ-Ọgbọdọ ny ịSayịnayị.

³Aadahị igogo anyị kem ọ nwà iro ọọwa ta lụka onyogo ka, ọ nwọọ tahị ahị angịlẹ wuu kahị jam lọhịhị lẹẹ alẹ ịnyịnyị.

⁴Amkpaa ya ẹla tanụ chahị junu bwu ẹpwụ nya ila u-uhye nya ọgbọdọ.

⁵Ụka ọọwa, m̀ godayị apewa nya Amkpaa bala anụ chajị kam ka ya jenu ẹla ọlẹ ká Amkpaa ya. Anụ ju uhi nya ila ọọwa, ánụ myị jẹ ka uhye nya ọgbọdọ ka. “Amkpaa ya tanụ ụka ọọwa yẹkẹẹ,

⁶‘Am à ri Amkpaa Ohe Oluhye nyanụ ọlẹ kọ gbanụ kpehe bwu ọpyị nya Ijipiti ẹga kanụ ri anyịhị ene-ene lẹ.

⁷“ ‘Ānụ kpụ eteji ha ojiga kpong-kpong ka, am Ohe Oluhye ānụ ka gbịgba ha lẹ.

⁸“ ‘Ā họ ukpeku o-me ịngịngịhyẹ oluhye-ọgba lee olodehe lee ọlẹpwụ nya enyi koo.

⁹Ānụ hirikpẹẹ haa lee ọ-gbịgba haa koo. Am kpangga kam ri Amkpaa Ohe Oluhye nyanụ wẹẹ, m̀ ri ọngọ jẹ ijiiji. M̀ kaa ya uri nya ang onyobyi ọhọhọ nya angịlẹ wuu kam waa ẹjẹ wu anyị nyaa bwu oyi ọhata ju ka ohene.

¹⁰M̀ tị kaa chị ọháha ọlala nyam ehe u-uhye nya ụnụnụụnọ nya anyị ịtụma nya angịlẹ kam háa kị myị kpa ehile nyam.

¹¹“ ‘Ānụ kpa ẹnyị nyam am Amkpaa Ohe Oluhye nyanụ họ ang ododu ka. M̀ ka yẹ ọngọngọhẹ ọlẹ kọ kpa ẹnyị nyam họ ang ododu.

¹²“ ‘Anụ kpịtịya nya Ẹnụtụrụ Ọhịnyọ Lụkụrwọ kanụ kpọọ la ịgọgọ jaabwọ ká am Amkpaa Ohe Oluhye nyanụ danụ ehile.

¹³Ẹnụtụrụ ịrwọnyẹ anụ ka họ ụkụrwọ nyanụ wuu lẹ.

¹⁴Ẹnụtụrụ ọharwiye ri Ẹnụtụrụ Ọhịnyọ Lụkụrwọ ham am Amkpaa Ohe Oluhye nyanụ. Ánụ ka họ ụkụrwọ ọhẹ-lọhẹ ẹnẹwẹ kpong-kpong ka. Ọngọngọhẹ lẹpwụ nya anyị nyanụ lee iyo ileji tụ angga ịlọpyị nyanụ á ka họ ụkụrwọ ẹnẹwẹ ka. Anyịhị nyanụ ka mwụ ịnyọ jaabwọ kanụ wẹẹ mwụ ịnyịnyị.

¹⁵Anụ tị́ kpịtịya, anụ ri anyịhị ụ-ụwa Ijipiti ẹnẹhẹ lẹ. Am Amkpaa Ohe Oluhye nyanụ à gbanụ kpehe bwu ụwa lọngịrị ọtụka nyam lẹ, Ịnyị à du kam danụ ehile ya anụ kpahị ju Ẹnụtụrụ Ọhịnyọ Lụkụrwọ ọwẹ lẹ.

¹⁶“ ‘Anụ ju adanụ bala ịnanụ ihi jaabwọ ká am Amkpaa Ohe Oluhye nyanụ danụ ehile-è wẹ. Ọọwa, anụ ka la ọhịhị oludiyo bala iwe-ahụrụ nyanụ ọ-ka há yẹẹyẹẹ o-ọpyị ọlẹ kam wẹẹ ya hanụ lẹlẹ.

¹⁷“ ‘Ānụ nwụ ọngịnyị ka.

¹⁸“ ‘Ānụ họ ụya ka.

¹⁹“ ‘Ānụ yi oyi ka.

²⁰“ ‘Ānụ ya ẹla ọnọọkịla ba ọngịnyị ehe ọọnanụ ka.

²¹“ ‘Ānụ chẹhị pyẹ̀ẹẹ nya ahụ nya ọngịnyị ehe ọọnanụ ka. Ānụ chẹhị pyẹ̀ẹẹ nya ẹpwa nyamwụ lee ọpyị nyamwụ ka. Ānụ chẹhị pyẹ̀ẹẹ nya anchẹ lee ẹna lee obyiyó lee ịngịngịhyẹ ọlẹ kọ ri ịnyamwụ ka.’ ”

²²Ọọwa, iMosisi à byi ala Isirẹlụ yẹkẹẹ, “Ehile ịlẹ ká Amkpaa ya hanụ wuu ụka kanụ tụguru ọ-ọmwụ nya ọgbọdọ à wẹ lẹ. Ụka ọọwa, ọ ya ẹla lomyi ogboo bwu ẹpwụ nya ila bala egbamwụ bala owu ọlẹ kọ chị kpịlẹẹẹ. Ọ́ ya ehile ịkịla ịhyẹ hanụ dala ịwẹ kaka. Ọọwa, ọ daa u-uhye nya ajwọ ịpapịla imiiye lẹ, ọ gyaa ham lẹlẹ.

²³Ụka ká ila juwa wuru ọ-ọgbọdọ, kanụ wo omyi bwu ẹpwụ nya ukpowu ohite-hite ọọwa, ịgabwọ bala alegbeju nya imwawụ nyanụ wuu wẹ ẹga nyam.

²⁴Ị byim yẹkẹẹ, ‘Amkpaa Ohe Oluhye nyahị chị ụmụmẹ bala ihi ọlala nyamwụ ehe mẹjẹẹhị, ahị wo ẹla oyaya nyamwụ bwu ẹpwụ nya ila lẹ. Ahị yẹ lịlọhị lẹẹ alẹ nyori ọngịnyị ehe ka jẹ-ẹ̀ juwa lọhịhị myị wẹẹ ụka ká Ohe Oluhye-é ya ẹla lịlọmwụ tọọ kpá.

²⁵Ee lẹ, ịyẹ tị́ du kahị lẹẹ ka ya ịlọhị ga ha igu ugbẹnyị mẹ? Ila ọtụka ọwẹ ka rụhị. Ó-ri kahị godayi wo ẹla oyaya nya Amkpaa myịmyị gụ ọlẹ, áhị ka dayi la o-gbugbu kaka.

²⁶Ọngịnyị ọhẹ-lọhẹ-ẹ́ ke ụrụ wo omyi-ẹla nya Ohe Oluhye Ọlọhịhị jaabwọ kaahị wo-ò wẹ, ọ juwa lọhịhị ẹnẹnẹhẹ lẹka.

²⁷Lẹẹlẹ, iMosisi, ahụ ā jẹ tụ kele ka wo ẹla myị ẹla ọlẹ ká Amkpaa Ohe Oluhye nyahị ka ya mẹ. Ọọwa lẹ, ká nyà tịrẹkpẹ kaka tịrọnụ ya jehi mẹ. Ahị ka ke ụrụ wo lang, ahị-ị̀ ju ihi nya ẹla ọọwa lẹ.’

²⁸“Amkpaa wo ẹla ọlẹ kanụ ya tam. Ọọwa, ọ byim yẹkẹẹ, ‘M̀ wo ẹla ọlẹ ka angịlẹ ya tang-ǹg wẹ lẹ. Ẹlẹwẹ kị ya wuu la kpakpa.

²⁹Ang pyii ká ịịwẹ ọkịlẹtụ nyaa-à ka la ụka wuu kị ka juwa ju uhi nyam bala ọ-kpa ehile nyam wuu! Ọọwa ka du ka iwe-ahụrụ ka há haa bala anyị ịtụma nya gbe oyi myị oyi.

³⁰Kele ká byaa kị rụ tịrẹkpẹ ka ẹpwang nya ọdụ nyaa mẹ.

³¹Ahụ tị lẹ, aa hi godayị rịrị am̀m ẹ-ẹga nyam chajị kam ka ya ehile nyam wuu je ala Isirẹlụ kị jẹ-ẹ̀ kpaa jịra kpẹẹkpẹẹ o-ọpyị ọlẹ kam wẹẹ ya haa la mẹ.’

³²“Lẹẹlẹ, anụ ala Isirẹlụ, anụ-ụ̀ kpẹhị chịng, kanụ họ ang myị ang ịlẹ ká Amkpaa Ohe Oluhye nyanụ danụ ehile ya anụ nyị họ wuu mẹ. Ānụ pẹhi ọhẹ-lọhẹ nyaa deeji koko.

³³Anụ ka họ ehile ịlẹ ká Amkpaa Ohe Oluhye nyanụ ya hanụ wuu kpẹẹkpẹẹ. Ọọwa, iwe-ahụrụ nyanụ à ka há hanụ lẹ, anụ ka hị tata ọ-ọpyị ọlẹ kanụ wẹẹ kaka ye la lẹlẹ.