Read idege Ehile Ọmada 6 Bible Online

Ehile Ọmada 6 - idege bible

Ehile Ọmada 6

¹“Ịlẹ wuu à ri ehile bala ọmẹjẹ ịlẹ ká Amkpaa Ohe Oluhye nyanụ dam ehile am nyị mẹjẹẹnụ lẹ. Ọ ya anụ nyị ka baa jẹ kpẹẹkpẹẹ ọ-ọpyị ọlẹ kanụ wẹẹ kaka ye la.

²Anụ bala anyị nyanụ bala anyị ịtụma nyanụ ka ju ihi nya Amkpaa Ohe Oluhye nyanụ jaabwọ myị abwọ kanụ hịhị tata ka ba. Anụ ka kpa ehile nyamwụ ịlẹ kam wẹẹ ya hanụ wuu chajị kanụ ka la ọhịhị oludiyo.

³Lẹẹlẹ, anụ ke ụrụ mẹ, anụ ala Isirẹlụ, kanụ kpa ehile ịwẹ wuu jịra kpẹẹkpẹẹ mẹ. Ọọwa, iwe-ahụrụ nyanụ à ka há lẹ, anụ ka pyẹ kaka ri ẹpwụma ọtụka ọ-ọpyị ọnyịịla o-ju eyo bala ọ-há ang ọọwa jaabwọ ká Amkpaa Ohe Oluhye nya adanụ igogo anyị myị ọnụ ene-ene lẹlẹ.

⁴“Anụ ala Isirẹlụ ee, anụ wo mẹ, Amkpaa Ohe Oluhye nyahị kẹnẹ-kẹnẹ à ri Amkpaa lẹ.

⁵Amkpaa Ohe Oluhye nyanụ ka haanụ bwu ẹpwụ ọkịlẹtụ nyanụ wuu bala ugbodu okpukpuru nyanụ wuu bala bwula ọngịrị nyanụ wuu.

⁶Anụ-ụ̀ kpa ehile ịlẹ kam wẹẹ ya hanụ ale i-irya nyanụ ụka wuu mẹ.

⁷Anụ ka kpa ma ya je anyị nyanụ. Anụ ka ya ẹla rwaa ụka kanụ juwa ẹ-ẹpwa lee ụka kanụ juwa ụ-ụgbẹyị bala ụka kanụ nọnọ juwa mwụ ịnyọ lee ụka kanụ wuleji juwa họ ukurwo.

⁸Anụ ka yaa do bwọ ịlọnụ a-abwọ bala ọ-yaa ba ịlọnụ i-itochi nya ang-ẹjẹẹ ị-kpa kpụ ịlọnụ ịtịya.

⁹Anụ ka daa ba ekeji i-wu ukpileku nyanụ kpa bala ọ-daa ba ogirigba nyanụ.

¹⁰“Amkpaa Ohe Oluhye nyanụ ka kpanụ kele ka ọpyị ọlẹ kọ myị ọnụ nyamwụ ha adanụ igogo Ebiraham bala Ayisiki bala iJekọbụ anyị. Epweji itụka ị-pyẹ pyọọ ịlẹ kanụ nwụ lụbwọ nya ịlọnụ ka ụwa-à ri lẹ.

¹¹Ẹpwa ịlụwa ka myị la ang ịnyịịla-ịnyịịla ịlẹ kaanu à ya juwa lịlọnụ ka. Ịwẹlụ ịlẹ kaanụ à wu ka bala ẹrụ nya alakọnụ ịlẹ kanụ wuwu ka bala ekeji nya olivu ịlẹ kanụ wu lịlọnụ ka juwa ụ-ụwa ịnyịnyị. Ụka ọọwa ká Amkpaa-á kpanụ pwụ ụwa kanụ ye ang ri jaabwọ kanụ tịtọ ka ba lẹ,

¹²anụ-ụ̀ kpẹhị chịng mẹ, kanụ deeri nya Amkpaa ọlẹ kọ gbanụ kpehe bwu ọpyị nya Ijipiti ẹga kanụ ri anyịhị wẹ ene koko.

¹³Anụ ju ihi nya Amkpaa Ohe Oluhye nyanụ. Ọwa kem anụ ka gbịgba ha bala ọ-la ọnụ ọmyịmyị nyanụ wuu bwula ẹnyị nyamwụ lẹ.

¹⁴Ānụ kpụ eteji ha ojiga ọhẹ-lọhẹ nya alẹpwụma ịlẹ kị kụ dagaga junu-ù wẹ koo,

¹⁵chajị Amkpaa Ohe Oluhye nyanụ ọlẹ kọ kụ tanụ-ụ̀ wẹ ka wụ ẹjẹ ọtụka-ọtụka tanụ, ọ ka tanụ ayịreji gbanggbang hi odehe. Ọwa ayịdang ri ọngọ jẹ ijiiji.

¹⁶Ānụ ma Amkpaa Ohe Oluhye nyanụ ye jaabwọ kanụ họ ụ-ụwa ị-ịMasa koo.

¹⁷Anụ-ụ̀ kpa ehile bala ọmẹjẹ ịlẹ wuu ká Amkpaa Ohe Oluhye nyanụ ya hanụ kpẹẹkpẹẹ mẹ.

¹⁸Anụ ka họ ang ọlẹ ká Amkpaa ya nyị pwoku bala o-ri ọnyịịla, chajị ka iwe-ahụrụ nyanụ ka há hanụ. Ọọwa, anụ ka jẹ-ẹ̀ la ọngịrị kele ka ye ọpyị ọnyịịla ọ-há ang ọlẹ ká Amkpaa myị ọnụ nyamwụ ha adanụ igogo anyị lẹlẹ.

¹⁹Anụ ka jụ aluji nyanụ wuu ku rụ ụka kanụ juwa jụ ka ọpyị ọọwa jaabwọ ká Amkpaa ya.

²⁰“Ụka juwa wẹ ká anyị nyanụ ka tọnụ wo yẹkẹẹ, ‘Ịyẹ tị́ du ká Amkpaa Ohe Oluhye nyahị ya ahị nyị kpa ehile ịlẹ wuu ịnyị-ị̀?’

²¹Ụka ọọwa, anụ-ụ̀ byaa yẹkẹẹ, ‘Ahị ri anyịhị nya adịrahụ nya ala Ijipiti ene. Ọọwa Amkpaa-à gbahị kpehe lụbwọ ọngịrị ọtụka nyamwụ lẹ.

²²Ahị kpẹhị nya ịlọhị yẹ jaabwọ ká Amkpaa họ ụkụrwọ ilẹbyẹbyị bala ang-ẹjẹẹ iluhi-uhi tụ ala Ijipiti bala adịrahụ nyaa bala alẹpwa nyamwụ wuu pyịpyị.

²³Ọ tị gbahị kpehe bwu ụwa, kpahị wẹ ẹgẹlẹ nyọka ya ọpyị ọlẹ hahị jaabwọ kọ myị ọnụ nyamwụ ha adahị igogo anyi.

²⁴Ọọwa, Amkpaa-à dahị ehile ya ahị nyị kpa ehile ịlẹ wuu kpẹẹkpẹẹ bala ọ-ju ihi nyamwụ chajị ká ang wuu nyị ka há hahị bala ahị ọ-ka hụ lokpunyi jaabwọ kahị hụ lẹẹ lẹẹlẹẹ lẹ.

²⁵Ó-ri kahị kpa ehile nya Amkpaa Ohe Oluhye nyahị ịwẹ wuu jịra kpẹẹkpẹẹ jaabwọ kọ ya lẹ aalẹ, ahị họ hiigu ẹ-ẹga nyamwụ lẹ.’