Read idege Ehile Ọmada 9 Bible Online

Ehile Ọmada 9 - idege bible

Ehile Ọmada 9

¹“Anụ ala Isirẹlụ ee, anụ wo mẹ, anụ tụbwọọ ka kpoye nya Ihu ịJọdan kaka nu ọpyị nya alẹpwụma ịlẹ kị lụmẹ bala o-la ọngịrị gụụnụ anụ ayịdang la lẹ. Ị la epweji ịtụka ịlẹ ká egwalọ ịdagaga jwaa la uhye tenee lala ịnyaa ka gu egbamwụ.

²Alụwa luhye gọnggọng bala ọ-chị ekpongka. Ịwa-à ri ala Anakị ịlẹ kanụ jẹ bala o-wo ká angịnyị kaa ya ẹla rwaa lẹẹ yẹkẹẹ, ‘Ọngọngọhẹ-ẹ́ ji ka bá ẹla ta anyị nya Anakị myị ka’ lẹ.

³Anụ tị yẹ alẹ mẹ, Amkpaa Ohe Oluhye nyanụ lịlọmwụ à wẹẹ ka ji ilaịị nyanụ kele lala ila ọ-ta ang ayịreji lẹ. Ọ ka kụrụ angịwẹ chẹẹchẹẹ ene kanụ ka pwụ ụwa. Ọọwa, anụ ka kwaa rụ bala ọ-taa ayịreji ahyaahị jaabwọ ká Amkpaa myị ọnụ lẹlẹ.

⁴“Ụka ká Amkpaa Ohe Oluhye nyanụ-ụ́ ku alẹpwụma ịwẹ rụ ị-ịlahị nyanụ kpá, ánụ ka ya i-irya nya ịlọnụ yẹkẹẹ, ‘Ọọ-lajị nya ang ọnyịịla ọhọhọ nyahị à du ká Amkpaa kpahị warị ka ye ọpyị ọlẹ la lẹ’ koo. Ịnyị ọ la ka. Alẹpwụma ịwẹ ri angị họ ang onyobyi. Ịnyị á du ká Amkpaa wẹẹ kwaa rụ hi ẹga hanụ lẹ.

⁵Ọọ-lajị nyori anụ ri angịnyị ịnyịịla bala ọ-kaa họ ang ọlẹ kọ pwoku à du kanụ wẹẹ ka ye ọpyị nyaa la ka. Ajị nya ang onyobyi ọhọhọ nya alẹpwụma ịwẹ à du ká Amkpaa Ohe Oluhye nyanụ wẹẹ ka kwaa rụ lẹ. Ọ ba ọọwa kem ka, ọ tịtọ kọ ka họ ọnụ ọlẹ kọ myị ha Ebiraham bala Ayisiki bala iJekọbụ adanụ igogo anyị jịra à du lẹ.

⁶M̄ ya jenu hwongkpooo kanụ jẹ mẹ, ọlẹ ká Amkpaa Ohe Oluhye nyanụ wẹẹ ya ọpyị o-ju eyo ọwẹ hanụ-ụ́ ri ajị nya ịngịngịhyẹ ọnyịịla ọlẹ kanụ họ ka. Anụ ayịdang ri angị la egbeju-ọngịrị.

⁷“Anụ kpịtịya jaabwọ kanụ hu agbama ju Amkpaa Ohe Oluhye nyanụ u-ugbileji wẹẹ. Bwu ẹnụtụrụ ọlẹ kanụ rụ bwu Ijipiti gbee da ka ụka ọlẹ kanụ pwụ ẹgẹlẹ lẹ, anụ la egbeju-ọngịrị ta Amkpaa.

⁸Ụ-ụwa ọ-Ọgbọdọ nya ịSayịnayị, anụ hu agbama ju Amkpaa. Ikẹjẹ awụrụ nyamwụ lụmẹ gbee hi pyịnyẹng kọ ka tanụ ayịreji.

⁹Ụka ọọwa, m̀ kele ka uhye nya ọgbọdọ ọwẹ nyọka ye ajwọ ịpapịla ịlẹ kị da iro ọlẹ ká Amkpaa nwa tanụ ba. M̀ hụ ụ-ụwa ahị ọpyẹpyẹ iwo ine bala odu iwo ine gbẹgbịlẹ. Lụka ọwẹ wuu, ḿ kpa ang oriri lee enyi ka ọnụ ka.

¹⁰Ọọwa, Amkpaa-à ya ajwọ ịpapịla imiiye ịlẹ kọ kpa ụbwọ nya ịlọmwụ da ụpwụ ba ham lẹlẹ. Ụpwụ ọlẹ kọ da u-uhye nyaa ri ẹla ịlẹ wuu kọ ya tanụ bwu ẹpwụ nya ila ẹnụtụrụ ọlẹ kanụ kele kaka tụguru ọ-ọgbọdọ.

¹¹Ụka ká ahị ọpyẹpyẹ iwo ine bala odu ohihi iwo ine ịwẹ cheju lẹ, Amkpaa-à ya ajwọ ịpapịla imiiye ịlẹ kị da iro ọnwanwa ba ham lẹlẹ.

¹²“Ọọwa, Amkpaa-à byim yẹkẹẹ, ‘Hireji bwu ọgbọdọ kele ahyaahị mẹ, chajị angịnyị nyang ịlẹ ká kpa kpehe bwu Ijipiti họ ang onyobyi lẹ. Ị nyẹẹkpẹ da ang ọlẹ kam daa ehile nyọka họhọ ahyaahị kpụ ị họ ukpeku ha ịlaa lẹ.’

¹³“Amkpaa myịmyị byim yẹkẹẹ, ‘M̀ wụla ọhịhị nya angịlẹ yẹ wuu lẹ, angị la egbeju-ọngịrị ị ri lẹ.

¹⁴Bà kam taa ayịreji gbanggbang chajị ká ọngọngohe ā wo ẹnyị-ehe nyaa kaka mẹ. M̀ ka họ ka ka pyẹe ka ri ẹpwụma ọkịla ọlẹ kọ ka lụmẹ bala ọ-la ọngịrị gwaa.’

¹⁵“Ọọwa, m̄ jahị kpata juwa hireji bwu uhye nya ọgbọdọ lajwọ ịpapịla imiiye ịlẹ kị da iro ọnwanwa ba a-abwọ nyam lẹlẹ. Ụka ọọwa, ọgbọdọ juwa wuru kowu-kowu la ẹlẹlẹ nya ila.

¹⁶M̀ yẹ kanụ pẹ ahyaahị hi ụgbẹyị ọlẹ ká Amkpaa danụ ehile wuu. Anụ họ ang onyobyi ba Amkpaa Ohe Oluhye nyanụ bwula ọ-họ ukpeku nya ẹna ha ịlọnụ.

¹⁷Ịnyị, m̄ pẹhi ajwọ ịpapịla imiiye ịwẹ weji ka bene yịgẹ-yịgẹ ị-ịlahị nyanụ lẹlẹ.

¹⁸Ọọwa, m̄ myịmyị hị nọnọ yahị kụrụ eji i-ijata nya Amkpaa ẹ-ẹpwụ nya ahị ọpyẹpyẹ iwo ine bala odu iwo ine gbẹgbịlẹ lẹlẹ. Ụka ọọwa, ḿ myị kpa ang oriri lee enyi ka ọnụ ka, chajị anụ họ ang onyobyi ba Amkpaa hu agbama jwoo.

¹⁹M̀ ju uhi nya agbama ọlẹ ká Amkpaa ju jahị danu. Ikẹjẹ-awụrụ nyamwụ lụmẹ kpụ kọ ka tanu ayịreji myị. Ma, Amkpaa ke ụrụ lam myịmyị ụka ọọwa.

²⁰Amkpaa wụ ẹjẹ ta Erọn nya ịlẹhị-ịlẹhị ịnyịnyị hi kpá pyịnyẹng kọ ka nwọọ. Ọọwa, m̄ raabwọ bịlẹ chajị nya Eron ụka ọọwa lẹlẹ.

²¹M̀ hu ukpeku nya ẹna, ang onyobyi ọlẹ kanụ họ-ọ̀ wẹ ju ka ẹpwụ nya ila lẹ, m̄ boo ene yịgẹ-yịgẹ, gyoo hịlẹ-hịlẹ gbee kọ kpụ ọrụ pwụrwẹ-pwụrwẹ lẹlẹ. Ọọwa, m̄ ya ọrụ nyamwụ hụrụ ju ka ẹpwụ nya ọ̀bá nya enyi ọlẹ kọ mwụ bwu uhye nya ọgbọdọ lẹlẹ.

²²“Anụ du agbama ju Amkpaa ụka kanụ juwa ị-ịTabera bala ị-ịMasa bala i-iKibirotu-ịhatava ịnyịnyị.

²³Ụka ká Amkpaa duunu ẹrụ bwu ịKadẹchị-ịbaniya ya anụ nyị kele ka ye ọpyị ọlẹ kọọwa nyị ya hanụ-ụ̀ wẹ la mẹ, anụ pwa ẹla nyamwụ ọọwa. Ánụ myị dahịhiloo lee o-jwoo ihi ka.

²⁴Mwiiji nya ọlẹ kam jẹẹnụ lẹ, ịịwẹ anụ kaa pwa ẹla nya Amkpaa deeji lẹ.

²⁵“Amkpaa lẹẹ nwụlanọ kọ ka tanụ ayịreji. Ọọwa-à du kam hị nọnọ yahị kụrụ eji i-ijata nya Amkpaa ẹ-ẹpwụ nya ahị ọpyẹpyẹ iwo ine bala odu iwo ine ịịwa lẹ.

²⁶Ụka ọọwa, m̀ raabwọ bịlẹ Amkpaa yẹkẹẹ, ‘Ọngọlahị Amkpaa ee, ā ta angịnyị nyang ayịreji koo. Ịwa-à ri angịnyị nya ụbwọ nya ilong ịlẹ ká chịda ka gbaa kpehe bwu Ijipiti lụbwọ ọngịrị ọtụka nyang lẹ.

²⁷Kpịtịya nya anchẹ nyang Ebiraham bala Ayisiki bala iJekọbụ anyị, chajị ká gu ahị daarụ hi egbeju-ọngịrị ọlala bala ang onyobyi ọhọhọ nya angịlẹ mẹ.

²⁸Á taa ayịreji, ala Ijipiti ka ya ahụ nyị́ kpa angịnyị nyang kaka pwụ ọpyị ọlẹ kaahụ nyị myị ọnụ haa myị kaka lẹẹ lẹ, ahụ nyị kpaa wẹ ugbileji kaka nwụ lẹ, chajị angịnyị nyang ịwẹ nyị wụng ẹjẹ.

²⁹Angịnyị nyang a tị-ị̀ wẹ lẹ. Angịnyị nya ụbwọ nya ịlọng ịlẹ ka gba kpehe bwu Ijipiti lụbwọ ọngịrị ọtụka nyang ịnyị.’