Read idege Ehile Ọmada 7 Bible Online

Ehile Ọmada 7 - idege bible

Ehile Ọmada 7

¹“Ụka ká Amkpaa Ohe Oluhye nyanụ ka kpanụ ka pwụ ọpyị ọlẹ kanụ wẹẹ jẹ kaka ye kụ, ọ ka ku alẹpwụma nya iHiiti bala ịGẹgachị bala Amọ bala iKenan bala ịPẹrisi bala iHivi bala iJebusi wuu rụ hiinu. Ẹpwụma irwiye ịwẹ wuu tị lụmẹ bala ọ-la ọngịrị gụụnụ.

²Ụka ká Amkpaa-á ya angịwẹ junu ụ-ụbwọ kanụ kụrwaa chẹẹchẹẹ lẹ, anụ-ụ̀ taa ayịreji gbanggbang mẹ. Anụ nwa iro ọhẹ-lọhẹ taa koo. Anụ tị yaa ahyẹẹrwẹrwa kpong-kpong ka ịnyịnyị.

³Anụ ye anyị nyaa nya ịhụ nyanụ koo. Anụ tị myị ká anyị nyanụ bala anyị nyaa-ā ye awụlẹ ka ịnyịnyị.

⁴Ánụ họ ịnyị, ị ka ji anyị nyanụ ahị kpata rụ hwahị hi Amkpaa kaka kpụ eteji ha ijiga lẹ Amkpaa-à ka wụ ẹjẹ tanụ lẹ, ọ ka tanụ ayịreji i-ijata-ijata lẹlẹ.

⁵Lẹẹlẹ, ang ọlẹ kanụ ka họ ẹ-ẹga nya alẹpwụma ịwẹ ri anụ ka tụrụ ogidi ikiliya nyaa ju eji. Anụ ka be ajwọ igbori-gbori irigọgọ nyaa ịlẹ kị me rịrị kọkọ ene yịgẹ-yịgẹ. Anụ tụrụ ekpeku nya ojiga Achẹra nyaa deeji kanụ chị ekpeku nyaa ila.

⁶“Anụ ala Isirẹlụ ri angịnyị ịlịgọgọ ịlẹ kanụ ri ịnya Amkpaa Ohe Oluhye nyanụ. Bwu ẹpwụ nya iru nya alodehe ọlẹ wuu ọ chụnụ kanụ ka ri angịnyị nya ụbwọ nya ịlọmwụ ịdatị-datị lẹ.

⁷Amkpaa-á la ọháha ẹ-ẹga nyanụ bala ọ-chụnụ ajị nyori anụ à ju iru gụ alẹpwụma ịkịla koo. Anụ à dọmwụ byẹhị gụ alẹpwụma ilodehe ọlẹ wuu lẹ!

⁸Ajị nyọlẹ ká Amkpaa la ọháha ẹ-ẹga nyanụ kọ tị tịtọ nyọka họ ọnụ ọlẹ kọ myị ha adanụ igogo anyị jịra à du lẹ. Ịnyị à du kọ gbanụ kpehe bwu Ijipiti lụbwọ ọngịrị ọtụka nyamwụ, kọ chịnụ da bwula anyịhị nya adịrahụ nya ala Ijipiti oriri lẹlẹ.

⁹Lẹẹlẹ, anụ jẹ mẹ, Amkpaa Ohe Oluhye nyanụ kẹnẹ-kẹnẹ à ri Ohe Oluhye lẹ. Ọ ri Ohe Oluhye ọ-la kpẹẹkpẹẹ. Ọ kaa kpa iro ọlẹ kọ nwa ta angịnyị nyamwụ kpẹẹkpẹẹ, kọ ka mẹ ọháha nyamwụ jẹ u-uhye nya ụnụnụụnọ nya anyị ịtụma nya angịlẹ kọ háā kị myị kpa ehile nyamwụ.

¹⁰“Angịlẹ kị tị ba Amkpaa ẹtẹ, ọ ka haa ku ịwa bwula ọ-taa ayịreji. Ịnyịlẹhị ịnyị, angịlẹ nyẹẹkpẹ dọọ-ọ̀ wẹẹ, Ọ́ ka họ atịmẹ ene kọ ka yaa akama ka.

¹¹Lẹẹlẹ, anụ kpẹhị chịng, kanụ ba omẹjẹ bala ehile ịlẹ wuu kam ya hanụ alẹ jẹ mẹ.

¹²“O-ri kanụ ke ụrụ la ehile ịlẹ kanụ ju ihi nyaa kpẹẹkpẹẹ aalẹ, Amkpaa Ohe Oluhye nyanụ tị̀tị̀ ka kpa iro ọlẹ kọ nwa tanụ bala ọ-chị ọháha ọlala nyamwụ ehe ẹ-ẹga nyanụ kinyaa ka ịlahị jaabwọ kọ myị ọnụ ha adanụ igogo anyị.

¹³Ọ ka la ọháha ẹ-ẹga nyanụ. Ọ ka wahị kụrụụnụ chajị kanụ ka pyẹ ju iru bala ọ-ma anyị lụmẹ-lụmẹ. Ọ ka wahị kụrụ ang-ẹrụ nyanụ chajị kanụ ka la ajẹ nya ang-ẹrụ bala ere bala ida nya olivu lụmẹ-lụmẹ. Ọ ka wahị kụrụ ịna nyanụ kị ka ma anyị lụmẹ-lụmẹ. Ọ ka wahị kụrụ ịmwụ nyanụ kị ka ma anyị lụmẹ-lụmẹ ịnyịnyị. Ọ ka ya ahị ọwawa ịwẹ wuu hanụ ọ-ọpyị ọlẹ kọ myị ọnụ ha adanụ igogo anyị nyọka ya hanụ.

¹⁴Anụ à ka la ahị ọwawa kpá gụ alẹpwụma ịkịla ilodehe ọlẹ wuu lẹlẹ. Ongọngọhe nyanụ lee ọhẹ-lọhẹ nya iyo ileji nyanụ-ụ́ ka ta ụma ka.

¹⁵Amkpaa ka chẹwụ keenu hi ẹdụrụ ọnyị myị ọnyị. Ọ́ ka kpa eguru nya ẹdụrụ ịla Ijipiti ịlẹ kanụ jẹ wẹ uhye nyanụ ka. Ma, ọ ka ya ẹdụrụ ịịwa wuu ju aluji nyanụ.

¹⁶Anụ ka ta alẹpwụma ọnyị myị ọnyị ọlẹ ká Amkpaa Ohe Oluhye nyanụ ka ya junu ẹ-ẹpwụtụbwọ ayịreji. Ānụ yẹ ahyẹẹrwẹrwa nyaa ka. Ānụ kpụ eteji ha ijiga nyaa ka ịnyịnyị, chajị ọlịnyị ka ri ụnya wunu.

¹⁷“Ọhẹka anụ ka juwa ya ẹ-ẹpwụ nya irya nyanụ yẹkẹẹ, ‘Áhyu! Ahị tị́ ka họ anyị kahị ka jụ alẹpwụma ịwẹ kụrụ myị, ị lọngịrị gụụhị.’

¹⁸Anụ tị ju uhi nyaa koo. Anụ kpịtịya nya ang ịlẹ ká Amkpaa Ohe Oluhye nyanụ họ iFero Adịrahụ bala Ijipiti angịnyị nyamwụ wuu wẹẹ.

¹⁹Anụ tị́ kpẹhị nya ịlọnụ yẹ akama itụka bala ang-ẹjẹẹ bala ụkụrwọ ẹbyẹbyị bala ọngịrị ọtụka ịlẹ ká Amkpaa Ohe Oluhye nyanụ kpa gbanụ kpehe. Ịwẹ-ịwẹ ọ ka họ ẹ-ẹga nya alẹpwụma ịlẹ wuu kanụ wẹẹ ju uhi nyaa lẹlẹ.

²⁰Ọ ba ọọwa ka, Amkpaa Ohe Oluhye nyanụ ka chị uhi jwaa ọtụka-ọtụka gbee kọ ka ta angị ihihi nyaa ịlẹ kị wẹẹ rụ kpịbaa hiinu ayịreji.

²¹Anụ ju uhi nya angịwẹ koo. Amkpaa Ohe Oluhye nyanụ juwa tanụ—ọwa Ohe Oluhye ọtụka oluhi-uhi chọọ!

²²Amkpaa Ohe Oluhye nyanụ ka tụ alẹpwụma ịwẹ wuu kịnyaa hiinu dụmwọ-dụmwọ ụka kanụ juwa jẹ ka ịlahị-ịlahị. Ánụ ka jwaa ta ayịreji wuu gbanggbang lọhụ ọhẹ ịịwẹ koo. Ánụ họ ịnyị, ọ-ka ri iwe o-hi da ha iyo ịlẹpwamẹ, ị ka pyẹ ju iru kịlaanụ kịla.

²³Ma, Amkpaa Ohe Oluhye nyanụ ka yaa junu ụ-ụbwọ bala ọ-ka chị uhi ọtụka-ọtụka jwaa gbee kị ka ta ayịreji.

²⁴Ọ ka ya ịdịrịhụ nyaa junu ẹ-ẹpwụtụbwọ kanụ ka kụrwaa chẹẹchẹẹ. Anụ ka taa ayịreji gbanggbang. Ọngọngọhẹ-ẹ́ ka wo ẹnyị-ehe nyaa kaka. Ongọngọhẹ-ẹ́ ka chịnụ ọha myị ka. Anụ ka taa ayịreji wuu.

²⁵Anụ ta ekpeku nya ijiga nyaa wuu ayịreji la ila. Ānụ chẹhị pyẹ̀ẹẹ nya okpoko ịgọm lee okpoko onyoowuru ọlẹ kị kpa haa ka, anụ tị gyaa ang ọlala nyanụ ka ịnyịnyị. Ánụ họ ịnyị ọọwa ka ri ụnya wunu. Ijiga ọkpụkpụ wụ Amkpaa Ohe Oluhye nyanụ ẹjẹ.

²⁶Anụ kpa ekpeku ịwẹ wẹ ẹpwa nyanụ koo. Ó-ri kanụ họ ịnyị lẹ, anụ ka ri ang-ibyi nya ọlọ owuwu lala ịwa-ịwa lẹlẹ. Anụ ka pwa ekpeku ịwẹ nyi egbeju kile-kile, chajị ị ri ang ịlẹ kị juwa ka ta ayịreji.