Read idege ỊJỌN 1 Bible Online

ỊJỌN 1 - idege bible

ỊJỌN 1

¹Bwu ọmwụ-ọmwụ ọdada, Ẹla ọlẹ kọ juwa hịhị lẹ, ọ juwa ene-ene lẹ. Ụka ọọwa, Ẹla ọọwa juwa ta Ohe Oluhye ayịdang. Ẹla ọọwa a ri Ohe Oluhye lẹ.

²Ẹla ọọwa ayịdang juwa ta Ohe Oluhye bwu ọmwụ-ọmwụ ọdada.

³Ang myị́ ang ịlẹ wuu ká Ohe Oluhye họ bwu ọmwụ ọdada lẹ, Ọ haa bwula Ẹla nya ọhịhị ọọwa. Ụpịlẹ nya ịngịngịhyẹ-ẹ́ juwa ọlẹ ká Ohe Oluhye họ ẹ-ẹkpẹ nya Ẹla ọọwa kpong-kpong ka.

⁴Ẹla ọọwa kpangga a ri ẹmwụ-enyi nya ọhịhị lẹ. Ọhịhị ọọwa a tị ri otinika o-hu ahịgboo nya abwẹla ọnyịịla nya Ohe Oluhye ha angịnyị ehe lẹ.

⁵Ahịgboo nya otinika nya abwẹla ọnyịịla nya Ohe Oluhye ọọwa, juwa wuru ha angịnyị ehe wuu, ịlẹ kị juwa ẹ-ẹpwụ nya ukpowu nya ang onyobyi ọhọhọ. Ma, alẹpwụ nya ukpowu ọọwa á tị jẹ́ ang chajị nya ahịgboo ọọwa yẹẹyẹẹ myị́ kaka.

⁶Ohe Oluhye du ọlẹng ọhẹ, ọlẹ kị wụrụ ịJọn ẹrụ warị wẹ odehe ọlẹ lẹ.

⁷ỊJọn ọọwa warị kaka ya ẹla dodehe rụ́ Otinika O-hu Ahịgboo nya ọhịhị nya Ohe Oluhye ọọwa ha, je alodehe, chajị kị ka jẹ́-ẹ myị la Ahịgboo nya ọhịhị ọọwa.

⁸Ị-ịJọn ọọwa ayịdang a ri Otinika O-hu Ahịgboo nya ọhịhị nya Ohe Oluhye ọọwa ha ka. Ma, olibeenu nya Ahịgboo nya ọhịhị ọọwa, ịJọn a ri kem lẹ.

⁹Otinika nya abwẹla ọnyịịla ọhọhọ nya Ohe Oluhye ọọwa ayịdang kpangga, a ri Ahịgboo nya ọhịhị ọlam-ọlam ọlẹ kọ juwa wuru ha ọng myị́ ọng ọlẹ kị ma warị wẹ ẹpwụ nya odehe ọlẹ lẹ.

¹⁰Otinika O-hu Ahịgboo nya ọhịhị ha ọọwa, a ri Ẹla nya Ohe Oluhye ayịdang ọlẹ kọ warị wẹ odehe ọlẹ lẹ. Ịnọ, Ẹla ọọwa, Ohe Oluhye a kpa họ odehe ọlẹ lẹ. Ma, ụka kọ tị warị wẹ odehe lẹ, alodehe-é jẹ́ ụma nya ọngọlẹ kọ ri datị kaka.

¹¹Ịnọ, ẹga nya angịnyị nyamwụ ọwa ayịdang, ọ wẹ lẹ. Ma, angịnyị nyamwụ ịịwa á tị myị kpa ọkịlẹtụ ookpokpo yoo kpong-kpong kaka.

¹²Ma, ọng myị́ ọng ọlẹ wuu kọ ka kpa ọkịlẹtụ ookpokpo ye Ẹla nya ọhịhị ọọwa bala ọ-myị la ẹnyị nyamwụ yẹẹyẹẹ lẹ aalẹ, ọ ka ya ọngịrị ha angịịwa wuu kị ka yẹ ri anyị ịlam-ịlam nya Ohe Oluhye lẹ.

¹³Angịịwa á ka ri anyị nya Ohe Oluhye bwula ọngịrị nya ịwọ bala enyi ọlẹ kị kaa kpa ma ọngịnyị warị wẹ ẹpwụ nya odehe ọlẹ lee irya ọlẹpwụ nya ọngọngọhẹ odehe ọlẹ kpong-kpong ka. Kẹnẹ-kẹnẹ, irya nya Ohe Oluhye Adịda ụbwọọmwụ kem mẹ ịnyị!

¹⁴Ẹla ọ-hu ọhịhị nya Ohe Oluhye ha angịnyị ehe ọọwa warị kaka ri ọngịnyị ehe lụka ọlẹ kị mọọ warị wẹ ẹpwụ nya odehe ọlẹ. Ọ kụ ám ẹ-ẹpwụ nya odehe ọlẹ tahị. Ụka ọọwa, ahị angịlẹ kahị juwa tọọ lẹ, ahị kpẹhị nyahị yẹ ẹbyẹbyị nya ogbo ọtụka nyamwụ. Ogbo ọtụka ọọwa a ri ang o-ju ẹjẹẹ yẹkẹẹ, ọwa ayịdang kpangga nyaa ri Ọnyẹwẹ olookpokpo nya Ohe Oluhye Adịda lẹlẹ. Ahị yẹ jaabwọ ká ahyẹẹrwẹrwa bala ẹla nya ịlẹhị myị ẹpwụ nyamwụ pwẹẹpwẹẹ ụka ọọwa ịnyịnyị.

¹⁵ỊJọn ọlẹrụ nya Ohe Oluhye ọọwa ya ẹla dodehe rụ́ Ọnyẹwẹ ọọwa yẹkẹẹ, “Anụ wo mẹ! Ọngọlahị ayịdang a ri ọngọlẹ kam ya ẹla rụ́ jenu ene-ene yẹkẹẹ, ‘O ri nya ịlẹhị, ọ juwa warị kum ẹkpẹ. Ma, ọwa ayịdang a ji ịlahị nyam i-iwe ahụrụ lẹ. Chajị ọwa ayịdang juwa la ọhịhị tatata ene-ene kị mam warị wẹ ẹpwụ nya odehe ọlẹ.’ ”

¹⁶Jaabwọ ká Ọnyẹwẹ ọọwa ayịdang a ri ẹmwụ-enyi nya ahyẹẹrwẹrwa lẹ, ọwa kaa kpa ahyẹẹrwẹrwa nyamwụ ọọwa wahị kụrụụhị bwula o-juwa hu ọhaha ọhẹ ba ọkịla u-uhye hahị ịnyịnyịịnyị lẹ.

¹⁷Chajị, jaabwọ ká ehile nya Ohe Oluhye bwu ẹga nya iMosisi chịhị ọgụ lẹ, ịnyịnyị-ịnyịnyị, ọgahị ọnahị nya Ohe Oluhye bala ẹla nya ịlẹhị nyamwụ a tịtị bwu ẹga nya iJisọsị ịKịrayịsị chịhị ọgụ lẹ.

¹⁸Ọngọngọhẹ á yẹ Ohe Oluhye ayịdang ẹ-ẹhị ẹnẹnẹhẹ lẹka. Kẹnẹ-kẹnẹ, Ọnyẹwẹ olookpokpo nya Ohe Oluhye ọlẹ kọ juwa ịkịka nya Ohe Oluhye bala ọ-jẹ́ Ohe Oluhye Adịda yẹẹyẹẹ, a warị kaka chọọ ehe hahị ahị angịnyị ehe lẹẹ wẹẹ lẹ.

¹⁹Ụka ọọwa, alegbeju nya ala iJuu ịla iJerusalẹm du angịkịla iya nya Ohe Oluhye bala ala iLivayị ịhyẹ ẹrụ kele ka ẹga nya ịJọn ọngọ hụ enyi Ohe kaka tọọ ịtọ yẹkẹẹ, “Oowo, a tị́ ri kpong-kpong?”

²⁰Ụka ọọwa lẹ, ịJọn á pwa ịtọ nyaa ọọwa ọwẹwẹ kpong-kpong ka. Ma, ọ ya dodehe gede yẹkẹẹ, “Ám ayịdang a ri ịKịrayịsị ọọwa koo!”

²¹Alẹrụ ịịwa tọọ wo yẹkẹẹ, “Ee lẹ, o-owo, a tị́ tị tị ri mẹ? Ahụ a ri Ịlayịja lẹ?” ỊJọn wẹ byaa yẹkẹẹ, “Ehe! Ám a ri Ịlayịja ka.” Angịịwa tọọ wo yẹkẹẹ, “Ọngọhẹ lẹpwarịrị nya alọmwụ nya Ohe Oluhye, a ri lẹ?” ỊJọn myịmyị wẹ byaa yẹkẹẹ, “Ehe! Ḿ ri ọngọhẹ lẹpwụ nya alọmwụ ka.”

²²Ọọwa lẹ, angịịwa a byoo yẹkẹẹ, “Ee lẹ, o-owo, a tị́ tị tị ri mẹ? Bwuru ịlọng ya jehi mẹ. Chajị kahị ka jẹ́ ẹla ọlẹ kahị ka kpa kaka tịrọnụ ya je angịlẹ kị duuhi ẹrụ mẹ!”

²³ỊJọn wẹ byaa yẹkẹẹ, “Am ayịdang a ri omyi nya ọlẹng ọhẹ ọlẹ kọ juwa chị eko u-ugbileji dodehe lẹ. Omyi ọọwa yẹkẹẹ, anụ angịnyị ehe, anụ nwụ ọhịhị nyanụ rịrị kpakpakpa kọ pwoku ụgbẹyị nya ọhịhị nya Ọngọlahị ọlẹ kọ wẹẹ ka warị mẹ. Chajị ịịwẹ, Ayịsaya ọlọmwụ onyogo a yẹ ọmwụ neeji ene-ene lẹ.”

²⁴Ala ịFarisii a du angịwẹ ẹrụ tọ ịJọn ọngọ hụ enyi Ohe lẹ.

²⁵Ịnyị, alẹrụ ịịwa a tọ ịJọn wo yẹkẹẹ, “Ọ́ ri ahụ ayịdang ká ri ịKịrayịsị ọọwa ka lee o-ri Ịlayịja ọlọmwụ nya Ohe Oluhye ka lee o-ri ọngọhẹ lẹpwụ nya alọmwụ nya Ohe Oluhye ka. Ịịyẹ a tị́ du ká tịtị jam hụ angịnyị enyi Ohe?”

²⁶ỊJọn wẹ byaa yẹkẹẹ, “Anụ wo mẹ! Enyi ọlam-ọlam, am ayịdang a lẹẹ kpa hụ angịnyị enyi Ohe lẹ! Ma, ọngọhẹ tị juwa ẹ-ẹpwarịrị nyanụ ọlẹ kaanụ ayịdang á jọ́ọ datị ka.

²⁷Ọngọọwa juwa ka warị kum ẹkpẹ. Ma, am ayịdang á dọmwụ chịla ị-ịlahị nyamwụ kpụ, m ka hiri kpẹẹ yi ori nya ugbẹtẹ nyamwụ myị́ kpong-kpong ka.”

²⁸Ẹla ọọwa họ ị-ịBẹtanị ọlẹ kọ ji koye ọlaanyị nya Ihu ịJọdan ẹ-ẹga ọlẹ ká ịJọn ọwẹ juwa hụ angịnyị enyi Ohe.

²⁹Ịnyị, ụka ká ahị ọọnamwụ pyẹ lẹ, ịJọn a chẹhị kaka yẹ iJisọsị kọ juwa warị wẹ ẹga nyamwụ lẹ, ọ byi angịlẹ kị juwa ẹ-ẹga nyamwụ yẹkẹẹ, “Anụ chẹhị kele kaka yẹ ọngọlẹ kọ ri Ọnyị ọkpịlọ nya Ohe Oluhye ọlẹ kọ wẹẹ ka tụ ibyi nya ọhọbịrị ọhọhọ nya alodehe wuu, kọ lalẹẹ warị mẹ.

³⁰Ọwa ayịdang a ri ọngọlẹ kam ya ẹla rụ́ lẹẹ ene-ene yẹkẹẹ, ‘Ọlẹng ọhẹ ọlẹ kọ wẹẹ ka wẹ kum ẹkpẹ warị lẹ, ọ ji ịlahị nyam ẹ-ẹpwụ nya iwe ahụrụ, chajị, ọ juwa la ọhịhị tatata ene kị mam warị wẹ ẹpwụ nya odehe ọlẹ.’

³¹Ịnọ, am ayịdang á dọmwụ jọ́ọ ogu datị ene ka! Ma, Ohe Oluhye tị dum ẹrụ warị kaka kpa enyi hụ angịnyị ehe enyi Ohe, chajị kam ka jẹ́-ẹ chọọ ehe mẹjẹ ala Isirẹlụ wuu.”

³²Ụka ọọwa, ịJọn ọwẹ ri ibeenu ya ẹla dodehe yẹkẹẹ, “Am ayịdang kpẹhị nyam yẹ Olegu Ịgọgọ nya Ohe Oluhye kọ ju abwụma nya enewulo hireji bwu epwoohe kaka kụ u-uhye nya ọngọọwa chịng gbee pyịyọọ.

³³Ụka ọọwa lẹ, ḿ dọmwụ jọ́ọ ogu jẹ́ datị lẹka. Ma, Ohe Oluhye Ọngọ dum ẹrụ warị kaka kpa enyi hụ angịnyị enyi Ohe ya jem ụka ọọwa yẹkẹẹ, ‘Ọngọlẹ ká ka chẹhị kaka yẹ Olegu Ịgọgọ nya Ohe Oluhye kọ ka ju abwụma nya enewulo kaka kwọọ u-uhye chịng gbee pyịyọọ lẹ aalẹ, ọngọọwa ayịdang kpangga a ri ọngọ ka kpa Olegu Ịgọgọ hụ angịnyị ehe enyi Ohe lẹlẹ.’

³⁴Lẹ, am ayịdang kpẹhị nya ịlọm yẹ jaabwọ ká ẹla ọọwa họ jịra u-uhye nya ọlẹng ọlẹ lẹ, ọọwa, m wẹẹ ri ibeenu ya jenu yẹkẹẹ, ọwa ayịdang kpangga a ri Ọnyẹwẹ nya Ohe Oluhye lẹ.”

³⁵Ụka ká ahị ọọnamwụ pyẹ myịmyị, ịJọn godayị rịrị ụ-ụwa bala angịjụgbẹyị nyamwụ angị imiiye ịhyẹ.

³⁶Ịnyị, ụka kọ chẹhị kaka yẹ iJisọsị kọ juwa chịpwụrụ kam lẹ, ọ ya ẹla dodehe rwọ́ọ yẹkẹẹ, “Ọngọlẹ ayịdang a ri Ọnyị ọkpịlọ nya Ohe Oluhye ọọwa ọlẹ kọ du warị lẹlẹ.”

³⁷Ụka ká angịjụgbẹyị nya ịJọn angị imiiye ịịwa wo ẹlẹwẹ ká ịJọn ya ịnyị lẹ, ị rụ kele ka ẹga nya iJisọsị lẹlẹ.

³⁸Ụka ká iJisọsị jahị kpata da kọ yaa kị juwa bọọ jẹ lẹ, ọ taa wo yẹkẹẹ, “Ịịyẹ anụ tị́ juwa pịlahị ẹ-ẹgẹlẹ?” Angịịwa wẹ byi iJisọsị yẹkẹẹ, “Ẹpwa nyang tị́ ji ale ene, ịRabayị?” Etu nya ịRabayị ri, Ayịbahị iticha.

³⁹IJisọsị wẹ byaa yẹkẹẹ, “Anụ kẹwẹ kaka yẹ lẹẹ mẹ!” Ọọwa lẹ, ị bọọ rụ kele kaka yẹ ẹga ọlẹ ká iJisọsị kụ lẹlẹ. Jaabwọ ká ẹnụ juwa pwọ lala ụka nya oje ine nya obyi lẹ, ị hyehe obyi tọọ ụ-ụwa ẹnụ ọọwa lẹlẹ.

⁴⁰Ọngọhẹ lẹpwụ nya angị imiiye ịịwa ịlẹ kị wo ẹla nya ịJọn ene kị ba iJisọsị jẹ, a ri Andụrụ lẹ. Andụrụ ọọwa bala ịSayịmọn Pita a bwu ịnịna bwu ẹpwụ lẹ.

⁴¹Ụka ọọwa, Andụrụ kele kaka pịlahị nya ịSayịmọn ọnyịnamwụ ahyaahị lẹ, ọ byoo yẹkẹẹ, “ỊSayịmọn ee, ahị yẹ ọngọ ri iMesaya ọọwa alẹ lẹ!” Etu nya iMesaya a ri ịKịrayịsị, ọlẹ ká Ohe Oluhye du warị lẹ.

⁴²Ịnyị lẹ, Andụrụ a kpa ịSayịmọn kele ka ẹga nya iJisọsị lẹlẹ. Ụka ká iJisọsị chẹhị kaka yọọ, ọ byoo yẹkẹẹ, “Ahụ a ri ịSayịmọn, ọnyị nya iJona lẹ. Ẹnyị nyang a ka ri ịSẹfasị lẹlẹ.” ỊSẹfasị bala iPita ri ẹnyị ookpokpo. Etu nyamwụ ri ẹjwọ.

⁴³Ịnyị, ụka ká ahị ọọnamwụ pyẹ lẹ, iJisọsị a chị eje yẹkẹẹ, ọwa nyị ka ka ọpyị nya ịGalili lẹlẹ. Ọọwa lẹ, iJisọsị a yẹ iFilipu lẹ. Ọ byoo yẹkẹẹ, “Kẹwẹ ká bam jẹ mẹ!”

⁴⁴IFilipu ọwẹ bwu epweji nya ịBẹtịsayịda ọlẹ kọ ri epweji nya Andụrụ bala iPita ịnyịnyị.

⁴⁵Ụka ká iFilipu yẹ ịNatanẹlụ, ọ byoo yẹkẹẹ, “Ahị yẹ ọlẹng ọlẹ ká iMosisi bala alọmwụ nya Ohe Oluhye inyogo anyị da ụpwụ ya ẹla rụ́ lẹ! Ọwa, a ri iJisọsị ọla ịNasareti ọlẹ kọ ri ọnyị nya iJosẹfụ lẹ.”

⁴⁶ỊNatanẹlụ wẹ byoo yẹkẹẹ, “A ya ká ịngịngịhyẹ ọnyịịla ka jẹ́-ẹ bwu epweji nya ịNasareti kpehe myị́ wẹẹ?” ịFilipu wẹ byoo yẹkẹẹ, “Ọ hiigu. Kẹwẹ kaka yẹ la ịlọng lẹẹ mẹ!”

⁴⁷Ụka ká iJisọsị chẹhị kaka yẹ ịNatanẹlụ kọ juwa warị wẹ ẹga nyamwụ, ọ ya ẹla rwọ́ọ yẹkẹẹ, “Ọlẹng ọlẹ ri ọla Isirẹlụ ọlam-ọlam, ọlẹ ká ọnọọkịla omeme, á ji ẹpwụ nyamwụ ka.”

⁴⁸ỊNatanẹlụ tọ iJisọsị wo yẹkẹẹ, “Anyị, a tị́ họ ká jẹ́ ụma nya ọngọlẹ kam ri ene?” IJisọsị wẹ byoo yẹkẹẹ, “M yẹng ụka ọlẹ ká hụhụ ọ-ọmwụ nya okoji ifigi ene-ene ká iFilipu be ẹkọ wụrụng.”

⁴⁹ỊNatanẹlụ wẹ yẹkẹẹ, “Ayịbahị iticha, ahụ ayịdang a ri Ọnyị nya Ohe Oluhye ịnyịlẹhị lẹ! Ahụ a ri Adịrahụ nya ala Isirẹlụ wuu lẹ.”

⁵⁰IJisọsị wẹ byoo yẹkẹẹ, “ỊNatanẹlụ, a myị ugbẹnyị ọọ-la ọlẹ kam bying yẹkẹẹ, ‘M yẹng ụka ká hụhụ ọ-ọmwụ nya okoji ifigi lẹ?’ Ọ hiigu. Aalẹ, a ka yẹ iru nya ang ị-gụ ọọwa gụ wẹẹ!”

⁵¹Ọọwa lẹ, iJisọsị a myịmyị byaa yẹkẹẹ, “Nya ịlẹhị-ịlẹhị, m byinu yẹkẹẹ, anụ ayịdang ka chẹhị kaka yẹ ká epwoohe ka wụrụ dụwa gbadaa, ká alegu-ẹrụ nya Ohe Oluhye ka juwa wẹ awụlẹ wẹ bwu eji kele ka uhye, bwu uhye weji ịnyịnyịịnyị, u-uhye nya ọnyị nya ọngịnyị ehe ọlẹ ayịdang ị-ịlahị kpá wẹẹ.”