Read idege Ehile Ọmada 8 Bible Online

Ehile Ọmada 8 - idege bible

Ehile Ọmada 8

¹“Anụ-ụ̀ ju ihi nya ehile ịlẹ wuu kam ya hanụ-ụ̀ alẹ jịra kpẹẹkpẹẹ mẹ. Ọọwa, anụ ka juwa hịhịh bala ọ-pyẹ ju iru lẹ, anụ ka jụ kele kaka kụ ọpyị ọlẹ ká Amkpaa myị ọnụ nyamwụ ha adanụ igogo anyị lẹlẹ.

²Anụ kpịtịya jaabwọ ká Amkpaa Ohe Oluhye nyanụ kpanụ ẹ-ẹpwụ nya ẹdịyẹ oludiyo nyanụ olugbileji ẹ-ẹpwụ nya ẹka iwo ine ịlẹ wuu mẹ. Lụka ọọwa, ọ họ kanụ hiri egbeju kpẹẹ bala ọ-manu yẹ chajị kọ ka jẹ irya nyanụ ó-ri kanụ ka myị-ị̀ kpa ehile nyamwụ lee anụ ka kpa ka.

³Ọ hiriinu egbeju kpẹẹ bwula ọ-ya imyi nwụnụ lẹ, ọ ya ịmána hanụ ri lẹlẹ. Anụ ayịdang tụ adanụ igogo anyị-ị́ dọmwụ kpa ang oriri ọlịịwẹ ka ọnụ ẹnẹhẹ ene lẹka. Ọ họ ịnyị nyọka mẹjẹenu ya ịịkaa ọlam-ọlam ọlẹ oriri kem ọngịnyị à kaa kpa hị ka ma, ọngịnyị ehe kaa hị bwula ẹla myị ẹla ká Amkpaa ya.

⁴Ẹ-ẹpwụ nya ẹka iwo ine ịwẹ, ang ịkụrụ-kụrụ nyanụ-ụ́ bịrị, chị pwẹẹpwẹẹ ka. Ata nyanụ-ụ́ mịrị ka ịnyịnyị.

⁵Anụ jẹ nyori Amkpaa Ohe Oluhye nyanụ kaa nwụnụ rịrị bwula ọ-yẹnụ akama jaabwọ ka adịda ọlọnyị kaa nwụ ọnyị nyamwụ riri.

⁶Lẹẹlẹ, anụ-ụ̀ kpa ehile nya Amkpaa Ohe Oluhye nyanụ bwula ọ-hịhị ba ehile nyamwụ jẹ bala o-ju ihi nyamwụ mẹ.

⁷Amkpaa Ohe Oluhye nyanụ juwa kpanụ kele ka ọpyị ọnyịịla o-ju eyo. Ọpyị ọọwa ri ẹga ka ihu bala ẹmwụ-enyi bala ụgbụ nya enyi lụmẹ-lụmẹ ji ka enyi ịlụwa juwa mwụ tụ ịkiti bala ọkpọọ da.

⁸Opyi ọwẹ ri ẹga ká iwiiti bala ịbali ji. Alakọnụ bala ikiledu bala ipomegraneti bala olivu bala inwa juwa o-ọpyị ọọwa ịnyịnyị.

⁹Anụ ka ye ang ri ụ-ụwa wu ẹpwụ. Imyi-í ka nwụnụ ụka ọhẹ-lọhẹ ka. Ajwo ịlụwa ri ije-ije wuu. Anụ ka ye ije ịlẹ kị ri epwu gba bwu ẹpwụ nya ịgbọdọ ịlụwa.

¹⁰Anụ ka ye ang ri jaabwọ kanụ tịtọ ka ba. Ụka ọọwa lẹ, anụ-ụ̀ gwogbo ha Amkpaa Ohe Oluhye nyanụ chajị nya ọpyị ọnyịịla o-ju eyo ọlẹ kọ ya hanụ mẹ.

¹¹“Anụ-ụ̀ kpẹhị chịng mẹ, kanụ deeri nya Amkpaa Ohe Oluhye nyanụ koko. Anụ pẹhi ọhẹ-lọhẹ nya ehile ịlẹ wuu kam wẹẹ ya hanụ alẹ deeji la ọkpakpa koo.

¹²Ụka kanụ ye ang oriri jaabwọ kanụ tịtọ ka ba, kanụ nwụ ẹpwa ịnyịịla-ịnyịịla ịlẹ kanụ ka kụ,

¹³bala ụka ka ịna bala ịmwụ bala okpoko onyoowuru bala okpoko ịgọm nyanụ bala ang myị ang ịkịla ịlẹ kanụ la wuu á pyebile,

¹⁴anụ-ụ̀ jẹ myị̀myị mẹ, anụ hi ọbọọchẹ kanụ deeri nya Amkpaa Ohe Oluhye nyanụ ọlẹ kọ gbanụ kpehe bwu ọpyị nya Ijipiti ẹga kanụ ri anyịhị ene-ene koo.

¹⁵Ọwa-à kpanụ bwu ẹpwụ nya ugbileji ọgbam-gbam oluhi-uhi ọlẹ ka ilo i-ju ẹhwa bala ịgịrịhya ji lẹ. Ụwa ri ọpyị ọ-chị ọhụ kịra-kịra ọlẹ ka enyi-í ji ka. Ọ họ ká enyi kpehe bwu ẹpwụ nya ẹjwọ ọnyọọngịrị hanụ.

¹⁶U-ugbileji ọọwa, ọ ya ịmána, ang oriri ọlẹ ká adanụ igogo-ó jẹjẹ ka, hanụ ri lẹ. Ọ họ ịnyị nyọka hiriinu egbeju kpẹẹ bala ọ-ka manụ yẹ la ang ilujwo chajị ká ang wuu ka há hanụ ụka ohyẹẹkpẹ.

¹⁷Ānụ me irya ẹ-ẹpwụ nya ịlọnụ ya ọngịrị ọlala bala aga ọmama nya ịlọnụ à du kanụ kpụ ụdụ wẹ ịịwẹ koo.

¹⁸Anụ kpịtịya mẹ, Amkpaa Ohe Oluhye nyanụ à ya ọngịrị hanụ du kanụ kpụ ụdụ lẹ. Ọ họ ịnyị nyọka họ ọnụ ọlẹ kọ myị ha adanụ igogo anyị ene-ene jịra alẹ.

¹⁹Lẹẹlẹ, anụ deeri nya Amkpaa Ohe Oluhye nyanụ kanụ rụ ka kpụ eteje bala ọ-myị ẹrụ ha ijiga ẹnẹnẹhẹ koo. M̀ jam gbileenu ụbwọ ụ-ụrụ alẹ ọlẹ ya ó-ri kanụ họ inyi aalẹ, anụ ka ta ayịreji pyii lẹ.

²⁰Ó-ri kanụ ju ihi nya omyi nya Amkpaa Ohe Oluhye nyanụ ka aalẹ, anụ ka ta ayịreji lala ẹpwụma ịlẹ ká Amkpaa wẹẹ ka ta ayịreji hi iwe da hanụ jaabwọ kanụ juwa jẹ ka ịlahị-ịlahị.